ALƐ̍FƐ̄SUSI 1

Owu̍tu

1Ami Ipɔ̍ɔli nīi - ɔlɛrɔ̄ yī Ikra̍yisi Iji̍sɔ̄ɔsi bū lɔkɔ nīi Ɔwɔ ɔlɔjā chikpo̍ ma̍ ta̍ īpū nūma̍ tɛ̄rɔ̄ a̍nɛ. N tɛ̄rɔ̄ nūma̍ hu ala̍ āchɛ yī Ɔwɔ wa̍a̍ nīi gblāa la Ɛ̍fɛ̄susi nīi - āchɛ ode iyī wā kwɔbɔ̄ de Ikra̍yisi Iji̍sɔ̄ɔsi ma̍.

2Ɔwɔ nīi - A̍dā yī alɔ ma̍ ba̍la Iji̍sɔ̄ɔsi Ikra̍yisi nīi - Ādādā ma̍ ge̍ de ɔpiyɛ ba̍la ogbodɔ̍dɔ̍ de ala̍.

Ɔpiyɛ nīi Uhu yī Ɔwɔ ē de la abɔ̄ yī Ikra̍yisi ma̍

3Alɔ ā da Ɔwɔ nīi - A̍dā yī Iji̍sɔ̄ɔsi Ikra̍yisi Ādādā yī alɔ ma̍ o̍be gɛ. Wu̍chē oji̍ nɛ, o̍ de ɔpiyɛ de alɔ la otū ngmo̍tu̍chɛ̄ yī alɔ ba̍la Ikra̍yisi mɛ̍. O̍ de ɔjā ɔkɔ̄kɔ̄ ɔha̍lɔha̍ wa̍a̍ nīi bū abɔ̍ɔ la ichō la ɛbɛ nīi uhu bī wɔhu̍ yī nū ma̍ kɔ̄ de alɔ mɛ̍. 4O̍bū nīi yɛchɛ ngma̍ ma̍, Ɔwɔ hu alɔ ohōhu lā de iyī nū ke̍e̍ gala abɔ̄ yī Iji̍sɔ̄ɔsi Ikra̍yisi, ɔyi̍ yī nū. O̍ ya̍ i̍ngɔ̍ɔ hɛ̄ɛbɛ nīi alɔ ge̍ē lɛ cha̍ri̍cha̍ri̍ ke̍e̍ la iyɔ̄bū yī nū, nīi alɔ i̍ ge̍ē tū abi̍ ɔha̍lɔha̍ ni̍. Wu̍chē yī ɔhɔtū nīi Ɔwɔ lɛ de alɔ ma̍, 5o̍ de miya mɛ̍ hīka anɔ̍lɔ ge̍ē bī aɛ̍lɛ ē wā dikpo̍ ē ba̍ iyī anu̍ bāa ayi̍ yī anu̍ ma̍ gala abɔ̄ yī Iji̍sɔ̄ɔsi Ikra̍yisi. I̍ngɔ̍ɔ lɛ ɔ̍ wɔnyɛ a̍nɛ; i̍ngɔ̍ɔ nīi o̍ chī miya a̍nɛ. 6Alɔ ā to̍gbo̍ de Ɔwɔ wu̍chē yī uhwa ɔnɛ̄ɛhɛhi yī nū nīi mōmu rīgā ma̍, ba̍la ɔjā ɔkɔ̄kɔ̄ ke̍e̍ yī nū nīi - Ɔyi̍ yī nū nīi o̍ de de alɔ ma̍.

7Wu̍chē oji̍ nɛ, bū la ɔpīyaku̍ yī Ikra̍yisi, o̍ de alɔ hīya lɛfiyɛ ke̍e̍ mɛ̍. Ɔla̍ā re̍ka o̍ de lɛlā ɔdwɔ̄bi̍ yī alɔ kɔ̄ de alɔ wa̍a̍ mɛ̍. Uhwa ɔnɛ̄ɛhɛhi nīi Ɔwɔ ē de ma̍ lɔ̄kū kpa̍a! 8Ɔwɔ de uhwa ɔnɛ̄ɛhɛhi de alɔ mwɛbɛ mwɛbɛ gba̍a̍. Bū la lɛlā ojo̍ōje̍ ka̍ka̍ yī nū ba̍la yɛ̍ma̍ yī lɛlā ɔma̍ hiyuu yī nū, 9o̍ ya̍ i̍ngɔ̍ɔ ke̍e̍ lɔkɔ nīi anu̍ ɔlɔjā miya ge̍ē ya̍ ma̍ mɛ̍. Lɛlā ɔtrɛ̍ba nīi o̍ miya ge̍ē de ē ya̍ gɔ̄grāa gala abɔ̄ yī Ikra̍yisi ma̍, o̍ de ɔ̍ hi̍yɛchɛ de alɔ mɛ̍. 10Ɔwɔ miya ge̍ē bī ɛjā nīi o̍ ya̍ wa̍a̍ ma̍ ge̍ē ngmo̍tu̍chɛ̄ la ɛbɛ ūkpo̍he. O̍ ge̍ē bī ɛjā nīi hɔ̄ la ichō wa̍a̍ ma̍, ba̍la enīi hɔ̄ amu la ajɛ wa̍a̍ ma̍ ge̍ē ngmo̍tu̍chɛ̄ nīi Ikra̍yisi ge̍ē re̍ka ɔlɛhu̍ yī wā wa̍a̍. Ɔwɔ ge̍ē yɛ̍ɛ̄lā nūma̍ nīi o̍ miya ma̍ la yɛ̄grāa ɔkpakpa yī nū.

11Ɔwɔ ē yɛ̍ɛ̄lāha̍ ɛlāha̍ wa̍a̍ gala ɔgɔgu yī lɛlā nīi o̍ miya ma̍ ba̍la onīi o̍ de ka lɔ̄lā mɛ̍ ma̍. Ɔwɔ hu alɔ Iju̍u ohōhu bāa āchɛ yī nū ma̍ la otū ngmo̍tu̍chɛ̄ yī alɔ ba̍la Ikra̍yisi wu̍chē yī lɛlā nīi anu̍ ɔlɔjā de ka lɔ̄lā bū la owu̍tu ma̍. 12O̍ lɛ i̍ngɔ̍ɔ ma̍, alɔ Iju̍u nīi yɔbɔ̄ɔbū deyīche Ikra̍yisi ma̍, alɔ ā to̍gbo̍ de Ɔwɔ wu̍chē yī rīgā yī nū gɛ!

13I̍ngɔ̍ɔ nīi iyī ala̍ Ɛchɛkɔcha titi lɛ a̍nɛ. Ala̍ po̍ ɛrɔ̄ olēchi̍ lēchi̍ ɔla̍ā nīi re̍ka Wɔ̄kā Ɔlwɔnyɛ nīi bī ɔhɛ̍ta̍ ge̍ de ala̍ ma̍, ala̍ de ɔtū che Ikra̍yisi. Bū la ɛbɛ ɔla̍ā, Ɔwɔ de ina̍aba yī nū ba̍ ala̍ nīi ala̍ ge̍ē re̍ka āchɛ iyī nū ke̍e̍ bū la Uhu Ɔnɛ̄ɛhɛhi yī nū nīi o̍ de de ala̍ lɔkɔ nīi o̍ choko̍o ma̍. 14Uhu yī Ɔwɔ nūma̍, anu̍ re̍ka ochi̍chi̍ yī ɔjā obī jo̍ōkū hīka alɔ ge̍ē nāa ɔjā nīi Ɔwɔ choko̍o ge̍ē de ma̍ a̍nɛ. Anu̍ ɔjā ɔya̍ nīi alɔ jo̍ōkū hwɔhi hwɔhi hīka Ɔwɔ de ala̍ nīi - āchɛ yī nū ma̍ hīya lɛfiyɛ ke̍e̍ mɛ̍ a̍nɛ. O̍gbo̍ ge̍ iyī rīgā yī nū!

Ɔhā nīi Ipɔ̍ɔli ji ma̍

15Wu̍chē yī lɛlā nūma̍ wa̍a̍, bū la īchāha̍ ɔla̍ā nīi n po̍ lɔkɔ nīi ala̍ de ɔtū che Ādā Iji̍sɔ̄ɔsi ba̍la ɔhɔtū nīi ala̍ lɛ de āchɛ yī Ɔwɔ ma̍, 16n i̍ pi̍ye̍mā la ɔda Ɔwɔ o̍be wu̍chē yī ala̍ we̍ ni̍. N ē jɔhā de Ɔwɔ ma̍, n ē bla ē tū ala̍. 17Ɔwɔ yī Ādādā yī alɔ Iji̍sɔ̄ɔsi Ikra̍yisi, Ɔwɔ A̍dā nīi - olīgā ɔnɔ̄kɔ̄kū gba̍a̍ ma̍ ge̍ de Uhu Ɔnɛ̄ɛhɛhi yī nū de ala̍. Uhu Ɔnɛ̄ɛhɛhi yī Ɔwɔ ɔla̍ā ge̍ē de lɛlā ojo̍ōje̍ ka̍ka̍ ē de ala̍, ē chabɔ̄ yī Ɔwɔ ē hu̍ ala̍ nīi ala̍ ē je̍ ɔ̄. 18Ūkpɔ̄tū yī ala̍ wa̍a̍ ge̍ ta̍āpāapɛ̄ ke̍e̍ lɛbɛ nīi ala̍ ge̍ ma̍ ɛbɛ ɔlɛgēdēgēdē yī Ɔwɔ, hɛ̄ɛbɛ nīi ala̍ ge̍ ma̍ ɔjā nīi ala̍ deyīche ma̍, ɔjā nīi Ɔwɔ hī ala̍ ɛra̍ yī nū ma̍. Ala̍ chī ge̍ē ma̍ wɔdu nīi mwɛbɛ ke̍ke̍ni̍ la ɔpiyɛ ɔlɛbɛ̍bi̍ nīi o̍ choko̍o ge̍ē de ē de āchɛ yī nū ma̍. 19Ala̍ chī ge̍ē ma̍ wɔhu̍ yī nū nīi lɔ̄kū glɛbɛta̍ yɛ amu ē ya̍ u̍ku̍rɔ̍ la ibi̍īyē yī alɔ āchɛ nīi de ɔtū che ɔ̍ ma̍. Wɔhu̍ yī nū nūma̍ nīi hɔ̄ la ibi̍īyē yī alɔ ma̍ lɛ i̍ngɔ̍ɔ ke̍e̍ bāa wɔhu̍ ɔnɔ̄kɔ̄kū 20nīi Ɔwɔ bī de Ikra̍yisi ɔlɔjā hye̍ēyī la okū ma̍. O̍ de ɔ̍ nāa hyāhɔ̄ la abɔ̄ līre̍ yī nū abɔ̍ɔ la ichō la ɛbɛ nīi uhu ē bī wɔhu̍ yī ɛbɛ ma̍. 21Ikra̍yisi kwɔ̄bū yī ɛbɛ odeyīrɛ ɔha̍lɔha̍ wa̍a̍ nīi hɔ̄ abɔ̍ɔ la ichō ma̍, ba̍la wɔhu̍ yī lɛlā ɔyɔ̍ɔ̄ya̍ ɔha̍lɔha̍ wa̍a̍, ba̍la wɔhu̍ yī ɛbɛ obōbī ba̍la abābā ɔha̍lɔha̍ wa̍a̍ nīi hɔ̄ ma̍ a̍nɛ. Anu̍ ɔkwɔ̄bū yī riyī ɔha̍lɔha̍ wa̍a̍ nīi lā ku lɛlā yī wɔhu̍ yī ɛbɛ obōbī wa̍a̍ nīi hɔ̄ la yɛchɛ nūma̍ ba̍la yɛchɛ ɔha̍ nīi ge̍ē wā ma̍ a̍nɛ. 22Ɔwɔ de ɛjāha̍ ɛjāha̍ wa̍a̍ jimini kpo̍ tū Ikra̍yisi la apli̍kpo̍ mɛ̍. Ɔwɔ de ɔ̍ de ogrēeyī yī āchɛ yī nū hɛ̄ɛbɛ nīi o̍ ge̍ē re̍ka Ādādā nīi - ɔgɔnyɛ yī ɛjā wa̍a̍ ma̍. 23Ogrēeyī yī āchɛ yī Ɔwɔ re̍ka ibi̍īyē yī Ikra̍yisi a̍nɛ. Anu̍ - ɔgɔ̄grāa yī Ikra̍yisi ɔlɔjā nīi - ɔ̄chɛ ode ɔjāha̍ ɔjāha̍ wa̍a̍ ya̍ gɔ̄grāa la ɛbɛha̍ ɛbɛha̍ ma̍ a̍nɛ.

Currently Selected:

ALƐ̍FƐ̄SUSI 1: YBASR

Highlight

Copy