Aliro̍om 16

Ɔma̍kpɔɔ yī Ipɔ̍ɔli

1Ɔɔ̍nɛ̍ yī alɔ ɔnɔ̄nyā nūma̍ nīi re̍ka Ifi̍yōbi ma̍, ɔ̄chɛ ɔnɛ̄ɛhɛhi nīi ala̍ ge̍ē de ɔtū che ɔ̍ nɛ. Anu̍ ē chrɛ̄ɛrɔ̄ abɔ̍ɔ la ogrēeyī yī āchɛ yī Ɔwɔ la Ikɛ̍nkrīye a̍nɛ. 2Ala̍ ā tu̍ ɔ̄ bli̍īyē kwiko la ɔgulɛ̄lā yī Ādā ɔlɔjā bɔ̄ɔkɔ nīi o̍ ngma̍ nīi āchɛ yī Ɔwɔ ge̍ ya̍ ma̍. Ala̍ ā tū ɔ̄ wɔbɔ̄ la ɔjāha̍ ɔjāha̍ nīi ge̍ē ku̍ ɔ̄ ɔkɔ ē wā dikpo̍ ē ba̍ ala̍ ma̍. Wu̍chē oji̍ nɛ, anu̍ ɔlɔjā jyɛ̍ɛ̄lā gba̍a̍ tāa āchɛ yɛ̄mɛ̄mɛ̄, tōtū la ami ɔlɔjā.

3Ala̍ ā ma̍ Iprisi̍la ba̍la Akwi̍la kpɔɔ de u. Ami ba̍la aa̍ - alu̍ku̍rɔ̍ ūkpo̍he ūkpo̍he la ɛrɔ̄ yī Ikra̍yisi Iji̍sɔ̄ɔsi nīi alɔ ē chɛ̄ ma̍ a̍nɛ. 4E̍ de ɔkɔ lā de rikū wu̍chē yī u. N da wa̍ o̍be gba̍a̍. I̍ amami ka̍ta̍ ni̍, ogrēeyī yī āchɛ yī Ɔwɔ amu la ɔcha yī Ɛchɛkɔcha wa̍a̍ da wa̍ o̍be titi. 5Ogrēeyī yī āchɛ yī Ɔwɔ nīi grēeyī la wɔlɛ̍ yī wā ma̍, ala̍ ā ma̍ wā kpɔɔ de u titi.

Ala̍ ā ma̍ ɔya ami lēchi̍ lēchi̍ nīi re̍ka Epayine̍tūsi ma̍ kpɔɔ de u. Anu̍ - ɔ̄chɛ ɔrāarāa nīi chɛ̄ku Ikra̍yisi abɔ̍ɔ la ajɛ yī E̍siya wa̍a̍ a̍nɛ. 6Ala̍ ā ma̍ Imeri̍ kpɔɔ de u. O̍ ya̍ u̍ku̍rɔ̍ gba̍a̍ de ala̍ mɛ̍. 7Ala̍ ā ma̍ Adro̍nīkusi ba̍la Iju̍nīyasi kpɔɔ de u. Aa̍ - Iju̍u bāa ami nīi tū abɔ̍ɔ la igbakɔbɔ ba̍la ami i̍krɔ̍ɔ ɔla̍ā a̍nɛ. Alɛrɔ̄ yī Iji̍sɔ̄ɔsi je̍ wā hwɔhi hwɔhi. Aa̍ de pīya Āchɛ yī Ikra̍yisi yɔbū de u a̍nɛ.

8Ala̍ ā ma̍ Ampili̍yātūusi nīi - ɔya ami gba̍a̍ lipu̍ yī lɛya nīi alɔ re̍ la abɔ̄ yī Ādā ma̍ kpɔɔ de u. 9Ala̍ ā ma̍ Ɔba̍nūusi nīi - olu̍ku̍rɔ̍ ūkpo̍he ba̍la alɔ la ɛrɔ̄ yī Ikra̍yisi nīi alɔ chɛ̄ ma̍ kpɔɔ de u. Ala̍ ā ma̍ Isīte̍kīisi nīi - ɔya ami gba̍a̍ ma̍ kpɔɔ de u. 10Ala̍ ā ma̍ Apɛ̍lɛ̄ɛsi nīi āchɛ de jo̍ōkū ka ɔ̍lɔ - ɔ̍chɛ̍ ɔnɛ̄ɛhɛhi yī Ikra̍yisi nɛ ma̍ kpɔɔ de u. Ala̍ ā ma̍ alwɔlɛ̍ yī Arito̍būlusi kpɔɔ de u. 11Ala̍ ā ma̍ Ihɛrɔ̍dīyɔn nīi - ɔ̄chɛ yī Ikra̍yisi abɔ̍ɔ la wɔma yī Inasi̍sūusi ma̍ kpɔɔ.

12Ala̍ ā ma̍ Itayi̍fe̍na ba̍la Itrayifo̍sa nīi ē ya̍ u̍ku̍rɔ̍ yī ɛrɔ̄ yī Ādā nīi alɔ ē chɛ̄ ma̍ kpɔɔ de u. Ɔya ami lēchi̍ lēchi̍ ɔla̍ā nīi re̍ka Ipɛ̍sīisi, nīi ya̍ u̍ku̍rɔ̍ mwɛbɛ mwɛbɛ de Ādā ma̍, ala̍ ā ma̍ ɔ̄ kpɔɔ de u. 13Ala̍ ā ma̍ Iru̍fūusi nīi - olu̍ku̍rɔ̍ gɛdɛgɛdɛ la ɛrɔ̄ yī Ādā nīi alɔ ē chɛ̄ ma̍ kpɔɔ de u. Ɛ̍nɛ̍ yī nū nāa ami bāa ɔyi̍ yī anu̍ ɔlɔjā ma̍; ala̍ ā ma̍ ɔ̄ kpɔɔ de u. 14Ala̍ ā ma̍ Asi̍krītusi, ba̍la Iflɛ̍gɔn, ba̍la Ihɛ̍mɛ̄ɛsi, ba̍la Ipatro̍basi, ba̍la Ihɛ̍māasi, ba̍la aɛ̍nɛ̍ yī alɔ āchɛ yī Ikra̍yisi nīi gblāa abɔ̍ɔ ba̍la aa̍ ma̍ kpɔɔ. 15Ala̍ ā ma̍ Ifilo̍lōgusi, ba̍la Iju̍līya, ba̍la Ine̍rīyɔsi tūla ɔɔ̍nɛ̍ yī nū ɔnɔ̄nyā, ba̍la Oli̍mpasi ba̍la āchɛ yī Ɔwɔ mɔri̍mɔri̍ nīi gblāa abɔ̍ɔ ba̍la aa̍ ma̍, ala̍ ā ma̍ wā kpɔɔ de u.

16Ala̍ ā da ɔ̍nyīnū o̍be la ɔgɛnɛgɛnɛ yī lɛɛ̍nɛ̍. Ogrēeyī yī āchɛ yī Ikra̍yisi wa̍a̍ tɛ̄rɔ̄ yī ɔma̍kpɔɔ hu ala̍.

Ɔna yī lɛlā ɔchlɛhu̍

17Ala̍ chu̍chu̍u, aɛ̍nɛ̍ yī u! Ala̍ ā gbō iyī ala̍ hī āchɛ nīi ē ta̍tu̍tu̍ yī ode āchɛ krīibi ma̍, nīi ē ya̍ nīi āchɛ ē gwāajɛ la ɔtū ode chōche yī wā ma̍. Āchɛ ɛla̍ā nīi ē kɛlā abi̍ ku̍ ɔgulɛ̄lā ongōngū nīi ala̍ ngū o̍bū ma̍ nɛ. Ala̍ ā gwō gbo̍o̍ hī wā. 18Āchɛ eli̍ngɔ̍ɔ ɛla̍ā, i̍ ɛrɔ̄ yī Ikra̍yisi nīi - Ādādā yī alɔ ma̍ nīi e̍ yɛ ē chɛ̄ a̍ni̍. Lɛlā yī akpa̍rīpu̍ yī wā nīi e̍ yɛ ē kwɔgu a̍nɛ. E̍ ē bī oko̍o ɔlwɔnyɛ lɛlā ba̍la yɛ̍gra̍ yī oko̍o yī wā ti̍ya āchɛ nīi i̍ jɔ̍ha̍ ni̍ ma̍ ūkpɔ̄tū tū. 19Āchɛmāchɛ de po̍ lɔkɔ nīi ala̍ ta̍ābɔ̄ ku̍ lɛlā yī Wɔ̄kā Ɔlwɔnyɛ yī Ɔwɔ brii ma̍ mɛ̍. Wu̍chē yī ɔla̍ā, n lɛ ɔwɔ̄wīyā gba̍a̍ lɛhu̍ yī ala̍. N chikpo̍ hīka ala̍ ge̍ je̍ kure̍kure̍ pīyeta̍ ɔjā nīi - ɔnɛ̄ɛhɛhi ma̍. Ala̍ ā gblāa bāa ɔchɔ̍ɔnyɛ ma̍ pīyeta̍ lɛlā abi̍ ɔyɔ̍ɔ̄ya̍. 20Ɔwɔ nīi ogbodɔ̍dɔ̍ yī alɔ bū la abɔ̄ yī nū ma̍ ge̍ē de wɔhu̍ yī Isa̍tan ē chāajɛ, ē ku̍ ɔ̄ tū ala̍ la apli̍kpo̍. Ɔpiyɛ yī Iji̍sɔ̄ɔsi Ādādā yī alɔ ge̍ hɔ̄ ba̍la ala̍ wa̍a̍.

21Iti̍mōti nīi - olu̍ku̍rɔ̍ ūkpo̍he ūkpo̍he ba̍la ami ma̍ tɛ̄rɔ̄ yī ɔma̍kpɔɔ hu ala̍ wa̍a̍. Ilu̍sīyɔsi, ba̍la Ije̍sin ba̍la Isosipa̍ta nīi - Iju̍u bāa ami ma̍ tɛ̄rɔ̄ yī ɔma̍kpɔɔ hu ala̍ titi.

22Ami, Itɛ̍tīyusi ɔlɔjā nīi bī abɔ̄ ta̍ īpū nūma̍ de Ipɔ̍ɔli ma̍ tɛ̄rɔ̄ yī ɔma̍kpɔɔ bāa Ɔ̄chɛ yī Ikra̍yisi ma̍ hu ala̍ wa̍a̍.

23Ige̍yusi nīi - a̍dāwɔ̄lɛ̍ nīi ami Ipɔ̍ɔli twɔ̄ɔga ma̍, nīi āchɛ yī Ɔwɔ gba̍a lɛ ogrēeyī la wɔlɛ̍ yī nū ma̍, o̍ tɛ̄rɔ̄ yī ɔma̍kpɔɔ hu ala̍ titi. Ɛra̍si̍tusi nīi - ɔ̄chɛ ogbō okpo yī alo̍gra ma̍ ba̍la ɔɔ̍nɛ̍ yī alɔ ɔnɔ̄ngrɔ̄ɔ nīi re̍ka Ikwa̍tusi ma̍ tɛ̄rɔ̄ yī ɔma̍kpɔɔ titi hu ala̍.

24[Ɔpiyɛ yī Ādādā yī alɔ Iji̍sɔ̄ɔsi Ikra̍yisi ge̍ hɔ̄ ba̍la ala̍ wa̍a̍! O̍ ge̍ lɛ i̍ngɔ̍ɔ!]

Ipɔ̍ɔli jɔhā kā Ɔwɔ ɔkɔ̄kā

25O̍gbo̍ ge̍ - iyī Ɔwɔ! Anu̍ hu̍ nīi ala̍ ge̍ē yarɛ brii la ɔtū ode chōche yī ala̍ a̍nɛ. Ɔla̍ā gala ɔgɔgu yī Wɔ̄kā Ɔlwɔnyɛ nīi ami ē ka, nīi re̍ka ɛrɔ̄ yī lɛlā yī Iji̍sɔ̄ɔsi Ikra̍yisi ma̍. O̍ gba̍a gala ɔgɔgu yī lɛlā olēchi̍ lēchi̍ nīi trɛ̍ba gbi̍chɛ gbi̍chɛ ma̍. 26U̍ma̍ama nūma̍, lɛlā olēchi̍ lēchi̍ ɔla̍ā bīyɛchɛ lā gēdēgēdē bū la lɛlā nīi āchɛ ɔkɛrɔ̄ yī Ɔwɔ ta̍ tū la īpū ma̍ mɛ̍. Bū la lɛlā nīi Ɔwɔ nīi i̍ ē ko̍ōku̍ ni̍ ka āchɛ ɛ̍lɛ ge̍ ya̍ ma̍, o̍ de ɔ̍ lā yɛchɛ de āchɛ wa̍a̍ nīi e̍ jo̍ōkū mɛ̍, hɛ̄ɛbɛ nīi āchɛ wa̍a̍ ge̍ē de ɔtū che Ɔwɔ ē pɔ̍ɔkɔ yī nū.

27Ɔwɔ lōri̍īnū nīi jyɛ̍ɛ̄lā mɛlā wa̍a̍ la ɔgɔ̄grāa ma̍, o̍gbo̍ ge̍ - iyī nū gala abɔ̄ yī Iji̍sɔ̄ɔsi Ikra̍yisi kpɛɛ ku yɛ̄grāa ɔha̍lɔha̍! O̍ ge̍ lɛ i̍ngɔ̍ɔ!

Currently Selected:

Aliro̍om 16: YBASR

Highlight

Copy