11 ALIKƆ̍RĪNTI 12

Yɛ̍ma̍ ɔlɛbɛ̍bi̍ ba̍la lɛlā ode hi̍yɛchɛ de Ipɔ̍ɔli

1Lɛlā ma̍, n ge̍ē bī gbogū kpɔ̍ɔ̍; ɛpiyabuna ɔha̍lɔha̍ i̍ chī hɔ̄ abɔ̍ɔ la anu̍ ni̍. Onīi n ge̍ē ka bɛ̍ɛ̄nɛ̄ ma̍, lɛlā yī yɛ̍ma̍ ɔlɛbɛ̍bi̍ ɔmɔ̍ɔ̄ma̍ ba̍la lɛlā nīi Ādā de hi̍yɛchɛ de u ma̍ nɛ. 2Lɛ̍yi̍ igwo̍lɛnɛ ga okwi̍ihi, n je̍ Ɔ̄chɛ yī Ikra̍yisi ɔha̍ nīi e̍ de ɔ̍ hɛ̍ kpa̍a̍ pīya ga ichō hwɛɛ ma̍. N i̍ jo̍ōkū ni̍, lɛlā nūma̍ ka̍a ya̍ i̍ngɔ̍ɔ ichɛ̄ɛhi oo, kɛ̄ɛ o̍ ka̍a - yɛ̍ma̍ ɔlɛbɛ̍bi̍ ɔha̍ nīi o̍ ma̍ a̍nɛ oo. Ɔwɔ lōri̍īnū jo̍ōkū a̍nɛ. 3N ge̍ē gbla̍a anu̍ ē ka! N je̍ ɔngrɔ̄ɔ nūma̍ nīi e̍ de ɔ̍ hɛ̍ kpa̍a̍ pīya ga Ɛbɛ A̍hōhi la ichō ma̍. N i̍ jo̍ōkū ni̍, lɛlā nūma̍ ka̍a ya̍ i̍ngɔ̍ɔ ichɛ̄ɛhi oo, kɛ̄ɛ o̍ ka̍a - yɛ̍ma̍ ɔlɛbɛ̍bi̍ ɔha̍ nɛ oo. Ɔla̍ā Ɔwɔ lōri̍īnū jo̍ōkū a̍nɛ. 4Ɔngrɔ̄ɔ ɔla̍ā plɛ̍ɛ̄lā yɛ̄mɛ̄mɛ̄ nīi ɔ̄chɛ i̍ ge̍ē ka ē mɛ ni̍ ma̍ abɔ̍ɔ; lɛlā nīi ɔ̄chɛ i̍ ge̍ē de oko̍o ē gwō ɔ̄ ni̍ ma̍. 5Ɔngrɔ̄ɔ nūma̍ nīi n ge̍ē bī gbogū a̍nɛ. N i̍ ge̍ē bī iyī ami ɔlɔjā gbogū ni̍; ɔ̍chi̍kpa̍kpa̍ ɛjā ɛla̍ā nīi ē chabɔ̄ lɔkɔ nīi n lɛ kwīkwī ma̍ nīi n ge̍ē bī gbogū a̍nɛ. 6N ge̍ bī iyī u ē gbogū, n i̍ ge̍ē ya̍ bāa oli̍bobo ma̍ ni̍. Wu̍chē oji̍ nɛ, n ge̍ē kɛlā olēchi̍ lēchi̍, n i̍ kē chikpo̍ ge̍ē ya̍ i̍ngɔ̍ɔ ni̍. Wu̍chē oji̍ nɛ, n i̍ chikpo̍ nīi ɔ̄chɛ ge̍ nāa ami ke̍ke̍ni̍ gla onīi o̍ ge̍ē nāa ami ē bū la lɛlā nīi n ya̍ nīi o̍ ma̍ kɛ̄ɛ nīi o̍ po̍ ma̍ ni̍.

7Hɛ̄ɛbɛ nīi ɛba̍achɛ ge̍ e̍e hɔ̄ de u ɔ̄kɔ̄kū bū lɛlā ɔlɛbɛ̍bi̍ yɛ̄mɛ̄mɛ̄ ɔmɔ̍ɔ̄ma̍ ni̍, Ɔwɔ de ibi̍īyē ɔngmu̍wɔnɔ ɔha̍ de u. Ibi̍īyē ɔngmu̍wɔnɔ nūma̍ ē ya̍ u̍ku̍rɔ̍ ē de Isa̍tan. O̍ ē gwō u lijē hɛ̄ɛbɛ nīi n i̍ ge̍ē jɛ̄ ɛba̍achɛ ni̍. 8Igbɛta̍ nīi n jɔhā de Ādā wu̍chē yī ibi̍īyē ɔngmu̍wɔnɔ yī u nūma̍ ma̍, hīka o̍ ge̍ de ɔ̍ nāa hī u. 9I̍ngɛ̍ɛ̄nɛ̄ nīi ɔkɔ ɔhɔ̄hīya yī Ādā lɛ a̍nɛ: “Ɔpiyɛ yī u nīi a lɛ ma̍, anu̍ ɔka̍ka̍ yī ɔjā de wɔ a̍nɛ. Wu̍chē oji̍ nɛ, yɛ̄grāa nīi a ge̍ de lɛ kwīkwī ma̍, wɔhu̍ yī u nīi hɔ̄ la awɔ ma̍ ē to̍ōtu̍ ē lwɔhu̍.” Wu̍chē yī ɔla̍ā, ūkpɔ̄tū lɛ u bāa ɔyaya ma̍. N ē wɔ̄wīyā wu̍chē yī ɔlɛkwīkwī yī u ɔha̍lɔha̍ wa̍a̍. Bɛ̍ɛ̄nɛ̄ ma̍, wɔhu̍ yī Ikra̍yisi ge̍ē gbuhu ē kla̍ ami.

10Ɔlɛkwīkwī, ba̍la ɛcha̍ ba̍la lɛlā olichi̍chi̍ gba̍a̍, ba̍la ichi̍ ɔya̍ ɔ̄chɛ, ba̍la akanya wa̍a̍ nīi ē hɔ̄ de u wu̍chē yī Ikra̍yisi ma̍, n ē nāa aa̍ wa̍a̍ la ɔwɔ̄wīyā. Wu̍chē oji̍ nɛ, yɛ̄grāa nīi n ge̍ de lɛ kwīkwī ma̍ nīi n ē de ē lwɔhɔ̍hu̍ brii a̍nɛ.

Lɔkɔ nīi Ipɔ̍ɔli ē gbɛri̍ya̍ ē tū Alikɔ̍rīnti ma̍

11N yɛ ē ya̍ bāa oli̍bobo ma̍. Ala̍ ya̍ u nīi n yɛ ē ya̍ i̍ngɔ̍ɔ a̍nɛ. Ala̍ nīi o̍ ngma̍ nīi ala̍ ge̍ chabɔ̄ yī u yɛ̍yɛ̍ a̍nɛ. N i̍ wɔ̄wɛ ɔjɔ̄jā ni̍ nyaa ma̍, alɛrɔ̄ ɛlamu ɛlamu yī ala̍ ɛ̍lɛma̍ i̍ ga um ɔgɔ̄ga la ɔjɔ̄jā ni̍. 12Ɛjā nīi chabɔ̄ yī u lēchi̍ lēchi̍ bāa ɔlɛrɔ̄ yī Ikra̍yisi ma̍, n mlɔtū kpɔ̍ɔ̍ de ya̍ abɔ̍ɔ la olo̍ōlo̍ yī ala̍ wa̍a̍ mɛ̍. Ɛjā bāa ɛjā ɔya̍ de lɛlā chabɔ̄, lɛlā ɔlɛbɛ̍bi̍ ɔyɔ̍ɔ̄ya̍ ba̍la i̍mamachi̍ ɔyɔ̍ɔ̄ya̍ nɛ. 13Ɔjāha̍ hɔ̄ abɔ̍ɔ nīi n i̍ ya̍ ala̍ yɛ̍yɛ̍ bāa ogrēeyī yī āchɛ yī Ɔwɔ ehēhī ni̍? Ɔ̍chi̍kpa̍kpa̍ ge̍ - iyī wɔbɔ̄ otōtū nīi n i̍ chikpo̍ la abɔ̄ yī ala̍ ni̍ ma̍. Ɔ̍lɔma̍, ala̍ ā de onūma̍ nīi n i̍ ya̍ ala̍ yɛ̍yɛ̍ ni̍ ma̍ kɔ̄ de u gɛ!

14O̍mgbo̍mɛta̍ hɔ̄ ma̍ nīi n ti̍bi̍īyēchɛ̄ ge̍ē wā ge̍ē ma̍ ala̍ a̍nɛ. N i̍ chī ge̍ē che ala̍ abɔ̄ yī lɛlɛ̄lā ni̍. Ala̍ ɛlɛjā nīi n chikpo̍ a̍nɛ; i̍ okpo yī ala̍ ni̍. Ayi̍ u̍tu ē bī āchɛ nīi ma wa̍ ma̍ a̍nɛ? Je̍ka aa̍ āchɛ nīi ma ayi̍ ma̍ ē bī ayi̍ a̍nɛ? 15N ge̍ē wɔ̄wīyā la ode ɔjāha̍ ɔjāha̍ nīi n lɛ wa̍a̍ ma̍ tū ala̍ wɔbɔ̄, tōtū la ami ɔlɔjā ode bi̍ tū ala̍ hɛ̄ɛbɛ tū ala̍ wɔbɔ̄. Bɛ̍ɛ̄nɛ̄ ma̍, ala̍ ge̍ē yɔ̍ɔhɔtū yī u pi̍nyɛ̍ wu̍chē lɔkɔ nīi ami yɔ̍ɔhɔtū yī ala̍ gba̍a̍ ma̍?

16Ala̍ ge̍ē chɛ̄ bɛ̍ɛ̄nɛ̄ hīka ami pi̍i̍ i̍ ya̍ nīi lɛlɛ̄lā de yi̍chi̍chi̍ de ala̍ ni̍. Ɔ̄chɛ ɔha̍ chī ge̍ē ka hīka amɔ̍lɔ je̍ a̍chālā, bī arīmɛ̄ trɛ̍ɛda gwō ala̍ mɛ̍. 17Ɔkana̍ nɛ? N wu̍ ala̍ ɛpiyabuna ɔha̍ gala abɔ̄ yī āchɛ nīi n de tɛ̄rɔ̄ wā ma̍? 18N ra̍ābɔ̄ de Ita̍yi̍tɔ̄ɔsi hīka o̍ ge̍ wā abɔ̍ɔ ma̍, n chī gba̍a de āchɛ ɛha̍ nīi - aɛ̍nɛ̍ yī alɔ la abɔ̄ yī Ikra̍yisi ma̍ tɛ̄rɔ̄ ba̍la anu̍. Kɛ̄ɛ ala̍ ge̍ē ka hīka Ita̍yi̍tɔ̄ɔsi ɔ̍lɔ wu̍ ala̍ ɛpiyabuna? Je̍ka ɛri̍ya̍ yī lɛlā ūkpo̍he ūkpo̍he nīi ami ba̍la anu̍ ē bī yɛ̍ɛ̄lā a̍nɛ! Je̍ka ɔpɔ̄pū yī lɛlā ūkpo̍he nīi ami ba̍la anu̍ ē ya̍ a̍nɛ!

19Kɛ̄ɛ ala̍ ka̍a gbɛri̍ya̍ ka aɛ̍lɛ yɛ ē bɔ̍ɔ̄ba̍ ē nyiyoko̍o iyī aɛ̍lɛ la īkprī yī ala̍ oo! I̍ i̍ngɔ̍ɔ ni̍! Alɔ yɛ ē kɛlā lɔkɔ nīi Ikra̍yisi chikpo̍ ka aɛ̍lɛ ge̍ ya̍ ma̍ la iyɔ̄bū yī Ɔwɔ ɔlɔjā. Ɔjāha̍ ɔjāha̍ nīi alɔ ē ya̍ wa̍a̍ ma̍, aɛ̍ɛya ami, alɔ ē ya̍ wu̍chē yī wɔbɔ̄ ɔtū ala̍ otōtū. 20Ɔjā ūkpo̍he, n yɛ ē tūuhwi hīka yɛ̄grāa nīi n ge̍ē wā abɔ̍ɔ ma̍, ala̍ ge̍ē de ē hɔ̄ɔ̄hɔ̄ hi̍ ɔkɔ nīi n gbɛri̍ya̍ hīka ala̍ ge̍ē lɛ ma̍; ami chī ge̍ē de hɔ̄ɔ̄hɔ̄ hi̍ ɔkɔ nīi ala̍ gbɛri̍ya̍ ka amɔ̍lɔ ge̍ē lɛ ma̍. N yɛ ē tūuhwi hīka, n ge̍ē wā ma̍, n ge̍ē ma̍ apɔ̄ ogbōgbo ba̍la ɔ̍nyīnū, uji otū ɔ̍nyīnū, ɔtū ngurangura ba̍la ɔ̍nyīnū, ɛjā ode gbō iyī ɔ̄chɛ ke̍e̍, ɛcha̍ ɔcha̍ ɔ̍nyīnū, ɔka la ɔ̍nyīnū, ɛba̍achɛ ɔjɔ̄jɛ̄, ba̍la lɛlā ɔlɛ ji̍gījigī abɔ̍ɔ lipu̍ yī ala̍. 21N yɛ ē tūuhwi hīka lɛɛha̍ nīi n ge̍ē wā ma̍, Ɔwɔ yī u ge̍ē bī u ē gāa ajɛ gba̍a̍ la iyɔ̄bū yī ala̍; n ge̍ē drɛ̄ɛgba wu̍chē yī āchɛ ɛha̍ yī ala̍ nīi yɛ̍ɛ̄lā ya̍chi i̍ngɔ̍ɔ īchāha̍ o̍bū nīi i̍ chī gba̍a pīyabɔ̄ta̍ hī ya̍chi yī lɛlā ɔyɔ̍ɔ̄ya̍ ɛla̍ā we̍ ni̍ ma̍, ba̍la ɔnyā ɔla̍ bɛ̍bɛ̍ ba̍la a̍hla̍ yī ibi̍īyē yī aa̍ ɛlɛjā.

Currently Selected:

11 ALIKƆ̍RĪNTI 12: YBASR

Highlight

Copy