Aliro̍om 11
11
Ɔwɔ mlɛ̍ha̍ yī Ali̍sɛ̄rɛli
1Bɛ̍ɛ̄nɛ̄ ma̍, o̍ re̍ka Ɔwɔ de āchɛ yī nū wu̍ligbo̍ kɛ̄ɛ? Īchāha̍ īchāha̍! Je̍ka aa̍ ami ɔlɔjā nīi hɔ̄ ma̍ ma̍ - Oli̍sɛ̄rɛli nɛ. N bū la wɔma yī A̍brahāam. Ami - olipwɔ̍ɔma yī Ibɛ̍njāmɛn nɛ. 2Ɔwɔ i̍ de āchɛ yī nū nīi o̍ hōhu bū la owu̍tu ma̍ wu̍ligbo̍ je̍ ni̍. Je̍ka aa̍ ala̍ ma̍ lɛlā nīi Īpū yī Ɔwɔ ka ku̍ lɛlā nīi Ɛla̍yi̍ja ra̍ābɔ̄ de Ɔwɔ pīyeyīta̍ Ali̍sɛ̄rɛli īchāha̍ ma̍? Ɛla̍yi̍ja ka de Ɔwɔ ka ɔ̍lɔ ge̍, 3“Ādā be̍e! E̍ de āchɛ ɔkɛrɔ̄ yī wɔ kpo̍ ngmo̍ cha̍cha̍ mɛ̍. Ɛbɛ nīi e̍ ē de ɔjā pā wɔ ma̍, e̍ de ɔ̍ hi̍ya tāajɛ cha̍cha̍ mɛ̍. O̍ de hī amami lōru̍u, e̍ i̍ chī gba̍a yɛ amu ē chikpo̍ ge̍ē de u ē ngmo̍.” 4Ɔjā nīi Ɔwɔ hīya anu̍ ɔkɔ ma̍ hɔ̄ a̍nɛ: “N lɛ āchɛ u̍nɔ igwa̍arāapa che āchɛ ohu igwo̍ nīi chɛ̄ku u gblāa abɔ̍ɔ ma̍. Lipu̍ yī āchɛ ɛla̍ā, ɔ̄chɔ̄chɛ i̍ pu̍ kpɛ̍ɛ̍ ya̍ otūlichō de i̍kpe̍ēkū ɔla̍ā nīi re̍ka Iba̍ali ma̍ je̍ ni̍.” 5I̍ngi̍ngɔ̍ɔ nīi o̍ lɛ u̍ma̍ama yɛ̄grāa nūma̍ a̍nɛ. Āchɛ ɛha̍ hōhī kplɛ̄ɛ̄ gblāa amu nīi Ɔwɔ hu wa̍ ohōhu bū lɛhi ɔyɔ̍ɔ̄ya̍ yī nū ma̍. 6Ohōhu nīi Ɔwɔ ē hu āchɛ ma̍ bū lɛhi ɔyɔ̍ɔ̄ya̍ yī Ɔwɔ ɔlɔjā. O̍ i̍ bū lɛlā ɔyɔ̍ɔ̄ya̍ yī āchɛ ɔlɔjā ni̍. O̍ ge̍ re̍ka ohōhu ɔla̍ā bū lɛlā nīi āchɛ ɛlɛjā ya̍ o̍bū ma̍ nɛ, nɛ̄ni̍ lɛhi ɔyɔ̍ɔ̄ya̍ yī Ɔwɔ i̍ ge̍ re̍ka lɛlā olēchi̍ lēchi̍ ni̍.
7O̍ chī - oji̍ bɛ̍ɛ̄nɛ̄ nɛ? Ɔjā nīi Ali̍sɛ̄rɛli wa̍a̍ yɛ ē gāla̍ ma̍, e̍ i̍ ma̍ ni̍? Āchɛ kplɛ̄ɛ̄ nīi Ɔwɔ hōhu ma̍ ma̍ ɔjā ɔ̍lɔma̍ a̍nɛ. Āchɛ ehēhī de darɔ̄, e̍ i̍ chɛ̄ po̍ ɛra̍ ohōhī yī Ɔwɔ ni̍. 8O̍ lɛ lɔkɔ nīi Īpū yī Ɔwɔ ka ma̍,
“Ɔwɔ ya̍ nīi ūkpɔ̄tū yī wā ba̍la ɛri̍ya̍ ogbōgbo yī wā de ya̍ kwīkwī mɛ̍.
Ɔkpɛɛ ku i̍chɛ nūma̍, e̍ i̍ ē bī eyī yī wā myɛ̍ma̍ mɛ ni̍,
e̍ i̍ ē chī bī arɔ̄ yī wā plɛ̍ɛ̄lā mɛ ni̍.” 9Ide̍bīidi chī ka ɔha̍ hīka,
“Ɔwɔ chu̍chu̍u, ku̍ wā!
Rɛ̍ɛda kla̍ āā abɔ̍ɔ la ɛbɛ yī ɔwɔ̄wīyā ɔyɔ̍ɔ̄ya̍ yī wā ɔla̍ā.
Ya̍ nīi e̍ ge̍ gwāajɛ! Ya̍ wā ichi̍ ku̍re̍!
10Ya̍ nīi e̍ ge̍ de priyī ligbo̍ ligbo̍!
Ya̍ nīi akanya nīi ge̍ē hɔ̄ de wa̍ ma̍ ge̍ de wa̍ pu̍ kɔ̍kɔ̍kɔ̍ yɛ̄grāa ɔha̍lɔha̍!”
11Bɛ̍ɛ̄nɛ̄ ma̍, o̍ re̍ka Iju̍u ti̍ingla̍ i̍ngɔ̍ɔ ma̍, e̍ gwāajɛ de chāajɛ kpɛɛ ojōjī? Īchāha̍ īchāha̍! Wu̍chē lɔkɔ nīi e̍ ya̍ dwɔ̄bi̍ ma̍, ɔhɛ̍ta̍ hɔ̄ de Ɛchɛkɔcha bɛ̍ɛ̄nɛ̄. Ɔla̍ā ge̍ē ya̍ nīi āchɛ yī Iju̍u ē kpi̍ya̍nya ē tāa aa̍. 12Lɛlā ɔdwɔ̄bi̍ yī āchɛ yī Iju̍u bī ɔpiyɛ mwɛbɛ mwɛbɛ ge̍ de āchɛ yī yɛchɛ wa̍a̍. Yeklo̍ nīi āchɛ yī Iju̍u gbo la ɔpɔ̄pū yī Ɔwɔ ma̍ bī wɔdu yī ɔpiyɛ ge̍ de Ɛchɛkɔcha wa̍a̍. O̍ ge̍ re̍ka āchɛ yī Iju̍u pɔ̍ɔkɔ yī Ɔwɔ la ɔgɔ̄grāa nɛ ma̍, ɔpiyɛ nūma̍ ge̍ē lɛ ke̍ke̍ni̍ kana̍ ma̍ ēēe!
Ɔhɛ̍ta̍ nīi hɔ̄ de ɛchɛkɔcha ma̍
13U̍ma̍ama, n ge̍ē kɛlā tāa ala̍ nīi - Ɛchɛkɔcha ma̍: Kpɛɛ ku olo̍ ɔha̍lɔha̍ nīi ami chī re̍ka ɔlɛrɔ̄ yī Iji̍sɔ̄ɔsi de ala̍ Ɛchɛkɔcha nɛ ma̍, n ge̍ē wīyā la u̍ku̍rɔ̍ yī u nūma̍. 14Ɔha̍ni̍, n ē ya̍ nīi Iju̍u nīi - āchɛ yī ami ɔlɔjā ma̍ ē kpi̍ya̍nya ē tāa ala̍. Bū la ɛbɛ ɔla̍ā, ɔha̍ni̍ Ɔwɔ ē de ibiha̍ yī wā hɛ̍ ē ta̍. 15Wu̍chē oji̍ nɛ, Ɔwɔ de wa̍ wu̍ligbo̍ ma̍, yɛchɛ wa̍a̍ de rɛ̍ɛya ba̍la Ɔwɔ bɛ̍ɛ̄nɛ̄. O̍ ge̍ re̍ka Ɔwɔ chōo̍chē nāa aa̍ ba̍ ɔgɛgɛ ma̍, kana̍ kpɛ̍ɛ nīi o̍ ge̍ē lɛ ma̍? Lēchi̍, o̍ ge̍ē lɛ bɔ̄ɔkɔ nīi ɔ̄chɛ ē hye̍ēyī bū la okū wā la ɔhɔ̄leyī ma̍.
16Ala̍ ma̍ gɛ ko̍ō! Ɔ̄chɛ ge̍ de irwi ɔrāarāa nīi bū la ibrɛ̍ɛdi ma̍ kɔ̄ de Ɔwɔ, ɔ̍lɔma̍ o̍ re̍ka ākpā yī ibrɛ̍ɛdi ɔla̍ā ligbo̍ ligbo̍ wa̍a̍, o̍ de kwɔbɔ̄ de Ɔwɔ mɛ̍. Ɔ̄chɛ ge̍ chī de ɛgba yī ɔchi̍ ɔha̍ kɔ̄ de Ɔwɔ mɛ̍, o̍ re̍ka a̍bɔ̄ yī ɔchi̍ ɔla̍ā wa̍a̍ - iyī Ɔwɔ bɛ̍ɛ̄nɛ̄ nɛ. 17Ɔchi̍ nīi re̍ka o̍līifu nīi e̍ ē tōtū ma̍, e̍ de a̍bɔ̄ yī nū ɛha̍ kpo̍ hwō. E̍ bī a̍bɔ̄ yī o̍līifu ɔha̍ nīi bū rɛ la a̍chi̍ ji ma̍ ge̍ ku ɔ̍ mɛ̍. Ala̍ Ɛchɛkɔcha re̍ka o̍līifu ɔla̍ā nīi bū rɛ la a̍chi̍ ji ma̍ a̍nɛ. U̍ma̍ama, ala̍ chī yɛ amu ē bɔ̍ɔ̄ba̍ ē nāa wɔhu̍ ba̍la ɔhɔ̄leyī ɔnɔ̄kɔ̄kū yī āchɛ yī Iju̍u mɛ̍. 18O̍ chī lɛ i̍ngɔ̍ɔ nyaa ma̍, ala̍ e̍e chi̍hi̍ya̍ yī āchɛ nīi lɛ bāa a̍bɔ̄ yī o̍līifu nīi e̍ de kpo̍ hwō ma̍ ni̍. Ɛba̍achɛ ma̍, ala̍ ge̍ē u̍tu jɛ̄ kana̍ ma̍? Ala̍ chī lɛ bāa abɔ̄ yī ɔchi̍ ɔbɔbɔ ma̍. I̍ ala̍ ē chī bī ɔgba yī ɔchi̍ ɔlɔjā a̍ni̍. Ɛgba ē bī ala̍ nīi re̍ka a̍bɔ̄ ma̍ a̍nɛ.
19Ala̍ chī ge̍ē bī gbogū mɛ hīka, je̍ka ɛ̍lɛ de a̍bɔ̄ ɛla̍ā hwō hɛ̄ɛbɛ lā de ala̍ mɛ̍. 20O̍ lɛ i̍ngɔ̍ɔ ichɛ̄ɛhi. Ɔwɔ de wa̍ hwō wu̍chē lɔkɔ nīi e̍ de ɔtū che Ɔwɔ ni̍ ma̍. Ɔwɔ chī de ala̍ ku abɔ̍ɔ riyi̍ yī wā wu̍chē lɔkɔ nīi ala̍ de ɔtū che ɔ̍ ma̍. Ɛba̍achɛ ɔha̍lɔha̍ ge̍ e̍e hɔ̄ la ɛri̍ya̍ ogbōgbo yī ala̍ wu̍chē ɔla̍ā ni̍. Ɔkɔkɔ ɔla̍ā, ala̍ ā tūuhwi. 21Wu̍chē oji̍ nɛ, āchɛ yī Iju̍u nīi lɔ̄lɛ bāa a̍bɔ̄ nīi ku abɔ̍ɔ la ɔchɔ̍ɔwɔ yī wā ma̍, Ɔwɔ i̍ pi̍ye̍mā hī wā ji ni̍. Ala̍ gbɛri̍ya̍ ka ɔ̍lɔ ge̍ē pi̍ye̍mā hī ala̍ ji ē mɛ? 22Bū la ɛbɛ ɔla̍ā, alɔ ē ma̍ lɔkɔ nīi Ɔwɔ jyɛ̍ɛ̄lā tāa āchɛ kɛ̄ɛ lwɔnɔnɔ tāa āchɛ ma̍ gɛ. Ɔwɔ lwɔnɔnɔ tāa āchɛ nīi gwāajɛ ma̍. Ala̍ ma̍, Ɔwɔ yɛ ē jyɛ̍ɛ̄lā tāa ala̍, o̍ chī ge̍ē ya̍ i̍ngɔ̍ɔ kpɛɛ ge̍ē ba̍ la yɛ̄grāa nīi hi anu̍ ɔlɔjā ɔtū ma̍. O̍ i̍ ge̍ chī lɛ i̍ngɔ̍ɔ ni̍, ɔ̍lɔma̍ o̍ ge̍ē de ala̍ titi ē hwō ta̍anū. 23Āchɛ yī Iju̍u titi ge̍ tu̍labɔ̄ hī ɔtū i̍ de che Ɔwɔ ni̍ yī wā ɔla̍ā, Ɔwɔ ge̍ē ku̍chē la aa̍ ē ku la ɛbɛbɛ yī wā. Wu̍chē oji̍ nɛ, Ɔwɔ lwɔhu̍ ge̍ē ku̍chē la aa̍ ku aba̍bɔ̍ɔ ē mɛ. 24Ala̍ nīi - Ɛchɛkɔcha ma̍ lɛ bāa a̍bɔ̄ yī o̍līifu ɔla̍ā nīi bū rɛ la a̍chi̍ ji nīi e̍ de ɔ̍ hwō bī ge̍ ku la o̍līifu nīi e̍ tōtū ma̍. O̍ i̍ chī ku i̍ngɔ̍ɔ la ɔchɔ̍ɔwɔ ni̍. Āchɛ yī Iju̍u ma̍ lɛ bāa o̍līifu ɔla̍ā nīi e̍ tōtū yɛ ē gbla̍a anu̍ ma̍. O̍ ge̍ē hɛ̍ kpɛ̍ɛ ē de Ɔwɔ la oku̍chē la a̍bɔ̄ yī ɔchi̍ ɔlɔjā ge̍ ku aba̍bɔ̍ɔ la ɔchi̍ ɔlɔjā.
Ɔwɔ ē mlɛ̍ha̍ de āchɛ wa̍a̍
25Aɛ̍nɛ̍ yī u, lɛlā olēchi̍ lēchi̍ ɔha̍ nīi - lɛlā ɔtrɛ̍ba ma̍ hɔ̄ amu nīi n chikpo̍ nīi ala̍ ge̍ē jo̍ōkū. O̍ ge̍ē ya̍ nīi ala̍ ē pi̍ye̍mā la ɔgbɛri̍ya̍ hīka ala̍ ɔ̍lɔ je̍ ka̍ka̍. Arɔ̄ odulɛhu̍ yī Ali̍sɛ̄rɛli i̍ ge̍ē lɛ i̍ngɔ̍ɔ kpɛɛ ni̍. O̍ ge̍ē hɔ̄ kpɛɛ ē ku yɛ̄grāa ɔla̍ā nīi Ɛchɛkɔcha wa̍a̍ nīi ge̍ē lɛ ɔhɛ̍ta̍ ma̍ ē wā dikpo̍ ē ba̍ Ɔwɔ la ɔgɔ̄grāa o̍bū. 26I̍ngɛ̍ɛ̄nɛ̄ nīi Ɔwɔ ge̍ē hɛ̍ Ali̍sɛ̄rɛli ē ta̍ a̍nɛ, lɔkɔ nīi Īpū yī Ɔwɔ ka ma̍:
“Ɔhɔ̍ɔnyɛta̍ ge̍ē bū la Isa̍yɔn.
O̍ ge̍ē de lɛlā abi̍ ɔyɔ̍ɔ̄ya̍ ɔha̍lɔha̍ wa̍a̍ ē ngmo̍nyi̍ hī wɔma yī Ije̍kɔ̄ɔpu.
27Yɛka yī u nīi n ge̍ē gwa̍ ba̍la aa̍
yɛ̄grāa nīi n ge̍ē de lɛlā ɔdwɔ̄bi̍ yī wā kɔ̄ de wa̍ ma̍ bī aa̍ a̍nɛ.
Ami Ɔwɔ ka i̍ngɔ̍ɔ a̍nɛ.”
28Wu̍chē lɔkɔ nīi āchɛ yī Iju̍u hi̍hi̍yo̍ Wɔ̄kā Ɔlwɔnyɛ yī Ɔwɔ ma̍, e̍ de pīya aluji yī Ɔwɔ. Ɔla̍ā chī chōo̍chē de pīya ɛpiyabuna de ala̍ nīi - Ɛchɛkɔcha ma̍. Wu̍chē lɔkɔ nīi Ɔwɔ chī hu āchɛ yī Iju̍u ohōhu ma̍, e̍ re̍ka aɛ̍ɛya yī Ɔwɔ kpɛɛ we̍ wu̍chē yī a̍dɔ̄kū yī wā we̍. 29Wu̍chē oji̍ nɛ, ɔ̄chɛ nīi Ɔwɔ ge̍ de ɔ̍ hōhu, de ɔpiyɛ de ɔ̍ mɛ̍, o̍ i̍ ē pīya ūkpɔ̄tū ta̍ gɛ ni̍. 30Ala̍ nīi - Ɛchɛkɔcha ma̍, je̍ka aa̍ ala̍ tɔ̍ɔkɔ yī Ɔwɔ i̍gbi̍chɛ o̍bū? U̍ma̍ama ma̍, Ɔwɔ mlɛ̍ha̍ yī ala̍ wu̍chē yī āchɛ yī Iju̍u nīi tɔ̍ɔkɔ yī Ɔwɔ ma̍. 31Wu̍chē lɔkɔ nīi Ɔwɔ ma̍ ala̍ lɛha̍ ma̍, āchɛ yī Iju̍u titi tɔ̍ɔkɔ yī Ɔwɔ hɛ̄ɛbɛ nīi Ɔwɔ ge̍ē ma̍ aa̍ titi lɛha̍ bɛ̍ɛ̄nɛ̄. 32Wu̍chē oji̍ nɛ, Ɔwɔ ya̍ nīi āchɛ wa̍a̍ de pīya aligbakɔbɔ wu̍chē yī ɔkɔlɛ̄lā yī Ɔwɔ i̍po̍ōpo̍ ni̍. O̍ ya̍ i̍ngɔ̍ɔ hɛ̄ɛbɛ ge̍ē de lɛha̍ ɔmɔ̍ɔ̄ma̍ yī nū chabɔ̄ hu̍ wā.
O̍gbo̍ ke̍ - iyī Ɔwɔ
33Ɔwɔ hwɔhi lɛlā glɛbɛta̍ kpa̍a! Lɛlā oje̍ ka̍ka̍ yī nū ba̍la ochi̍chi̍ lɛlā ojo̍ōje̍ yī nū glɛbɛta̍ kpa̍a! Ɔ̄nyɛ kpɛ̍ɛ u̍tu ge̍ē ka ochi̍chi̍ yī lɛlā ɔmɔ̄miya yī nū mɛ ma̍? 34O̍ lɛ lɔkɔ nīi Īpū yī Ɔwɔ ka ma̍:
“Ɔ̄nyɛ je̍ ɛri̍ya̍ yī ūkpɔ̄tū yī Ādā ma̍/?
Ɔ̄nyɛ kpɛ̍ɛ ge̍ē chabɔ̄ yī lɛlā hu̍ ɔ̄ mɛ ma̍?
35Ɔ̄nyɛ kpɛ̍ɛ kɔ̄ ɔjā de Ɔwɔ je̍
nīi ngma̍ nīi Ɔwɔ ge̍ē kla̍ ɔlɔjā ure̍ ma̍/?”
36Ɔwɔ ɔlɔjā ya̍ ɔjāha̍ ɔjāha̍ wa̍a̍ a̍nɛ. Ɔjāha̍ ɔjāha̍ wa̍a̍ chī hɔ̄ bū la abɔ̄ yī nū de anu̍ ɔlɔjā. O̍gbo̍ ge̍ - iyī Ɔwɔ kpɛɛ ku yɛ̄grāa ɔha̍lɔha̍! O̍ ge̍ lɛ i̍ngɔ̍ɔ!
Currently Selected:
Aliro̍om 11: YBASR
Highlight
Share
Copy
Want to have your highlights saved across all your devices? Sign up or sign in
© 2020 Bible Society of Nigeria (second edition)
Aliro̍om 11
11
Ɔwɔ mlɛ̍ha̍ yī Ali̍sɛ̄rɛli
1Bɛ̍ɛ̄nɛ̄ ma̍, o̍ re̍ka Ɔwɔ de āchɛ yī nū wu̍ligbo̍ kɛ̄ɛ? Īchāha̍ īchāha̍! Je̍ka aa̍ ami ɔlɔjā nīi hɔ̄ ma̍ ma̍ - Oli̍sɛ̄rɛli nɛ. N bū la wɔma yī A̍brahāam. Ami - olipwɔ̍ɔma yī Ibɛ̍njāmɛn nɛ. 2Ɔwɔ i̍ de āchɛ yī nū nīi o̍ hōhu bū la owu̍tu ma̍ wu̍ligbo̍ je̍ ni̍. Je̍ka aa̍ ala̍ ma̍ lɛlā nīi Īpū yī Ɔwɔ ka ku̍ lɛlā nīi Ɛla̍yi̍ja ra̍ābɔ̄ de Ɔwɔ pīyeyīta̍ Ali̍sɛ̄rɛli īchāha̍ ma̍? Ɛla̍yi̍ja ka de Ɔwɔ ka ɔ̍lɔ ge̍, 3“Ādā be̍e! E̍ de āchɛ ɔkɛrɔ̄ yī wɔ kpo̍ ngmo̍ cha̍cha̍ mɛ̍. Ɛbɛ nīi e̍ ē de ɔjā pā wɔ ma̍, e̍ de ɔ̍ hi̍ya tāajɛ cha̍cha̍ mɛ̍. O̍ de hī amami lōru̍u, e̍ i̍ chī gba̍a yɛ amu ē chikpo̍ ge̍ē de u ē ngmo̍.” 4Ɔjā nīi Ɔwɔ hīya anu̍ ɔkɔ ma̍ hɔ̄ a̍nɛ: “N lɛ āchɛ u̍nɔ igwa̍arāapa che āchɛ ohu igwo̍ nīi chɛ̄ku u gblāa abɔ̍ɔ ma̍. Lipu̍ yī āchɛ ɛla̍ā, ɔ̄chɔ̄chɛ i̍ pu̍ kpɛ̍ɛ̍ ya̍ otūlichō de i̍kpe̍ēkū ɔla̍ā nīi re̍ka Iba̍ali ma̍ je̍ ni̍.” 5I̍ngi̍ngɔ̍ɔ nīi o̍ lɛ u̍ma̍ama yɛ̄grāa nūma̍ a̍nɛ. Āchɛ ɛha̍ hōhī kplɛ̄ɛ̄ gblāa amu nīi Ɔwɔ hu wa̍ ohōhu bū lɛhi ɔyɔ̍ɔ̄ya̍ yī nū ma̍. 6Ohōhu nīi Ɔwɔ ē hu āchɛ ma̍ bū lɛhi ɔyɔ̍ɔ̄ya̍ yī Ɔwɔ ɔlɔjā. O̍ i̍ bū lɛlā ɔyɔ̍ɔ̄ya̍ yī āchɛ ɔlɔjā ni̍. O̍ ge̍ re̍ka ohōhu ɔla̍ā bū lɛlā nīi āchɛ ɛlɛjā ya̍ o̍bū ma̍ nɛ, nɛ̄ni̍ lɛhi ɔyɔ̍ɔ̄ya̍ yī Ɔwɔ i̍ ge̍ re̍ka lɛlā olēchi̍ lēchi̍ ni̍.
7O̍ chī - oji̍ bɛ̍ɛ̄nɛ̄ nɛ? Ɔjā nīi Ali̍sɛ̄rɛli wa̍a̍ yɛ ē gāla̍ ma̍, e̍ i̍ ma̍ ni̍? Āchɛ kplɛ̄ɛ̄ nīi Ɔwɔ hōhu ma̍ ma̍ ɔjā ɔ̍lɔma̍ a̍nɛ. Āchɛ ehēhī de darɔ̄, e̍ i̍ chɛ̄ po̍ ɛra̍ ohōhī yī Ɔwɔ ni̍. 8O̍ lɛ lɔkɔ nīi Īpū yī Ɔwɔ ka ma̍,
“Ɔwɔ ya̍ nīi ūkpɔ̄tū yī wā ba̍la ɛri̍ya̍ ogbōgbo yī wā de ya̍ kwīkwī mɛ̍.
Ɔkpɛɛ ku i̍chɛ nūma̍, e̍ i̍ ē bī eyī yī wā myɛ̍ma̍ mɛ ni̍,
e̍ i̍ ē chī bī arɔ̄ yī wā plɛ̍ɛ̄lā mɛ ni̍.” 9Ide̍bīidi chī ka ɔha̍ hīka,
“Ɔwɔ chu̍chu̍u, ku̍ wā!
Rɛ̍ɛda kla̍ āā abɔ̍ɔ la ɛbɛ yī ɔwɔ̄wīyā ɔyɔ̍ɔ̄ya̍ yī wā ɔla̍ā.
Ya̍ nīi e̍ ge̍ gwāajɛ! Ya̍ wā ichi̍ ku̍re̍!
10Ya̍ nīi e̍ ge̍ de priyī ligbo̍ ligbo̍!
Ya̍ nīi akanya nīi ge̍ē hɔ̄ de wa̍ ma̍ ge̍ de wa̍ pu̍ kɔ̍kɔ̍kɔ̍ yɛ̄grāa ɔha̍lɔha̍!”
11Bɛ̍ɛ̄nɛ̄ ma̍, o̍ re̍ka Iju̍u ti̍ingla̍ i̍ngɔ̍ɔ ma̍, e̍ gwāajɛ de chāajɛ kpɛɛ ojōjī? Īchāha̍ īchāha̍! Wu̍chē lɔkɔ nīi e̍ ya̍ dwɔ̄bi̍ ma̍, ɔhɛ̍ta̍ hɔ̄ de Ɛchɛkɔcha bɛ̍ɛ̄nɛ̄. Ɔla̍ā ge̍ē ya̍ nīi āchɛ yī Iju̍u ē kpi̍ya̍nya ē tāa aa̍. 12Lɛlā ɔdwɔ̄bi̍ yī āchɛ yī Iju̍u bī ɔpiyɛ mwɛbɛ mwɛbɛ ge̍ de āchɛ yī yɛchɛ wa̍a̍. Yeklo̍ nīi āchɛ yī Iju̍u gbo la ɔpɔ̄pū yī Ɔwɔ ma̍ bī wɔdu yī ɔpiyɛ ge̍ de Ɛchɛkɔcha wa̍a̍. O̍ ge̍ re̍ka āchɛ yī Iju̍u pɔ̍ɔkɔ yī Ɔwɔ la ɔgɔ̄grāa nɛ ma̍, ɔpiyɛ nūma̍ ge̍ē lɛ ke̍ke̍ni̍ kana̍ ma̍ ēēe!
Ɔhɛ̍ta̍ nīi hɔ̄ de ɛchɛkɔcha ma̍
13U̍ma̍ama, n ge̍ē kɛlā tāa ala̍ nīi - Ɛchɛkɔcha ma̍: Kpɛɛ ku olo̍ ɔha̍lɔha̍ nīi ami chī re̍ka ɔlɛrɔ̄ yī Iji̍sɔ̄ɔsi de ala̍ Ɛchɛkɔcha nɛ ma̍, n ge̍ē wīyā la u̍ku̍rɔ̍ yī u nūma̍. 14Ɔha̍ni̍, n ē ya̍ nīi Iju̍u nīi - āchɛ yī ami ɔlɔjā ma̍ ē kpi̍ya̍nya ē tāa ala̍. Bū la ɛbɛ ɔla̍ā, ɔha̍ni̍ Ɔwɔ ē de ibiha̍ yī wā hɛ̍ ē ta̍. 15Wu̍chē oji̍ nɛ, Ɔwɔ de wa̍ wu̍ligbo̍ ma̍, yɛchɛ wa̍a̍ de rɛ̍ɛya ba̍la Ɔwɔ bɛ̍ɛ̄nɛ̄. O̍ ge̍ re̍ka Ɔwɔ chōo̍chē nāa aa̍ ba̍ ɔgɛgɛ ma̍, kana̍ kpɛ̍ɛ nīi o̍ ge̍ē lɛ ma̍? Lēchi̍, o̍ ge̍ē lɛ bɔ̄ɔkɔ nīi ɔ̄chɛ ē hye̍ēyī bū la okū wā la ɔhɔ̄leyī ma̍.
16Ala̍ ma̍ gɛ ko̍ō! Ɔ̄chɛ ge̍ de irwi ɔrāarāa nīi bū la ibrɛ̍ɛdi ma̍ kɔ̄ de Ɔwɔ, ɔ̍lɔma̍ o̍ re̍ka ākpā yī ibrɛ̍ɛdi ɔla̍ā ligbo̍ ligbo̍ wa̍a̍, o̍ de kwɔbɔ̄ de Ɔwɔ mɛ̍. Ɔ̄chɛ ge̍ chī de ɛgba yī ɔchi̍ ɔha̍ kɔ̄ de Ɔwɔ mɛ̍, o̍ re̍ka a̍bɔ̄ yī ɔchi̍ ɔla̍ā wa̍a̍ - iyī Ɔwɔ bɛ̍ɛ̄nɛ̄ nɛ. 17Ɔchi̍ nīi re̍ka o̍līifu nīi e̍ ē tōtū ma̍, e̍ de a̍bɔ̄ yī nū ɛha̍ kpo̍ hwō. E̍ bī a̍bɔ̄ yī o̍līifu ɔha̍ nīi bū rɛ la a̍chi̍ ji ma̍ ge̍ ku ɔ̍ mɛ̍. Ala̍ Ɛchɛkɔcha re̍ka o̍līifu ɔla̍ā nīi bū rɛ la a̍chi̍ ji ma̍ a̍nɛ. U̍ma̍ama, ala̍ chī yɛ amu ē bɔ̍ɔ̄ba̍ ē nāa wɔhu̍ ba̍la ɔhɔ̄leyī ɔnɔ̄kɔ̄kū yī āchɛ yī Iju̍u mɛ̍. 18O̍ chī lɛ i̍ngɔ̍ɔ nyaa ma̍, ala̍ e̍e chi̍hi̍ya̍ yī āchɛ nīi lɛ bāa a̍bɔ̄ yī o̍līifu nīi e̍ de kpo̍ hwō ma̍ ni̍. Ɛba̍achɛ ma̍, ala̍ ge̍ē u̍tu jɛ̄ kana̍ ma̍? Ala̍ chī lɛ bāa abɔ̄ yī ɔchi̍ ɔbɔbɔ ma̍. I̍ ala̍ ē chī bī ɔgba yī ɔchi̍ ɔlɔjā a̍ni̍. Ɛgba ē bī ala̍ nīi re̍ka a̍bɔ̄ ma̍ a̍nɛ.
19Ala̍ chī ge̍ē bī gbogū mɛ hīka, je̍ka ɛ̍lɛ de a̍bɔ̄ ɛla̍ā hwō hɛ̄ɛbɛ lā de ala̍ mɛ̍. 20O̍ lɛ i̍ngɔ̍ɔ ichɛ̄ɛhi. Ɔwɔ de wa̍ hwō wu̍chē lɔkɔ nīi e̍ de ɔtū che Ɔwɔ ni̍ ma̍. Ɔwɔ chī de ala̍ ku abɔ̍ɔ riyi̍ yī wā wu̍chē lɔkɔ nīi ala̍ de ɔtū che ɔ̍ ma̍. Ɛba̍achɛ ɔha̍lɔha̍ ge̍ e̍e hɔ̄ la ɛri̍ya̍ ogbōgbo yī ala̍ wu̍chē ɔla̍ā ni̍. Ɔkɔkɔ ɔla̍ā, ala̍ ā tūuhwi. 21Wu̍chē oji̍ nɛ, āchɛ yī Iju̍u nīi lɔ̄lɛ bāa a̍bɔ̄ nīi ku abɔ̍ɔ la ɔchɔ̍ɔwɔ yī wā ma̍, Ɔwɔ i̍ pi̍ye̍mā hī wā ji ni̍. Ala̍ gbɛri̍ya̍ ka ɔ̍lɔ ge̍ē pi̍ye̍mā hī ala̍ ji ē mɛ? 22Bū la ɛbɛ ɔla̍ā, alɔ ē ma̍ lɔkɔ nīi Ɔwɔ jyɛ̍ɛ̄lā tāa āchɛ kɛ̄ɛ lwɔnɔnɔ tāa āchɛ ma̍ gɛ. Ɔwɔ lwɔnɔnɔ tāa āchɛ nīi gwāajɛ ma̍. Ala̍ ma̍, Ɔwɔ yɛ ē jyɛ̍ɛ̄lā tāa ala̍, o̍ chī ge̍ē ya̍ i̍ngɔ̍ɔ kpɛɛ ge̍ē ba̍ la yɛ̄grāa nīi hi anu̍ ɔlɔjā ɔtū ma̍. O̍ i̍ ge̍ chī lɛ i̍ngɔ̍ɔ ni̍, ɔ̍lɔma̍ o̍ ge̍ē de ala̍ titi ē hwō ta̍anū. 23Āchɛ yī Iju̍u titi ge̍ tu̍labɔ̄ hī ɔtū i̍ de che Ɔwɔ ni̍ yī wā ɔla̍ā, Ɔwɔ ge̍ē ku̍chē la aa̍ ē ku la ɛbɛbɛ yī wā. Wu̍chē oji̍ nɛ, Ɔwɔ lwɔhu̍ ge̍ē ku̍chē la aa̍ ku aba̍bɔ̍ɔ ē mɛ. 24Ala̍ nīi - Ɛchɛkɔcha ma̍ lɛ bāa a̍bɔ̄ yī o̍līifu ɔla̍ā nīi bū rɛ la a̍chi̍ ji nīi e̍ de ɔ̍ hwō bī ge̍ ku la o̍līifu nīi e̍ tōtū ma̍. O̍ i̍ chī ku i̍ngɔ̍ɔ la ɔchɔ̍ɔwɔ ni̍. Āchɛ yī Iju̍u ma̍ lɛ bāa o̍līifu ɔla̍ā nīi e̍ tōtū yɛ ē gbla̍a anu̍ ma̍. O̍ ge̍ē hɛ̍ kpɛ̍ɛ ē de Ɔwɔ la oku̍chē la a̍bɔ̄ yī ɔchi̍ ɔlɔjā ge̍ ku aba̍bɔ̍ɔ la ɔchi̍ ɔlɔjā.
Ɔwɔ ē mlɛ̍ha̍ de āchɛ wa̍a̍
25Aɛ̍nɛ̍ yī u, lɛlā olēchi̍ lēchi̍ ɔha̍ nīi - lɛlā ɔtrɛ̍ba ma̍ hɔ̄ amu nīi n chikpo̍ nīi ala̍ ge̍ē jo̍ōkū. O̍ ge̍ē ya̍ nīi ala̍ ē pi̍ye̍mā la ɔgbɛri̍ya̍ hīka ala̍ ɔ̍lɔ je̍ ka̍ka̍. Arɔ̄ odulɛhu̍ yī Ali̍sɛ̄rɛli i̍ ge̍ē lɛ i̍ngɔ̍ɔ kpɛɛ ni̍. O̍ ge̍ē hɔ̄ kpɛɛ ē ku yɛ̄grāa ɔla̍ā nīi Ɛchɛkɔcha wa̍a̍ nīi ge̍ē lɛ ɔhɛ̍ta̍ ma̍ ē wā dikpo̍ ē ba̍ Ɔwɔ la ɔgɔ̄grāa o̍bū. 26I̍ngɛ̍ɛ̄nɛ̄ nīi Ɔwɔ ge̍ē hɛ̍ Ali̍sɛ̄rɛli ē ta̍ a̍nɛ, lɔkɔ nīi Īpū yī Ɔwɔ ka ma̍:
“Ɔhɔ̍ɔnyɛta̍ ge̍ē bū la Isa̍yɔn.
O̍ ge̍ē de lɛlā abi̍ ɔyɔ̍ɔ̄ya̍ ɔha̍lɔha̍ wa̍a̍ ē ngmo̍nyi̍ hī wɔma yī Ije̍kɔ̄ɔpu.
27Yɛka yī u nīi n ge̍ē gwa̍ ba̍la aa̍
yɛ̄grāa nīi n ge̍ē de lɛlā ɔdwɔ̄bi̍ yī wā kɔ̄ de wa̍ ma̍ bī aa̍ a̍nɛ.
Ami Ɔwɔ ka i̍ngɔ̍ɔ a̍nɛ.”
28Wu̍chē lɔkɔ nīi āchɛ yī Iju̍u hi̍hi̍yo̍ Wɔ̄kā Ɔlwɔnyɛ yī Ɔwɔ ma̍, e̍ de pīya aluji yī Ɔwɔ. Ɔla̍ā chī chōo̍chē de pīya ɛpiyabuna de ala̍ nīi - Ɛchɛkɔcha ma̍. Wu̍chē lɔkɔ nīi Ɔwɔ chī hu āchɛ yī Iju̍u ohōhu ma̍, e̍ re̍ka aɛ̍ɛya yī Ɔwɔ kpɛɛ we̍ wu̍chē yī a̍dɔ̄kū yī wā we̍. 29Wu̍chē oji̍ nɛ, ɔ̄chɛ nīi Ɔwɔ ge̍ de ɔ̍ hōhu, de ɔpiyɛ de ɔ̍ mɛ̍, o̍ i̍ ē pīya ūkpɔ̄tū ta̍ gɛ ni̍. 30Ala̍ nīi - Ɛchɛkɔcha ma̍, je̍ka aa̍ ala̍ tɔ̍ɔkɔ yī Ɔwɔ i̍gbi̍chɛ o̍bū? U̍ma̍ama ma̍, Ɔwɔ mlɛ̍ha̍ yī ala̍ wu̍chē yī āchɛ yī Iju̍u nīi tɔ̍ɔkɔ yī Ɔwɔ ma̍. 31Wu̍chē lɔkɔ nīi Ɔwɔ ma̍ ala̍ lɛha̍ ma̍, āchɛ yī Iju̍u titi tɔ̍ɔkɔ yī Ɔwɔ hɛ̄ɛbɛ nīi Ɔwɔ ge̍ē ma̍ aa̍ titi lɛha̍ bɛ̍ɛ̄nɛ̄. 32Wu̍chē oji̍ nɛ, Ɔwɔ ya̍ nīi āchɛ wa̍a̍ de pīya aligbakɔbɔ wu̍chē yī ɔkɔlɛ̄lā yī Ɔwɔ i̍po̍ōpo̍ ni̍. O̍ ya̍ i̍ngɔ̍ɔ hɛ̄ɛbɛ ge̍ē de lɛha̍ ɔmɔ̍ɔ̄ma̍ yī nū chabɔ̄ hu̍ wā.
O̍gbo̍ ke̍ - iyī Ɔwɔ
33Ɔwɔ hwɔhi lɛlā glɛbɛta̍ kpa̍a! Lɛlā oje̍ ka̍ka̍ yī nū ba̍la ochi̍chi̍ lɛlā ojo̍ōje̍ yī nū glɛbɛta̍ kpa̍a! Ɔ̄nyɛ kpɛ̍ɛ u̍tu ge̍ē ka ochi̍chi̍ yī lɛlā ɔmɔ̄miya yī nū mɛ ma̍? 34O̍ lɛ lɔkɔ nīi Īpū yī Ɔwɔ ka ma̍:
“Ɔ̄nyɛ je̍ ɛri̍ya̍ yī ūkpɔ̄tū yī Ādā ma̍/?
Ɔ̄nyɛ kpɛ̍ɛ ge̍ē chabɔ̄ yī lɛlā hu̍ ɔ̄ mɛ ma̍?
35Ɔ̄nyɛ kpɛ̍ɛ kɔ̄ ɔjā de Ɔwɔ je̍
nīi ngma̍ nīi Ɔwɔ ge̍ē kla̍ ɔlɔjā ure̍ ma̍/?”
36Ɔwɔ ɔlɔjā ya̍ ɔjāha̍ ɔjāha̍ wa̍a̍ a̍nɛ. Ɔjāha̍ ɔjāha̍ wa̍a̍ chī hɔ̄ bū la abɔ̄ yī nū de anu̍ ɔlɔjā. O̍gbo̍ ge̍ - iyī Ɔwɔ kpɛɛ ku yɛ̄grāa ɔha̍lɔha̍! O̍ ge̍ lɛ i̍ngɔ̍ɔ!
Currently Selected:
:
Highlight
Share
Copy
Want to have your highlights saved across all your devices? Sign up or sign in
© 2020 Bible Society of Nigeria (second edition)