ALIFILI̍PĀYI 1

Owu̍tu

1Ami Ipɔ̍ɔli ba̍la Iti̍mōti nīi - a̍chɛ̍ yī Ikra̍yisi Iji̍sɔ̄ɔsi ma̍, alɔ ta̍ īpū nūma̍ a̍nɛ. Alɔ tɛ̄rɔ̄ nūma̍ hu āchɛ wa̍a̍ nīi - āchɛ yī Ɔwɔ abɔ̍ɔ la Ifili̍pāyi nīi tū la ongmo̍tu̍chɛ̄ ba̍la Ikra̍yisi Iji̍sɔ̄ɔsi ma̍, ba̍la āchɛ nīi - alɛhu̍ ba̍la āchɛ ɛtwɔ̄bɔ̄ abɔ̍ɔ la ogrēeyī yī āchɛ yī Ɔwɔ ma̍.

2Ɔwɔ A̍dā yī alɔ ba̍la Ādā Iji̍sɔ̄ɔsi Ikra̍yisi ge̍ de ɔpiyɛ ba̍la ogbodɔ̍dɔ̍ de ala̍.

Ɔhā nīi Ipɔ̍ɔli ji de āchɛ nīi ge̍ē ma̍ īpū yī nū ma̍

3N ē da Ɔwɔ yī u o̍be wu̍chē yī ala̍ myɛ̄grāa-myɛ̄grāa nīi n ē gbɛri̍ya̍ ē tū ala̍ ma̍. 4Myɛ̄grāa-myɛ̄grāa nīi n ē jɔhā de āchɛ wa̍a̍ ma̍, n ē ji la ɔwɔ̄wīyā. 5N ē ya̍ i̍ngɔ̍ɔ wu̍chē yī ɔpɔ̄pū nīi ala̍ ē bī tū u wɔbɔ̄ la u̍ku̍rɔ̍ yī Wɔ̄kā Ɔlwɔnyɛ nūma̍ bū la ɔ̄chī ɔrāarāa ɔla̍ā kpɛɛ ge̍ ku u̍ma̍ama ma̍. 6Bū la ɛbɛ ɔla̍ā, n jo̍ōkū hwɔhi hwɔhi hīka, Ɔwɔ nīi wu̍tu yī u̍ku̍rɔ̍ ɔnɛ̄ɛhɛhi nūma̍ la ala̍ ma̍ ge̍ē bī ɔ̄ i̍ngɔ̍ɔ ē gāa iyɔ̄bū iyɔ̄bū kpɛɛ nīi o̍ ē chlɛhu̍ la Ɔ̄chī Ɔwɔ̄wā yī Ikra̍yisi Iji̍sɔ̄ɔsi. 7Ala̍ tū um amu la ūkpɔ̄tū myɛ̄grāa-myɛ̄grāa. O̍ u̍tu ngma̍ nīi ūkpɔ̄tū lɛ u i̍ngɔ̍ɔ ē pīyeyīta̍ ala̍; wu̍chē oji̍ nɛ, ala̍ wa̍a̍ nāa ɔplɛ̄ɛhi nūma̍ nīi Ɔwɔ de de u ma̍ ba̍la ami. O̍ lɛ i̍ngɔ̍ɔ, u̍ma̍ama nīi tū ma̍ la igbakɔbɔ ma̍; o̍ gba̍a lɛ i̍ngɔ̍ɔ īchāha̍ ɔla̍ā nīi n hɔ̄ ke̍e̍ yɛ ē chlɛ̄pɔ̄ yī Wɔ̄kā Ɔlwɔnyɛ nūma̍ yɛ ē ka brii ē de āchɛ ma̍. 8N ka hīka ūkpɔ̄tū nīi lɛ u nyi̍i̍ pīyeyīta̍ ala̍ ma̍ bū la ūkpōrūkpɔ̄tū yī Ikra̍yisi Iji̍sɔ̄ɔsi ɔlɔjā. Ɔwɔ jo̍ōkū hīka lɛlā lēchi̍ nīi amɔ̍lɔ yɛ ē ka a̍nɛ.

9I̍ngɛ̍ɛ̄nɛ̄ nīi n yɛ ē jɔhā yī u ē de ala̍ a̍nɛ: N ē jɔhā hīka ɔhɔtū yī ala̍ ge̍ jɛ̄ i̍ngɔ̍ɔ īcha ga iyɔ̄bū iyɔ̄bū. Ochi̍chi̍ yī lɛlā olēchi̍ lēchi̍ ojo̍ōje̍ ba̍la ochi̍chi̍ yī lɛlā ɔmɔ̍ɔ̄ma̍ gɔ̄grāa yī ala̍ ge̍ jɛ̄ ga iyɔ̄bū iyɔ̄bū i̍ngi̍ngɔ̍ɔ. 10O̍ ge̍ lɛ i̍ngɔ̍ɔ hɛ̄ɛbɛ nīi ala̍ ge̍ jɔ̍ɔkɔ chabɔ̄ ɔ̄chɔ̄chɛ̄ wu̍ ɔjā nīi hwɔhi gɔ̄ga ma̍. Bū la ɛbɛ ɔla̍ā, i̍lɛcha̍ri̍cha̍ri̍ ni̍ ba̍la lɛfiyɛ ɔyɔ̍ɔ̄ya̍ ɔha̍lɔha̍ i̍ ge̍ē hɔ̄ de ala̍ la ɔ̄chī ɔla̍ā nīi - Ɔ̄chī Ɔwɔ̄wā yī Ikra̍yisi ma̍ ē gɛ ni̍. 11Bɛ̍ɛ̄nɛ̄ ma̍, ɔhɔ̄leyī yī ala̍ ge̍ē mōmu la ita yī lɛlā ɔnɛ̄ɛhɛhi ɔnɛ̄ɛhɛhi nīi ē bū la abɔ̄ yī Iji̍sɔ̄ɔsi Ikra̍yisi lōri̍īnū ma̍. Ɔla̍ā ge̍ē lɛ i̍ngɔ̍ɔ wu̍chē rīgā ba̍la ɔkɔ̄kā yī Ɔwɔ.

Ikra̍yisi re̍ka ɔhɔ̄leyī a̍nɛ

12Aɛ̍nɛ̍ yī u, ala̍ ma̍ gɛ ko̍ō! Lɛlā nīi ya̍ u wa̍a̍ ma̍ twɔ̄bɔ̄ ya̍ nīi Wɔ̄kā Ɔlwɔnyɛ yī Ɔwɔ yɛ hwɔhi hwɔhi ga iyɔ̄bū iyɔ̄bū. 13Bū la ɔla̍ā, idege̍ri wa̍a̍ nīi ē deyīrɛ ipwɔ̍ɔ̄nū amu ma̍, ba̍la āchɛ ɛha̍ yɛ̄mɛ̄mɛ̄ de jo̍ōkū hīka amɔ̍lɔ tū igbakɔbɔ nūma̍ wu̍chē lɔkɔ nīi amɔ̍lɔ hɔ̍chɛ̍ yī Ikra̍yisi ma̍. 14Igbakɔbɔ otōtū yī u nūma̍ gba̍a ya̍ nīi aɛ̍nɛ̍ yī alɔ ibiha̍ yɛ̄mɛ̄mɛ̄ de ɔtū che Ādā brii bɛ̍ɛ̄nɛ̄. Bū la ɛbɛ ɔla̍ā, e̍ ē tu̍ ūkpɔ̄tū ku brii myɛ̄grāa-myɛ̄grāa yɛ ē ka ɛrɔ̄ yī Ɔwɔ, e̍ i̍ ē tūuhwi ē gɛ ni̍.

15Āchɛ ɛha̍ ma̍ ē ka ɛrɔ̄ yī Ikra̍yisi wu̍chē ya̍nya okpo̍ōkpo̍ yī wā ba̍la apɔ̄ ogbōgbo yī wā. Āchɛ ɛha̍ chī ka ɛrɔ̄ yī Ikra̍yisi wu̍chē lɔkɔ nīi e̍ chikpo̍ ge̍ē ya̍ i̍ngɔ̍ɔ hwɔhi hwɔhi ma̍. 16Aa̍ ma̍ ē ya̍ i̍ngɔ̍ɔ wu̍chē yī ɔhɔtū. Wu̍chē oji̍ nɛ, e̍ jo̍ōkū hīka Ɔwɔ ɔ̍lɔ de u̍ku̍rɔ̍ ɔla̍ā de amɔ̍lɔ ka amɔ̍lɔ ge̍ chlɛ̄pɔ̄ yī Wɔ̄kā Ɔlwɔnyɛ yī anu̍ a̍nɛ. 17Aa̍ ɛla̍ā nīi i̍ yɛ ē ka ɛrɔ̄ yī Ikra̍yisi la olēchi̍ lēchi̍ ni̍ ma̍, e̍ yɛ ē ya̍ i̍ngɔ̍ɔ wu̍chē yī a̍hla̍ yī lɛlā wɔ̄bɔ̄bɔ̄ yī aa̍ ɛlɛjā. E̍ gbɛri̍ya̍ ka aɛ̍lɛ ge̍ē ya̍ nīi lɛlā olichi̍chi̍ ɔ̍lɔ ē hɔ̄ de amɔ̍lɔ gāa iyɔ̄bū iyɔ̄bū yɛ̄grāa nīi amɔ̍lɔ e̍e tū ma̍ la igbakɔbɔ ma̍.

18Ɔka̍ka̍ yī nū u̍tu kɔ̍ɔ̄ ma̍? N lɛ ɔwɔ̄wīyā wu̍chē yī ɔla̍ā wa̍a̍. E̍ ge̍ bī Ikra̍yisi ka de āchɛ ji la ɔpɔ̄pū ɔha̍lɔha̍ nīi hɔ̄ ma̍ gɛ/. E̍ ge̍ kɔ̄ka bū la ɛri̍ya̍ ɔdwɔ̄bi̍ kɛ̄ɛ ɔnɛ̄ɛhɛhi, owe̍e! N chī ge̍ē lɛ ɔwɔ̄wīyā i̍ngi̍ngɔ̍ɔ kpɔ̍ɔ̍ ē gāa iyɔ̄bū iyɔ̄bū. 19Wu̍chē oji̍ nɛ, n jo̍ōkū hīka, bū la ɔhā yī ala̍ ba̍la wɔbɔ̄ otōtū nīi Uhu yī Iji̍sɔ̄ɔsi Ikra̍yisi ge̍ē de ma̍, e̍ ge̍ē tu̍ ē hī u. 20Lɛlā nīi hla̍ ami ka̍ka̍ka̍ nīi n gba̍a deyīche ge̍ē ya̍ ma̍, ɔya̍ u̍ku̍rɔ̍ yī u gɔ̄grāa lɛbɛ nīi liwēyī ɔha̍lɔha̍ i̍ ge̍ hɔ̄ de u ni̍ nɛ. N ge̍ē tū ūkpɔ̄tū yī yɛngrɔ̄ɔ brii yɛ̄grāa ɔha̍lɔha̍ ba̍la yɛ̄grāa nūma̍ pi̍i̍. N ge̍ē de ibi̍īyē tū la anu̍ wa̍a̍, hɛ̄ɛbɛ ē bī otūlichō ge̍ē de Ikra̍yisi, o̍ ge̍ ro̍ōre̍ka n hɔ̄leyī kɛ̄ɛ n pīyaku̍. 21Oji̍ u̍tu - ɔhɔ̄leyī ma̍/? Ami ma̍, Ikra̍yisi re̍ka ɔhɔ̄leyī a̍nɛ. Ɔpīyaku̍ ma̍ - ɔchɔba yī lɛlā nɛ. 22Ɔhɔ̄ amu la eyī ge̍ chī yɛ ge̍ē ya̍ nīi n ē ya̍ u̍ku̍rɔ̍ nīi - ɔlamu ɔlamu ma̍, ɔ̍lɔma̍ n i̍ je̍ onīi n ge̍ wu̍ labɔ̄-labɔ̄ ma̍ ē gɛ ni̍. 23O̍ re̍ka n yarɛ la ɔprɛ̍ɛpa yī lɛlā ɛpɛpa nūma̍ mɛ̍. Onīi yɛ ē chikpo̍ gɔ̄ga ma̍, ɔpīya hī ɔhɔ̄leyī yī yɛchɛ nūma̍ ge̍ hɔ̄ tāa Ikra̍yisi nīi - lɛlā ɔhwɔhi-ɔhwɔhi ma̍ nɛ. 24Wu̍chē yī ala̍, ɔhɔ̄ amu la eyī chī - lɛlā ɔlamu-ɔlamu gɔ̄ga a̍nɛ. 25N jo̍ōkū i̍ngɔ̍ɔ gblɛ̍ɛgblɛ̍ɛ. Wu̍chē yī ɔla̍ā, n jo̍ōkū hīka n ge̍ē hɔ̄ amu la eyī. N chī ge̍ē hɔ̄ amu la eyī i̍ngɔ̍ɔ ba̍la ala̍ hɛ̄ɛbɛ nīi n ē tābɔ̄ tāa ala̍ la ɔya̍ yɛ̍yɛ̍ ga iyɔ̄bū iyɔ̄bū ba̍la ɔya̍ nīi ɔwɔ̄wīyā yī ala̍ yɛ ga iyɔ̄bū iyɔ̄bū la lɛlā yī Ɔwɔ nīi ala̍ nāa ma̍. 26Bū la ɛbɛ ɔla̍ā, yɛ̄grāa nīi n ge̍ē wā ge̍ē hɔ̄ ba̍la ala̍ ma̍, ala̍ ge̍ē jɔ̍ɔkɔ ē wīyā gāa iyɔ̄bū iyɔ̄bū ē kā Iji̍sɔ̄ɔsi Ikra̍yisi ɔkɔ̄kā wu̍chē yī u.

27Ɔjā nīi - ɔlamu ɔlamu ma̍, ita yī ɔhɔ̄leyī nīi ala̍ ge̍ē hɔ̄ ma̍ ge̍ lɛ lɔkɔ nīi Wɔ̄kā Ɔlwɔnyɛ yī Ikra̍yisi chikpo̍ ke̍e̍ ma̍. Bū la ɛbɛ ɔla̍ā, o̍ ge̍ ro̍ōre̍ka n wā ge̍ ma̍ ala̍ mɛ, kɛ̄ɛ n i̍ wā ge̍ ma̍ ala̍ ni̍ oo, n ge̍ē plɛ̍ɛ̄lā ku̍ ala̍ hīka ala̍ ɔ̍lɔ yarɛ brii abɔ̍ɔ la ɛbɛ ūkpo̍he yɛ ē ngmo̍tu̍chɛ̄ nunu la uhu ūkpo̍he wu̍chē yī Wɔ̄kā Ɔlwɔnyɛ yī Ɔwɔ nīi ala̍ nāa ma̍. 28Ala̍ e̍e tūuhwi yī aluji yī ala̍ ni̍. Ala̍ ā tū ūkpɔ̄tū yī yɛngrɔ̄ɔ myɛ̄grāa-myɛ̄grāa. Ɔla̍ā ge̍ē chabɔ̄ hu̍ wā hīka aa̍ ge̍ē gwāajɛ ē de ala̍ nīi ala̍ ge̍ē de wa̍ ē gwō a̍nɛ. Wu̍chē oji̍ nɛ, Ɔwɔ de yɛngrɔ̄ɔ ɔyɔ̍ɔ̄ya̍ ɔla̍ā de ala̍ a̍nɛ. 29Ɔwɔ de ɔplɛ̄ɛhi de ala̍ ka ala̍ ɔ̍lɔ ge̍ hɔ̍chɛ̍ yī Ikra̍yisi. I̍ ode ɔtū che ɔ̍ ke̍e̍ ni̍; omi̍chi̍ de ɔ̍ i̍ngi̍ngɔ̍ɔ nɛ. 30O̍ lɛ i̍ngɔ̍ɔ ma̍, ala̍ ā twɔ̄bɔ̄ la unu onōnu tāa ami gɛ. Unu ɔla̍ā nīi ala̍ ma̍ nīi n yɛ ē nu gbi̍chɛ gbi̍chɛ ma̍, ana̍nu̍ nīi n yɛ ma̍ ē nu nīi ala̍ po̍ a̍nɛ.

Currently Selected:

ALIFILI̍PĀYI 1: YBASR

Highlight

Copy