1 Alikɔ̍rīnti 7

Lɛba̍ yī ɔngrɔ̄ɔ ba̍la ɔnyā

1U̍ma̍ama, n ge̍ē kɛlā nīi ala̍ ta̍ īpū yī nū tɛ̄rɔ̄ hu ma̍ bɛ̍ɛ̄nɛ̄. Lēchi̍ nɛ! Ɔ̄chɛ ge̍ hɔ̄ ke̍e̍ i̍ wu̍ ɔnyā kɛ̄ɛ blɛ̍ba̍ ni̍, ɔlɔjā ya̍ hwɔhi. 2Wu̍chē lɔkɔ nīi ya̍chi yī lɛlā ɔyɔ̍ɔ̄ya̍ yī anyā ba̍la angrɔ̄ɔ de yɔ̍ɔ̄kɔ̄kū ma̍, o̍ ngma̍ nīi angrɔ̄ɔmangrɔ̄ɔ ē wu̍ ɔnyā, nīi anyāmanyā ē blɛ̍ba̍. 3Ɔngrɔ̄ɔ ge̍ yɛ̍ɛ̄lā nīi ngma̍ nīi ɔngrɔ̄ɔ ɔwɔ̍ɔ̄nyā ē ya̍ ma̍; ɔnyā titi ge̍ yɛ̍ɛ̄lā nīi ngma̍ nīi ɔnyā ɔblɛ̍ba̍ ē ya̍ ma̍. Ɔnyɔnyɛ ge̍ yɛ̍ɛ̄lā nīi ge̍ē hi ɔ̍nyīnū ɔtū ke̍e̍ ma̍. 4I̍ ɔnyā ɔblɛ̍ba̍ lɛ ibi̍īyē yī anu̍ ɔlɔjā a̍ni̍; ɔbu̍ūnū lɔ̄lɛ a̍nɛ. I̍ ɔngrɔ̄ɔ chī lɛ ibi̍īyē yī anu̍ ɔlɔjā a̍ni̍; ɔnyā yī nū lɔ̄lɛ a̍nɛ. 5Ala̍ e̍e hi̍hi̍yo̍ yī ibi̍īyē iyī ɔ̍nyīnū ni̍, ɔ̍chi̍kpa̍kpa̍ ala̍ āchɛ ɛpɛpa chɛ̄ ge̍ē gbo ē hī iyī ala̍ yɛ̄grāa ɔha̍ pi̍nyɛ̍ i̍ngɔ̍ɔ o̍bū. Ɔla̍ā - ɔya̍ lɛbɛ de yɛ̄grāa lā de ɔhā ojōji nɛ. O̍bū ma̍, ala̍ gbo tāa iyī ala̍ bɛ̍ɛ̄nɛ̄. Nɛ̄ni̍, Isa̍tan ge̍ē ma̍ ɛbɛ ē yarɛ wu̍chē yī ɔlɛkwīkwī yī ala̍, ē tu̍ ala̍ tū yī lɛlā ɔdwɔ̄bi̍ ɔyɔ̍ɔ̄ya̍.

6Lɛlā nūma̍ nīi n ka ma̍, i̍ lihɔ nīi n tōtū a̍ni̍. Ɔkɔ nīi n gbɛri̍ya̍ ka o̍ hwɔhi ma̍ nɛ. 7O̍ ge̍ amami nɛ, o̍ ngma̍ nīi āchɛ wa̍a̍ ge̍ hɔ̄ ke̍e̍ bāa ami ma̍. Ɔ̄chɛmɔ̄chɛ chī lɛ ita yī ɔjā ɔha̍ lɛ̍kɛ̍kɔ̍ nīi Ɔwɔ kɔ̄ de ɔ̍ ma̍. O̍ de onūma̍ de ɔ̄chɛ ɔha̍; o̍ ē de ɔla̍ā de ɔha̍.

8U̍ma̍ama, lɛlā yī anyōkū nīi kwɔ̄ɔgba ma̍ ba̍la āchɛ nīi i̍ wu̍ ɔnyā kɛ̄ɛ blɛ̍ba̍ ni̍ ma̍ nīi n ge̍ē ka bɛ̍ɛ̄nɛ̄ a̍nɛ: O̍ ge̍ē hwɔhi pɛtɛpɛtɛ ē de ala̍ nīi o̍ ge̍ re̍ka ala̍ hɔ̄ i̍ngɔ̍ɔ ke̍e̍ lōra̍ala̍ ga iyɔ̄bū iyɔ̄bū bāa ami ma̍. 9A i̍ ge̍ chī yɛ ge̍ē ku̍ iyī wɔ ē bī i̍ngɔ̍ɔ ē mɛ ni̍, ɔ̍lɔma̍ wu̍ ɔnyā kɛ̄ɛ blɛ̍ba̍ gɛ. O̍ hwɔhi pɛtɛpɛtɛ nīi a ge̍ wu̍ ɔnyā kɛ̄ɛ blɛ̍ba̍ hi̍ ɔkɔkɔ nīi a ge̍ē gbo ē hɔ̍ɔ̄hla̍.

10Iyī āchɛ ɔwɔ̍ɔ̄nyā kɛ̄ɛ ɛblɛ̍ba̍ nīi n yɛ ma̍ ge̍ē ka ma̍, lihɔ nīi n tū a̍nɛ. I̍ ami tū a̍ni̍, Ādādā ɔlɔjā nɛ: Ɔnyā ɔblɛ̍ba̍ ge̍ e̍e pɔ̄pīya hī ɔbu̍ūnū ni̍. 11O̍ ge̍ chī pīya hī ɔbu̍ūnū, ɔ̍lɔma̍ o̍ ge̍ hɔ̄ ke̍e̍ lōri̍īnū. Kɛ̄ɛ i̍ngɔ̍ɔ ni̍, e̍ ge̍ de lɛlā yī wā ka la ɔmlɛ̍ɛ̍ nīi o̍ ge̍ ku̍chē ga ɛbɛ yī ɔbu̍ūnū. Ɔngrɔ̄ɔ ge̍ e̍e ta̍ ɔnyā yī nū ni̍.

12Iyī āchɛ ehēhī ma̍, n ge̍ē koko̍o ē de wa̍! Onūma̍ - ami ka a̍nɛ, i̍ Ādādā ɔlɔjā ni̍: Ɔngrɔ̄ɔ ge̍ - Ɔ̄chɛ yī Ikra̍yisi nīi o̍ ge̍ wu̍ ɔnyā nīi i̍ chɛ̄ku Ɔwɔ ni̍, ɔnyā ɔ̍lɔma̍ ge̍ chɛ̄ ge̍ē hɔ̄ i̍ngɔ̍ɔ ē tāa anu̍, ɔngrɔ̄ɔ ge̍ e̍e de ɔ̍ nū ni̍. 13Ɔnyā titi nīi ge̍ - Ɔ̄chɛ yī Ikra̍yisi ge̍ blɛ̍ba̍ nīi ɔbu̍ūnū i̍ chɛ̄ku Ɔwɔ ni̍, ɔngrɔ̄ɔ ɔla̍ā ge̍ chɛ̄ ge̍ē hɔ̄ i̍ngɔ̍ɔ ba̍la anu̍, ɔ̍lɔma̍ ɔnyā ge̍ e̍e ta̍ ɔ̄ ni̍. 14Wu̍chē oji̍ nɛ, ɔbu̍ūnū ɔla̍ā nīi i̍ chɛ̄ku Ɔwɔ ni̍ ma̍ ge̍ē de ē hwɔhi hwɔhi la eyī yī Ɔwɔ bū la ongmo̍tu̍chɛ̄ yī anu̍ ba̍la ɔnyā yī nū ɔla̍ā nīi je̍ Ɔwɔ ma̍. Anu̍ ɔnyā ɔla̍ā nīi i̍ chɛ̄ku Ɔwɔ ni̍ ma̍ titi ge̍ē de ē hwɔhi hwɔhi la eyī yī Ɔwɔ bū la ongmo̍tu̍chɛ̄ yī anu̍ ba̍la ɔbu̍ūnū nīi je̍ Ɔwɔ ma̍. O̍ i̍ ge̍ lɛ i̍ngɔ̍ɔ ni̍ nɛ, ayi̍ nīi e̍ ma ma̍ ge̍ē de ē lɛ bāa ayi̍ yī āchɛ i̍je̍ Ɔwɔ ni̍ ma̍. O̍ de lɛ i̍ngɔ̍ɔ ma̍, e̍ de hwɔhi hwɔhi la eyī yī Ɔwɔ. 15Ɔ̄chɛ nīi i̍ chɛ̄ku Ɔwɔ ni̍ ma̍ ge̍ chī chikpo̍ ge̍ē ku̍ ē pīya hī onīi - Ɔ̄chɛ yī Ikra̍yisi ma̍, pi̍ye̍mā nīi o̍ ge̍ ya̍ i̍ngɔ̍ɔ. O̍ ge̍ de lɛ i̍ngɔ̍ɔ ma̍, ɔ̄chɛ nīi - Ɔ̄chɛ yī Ikra̍yisi ma̍, o̍ ge̍ - ɔngrɔ̄ɔ kɛ̄ɛ ɔnyā oo, ɔlɔjā i̍ gblɛfiyɛ yī lɛlɛ̄lā abɔ̍ɔ la lɛlā ɔla̍ā ni̍. Ɔwɔ ma̍ hī ala̍ ɛra̍ nīi ala̍ ge̍ē gblāa la ogbodɔ̍dɔ̍ ke̍e̍. 16Ala̍ gbɛri̍ya̍ yī nū we̍ e̍e, Ɔnyā ɔblɛ̍ba̍, ɔha̍ni̍ awɔ ge̍ē ya̍ nīi ɔbu̍wɔ ē lɛ ɔhɛ̍ta̍ a̍nɛ bɛ̍ɛ? Ɔngrɔ̄ɔ ɔwɔ̍ɔ̄nyā, ɔha̍ni̍ awɔ ge̍ē ya̍ nīi ɔnyā yī wɔ ē lɛ ɔhɛ̍ta̍ a̍nɛ bɛ̍ɛ?

Hɔ̄ lɔkɔ nīi Ɔwɔ hī wɔ ɛra̍ ma̍

17Ɔnyɔnyɛ ge̍ hɔ̄ lɔkɔkɔ nīi Ādā ɔlɔjā kɔ̄ ɔjā de ɔ̍ ma̍ ba̍la ɔkɔ nīi ɔlɔjā lɛ nīi Ɔwɔ hī ɔ̄ ɛra̍ ma̍. Ɔgulɛ̄lā nūma̍ nīi n ē ngū āchɛ la ogrēeyī yī āchɛ yī Ɔwɔ wa̍a̍ a̍nɛ. 18Ɔ̄chɛ nīi twɔ̍wu̍ ma̍ ge̍ nāa lɛlā nīi Ɔwɔ hī ɔ̄ ɛra̍ ma̍ mɛ̍, ɔlɔjā ge̍ e̍e chōo̍chē chikpo̍ yī ode lɛlā yī wɔwu̍ ɔtɔ̍ɔ̄ta̍ yī nū ɔla̍ā ngmo̍nyi̍ gɛ ni̍. Ɔ̄chɛ nīi i̍ twɔ̍wu̍ ni̍ ma̍ ge̍ chī nāa lɛlā nīi Ɔwɔ hī ɔ̄ ɛra̍ yī nū ma̍ mɛ̍, ɔlɔjā ge̍ e̍e chōo̍chē chikpo̍ yī wɔwu̍ ɔtɔ̍ɔ̄ta̍ gɛ ni̍. 19Wu̍chē oji̍ nɛ, wɔwu̍ ɔtɔ̍ɔ̄ta̍ kɛ̄ɛ i̍ta̍ ni̍, i̍ ɔjɔ̄jā ni̍. Ɔjā nīi - ɔka̍ka̍ ma̍, lɛlā ɔya̍ lɔkɔ nīi Ɔwɔ ka ma̍ nɛ. 20Ɔ̄chɛmɔ̄chɛ ge̍ hɔ̄ ke̍e̍ lɔkɔ nīi ɔlɔjā lɛ nīi Ɔwɔ hī ɔ̄ ɛra̍ ma̍. 21Yɛ̄grāa nīi Ɔwɔ hī wɔ ɛra̍ ma̍, awɔ ka̍a - ɔfiyɛ nɛ oo! Ɔ̍lɔma̍ a ā gbɛri̍ya̍ ni̍. A ge̍ chī lɛ ɔpɔ̄pū ɔha̍ nīi a ge̍ē de iyī wɔ ē hīya lɛfiyɛ, ɔ̍lɔma̍ kwɔgu yī nū gɛ. 22Nɛ̄ni̍, ɔ̄chɛ nīi ge̍ ɔfiyɛ nīi Ādā chī hī ɔ̄ ɛra̍ mɛ̍, ɔ̍lɔma̍ ɔlɔjā de pīya ɔ̄chɛ ɔlamu yī Ādā mɛ̍. Ɔ̄chɛ nīi ge̍ chī ɔ̄chɛ ɔlamu nīi Ikra̍yisi hī ɔ̄ ɛra̍, o̍ re̍ka ɔlɔjā - ɔfiyɛ yī Ikra̍yisi bɛ̍ɛ̄nɛ̄ nɛ. 23Ɔwɔ ra̍ ala̍ ɔrɔ̍ɔ̄ra̍ la ɔjā. Wu̍chē yī ɔla̍ā, ɔ̄chɔ̄chɛ ge̍ e̍e wɛ ɔfiyɛ yī āchɛ̄ɛchɛ ni̍. 24Aɛ̍nɛ̍ yī u, ɔ̄chɛmɔ̄chɛ ge̍ hɔ̄ ke̍e̍ la ɔgɛnɛgɛnɛ ba̍la Ɔwɔ lɔkɔkɔ nīi ɔlɔjā hɔ̄ yɛ̄grāa nīi Ɔwɔ hī ɔ̄ ɛra̍ ma̍.

Lɛlā yī āchɛ ɔhɔ̄ ke̍e̍ lōri̍īwā

25U̍ma̍ama lɛlā yī āchɛ i̍wɔ̍ɔ̄nyā ni̍ bɛ̍ɛ̄nɛ̄ nɛ: Onūma̍ i̍ Ādā ɔlɔjā ka de u ka amɔ̍lɔ ge̍ ka a̍ni̍. Ɛri̍ya̍ yī ami ɔlɔjā nɛ. N yɛ ē ka i̍ngɔ̍ɔ, wu̍chē oji̍ nɛ, ami - ɔ̄chɛ nīi Ādā lɛ̍ɛhi tāa ami ngma̍ nīi āchɛ ē de ɔtū che u nɛ.

26Wu̍chē yī akanya nīi hɔ̄ yɛ̄grāa nūma̍ ma̍, n gbɛri̍ya̍ hīka o̍ ngma̍ nīi ɔ̄chɛ ē hɔ̄ ke̍e̍ lɔkɔkɔ nīi o̍ hɔ̄ o̍bū ma̍. 27A ka̍a wu̍ ɔnyā oo! Ɔ̍lɔma̍, a ā chikpo̍ yī ode ɔnyā yī wɔ nū ni̍. A i̍ wu̍ ɔnyā ni̍? Ɔ̍lɔma̍ a ā kwɔgu yī ɔnyā owo̍ōwu̍ gɛ ni̍. 28A ge̍ chī wu̍ ɔnyā, i̍ lɛlā ɔdwɔ̄bi̍ ɔha̍ nīi a yɔ̍ɔ̄ya̍ a̍ni̍. Ɔnyā i̍blɛ̍ba̍ we̍ ni̍ ge̍ chī blɛ̍ba̍, i̍ lɛlā ɔdwɔ̄bi̍ ɔha̍ nīi o̍ yɔ̍ɔ̄ya̍ a̍ni̍. Akanya chī ge̍ē hɔ̄ de wa̍ la ɔhɔ̄leyī yī lɛba̍ yī wā ɔ̍lɔma̍. Anu̍ nīi n yɛ ē chikpo̍ yī ode ala̍ lā la ɛkū hī ɔla̍ā a̍nɛ.

29Aɛ̍nɛ̍ yī u, ɔjā nīi hu̍ nīi n ka i̍ngɔ̍ɔ ma̍ hɔ̄ ma̍ a̍nɛ! Yɛ̄grāa i̍ hōhī ɛmla̍a gɛ ni̍. Bū la u̍ma̍ama nūma̍, āchɛ ɔwɔ̍ɔ̄nyā ge̍ ya̍ bɔ̄ɔjā nīi e̍ i̍ wu̍ ɔnyā ni̍ ma̍ bɛ̍ɛ̄nɛ̄. 30Āchɛ nīi yɛ ē drɛ̄ɛgba ma̍ ge̍ ya̍ bɔ̄ɔjā nīi e̍ i̍ yɛ ē he̍ēyīwɔnɔ ni̍ ma̍. Āchɛ nīi yɛ ē hɛhɛ ma̍ ge̍ ya̍ bɔ̄ɔjā nīi e̍ i̍ yɛ ē wɔ̄wīyā ni̍ ma̍. Āchɛ nīi yɛ ē ra̍ ɔjā ma̍ ge̍ē ya̍ bɔ̄ɔjā nīi e̍ i̍ lɛ ɔjā ɔla̍ā nīi e̍ ra̍ ma̍ gɛ ni̍ ma̍. 31Āchɛ nīi yɛ ē tɔ̍hi̍ yī āɛ̄jā yī yɛchɛ nūma̍ ma̍ ge̍ ya̍ bɔ̄ɔjā nīi e̍ i̍ lɛ yɛ̄grāa de āɛ̄jā ɛla̍ā gɛ ni̍ ma̍. Wu̍chē oji̍ nɛ, lɔkɔ nīi yɛchɛ lɛ u̍ma̍ama hɔ̄ ma̍ ma̍, o̍ i̍ ge̍ē ri̍yɛchɛ gba̍a̍ gɛ ni̍.

32N chikpo̍ hīka yɛ̄ngura ɔhɔ̍ɔ̄hɛ̍ ɔha̍lɔha̍ i̍ ge̍ hɔ̄ de ala̍ ni̍. Ɔ̄chɛ nīi i̍ wu̍ ɔnyā ni̍ ma̍ ē de iyī nū wa̍a̍ lā de u̍ku̍rɔ̍ yī Ɔwɔ ɔyɔ̍ɔ̄ya̍. Wu̍chē oji̍ nɛ, o̍ yɛ ē chikpo̍ ge̍ē yɛ̍ɛ̄lā nīi ge̍ē hī Ɔwɔ ɔtū ma̍. 33Ɔ̄chɛ nīi chī wu̍ ɔnyā ma̍ ē de iyī nū lā de lɛlā yī lipu̍ yɛchɛ nūma̍. Wu̍chē oji̍ nɛ, o̍ yɛ ē chikpo̍ ge̍ē ya̍ ɔjā nīi ge̍ē lɛ ɔnyā yī nū wɔnyɛ ma̍. 34Bū la ɛbɛ ɔla̍ā, lɛlā ɛpɛpa nūma̍ ē pi ɔ̍ gāa oo̍he oo̍he. Ɔnyā nīi i̍ blɛ̍ba̍ we̍ ni̍ ma̍ kɛ̄ɛ nīi i̍ je̍ ɔngrɔ̄ɔ ni̍ ma̍ ē chikpo̍ ode iyī nū lā ke̍e̍ de u̍ku̍rɔ̍ yī Ɔwɔ ɔyɔ̍ɔ̄ya̍. Wu̍chē oji̍ nɛ, o̍ chikpo̍ nīi ibi̍īyē yī nū ba̍la uhu yī nū ge̍ lā ke̍e̍ de Ɔwɔ lōri̍īnū. Ɔnyā ɔblɛ̍ba̍ ma̍ ē chikpo̍ ode iyī nū lā de lɛlā yī lipu̍ yī yɛchɛ nūma̍. Wu̍chē oji̍ nɛ, o̍ chikpo̍ ge̍ē ya̍ ɔjā nīi ge̍ē lɛ ɔbu̍ūnū wɔnyɛ ma̍.

35N yɛ ē kɛlā nūma̍ wu̍chē oji̍ nɛ, n chikpo̍ ge̍ē tū ala̍ wɔbɔ̄. N i̍ yɛ ē ya̍ hɛ̄ɛbɛ nīi o̍ ge̍ē de ē yi̍chi̍chi̍ ē de ala̍ ni̍. N yɛ ē chikpo̍ nīi ala̍ ge̍ē ya̍ ɔgulɛ̄lā nīi - ɔkpakpa ba̍la ɔlamu ɔlamu ma̍. N chikpo̍ nīi ala̍ ge̍ē de iyī ala̍ wa̍a̍ ligbo̍ ligbo̍ lā de u̍ku̍rɔ̍ yī Ɔwɔ nīi ɔha̍lɔha̍ ge̍ e̍e kɔ̄ lā ga ɛkū ni̍.

36Ɔngrɔ̄ɔ ba̍la ɔnyā nīi ge̍ ti̍yaha iyī wā yɛ ge̍ē de iyī wā wu̍ o̍bū chōo̍chē pi̍ye̍mā bɛ̍ɛ? Ɔngrɔ̄ɔ ge̍ yɛ ē gbɛri̍ya̍ ka anɔ̍lɔ ya̍ ɔɔ̍pɛ̄ ɔnɔ̄nyā ɔla̍ā ɔyɔ̍ɔ̄ya̍, nīi ɔnyā ge̍ yɛ ē hla̍ anu̍ ɔ̄kɔ̄kū, o̍ ge̍ yɛ ē gbɛri̍ya̍ ka aɛ̍lɛ ge̍ē de iyī aa̍ ē wu̍, ɔ̍lɔma̍ e̍ ge̍ de iyī wā wu̍ lɔkɔ nīi e̍ chikpo̍ ma̍. 37Ɔngrɔ̄ɔ nīi ɔ̄chɔ̄chɛ i̍ ge̍ ku̍ ɔ̄ wɔhu̍ wɔhu̍ ni̍, nīi o̍ miya la ūkpɔ̄tū yī nū brii ka anɔ̍lɔ i̍ ge̍ē wu̍ ɔnyā ni̍ bɛ̍ɛ? Ɔlɔjā ge̍ ku̍ iyī nū bī brii i̍ngɔ̍ɔ gɔ̄grāa, nīi o̍ ge̍ de miya i̍ngɔ̍ɔ abɔ̍ɔ la ūkpɔ̄tū lɔkɔ nīi o̍ ge̍ē ya̍ ma̍ mɛ̍, ɔ̍lɔma̍ ɔlɔjā ya̍ hwɔhi nīi o̍ i̍ ge̍ wu̍ ɔɔ̍pɛ̄ ɔnɔ̄nyā ɔla̍ā gɛ ni̍. 38Bū la ɛbɛ ɔla̍ā, ɔ̄chɛ nīi chōo̍chē de ɔɔ̍pɛ̄ ɔnɔ̄nyā yī nū wu̍ ma̍ ya̍ hwɔhi; onīi i̍ chī de iyī nū wu̍ ni̍ ma̍, anu̍ ya̍ hwɔhi gata̍ a̍nɛ.

39Ɔnyā ɔblɛ̍ba̍ nīi ɔbu̍ūnū hɔ̄leyī we̍ ma̍ tū lɛfiyɛ yī ɔbu̍ūnū we̍. Ɔbu̍ūnū ge̍ pīyaku̍ o̍bū mɛ̍, o̍ re̍ka o̍ wu̍ lɛfiyɛ ɔla̍ā mɛ̍; o̍ ge̍ē blɛ̍ba̍ ɔha̍ nīi o̍ chikpo̍ ma̍ bɛ̍ɛ̄nɛ̄. O̍ chī ge̍ē blɛ̍ba̍ ɔla̍ā bāa Ɔ̄chɛ yī Ikra̍yisi ma̍. 40O̍ ge̍ chī kwɔ̄ɔgba hɔ̄ ke̍e̍, anu̍ nīi o̍ ge̍ē lɛ ɔwɔ̄wīyā gɔ̄ga a̍nɛ. Ɔla̍ā lɔkɔ nīi ami ɔlɔjā gbɛri̍ya̍ ma̍ nɛ; je̍ka aa̍ ami titi lɛ Uhu yī Ɔwɔ.

Currently Selected:

1 Alikɔ̍rīnti 7: YBASR

Highlight

Copy