ALƐ̍FƐ̄SUSI 3
3
U̍ku̍rɔ̍ nīi Ipɔ̍ɔli ya̍ de ɛchɛkɔcha ma̍
1Wu̍chē yī lɛlā nūma̍ nīi ami Ipɔ̍ɔli nīi - oligbakɔbɔ yī Ikra̍yisi Iji̍sɔ̄ɔsi wu̍chē yī Ɛchɛkɔcha ma̍ yɛ ē jɔhā de Ɔwɔ a̍nɛ. 2Je̍ka aa̍ ala̍ jo̍ōkū mɛ̍ hīka, bū la uhwa ɔnɛ̄ɛhɛhi yī Ɔwɔ nīi Ɔwɔ de u̍ku̍rɔ̍ nūma̍ de u ka amɔ̍lɔ ge̍ ya̍ wu̍chē yī ɔnɛ̄ɛhɛhi de ala̍ a̍nɛ! 3Ɔwɔ de lɛlā ɔmɔ̄miya yī nū nīi trɛ̍ba ma̍ hi̍yɛchɛ, ya̍ nīi n jo̍ōkū ke̍e̍ mɛ̍. N ta̍ īpū yī lɛlā nūma̍ kpɛ̍tɛ̍ ji. 4Ala̍ ge̍ chī ma̍ īpū nūma̍ nīi n ta̍ ma̍, ala̍ ge̍ē ngū lɛlā bū la ochi̍chi̍ yī lɛlā ɔtrɛ̍ba yī Ikra̍yisi nīi ami jo̍ōkū ma̍. 5I̍chɔ̍lɔ ma̍, ɔ̄chɔ̄chɛ i̍ kɛlā ɔtrɛ̍ba nūma̍ de ɔ̄chɔ̄chɛ ni̍. U̍ma̍ama ma̍, Ɔwɔ de lɛlā ɔtrɛ̍ba nūma̍ hi̍yɛchɛ gala abɔ̄ yī Uhu Ɔnɛ̄ɛhɛhi yī nū de āchɛ ɛnɛ̄ɛhɛhi yī nū nīi - alɛrɔ̄ ba̍la āchɛ ɔkɛrɔ̄ yī nū ma̍ mɛ̍. 6Lɛlā ɔtrɛ̍ba ɔ̍lɔma̍ hɔ̄ ma̍ a̍nɛ: Bū la Wɔ̄kā Ɔlwɔnyɛ yī Ikra̍yisi, Ɛchɛkɔcha titi ge̍ē tābɔ̄ ba̍la āchɛ yī Iju̍u ē nāa ɔpiyɛ yī Ɔwɔ bɛ̍ɛ̄nɛ̄. Aa̍ wa̍a̍ tū la ribi ūkpo̍he nūma̍ bɛ̍ɛ̄nɛ̄. Aa̍ wa̍a̍ chī ge̍ē bɔ̍ɔ̄ba̍ ē nāa ɔjā nīi Ɔwɔ choko̍o gala abɔ̄ yī Iji̍sɔ̄ɔsi Ikra̍yisi ma̍ bɛ̍ɛ̄nɛ̄.
7N hɔ̍chɛ̍ yī u̍ku̍rɔ̍ yī Wɔ̄kā Ɔlwɔnyɛ yī Ikra̍yisi ɔyɔ̍ɔ̄ya̍ bū la ɔjā nīi Ɔwɔ kɔ̄kɔ̄ ke̍e̍ de u ji bū la wɔhu̍ yī anu̍ ɔlɔjā ma̍. 8Ami - ɔ̄chɛ pi̍nyɛ̍ hi̍ āchɛ nīi lɛ pi̍nyɛ̍ gɔ̄ga wa̍a̍ lipu̍ yī āchɛ yī Ɔwɔ ma̍ a̍nɛ. Ami nīi Ɔwɔ chī de ɔplɛ̄ɛhi nūma̍ de u ka amɔ̍lɔ ge̍ bī Wɔ̄kā Ɔlwɔnyɛ yī wɔdu ɔnɔ̄kɔ̄kū ke̍ke̍ni̍ yī Ikra̍yisi nūma̍ ge̍ ka de Ɛchɛkɔcha a̍nɛ. 9Amɔ̍lɔ ge̍ ya̍ nīi āchɛ wa̍a̍ ɛ̍lɛ ge̍ ma̍ lɔkɔ nīi lɛlā ɔmɔ̄miya yī Ɔwɔ nīi - lɛlā ɔtrɛ̍ba ma̍ ɔ̍lɔ ge̍ē ya̍ u̍ku̍rɔ̍ ma̍. Ɔwɔ nīi ya̍ ɔjāha̍ ɔjāha̍ wa̍a̍ ma̍ chī de lɛlā ɔtrɛ̍ba yī nū nūma̍ trɛ̍ba i̍ngɔ̍ɔ gbi̍chɛ gbi̍chɛ kpɛɛ ge̍ ku u̍ma̍ama. 10Ɔwɔ ya̍ i̍ngɔ̍ɔ hɛ̄ɛbɛ nīi yɛ̄grāa nūma̍ nīi uhu ɛla̍ā nīi yɛ ē deyīrɛ ɛbɛ abɔ̍ɔ la ichō ma̍, ba̍la enīi bī wɔhu̍ yī abɔ̍ɔ ma̍ ge̍ē jo̍ōkū yī lɛlā ojo̍ōje̍ ka̍ka̍ yī Ɔwɔ lɔkɔ nīi o̍ chikpo̍ wa̍a̍ ma̍ bū la abɔ̄ yī ogrēeyī yī āchɛ yī Ɔwɔ bɛ̍ɛ̄nɛ̄. 11Ɔwɔ yɛ̍ɛ̄lā nūma̍ gala ɔgɔgu yī ɔmɔ̄miya yī nū nīi lɛ i̍ngɔ̍ɔ ku yɛ̄grāa i̍mɔ̄mɛni̍ ma̍. O̍ de ngmɛ̍rɛ̍ de ɔ̍ gala abɔ̄ yī Ikra̍yisi Iji̍sɔ̄ɔsi Ādādā yī alɔ. 12Bū la otū ngmo̍tu̍chɛ̄ ba̍la Ikra̍yisi ba̍la ɔtū ode che ɔ̍ ochōche alɔ ge̍ē mlɔtū gāa iyɔ̄bū yī Ɔwɔ la ūkpɔ̄tū ode chōche hwɔhi hwɔhi. 13Ala̍ ā chu̍chu̍u! Ūkpɔ̄tū ge̍ e̍e de ti̍ya ala̍ tū wu̍chē yī ichi̍ nīi n yɛ ē ma̍ la lɛhu̍ yī ala̍ ma̍ ni̍. N yɛ ē mi̍chi̍ nūma̍ wu̍chē yī ɔnɛ̄ɛhɛhi yī ala̍.
Ɔhɔtū yī Ikra̍yisi
14Wu̍chē yī lɛlā nūma̍ - ohu̍ nīi n ē de ūnōowu ɛpɛpa ē tū ajɛ ē jɔhā de Ɔwɔ A̍dā a̍nɛ. 15Bū la abɔ̄ yī nū nīi ipwɔ̍ɔma ɔha̍lɔha̍ wa̍a̍ abɔ̍ɔ la ichō ba̍la amu la ajɛ nāa riyī olēchi̍ lēchi̍ yī wā bū a̍nɛ. 16N ra̍ābɔ̄ de Ɔwɔ hīka o̍ ge̍ de wɔhu̍ de ala̍ bū la rīgā yī nū nīi i̍ ē mɔ̄mɛ ni̍ ma̍. O̍ ge̍ ya̍ i̍ngɔ̍ɔ gala abɔ̄ yī Uhu Ɔnɛ̄ɛhɛhi yī nū hɛ̄ɛbɛ nīi o̍ ge̍ lwɔhɔ̍hu̍ abɔ̍ɔ lipu̍ yī ibi̍īyē yī ala̍. 17Ikra̍yisi ge̍ lwɔ̄lɛ̍ la ūkpɔ̄tū yī ala̍ bū la ɔtū ode chōche yī ala̍. N ra̍ābɔ̄ hīka ala̍ ge̍ tɛ̍ɛgba ku̍ ajɛ, yarɛ brii la ɔhɔtū ɔlɔ̄lɛ; 18hɛ̄ɛbɛ nīi ala̍ ba̍la āchɛ wa̍a̍ nīi - āchɛ yī Ɔwɔ ma̍ ge̍ lwɔhu̍ je̍ ochi̍chi̍ lɔkɔ nīi ɔhɔtū nīi Ikra̍yisi lɛ de alɔ ma̍ lɛ grogbo, gba̍a gwɔ̄gwā, gba̍a lɛ gɔɔ, chī gba̍a lɛ hiyuu ma̍. 19Hɛ̄ɛbɛ nīi ala̍ ge̍ je̍ ɔhɔtū nūma̍ nīi Ikra̍yisi lɛ de alɔ nīi ɔ̄chɔ̄chɛ i̍ ē je̍ ɔ̄ ojo̍ōje̍ gɔ̄grāa ē mɛ ni̍ ma̍. Bū la ɛbɛ ɔla̍ā, hɛ̄ɛbɛ nīi ala̍ ge̍ de mōmu la ɔhwɔhi hwɔhi gɔ̄grāa nīi - iyī Ɔwɔ ɔlɔjā ma̍.
20O̍gbo̍ ge̍ iyī Ɔwɔ nīi ē yɛ̍ɛ̄lā pɛtɛpɛtɛ ē gla onīi alɔ chikpo̍ kɛ̄ɛ gbɛri̍ya̍ ma̍ ē de alɔ bū la wɔhu̍ yī nū nīi yɛ ē ya̍ u̍ku̍rɔ̍ la alɔ ma̍! 21O̍gbo̍ ge̍ iyī nū la ogrēeyī yī āchɛ yī Ɔwɔ bū la otū ngmo̍tu̍chɛ̄ yī alɔ ba̍la Ikra̍yisi Iji̍sɔ̄ɔsi yɛ̄grāa ɔha̍lɔha̍ wa̍a̍ kpɛɛ ge̍ ku yɛ̄grāa i̍mɔ̄mɛni̍! O̍ ge̍ lɛ i̍ngɔ̍ɔ.
Currently Selected:
ALƐ̍FƐ̄SUSI 3: YBASR
Highlight
Share
Copy
Want to have your highlights saved across all your devices? Sign up or sign in
© 2020 Bible Society of Nigeria (second edition)
