Aliro̍om 1

Owu̍tu

1Ami Ipɔ̍ɔli nīi - ɔ̍chɛ̍ yī Ikra̍yisi Iji̍sɔ̄ɔsi, gba̍a ɔlɛrɔ̄ nīi Ɔwɔ hōhu, de abɔ̄ ku u nīi n ge̍ē kā Wɔ̄kā Ɔlwɔnyɛ yī nū de āchɛ ma̍ ta̍ īpū nūma̍ a̍nɛ.

2Ɔwɔ choko̍o yī Wɔ̄kā Ɔlwɔnyɛ nūma̍ i̍ngɔ̍ɔ gbi̍chɛ gbi̍chɛ gala abɔ̄ yī āchɛ ɔkɛrɔ̄ yī nū; e̍ de tɔ̍ɔ̄ta̍ tū la Īpū Ɔnɛ̄ɛhɛhi yī Ɔwɔ. 3Lɛlā yī Ɔyi̍ yī Ɔwɔ nīi - Ādādā yī alɔ re̍ka Iji̍sɔ̄ɔsi Ikra̍yisi ma̍ nɛ. Gala ɔgu yī ɔ̄chɛ̄ɛchɛ nīi o̍ wɛ ma̍, e̍ ma ɔ̍ bū la wɔma yī Ide̍bīidi. 4Gala ɔgu yī Ɔwɔ nīi o̍ wɛ ma̍, e̍ de ɔ̍ chabɔ̄ la wɔhu̍ ɔnɔ̄kɔ̄kū ke̍ke̍ni̍ ka ɔ̍lɔ - Ɔyi̍ yī Ɔwɔ nɛ, bū la onīi Ɔwɔ de ɔ̍ hye̍ēyī la okū ma̍. 5Gala abɔ̄ yī nū nīi Ɔwɔ de ɔplɛ̄ɛhi de u ka amɔ̍lɔ ge̍ de pīya ɔlɛrɔ̄ wu̍chē yī Ikra̍yisi a̍nɛ. O̍ ya̍ i̍ngɔ̍ɔ hɛ̄ɛbɛ nīi n ge̍ē bī āchɛ yī ɔchamɔcha wa̍a̍ ē wā ge̍ē chɛ̄ku ɔ̍ nīi e̍ ē pɔ̍ɔkɔ yī nū. 6Ala̍ titi nīi gblāa abɔ̍ɔ la Iro̍om nīi - āchɛ nīi Ɔwɔ de kwɔbɔ̄ de Iji̍sɔ̄ɔsi Ikra̍yisi ma̍ tū abɔ̍ɔ lipu̍ yī āchɛ nūma̍.

7Anu̍ - ohu̍ nīi n ta̍ īpū nūma̍ tɛ̄rɔ̄ hu ala̍ Aliro̍om nīi Ɔwɔ yɔ̍ɔhɔtū yī ala̍, de abɔ̄ ku ala̍ nīi ala̍ ge̍ē re̍ka āchɛ yī anu̍ ɔlɔjā ma̍ a̍nɛ.

Ɔwɔ A̍dā yī alɔ ba̍la Iji̍sɔ̄ɔsi Ikra̍yisi nīi - Ādādā ma̍ ge̍ de ɔpiyɛ ba̍la ogbodɔ̍dɔ̍ de ala̍ wa̍a̍.

Ɔhā ɔda Ɔwɔ o̍be

8N yɛ amu ē da Ɔwɔ yī u o̍be gala abɔ̄ yī Iji̍sɔ̄ɔsi Ikra̍yisi wu̍chē yī ala̍ wa̍a̍. Wu̍chē oji̍ nɛ, yɛchɛ wa̍a̍ yɛ amu ē po̍ lɔkɔ nīi ala̍ de ɔtū che Ɔwɔ ma̍. 9Ɔwɔ ɔlɔjā nīi n hɔ̍chɛ̍ yī nū la ūkpɔ̄tū yī u wa̍a̍ bū la Wɔ̄kā Ɔlwɔnyɛ yī Ɔyi̍ yī nū nīi n yɛ ē ka ē de āchɛ ma̍ ge̍ē chabɔ̄ mɛ hīka ichɛ̄ɛhi nīi amɔ̍lɔ ē ka a̍nɛ. Ɔwɔ jo̍ōkū hīka amɔ̍lɔ ē bla ē tū ala̍ 10myɛ̄grāa-myɛ̄grāa la ɔhā yī u nīi n ji ma̍. Bū la lɛlā ɔnɛ̄ɛhɛhi lɔkɔ nīi Ɔwɔ ɔlɔjā chikpo̍ ma̍, n ra̍ābɔ̄ hīka Ɔwɔ ge̍ ya̍ lɛbɛ nīi n ē wā ge̍ ma̍ ala̍ lɛɛ nūma̍ bɛ̍ɛ̄nɛ̄. 11Wu̍chē oji̍ nɛ, o̍ yɛ ē hla̍ ami kpɛɛ la ɔwā ge̍ ma̍ ala̍ hɛ̄ɛbɛ nīi ala̍ titi ge̍ nāa ɔpiyɛ yī Ɔwɔ nīi ge̍ē ya̍ nīi ala̍ ē lwɔhɔ̍hu̍ ma̍ ba̍la ami. 12Ɔjā nīi n yɛ ē ka ma̍, ami ba̍la ala̍ ɔnāa wɔbɔ̄ otōtū la abɔ̄ yī ɔ̍nyīnū nɛ. Ɔtū ode chōche yī ala̍ ge̍ tū u wɔbɔ̄, nīi iyī u titi tū ala̍ wɔbɔ̄ nīi n ka a̍nɛ.

13Aɛ̍nɛ̍ yī u, ala̍ ā ma̍ gɛ ko̍ō! Yɛ̄grāa yɛ̄mɛ̄mɛ̄, n miya yɛ ge̍ē wā ge̍ē ma̍ ala̍, ɔjā ɔha̍ ē chī wā ge̍ē ku̍ u chi̍yɛ i̍ngi̍ngɔ̍ɔ. N chikpo̍ ge̍ē ya̍ nīi āchɛ ɛha̍ ē de pīya āchɛ yī Ikra̍yisi abɔ̍ɔ la ɛbɛ yī ala̍ lɔkɔ nīi n ya̍ la ɛbɛ yī Ɛchɛkɔcha ehēhī wa̍a̍ ma̍. 14Wu̍chē oji̍ nɛ, n dūre̍ yī lɛlā yī āchɛ wa̍a̍: āchɛ orwēeyī ka̍ka̍ ba̍la alipu̍ yī a̍chi̍, āchɛ eji̍īpū ka̍ka̍ ba̍la i̍je̍ ɔjɔ̄jā ni̍. 15Wu̍chē yī ɔla̍ā, o̍ yɛ ē hla̍ ami kpɛ̍ɛ la ɔwā ge̍ kā Wɔ̄kā Ɔlwɔnyɛ yī Ɔwɔ de ala̍ titi nīi gblāa la Iro̍om ma̍.

Wɔhu̍ yī Wɔ̄kā Ɔlwɔnyɛ yī Ɔwɔ

16N de ūkpɔ̄tū yī u wa̍a̍ che Wɔ̄kā Ɔlwɔnyɛ yī Ɔwɔ la ɔgɔ̄grāa ke̍e̍. Anu̍ - wɔhu̍ yī Ɔwɔ obī hɛ̍ āchɛ wa̍a̍ nīi de ɔtū che Ɔwɔ ma̍ ta̍ a̍nɛ; ɔrāarāa yī nū, āchɛ yī Iju̍u nɛ, o̍bū ma̍ Ɛchɛkɔcha. 17Wu̍chē oji̍ nɛ; Wɔ̄kā Ɔlwɔnyɛ yī Ɔwɔ ē chabɔ̄ lɔkɔ nīi Ɔwɔ ɔlɔjā ya̍ nīi āchɛ de ē lɛ kpakpa ba̍la anu̍ ma̍ a̍nɛ. Ɔla̍ā bū la ɔtū ode che Ɔwɔ ochōche, bū la owu̍tu yī nū kpɛɛ ge̍ chɛ̄ ɔkwɛ̍ɛjī tū. Bū la ɛbɛ ɔla̍ā, o̍ lɛ lɔkɔ nīi Īpū yī Ɔwɔ ka ke̍e̍ ma̍, “Ɔ̄chɛ nīi ge̍ de lɛ kpakpa ba̍la Ɔwɔ bū la ɔtū ode chōche, ɔlɔjā ge̍ē wōwi.”

Āchɛ̄ɛchɛ gblɛfiyɛ wa̍a̍ wu̍chē yī lɛlā ɔdwɔ̄bi̍ ɔyɔ̍ɔ̄ya̍

18Lɛpɔ̄ nīi Ɔwɔ ge̍ē hɛ̍ āchɛ la ɔtū ngurangura yī nū ma̍ hi̍yɛchɛ bū abɔ̍ɔ la ichō yɛ amu yewā dikpo̍ba̍ alɛlā ɔdwɔ̄bi̍ ba̍la alwɔbi̍ lɛlā mɛ̍. Lɛpɔ̄ ɔla̍ā ge̍ē ku̍ āchɛ ɛla̍ā nīi ɔpɔ̄pū yī lɛlā abi̍ ɔyɔ̍ɔ̄ya̍ yī wā ɔ̍lɔma̍ gū ɔpu tū lɛlā olēchi̍ lēchi̍, chɛ̄ nīi āchɛ ge̍ē jo̍ōkū ni̍ ma̍. 19Ɔwɔ ge̍ē ya̍ wā ichi̍; wu̍chē oji̍ nɛ, lɛlā yī Ɔwɔ nīi ɔ̄chɛ ge̍ē jo̍ōkū mɛ ma̍ lā nyaa de wa̍ la ojo̍ōkū. Ɔwɔ ɔlɔjā de lɛlā ɔla̍ā lā gēdēgēdē i̍ngɔ̍ɔ de wa̍ a̍nɛ. 20Wu̍chē oji̍ nɛ, Ɔwɔ lɛ lɛlā ɛha̍ nīi lā ku anu̍ ɔlɔjā nīi ɔ̄chɔ̄chɛ i̍ ē mɔ̍ɔ̄ma̍ mɛ ni̍ ma̍: Wɔhu̍ i̍mɔ̄mɛni̍ yī nū ba̍la ɔkɔ nīi o̍ lɛ nīi o̍ - Ɔwɔ ma̍ nɛ. Bū la ogbi̍chɛ gbi̍chɛ ɔla̍ā nīi Ɔwɔ de yɛchɛ ya̍ ma̍, āchɛ chī yɛ amu ē ma̍ lɛlā ɔla̍ā nīi lā ku ɔ̍ ma̍ bāa ogēdēgēdē ma̍. E̍ yɛ ē ma̍ ɔ̄ bū la ɛjā nīi Ɔwɔ ya̍ wa̍a̍ ma̍. Wu̍chē yī ɔla̍ā, ɔpɔ̄pū ɔha̍lɔha̍ i̍ hɔ̄ nīi e̍ ge̍ē wu̍ oko̍o ni̍. 21E̍ je̍ Ɔwɔ, e̍ i̍ ē chī de otūlichō nīi - iyī nū ke̍e̍ ma̍ ē de ɔ̍ ni̍. E̍ i̍ ē chɛ̄ to̍gbo̍ ē de ɔ̍ o̍bo̍o̍bū ni̍. Ɔkɔkɔ ɔla̍ā, ɛri̍ya̍ ogbōgbo yī wā chōo̍chē mōmu la a̍kra̍kpa̍ yī lɛlā; ūkpɔ̄tū yī wā nīi ta̍lā ji ma̍ de dobū. 22E̍ ē ka aɛ̍lɛ jyɛ̍ɛ̄lā ka̍ka̍, e̍ chī - ali̍bobo ke̍e̍ nɛ. 23Ɔkɔkɔ nīi e̍ ge̍ē ya̍ otūlichō de Ɔwɔ nīi i̍ ē ko̍ōku̍ mɛ ni̍ ma̍, e̍ ē chōo̍chē ya̍ otūlichō de i̍kpe̍ēkū nīi lɛ bāa ɔ̄chɛ̄ɛchɛ, kɛ̄ɛ a̍gba̍ana, kɛ̄ɛ ɛbɛ̍, kɛ̄ɛ ɛjāajɛ opōpi nīi - ɛjā oko̍ōku̍ mɛ wa̍a̍ ma̍.

24Wu̍chē lɔkɔ nīi āchɛ̄ɛchɛ hi̍īchī i̍ngɔ̍ɔ ɔ̄kū ma̍, Ɔwɔ tu̍labɔ̄ hī wā nīi e̍ ge̍ē yɛ̍ɛ̄lā eli̍hi̍hi̍ya̍ ɛla̍ā nīi ē hla̍ āā ɔhɔ̍ɔ̄hla̍ ma̍. E̍ ē yɛ̍ɛ̄lā oliwēyī iwēyī yɛ̄mɛ̄mɛ̄ ba̍la ɔ̍nyīnū bɛ̍ɛ̄nɛ̄. 25E̍ ē de lɛlā olēchi̍ lēchi̍ yī Ɔwɔ ē hīyabɔ̄ la arīmɛ̄. E̍ ē ya̍ otūlichō, chī gba̍a ē hɔ̍chɛ̍ yī ɛjā nīi Ɔwɔ ɔlɔjā yɔ̍ɔ̄ya̍ ma̍ ihihi. Ɔjā nīi e̍ ge̍ē ya̍ i̍ngɔ̍ɔ de Ɔwɔ ɔlɔjā nīi ya̍ ɛjā wa̍a̍ ma̍. Ɔwɔ ngma̍ nīi e̍ ē kā ɔ̄ ɔkɔ̄kā ku yɛ̄grāa ɔha̍lɔha̍ a̍nɛ! O̍ ge̍ lɛ i̍ngɔ̍ɔ!

26Wu̍chē lɔkɔ nīi āchɛ ē ya̍ i̍ngɔ̍ɔ ma̍, Ɔwɔ tu̍labɔ̄ hī wā de lɛlā oliwēyī iwēyī ɔhɔ̍ɔ̄hla̍ ɛbɛ̍bɛ̍ ɛbɛ̍bɛ̍. Anyānyā chōo̍chē kū la ɔla̍ ɔ̍nyīnū gbo tāa ɔ̍nyīnū la ɔpɔ̄pū nīi i̍ ku kpakpa ni̍ ma̍. 27Gala ɔgɔgu ɔla̍ā, angrɔ̄ɔ titi ē pi̍ye̍mā hī ogbo tāa anyā nīi re̍ka ɔgulɛ̄lā kpakpa ma̍, ē chōo̍chē gāa ge̍ kū la ogbo tāa ɔ̍nyīnū. Āchɛ ē yɛ̍ɛ̄lā oliwēyī iwēyī yɛ̄mɛ̄mɛ̄ i̍ngɔ̍ɔ wa̍a̍ ba̍la ɔ̍nyīnū. Bū la ɔla̍ā, Ɔwɔ de ichi̍ nīi ngma̍ la aa̍ ma̍ de wa̍ wu̍chē yī lɛlā i̍ya̍ kpakpa ni̍ ɛla̍ā.

28Lɛlā olēchi̍ lēchi̍ nīi āchɛ je̍ ku̍ Ɔwɔ ma̍, e̍ i̍ chɛ̄ de gbō la ūkpɔ̄tū yī wā ni̍. Wu̍chē yī ɔla̍ā, Ɔwɔ tu̍labɔ̄ hī wā de ɛri̍ya̍ ya̍chi. Bū la ɛbɛ ɔla̍ā, e̍ ē yɛ̍ɛ̄lā nīi ngma̍ nīi e̍ i̍ ge̍ ya̍ ni̍ ma̍: 29Wɔbi̍ lɛlā, ba̍la lɛlā abi̍ ɔyɔ̍ɔ̄ya̍, ba̍la ānyānyi, ba̍la ya̍chi yī lɛlā ɔyɔ̍ɔ̄ya̍ yī angrɔ̄ɔ ba̍la anyā mu wa̍ lipu̍ omōmu a̍nɛ. Ya̍nya, ba̍la ɔ̄chɛ ongmo̍ōngmo̍, ba̍la unu onōnu bɛ̍bɛ̍, ba̍la yɛ̍gra̍ ɔgla̍ āchɛ, ba̍la ochi̍kpo̍ ge̍ ya̍ āchɛ ɔjā ē mu wa̍ lipu̍ omōmu a̍nɛ. E̍ ē ka la ɔ̍nyīnū. 30E̍ ē ka ɔdwɔ̄bi̍ ɔdwɔ̄bi̍ yī ɔ̍nyīnū. Ɔwɔ ta̍ wā anyī. E̍ i̍ ē gbɛri̍ya̍ tū āchɛ ni̍. E̍ ē jɛ̄ ɛba̍achɛ. E̍ ē bī iyī wā gbogū. E̍ ē gbɛrɛ̍ri̍ya̍ yī ɔpɔ̄pū nīi e̍ ge̍ē bī yɛ̍ɛ̄lā abi̍ gāa iyɔ̄bū iyɔ̄bū ma̍. E̍ ē tɔ̍ɔkɔ yī āchɛ nīi ma wa̍ ɔmɔ̄ma ma̍. 31E̍ ya̍chi yī lɛlā ɔha̍lɔha̍ wa̍a̍. E̍ i̍ ē yɛ̍ɛ̄lā lɔkɔ nīi e̍ choko̍o ge̍ē ya̍ ma̍ ni̍. E̍ i̍ ē lɛ yaya ē tāa āchɛ ni̍. E̍ ē chī mlɛ̍ha̍ ē de āchɛ ni̍. 32E̍ jo̍ōkū hīka lihɔ yī Ɔwɔ ɔ̍lɔ ka ɔ̄chɛ nīi - ɔ̍lɔ ge̍ ya̍ ɔhɔ̄leyī la ɔpɔ̄pū eli̍ngɛ̍ɛ̄nɛ̄, ɔpīyaku̍ ɔ̍lɔ ngma̍ la ɔlɔjā a̍nɛ, e̍ chī yɛ abɔ̍ɔ ē yɛ̍ɛ̄lā nūma̍ i̍ngɔ̍ɔ kpɔ̍ɔ̍ ē gāa iyɔ̄bū iyɔ̄bū. E̍ gba̍a nōnuni̍ chɛ̄ hwɔhi hwɔhi ku āchɛ ehēhī nīi ē ya̍ ita yī lɛlā ɛla̍ā ma̍.

Currently Selected:

Aliro̍om 1: YBASR

Highlight

Copy