1 Alikɔ̍rīnti 14
14
Ɛjā nīi Uhu Ɔnɛ̄ɛhɛhi yī Ɔwɔ ē de nīi - ɔka̍ka̍ ma̍
1Ɔhɔtū ɔlɔ̄lɛ nīi ala̍ ge̍ē kwɔgu ē gata̍ a̍nɛ. Ala̍ de ūkpɔ̄tū yī ala̍ rɛ la ɛjā nīi Uhu yī Ɔwɔ ē de ma̍. Ɛrɔ̄ yī Ɔwɔ ɔkɔ̄ka pi̍i̍ nɛ. 2Ɔ̄chɛ nīi ē ka ɔcha ɔlɛbɛ̍bi̍ ɛha̍ ma̍, i̍ āchɛ̄ɛchɛ nīi o̍ ē ka ba̍la aa̍ a̍ni̍; Ɔwɔ nɛ. Wu̍chē oji̍ nɛ, ɔ̄chɔ̄chɛ i̍ ē po̍ ochi̍chi̍ yī ɔjā nīi o̍ ē ka ma̍ ni̍. Lɛlā olēchi̍ lēchi̍ nīi trɛ̍ba ma̍ nīi o̍ yɛ ē ka bū la wɔhu̍ yī Uhu yī Ɔwɔ a̍nɛ. 3Ɔ̄chɛ nīi ē ka ɛrɔ̄ yī Ɔwɔ ma̍, āchɛ̄ɛchɛ nīi o̍ ē ka ē de wa̍ a̍nɛ. O̍ tū wā wɔbɔ̄, mla aa̍ ɔtū, gbo wa̍ ɔtū nɛnɛ. 4Ɔ̄chɛ nīi ē ka ɔcha ɔlɛbɛ̍bi̍ ɛha̍ ma̍ ē tū iyī anu̍ ɔlɔjā lōri̍īnū wɔbɔ̄. Ɔ̄chɛ nīi ē ka ɛrɔ̄ yī Ɔwɔ ma̍, ogrēeyī yī āchɛ yī Ɔwɔ wa̍a̍ nīi o̍ ē tū wā wɔbɔ̄ a̍nɛ.
5O̍ ge̍ē hi um ɔtū nīi ala̍ wa̍a̍ ge̍ nāa wɔhu̍ yī ɔcha ɔlɛbɛ̍bi̍ ɛha̍ ɔkɔ̄ka. O̍ chī ge̍ē hi um ɔtū gɔ̄ga nīi o̍ ge̍ re̍ka ala̍ wa̍a̍ nāa wɔhu̍ yī ɛrɔ̄ yī Ɔwɔ ɔkɔ̄ka de āchɛ. Wu̍chē oji̍ nɛ, ɔ̄chɛ nīi ē ka ɛrɔ̄ yī Ɔwɔ ē de āchɛ ma̍ - ɔ̄chɛ ɔlamu ɔlamu hi̍ ɔ̄chɛ nīi ē ka ɔcha ɔlɛbɛ̍bi̍ ɛha̍ ma̍ a̍nɛ. Ɔ̍chi̍kpa̍kpa̍ ɔ̄chɛ ɔha̍ hɔ̄ abɔ̍ɔ nīi ge̍ē ka ochi̍chi̍ yī ɔcha ɔlɛbɛ̍bi̍ ɔ̍lɔma̍ nīi o̍ ē ka ma̍, anu̍ nīi o̍ ge̍ē tū ogrēeyī yī āchɛ yī Ɔwɔ ɔla̍ā wɔbɔ̄ mɛ a̍nɛ. 6O̍ lɛ i̍ngɔ̍ɔ ma̍, aɛ̍nɛ̍ yī u, n ge̍ wā dikpo̍ba̍ ala̍ ge̍ yɛ ē ka ɔcha ɔlɛbɛ̍bi̍ ɛha̍ i̍ngɔ̍ɔ ma̍, ɛpiyabuna yī iyī nīi ala̍ ge̍ē lɛ la ami ma̍? Ɔjɔ̄jā i̍ hɔ̄ ni̍, ɔ̍chi̍kpa̍kpa̍ n bī lɛlā ɔha̍ nīi Ɔwɔ de hi̍yɛchɛ ma̍, kɛ̄ɛ ochi̍chi̍ yī lɛlā ojo̍ōje̍ ɔha̍, kɛ̄ɛ ɛrɔ̄ ɔha̍ nīi Ɔwɔ tū ma̍, kɛ̄ɛ lɛlā ongōngū ɔha̍ ge̍ de ala̍.
7Ɛjā bāa aa̍ u̍fle ba̍la lɛ̄ngū nīi - āɛ̄jā yī īrɛ̄ ɔyɔ̍ɔ̄ya̍ ji ma̍, e̍ ge̍ gwō āā ke̍e̍ hɔ̄ɔ̄hɔ̄ hɔ̄ɔ̄hɔ̄ ni̍, kana̍ nīi ɔ̄chɛ ge̍ē je̍ ɔkɔlɛ̄lā nīi e̍ yɛ ē gwō ma̍? 8Kɛ̄ɛ ɔ̄chɛ nīi yɛ ē gwō lɛjī yī lɛwu̍ ma̍ i̍ ge̍ hɛ̄ra̍ kpakpa ni̍ ma̍, kana̍ nīi āchɛ ge̍ē jo̍ōkū tībi̍īyē yī lɛwu̍ ma̍? 9Gala ɔgɔgu, a ge̍ yɛ ē ka ɔcha ɔlɛbɛ̍bi̍ ɛha̍ nīi i̍ lɛ chra̍da̍da̍ ni̍ ma̍, kana̍ nīi ɔ̄chɛ ge̍ē po̍ ochi̍chi̍ yī lɛlā ɔ̍lɔma̍ nīi a yɛ ē ka ma̍? Lɛlā yī wɔ ɔla̍ā wa̍a̍ ge̍ē ta̍anū i̍ngɔ̍ɔ ji ke̍e̍. 10Ɔcha lyɛ̄mɛ̄mɛ̄ nīi āchɛ ē ka amu yɛchɛ nūma̍ ma̍. Onīi i̍ lɛ ochi̍chi̍ wɔ̄bɔ̄bɔ̄ yī nū ni̍ hɔ̄ ni̍. 11N i̍ ge̍ po̍ ɔcha nīi ɔ̄chɛ yɛ ē ka ma̍ ni̍, ɔ̄chɛ nīi yɛ ē ka ɔcha ɔ̍lɔma̍ ma̍ ge̍ē re̍ka Ɛchɛkɔcha la īkprī yī u; ami chī ge̍ē re̍ka Ɛchɛkɔcha la īkprī yī anu̍. 12I̍ngi̍ngɔ̍ɔ nīi lɛlā yī ala̍ lɛ a̍nɛ: N jo̍ōkū hīka ala̍ yɛ ē chikpo̍ lēchi̍ lēchi̍ ge̍ē lɛ ɛjā nīi Uhu yī Ɔwɔ ē de ma̍. Ɔ̍lɔma̍, ala̍ ā chɛ̄rī gɛ nīi ala̍ ge̍ bī ɛjā nīi ge̍ē tū ogrēeyī yī āchɛ yī Ɔwɔ wɔbɔ̄ la ɔjɔ̄jɛ̄ ma̍ ya̍ gba̍a̍.
13Ɔ̄chɛ nīi - ɔ̄chɛ ɔka ɔcha ɔlɛbɛ̍bi̍ i̍ngɔ̍ɔ mɛ ma̍, ɔlɔjā ge̍ jɔhā hɛ̄ɛbɛ nīi Uhu yī Ɔwɔ ge̍ de wɔhu̍ yī ochi̍chi̍ yī lɛlā nīi o̍ ē ka ma̍ de ɔlɔjā. 14Wu̍chē oji̍ nɛ, n ge̍ bī ita yī ɔcha oli̍ngɔ̍ɔ yɛ ē jɔhā, uhu yī u ke̍e̍ yɛ ē jɔhā ɔla̍ā a̍nɛ; ūkpɔ̄tū yī u i̍ ya̍ ɔjɔ̄jā abɔ̍ɔ ni̍. 15N chī ge̍ē ya̍ kana̍ bɛ̍ɛ̄nɛ̄ ma̍? Ɔjā nīi n ge̍ē ya̍ ma̍, n ge̍ē jɔhā la uhu yī u wa̍a̍, n chī ge̍ē gba̍a ē jɔhā la ūkpɔ̄tū i̍ngi̍ngɔ̍ɔ. N ge̍ē gwe̍ejē kā Ɔwɔ ɔkɔ̄kā la uhu yī u wa̍a̍, n chī ge̍ē gba̍a ē gwō kā ɔ̄ ɔkɔ̄kā la ūkpɔ̄tū i̍ngi̍ngɔ̍ɔ. 16Ala̍ ge̍ yɛ ē to̍gbo̍ ē de Ɔwɔ la uhuhu yī ala̍ ma̍, kana̍ nīi ɔ̄chɛ ji nīi hɔ̄ abɔ̍ɔ la ogrēeyī ɔla̍ā ma̍ ge̍ē jo̍ōkū chɛ̄ku ala̍ hīka “O̍ ge̍ lɛ i̍ngɔ̍ɔ” ma̍? Wu̍chē oji̍ nɛ, o̍ i̍ jo̍ōkū yī ɔjā nīi ala̍ yɛ ē ka ma̍ ni̍. 17Bū la ɛbɛ ɔla̍ā, o̍gbo̍ nīi ala̍ yɛ ē ta̍ de Ɔwɔ ma̍ ge̍ hwɔ̄hwɔhi bāa ɔjɔ̄jā ma̍, wɔbɔ̄ otōtū ɔha̍lɔha̍ i̍ hɔ̄ abɔ̍ɔ de ɔ̄chɛ ɔlamu ɔla̍ā ni̍ lachi̍lachi̍.
18N da Ɔwɔ o̍be kpɛ̍ɛji wu̍chē oji̍ nɛ, ami ē ka ɔcha ɔlɛbɛ̍bi̍ oli̍ngɔ̍ɔ ɔla̍ā hi̍ ala̍ wa̍a̍ a̍nɛ. 19Lipu̍ yī ogrēeyī yī āchɛ yī Ɔwɔ, ɔkɔkɔ nīi n ge̍ē ka u̍nu̍nɔ yī lɛlā la oko̍o yī ɔcha ɔlɛbɛ̍bi̍ ɔ̍lɔma̍, ɔkɔkɔ ɔla̍ā, n ge̍ē kɛlā īkprī ɛrwɔ̄ la oko̍o ɔlamu nīi āchɛ wa̍a̍ ē po̍ ma̍. I̍ngɔ̍ɔ nīi n ge̍ē ya̍ ē ngū wā lɛlā a̍nɛ.
20Aɛ̍nɛ̍ yī u, ala̍ e̍e lɛ bāa aɛ̍pɛ̄ ma̍ la ɛri̍ya̍ yī lɛlā ogbōgbo ni̍. Gala ɔgulɛ̄lā ɔdwɔ̄bi̍ ɔyɔ̍ɔ̄ya̍ ma̍, ala̍ ā lɛ bāa aɛ̍pɛ̄ nīi i̍ jɔ̍ha̍ ni̍ ma̍. Ɛri̍ya̍ ogbōgbo yī ala̍ ge̍ lɛ ke̍e̍ bāa anyāku̍ ma̍. 21E̍ ta̍ tū la Īpū yī Ɔwɔ i̍ngɔ̍ɔ hīka ɔ̍lɔ ge̍:
“Ādā Nīi - Ɔwɔ Ma̍ ka hīka:
Anɔ̍lɔ ge̍ē bī ɔcha ɔlɛbɛ̍bi̍ yī āchɛ̄ɛchɛ ē kɛlā de āchɛ nūma̍.
Anɔ̍lɔ ge̍ē kɛlā gala oko̍o yī ɛchɛkɔcha ē de ɛ̍lɛ.
Ɛ̍lɛ i̍ chī ge̍ē darɔ̄ku lɛlā yī anu̍ ni̍ kpɔ̍ɔ̍.”
22Wu̍chē yī ɔla̍ā, ala̍ jo̍ōkū gɛ hīka, lɛlā ɔkɔ̄ka la ɔcha ɔlɛbɛ̍bi̍ oli̍ngɔ̍ɔ nūma̍ i̍ ɔjā ɔchabɔ̄ yī āchɛ nīi de ɔtū che Ɔwɔ ma̍ ni̍. Ɔjā ɔchabɔ̄ yī āchɛ i̍chɛ̄ ku Ɔwɔ ni̍ nɛ. Ɛrɔ̄ yī Ɔwɔ ode kɔ̄ka i̍ chī ɔjā ɔchabɔ̄ yī āchɛ i̍chɛ̄ ku Ɔwɔ ni̍ ni̍. Ɛrɔ̄ yī Ɔwɔ ode kɔ̄ka - ɔjā ɔchabɔ̄ yī āchɛ nīi de ɔtū che Ɔwɔ ke̍e̍ ma̍ nɛ.
23O̍ lɛ i̍ngɔ̍ɔ ma̍, o̍ ge̍ re̍ka ogrēeyī yī āchɛ yī Ɔwɔ wa̍a̍ ge̍ē tū grēeyī, pra̍akū la ɔcha ɔlɛbɛ̍bi̍ ɛha̍ la ɔkɔ̄ka nīi āchɛ ɔlamu ɛha̍ kɛ̄ɛ āchɛ ɛha̍ nīi i̍ chɛ̄ku Ɔwɔ ni̍ ma̍ ge̍ wā abɔ̍ɔ ma̍ bɛ̍ɛ? Lēchi̍, e̍ ge̍ē ka hīka ala̍ ɔ̍lɔ yɛ ē gbyɛ̍lɛ̍. 24O̍ ge̍ chī re̍ka ala̍ wa̍a̍ yɛ ē ka ɛrɔ̄ nīi Ɔwɔ tū ma̍ nīi ɔ̄chɛ ɔlamu kɛ̄ɛ ɔ̄chɛ ɔha̍ nīi i̍ chɛ̄ku Ɔwɔ ni̍ ma̍ wā abɔ̍ɔ bɛ̍ɛ? Lēchi̍, ɔlɔjā ge̍ē kwɛ̍ri̍ya̍ ē tū lɛlā ɔdwɔ̄bi̍ yī nū ɔpɔ̄ɔpɛ̄ bū la lɛlā nīi o̍ yɛ ē po̍ ma̍. Lɛlā ɔla̍ā wa̍a̍ nīi o̍ yɛ ē po̍ ma̍ ge̍ē hɛ̍ ɔ̄ lɛpɔ̄. 25Ɛri̍ya̍ yī lɛlā yī nū nīi trɛ̍ba ma̍ ge̍ē wu̍ lipu̍ ē ti̍yɛchɛ. O̍ ge̍ē pu̍ kpɛ̍ɛ̍ ē ya̍ otūlichō de Ɔwɔ. O̍ ge̍ē de ē ka gbra ɔpɔ̄ɔpɛ̄ ka Ɔwɔ ɔ̍lɔ hɔ̄ amu ba̍la ala̍ lēchi̍ lēchi̍.
Lɛlā ɔya̍ tri̍di̍di̍ la Ogrēeyī yī āchɛ yī Ɔwɔ
26Aɛ̍nɛ̍ yī u, oji̍ - ɔchlɛhu̍ yī lɛlā nūma̍ nīi n yɛ ē ka ma̍? Ala̍ ge̍ē grēeyī i̍ngɔ̍ɔ ē ya̍ otūlichō yī Ɔwɔ ma̍, ɔnyɔnyɛ ge̍ chɛ̄rī bī u̍ku̍rɔ̍ ɔha̍ bāa ejē ogwo̍ kā Ɔwɔ ɔkɔ̄kā ma̍, ba̍la lɛlā ongū āchɛ ongōngū, ba̍la lɛlā nīi Ɔwɔ de hi̍yɛchɛ de ɔ̄chɛ ɔha̍ ma̍, ba̍la ɛrɔ̄ yī Ɔwɔ ɔka la oko̍o yī ɔcha ɔlɛbɛ̍bi̍ ɛha̍, ba̍la ɔka ochi̍chi̍ yī lɛlā yī ɔcha ɔlɛbɛ̍bi̍ ɔ̍lɔma̍. Ɔjāmɔjā nīi ɔnyɔnyɛ ge̍ē ya̍ ma̍ ge̍ re̍ka ɔjā nīi ge̍ē tū ogrēeyī yī āchɛ yī Ɔwɔ wa̍a̍ wɔbɔ̄ ma̍. 27Āchɛ ge̍ yɛ ge̍ē ka ɔcha ɔlɛbɛ̍bi̍ ɔla̍ā la ogrēeyī yī ala̍, āchɛ ɛpa kɛ̄ɛ āchɛ ɛta̍ ka̍ta̍ ge̍ē ka a̍nɛ. E̍ ge̍ chī ka hī oko̍o de ɔ̍nyīnū. Ɔ̄chɛ ɔka ochi̍chi̍ yī lɛlā nīi e̍ ge̍ē ka ma̍ ge̍ hɔ̄ abɔ̍ɔ de ka de āchɛ. 28Ɔ̄chɔ̄chɛ i̍ ge̍ chī hɔ̄ abɔ̍ɔ ge̍ē ka ochi̍chi̍ yī lɛlā nīi e̍ ka ma̍ ē mɛ ni̍, ɔ̍lɔma̍ āchɛ ɔka ɔcha ɔlɛbɛ̍bi̍ i̍ngɔ̍ɔ ɛla̍ā ge̍ hɔ̄ cho̍cho̍ abɔ̍ɔ la ogrēeyī yī āchɛ yī Ɔwɔ. O̍ ge̍ ka de iyī anu̍ ɔlɔjā ke̍e̍ ba̍la Ɔwɔ. 29Āchɛ ɛpa kɛ̄ɛ ɛta̍ nīi ge̍ bī ɛrɔ̄ yī Ɔwɔ abɔ̍ɔ ma̍ ge̍ ka, hɛ̄ɛbɛ nīi āchɛ ehēhī ge̍ gblāa abɔ̍ɔ ē jiya lɛlā yī wā ɔla̍ā ma̍. 30Ɔwɔ ge̍ chī tɛ̄rɔ̄ ɔha̍ hu ɔ̄chɛ ɔha̍ abɔ̍ɔ lipu̍ yī ogrēeyī ɔla̍ā, ɔ̄chɛ nīi bī oko̍o yɛ ē kɛlā ma̍ ge̍ hɛ̍gbɛ̄ɛ̄ o̍bū. 31Ala̍ wa̍a̍, ɔnyɔnyɛ ge̍ ka ɛrɔ̄ yī Ɔwɔ lūkpō lūkpō, hɛ̄ɛbɛ nīi ɔ̄chɛmɔ̄chɛ ge̍ ngū lɛlā de mlɔtū brii. 32Ɔ̄chɛ nīi yɛ ē ka ɛrɔ̄ yī Ɔwɔ ma̍ ge̍ jɔ̍ɔkɔ ku̍ ɛrɔ̄ nīi o̍ ē ka ma̍ bī. 33Ɔwɔ i̍ hī alɔ ɛra̍ wu̍chē yī lɛlā ɔti̍yatū ni̍; ogbodɔ̍dɔ̍ nīi o̍ hī alɔ ɛra̍ yī nū a̍nɛ.
Lɔkɔ nīi o̍ ge̍ē lɛ la ogrēeyī yī āchɛ yī Ɔwɔ wa̍a̍ ma̍, 34anyā wa̍a̍ ge̍ hɔ̄ cho̍cho̍ la ogrēeyī yī ala̍ āchɛ yī Ɔwɔ; e̍ ge̍ e̍e kɛlɛ̄lā ni̍. I̍ngɔ̍ɔ nīi Lihɔ yī Iju̍u ka a̍nɛ. E̍ ge̍ē wɛ alɛhu̍ yī lɛlɛ̄lā ni̍. 35E̍ ge̍ chikpo̍ ge̍ē je̍ ochi̍chi̍ yī lɛlā ɔha̍, e̍ ge̍ ga wɔlɛ̍ ge̍ che ɔbu̍wā ikpo̍. O̍ liwēyī iwēyī nīi ɔnyā ge̍ē nīichō kɛlā la ogrēeyī yī āchɛ yī Ɔwɔ.
36A gbɛri̍ya̍ ka ɛrɔ̄ yī Ɔwɔ ɔ̍lɔ bū la abɔ̄ yī aɔ̍lɔ ɔlɔjā? Kɛ̄ɛ awɔ lōru̍wɔ ē nāa ɛrɔ̄ yī Ɔwɔ a̍nɛ? 37Ɔ̄chɛ nīi ge̍ ka anɔ̍lɔ - ɔlɛrɔ̄ yī Ɔwɔ, kɛ̄ɛ anɔ̍lɔ nāa wɔhu̍ yī ɔjā nīi Uhu Ɔnɛ̄ɛhɛhi yī Ɔwɔ ɔ̍lɔ de ma̍, ɔ̍lɔma̍ ɔlɔjā ge̍ jo̍ōkū gɛ hīka, ɔjā nīi n yɛ ma̍ ē ta̍ ē tɛ̄rɔ̄ hu ala̍ ma̍, Ādā ɔlɔjā ka amɔ̍lɔ ge̍ ya̍ i̍ngɔ̍ɔ a̍nɛ. 38Ɔ̄chɛ nīi i̍ ge̍ pīyeyī ma̍ lɛlā nūma̍ ni̍, ala̍ e̍e pīyeyī ma̍ ɔlɔjā ni̍.
39O̍ lɛ i̍ngɔ̍ɔ ma̍, aɛ̍nɛ̍ yī u, ala̍ ā de ūkpɔ̄tū rɛ la ɛrɔ̄ yī Ɔwɔ ɔkɔ̄ka gɛ. Ala̍ e̍e howu̍ yī ɔcha ɔlɛbɛ̍bi̍ ɛha̍ la ɔkɔ̄ka ni̍. 40Lɛlāha̍ ɛlāha̍ wa̍a̍, ala̍ ā ya̍ ɔ̄ ga la ɔpɔ̄pū nīi - ɔlamu ɔlamu gba̍a lɛ tri̍di̍di̍ ma̍.
Currently Selected:
1 Alikɔ̍rīnti 14: YBASR
Highlight
Share
Copy
Want to have your highlights saved across all your devices? Sign up or sign in
© 2020 Bible Society of Nigeria (second edition)
1 Alikɔ̍rīnti 14
14
Ɛjā nīi Uhu Ɔnɛ̄ɛhɛhi yī Ɔwɔ ē de nīi - ɔka̍ka̍ ma̍
1Ɔhɔtū ɔlɔ̄lɛ nīi ala̍ ge̍ē kwɔgu ē gata̍ a̍nɛ. Ala̍ de ūkpɔ̄tū yī ala̍ rɛ la ɛjā nīi Uhu yī Ɔwɔ ē de ma̍. Ɛrɔ̄ yī Ɔwɔ ɔkɔ̄ka pi̍i̍ nɛ. 2Ɔ̄chɛ nīi ē ka ɔcha ɔlɛbɛ̍bi̍ ɛha̍ ma̍, i̍ āchɛ̄ɛchɛ nīi o̍ ē ka ba̍la aa̍ a̍ni̍; Ɔwɔ nɛ. Wu̍chē oji̍ nɛ, ɔ̄chɔ̄chɛ i̍ ē po̍ ochi̍chi̍ yī ɔjā nīi o̍ ē ka ma̍ ni̍. Lɛlā olēchi̍ lēchi̍ nīi trɛ̍ba ma̍ nīi o̍ yɛ ē ka bū la wɔhu̍ yī Uhu yī Ɔwɔ a̍nɛ. 3Ɔ̄chɛ nīi ē ka ɛrɔ̄ yī Ɔwɔ ma̍, āchɛ̄ɛchɛ nīi o̍ ē ka ē de wa̍ a̍nɛ. O̍ tū wā wɔbɔ̄, mla aa̍ ɔtū, gbo wa̍ ɔtū nɛnɛ. 4Ɔ̄chɛ nīi ē ka ɔcha ɔlɛbɛ̍bi̍ ɛha̍ ma̍ ē tū iyī anu̍ ɔlɔjā lōri̍īnū wɔbɔ̄. Ɔ̄chɛ nīi ē ka ɛrɔ̄ yī Ɔwɔ ma̍, ogrēeyī yī āchɛ yī Ɔwɔ wa̍a̍ nīi o̍ ē tū wā wɔbɔ̄ a̍nɛ.
5O̍ ge̍ē hi um ɔtū nīi ala̍ wa̍a̍ ge̍ nāa wɔhu̍ yī ɔcha ɔlɛbɛ̍bi̍ ɛha̍ ɔkɔ̄ka. O̍ chī ge̍ē hi um ɔtū gɔ̄ga nīi o̍ ge̍ re̍ka ala̍ wa̍a̍ nāa wɔhu̍ yī ɛrɔ̄ yī Ɔwɔ ɔkɔ̄ka de āchɛ. Wu̍chē oji̍ nɛ, ɔ̄chɛ nīi ē ka ɛrɔ̄ yī Ɔwɔ ē de āchɛ ma̍ - ɔ̄chɛ ɔlamu ɔlamu hi̍ ɔ̄chɛ nīi ē ka ɔcha ɔlɛbɛ̍bi̍ ɛha̍ ma̍ a̍nɛ. Ɔ̍chi̍kpa̍kpa̍ ɔ̄chɛ ɔha̍ hɔ̄ abɔ̍ɔ nīi ge̍ē ka ochi̍chi̍ yī ɔcha ɔlɛbɛ̍bi̍ ɔ̍lɔma̍ nīi o̍ ē ka ma̍, anu̍ nīi o̍ ge̍ē tū ogrēeyī yī āchɛ yī Ɔwɔ ɔla̍ā wɔbɔ̄ mɛ a̍nɛ. 6O̍ lɛ i̍ngɔ̍ɔ ma̍, aɛ̍nɛ̍ yī u, n ge̍ wā dikpo̍ba̍ ala̍ ge̍ yɛ ē ka ɔcha ɔlɛbɛ̍bi̍ ɛha̍ i̍ngɔ̍ɔ ma̍, ɛpiyabuna yī iyī nīi ala̍ ge̍ē lɛ la ami ma̍? Ɔjɔ̄jā i̍ hɔ̄ ni̍, ɔ̍chi̍kpa̍kpa̍ n bī lɛlā ɔha̍ nīi Ɔwɔ de hi̍yɛchɛ ma̍, kɛ̄ɛ ochi̍chi̍ yī lɛlā ojo̍ōje̍ ɔha̍, kɛ̄ɛ ɛrɔ̄ ɔha̍ nīi Ɔwɔ tū ma̍, kɛ̄ɛ lɛlā ongōngū ɔha̍ ge̍ de ala̍.
7Ɛjā bāa aa̍ u̍fle ba̍la lɛ̄ngū nīi - āɛ̄jā yī īrɛ̄ ɔyɔ̍ɔ̄ya̍ ji ma̍, e̍ ge̍ gwō āā ke̍e̍ hɔ̄ɔ̄hɔ̄ hɔ̄ɔ̄hɔ̄ ni̍, kana̍ nīi ɔ̄chɛ ge̍ē je̍ ɔkɔlɛ̄lā nīi e̍ yɛ ē gwō ma̍? 8Kɛ̄ɛ ɔ̄chɛ nīi yɛ ē gwō lɛjī yī lɛwu̍ ma̍ i̍ ge̍ hɛ̄ra̍ kpakpa ni̍ ma̍, kana̍ nīi āchɛ ge̍ē jo̍ōkū tībi̍īyē yī lɛwu̍ ma̍? 9Gala ɔgɔgu, a ge̍ yɛ ē ka ɔcha ɔlɛbɛ̍bi̍ ɛha̍ nīi i̍ lɛ chra̍da̍da̍ ni̍ ma̍, kana̍ nīi ɔ̄chɛ ge̍ē po̍ ochi̍chi̍ yī lɛlā ɔ̍lɔma̍ nīi a yɛ ē ka ma̍? Lɛlā yī wɔ ɔla̍ā wa̍a̍ ge̍ē ta̍anū i̍ngɔ̍ɔ ji ke̍e̍. 10Ɔcha lyɛ̄mɛ̄mɛ̄ nīi āchɛ ē ka amu yɛchɛ nūma̍ ma̍. Onīi i̍ lɛ ochi̍chi̍ wɔ̄bɔ̄bɔ̄ yī nū ni̍ hɔ̄ ni̍. 11N i̍ ge̍ po̍ ɔcha nīi ɔ̄chɛ yɛ ē ka ma̍ ni̍, ɔ̄chɛ nīi yɛ ē ka ɔcha ɔ̍lɔma̍ ma̍ ge̍ē re̍ka Ɛchɛkɔcha la īkprī yī u; ami chī ge̍ē re̍ka Ɛchɛkɔcha la īkprī yī anu̍. 12I̍ngi̍ngɔ̍ɔ nīi lɛlā yī ala̍ lɛ a̍nɛ: N jo̍ōkū hīka ala̍ yɛ ē chikpo̍ lēchi̍ lēchi̍ ge̍ē lɛ ɛjā nīi Uhu yī Ɔwɔ ē de ma̍. Ɔ̍lɔma̍, ala̍ ā chɛ̄rī gɛ nīi ala̍ ge̍ bī ɛjā nīi ge̍ē tū ogrēeyī yī āchɛ yī Ɔwɔ wɔbɔ̄ la ɔjɔ̄jɛ̄ ma̍ ya̍ gba̍a̍.
13Ɔ̄chɛ nīi - ɔ̄chɛ ɔka ɔcha ɔlɛbɛ̍bi̍ i̍ngɔ̍ɔ mɛ ma̍, ɔlɔjā ge̍ jɔhā hɛ̄ɛbɛ nīi Uhu yī Ɔwɔ ge̍ de wɔhu̍ yī ochi̍chi̍ yī lɛlā nīi o̍ ē ka ma̍ de ɔlɔjā. 14Wu̍chē oji̍ nɛ, n ge̍ bī ita yī ɔcha oli̍ngɔ̍ɔ yɛ ē jɔhā, uhu yī u ke̍e̍ yɛ ē jɔhā ɔla̍ā a̍nɛ; ūkpɔ̄tū yī u i̍ ya̍ ɔjɔ̄jā abɔ̍ɔ ni̍. 15N chī ge̍ē ya̍ kana̍ bɛ̍ɛ̄nɛ̄ ma̍? Ɔjā nīi n ge̍ē ya̍ ma̍, n ge̍ē jɔhā la uhu yī u wa̍a̍, n chī ge̍ē gba̍a ē jɔhā la ūkpɔ̄tū i̍ngi̍ngɔ̍ɔ. N ge̍ē gwe̍ejē kā Ɔwɔ ɔkɔ̄kā la uhu yī u wa̍a̍, n chī ge̍ē gba̍a ē gwō kā ɔ̄ ɔkɔ̄kā la ūkpɔ̄tū i̍ngi̍ngɔ̍ɔ. 16Ala̍ ge̍ yɛ ē to̍gbo̍ ē de Ɔwɔ la uhuhu yī ala̍ ma̍, kana̍ nīi ɔ̄chɛ ji nīi hɔ̄ abɔ̍ɔ la ogrēeyī ɔla̍ā ma̍ ge̍ē jo̍ōkū chɛ̄ku ala̍ hīka “O̍ ge̍ lɛ i̍ngɔ̍ɔ” ma̍? Wu̍chē oji̍ nɛ, o̍ i̍ jo̍ōkū yī ɔjā nīi ala̍ yɛ ē ka ma̍ ni̍. 17Bū la ɛbɛ ɔla̍ā, o̍gbo̍ nīi ala̍ yɛ ē ta̍ de Ɔwɔ ma̍ ge̍ hwɔ̄hwɔhi bāa ɔjɔ̄jā ma̍, wɔbɔ̄ otōtū ɔha̍lɔha̍ i̍ hɔ̄ abɔ̍ɔ de ɔ̄chɛ ɔlamu ɔla̍ā ni̍ lachi̍lachi̍.
18N da Ɔwɔ o̍be kpɛ̍ɛji wu̍chē oji̍ nɛ, ami ē ka ɔcha ɔlɛbɛ̍bi̍ oli̍ngɔ̍ɔ ɔla̍ā hi̍ ala̍ wa̍a̍ a̍nɛ. 19Lipu̍ yī ogrēeyī yī āchɛ yī Ɔwɔ, ɔkɔkɔ nīi n ge̍ē ka u̍nu̍nɔ yī lɛlā la oko̍o yī ɔcha ɔlɛbɛ̍bi̍ ɔ̍lɔma̍, ɔkɔkɔ ɔla̍ā, n ge̍ē kɛlā īkprī ɛrwɔ̄ la oko̍o ɔlamu nīi āchɛ wa̍a̍ ē po̍ ma̍. I̍ngɔ̍ɔ nīi n ge̍ē ya̍ ē ngū wā lɛlā a̍nɛ.
20Aɛ̍nɛ̍ yī u, ala̍ e̍e lɛ bāa aɛ̍pɛ̄ ma̍ la ɛri̍ya̍ yī lɛlā ogbōgbo ni̍. Gala ɔgulɛ̄lā ɔdwɔ̄bi̍ ɔyɔ̍ɔ̄ya̍ ma̍, ala̍ ā lɛ bāa aɛ̍pɛ̄ nīi i̍ jɔ̍ha̍ ni̍ ma̍. Ɛri̍ya̍ ogbōgbo yī ala̍ ge̍ lɛ ke̍e̍ bāa anyāku̍ ma̍. 21E̍ ta̍ tū la Īpū yī Ɔwɔ i̍ngɔ̍ɔ hīka ɔ̍lɔ ge̍:
“Ādā Nīi - Ɔwɔ Ma̍ ka hīka:
Anɔ̍lɔ ge̍ē bī ɔcha ɔlɛbɛ̍bi̍ yī āchɛ̄ɛchɛ ē kɛlā de āchɛ nūma̍.
Anɔ̍lɔ ge̍ē kɛlā gala oko̍o yī ɛchɛkɔcha ē de ɛ̍lɛ.
Ɛ̍lɛ i̍ chī ge̍ē darɔ̄ku lɛlā yī anu̍ ni̍ kpɔ̍ɔ̍.”
22Wu̍chē yī ɔla̍ā, ala̍ jo̍ōkū gɛ hīka, lɛlā ɔkɔ̄ka la ɔcha ɔlɛbɛ̍bi̍ oli̍ngɔ̍ɔ nūma̍ i̍ ɔjā ɔchabɔ̄ yī āchɛ nīi de ɔtū che Ɔwɔ ma̍ ni̍. Ɔjā ɔchabɔ̄ yī āchɛ i̍chɛ̄ ku Ɔwɔ ni̍ nɛ. Ɛrɔ̄ yī Ɔwɔ ode kɔ̄ka i̍ chī ɔjā ɔchabɔ̄ yī āchɛ i̍chɛ̄ ku Ɔwɔ ni̍ ni̍. Ɛrɔ̄ yī Ɔwɔ ode kɔ̄ka - ɔjā ɔchabɔ̄ yī āchɛ nīi de ɔtū che Ɔwɔ ke̍e̍ ma̍ nɛ.
23O̍ lɛ i̍ngɔ̍ɔ ma̍, o̍ ge̍ re̍ka ogrēeyī yī āchɛ yī Ɔwɔ wa̍a̍ ge̍ē tū grēeyī, pra̍akū la ɔcha ɔlɛbɛ̍bi̍ ɛha̍ la ɔkɔ̄ka nīi āchɛ ɔlamu ɛha̍ kɛ̄ɛ āchɛ ɛha̍ nīi i̍ chɛ̄ku Ɔwɔ ni̍ ma̍ ge̍ wā abɔ̍ɔ ma̍ bɛ̍ɛ? Lēchi̍, e̍ ge̍ē ka hīka ala̍ ɔ̍lɔ yɛ ē gbyɛ̍lɛ̍. 24O̍ ge̍ chī re̍ka ala̍ wa̍a̍ yɛ ē ka ɛrɔ̄ nīi Ɔwɔ tū ma̍ nīi ɔ̄chɛ ɔlamu kɛ̄ɛ ɔ̄chɛ ɔha̍ nīi i̍ chɛ̄ku Ɔwɔ ni̍ ma̍ wā abɔ̍ɔ bɛ̍ɛ? Lēchi̍, ɔlɔjā ge̍ē kwɛ̍ri̍ya̍ ē tū lɛlā ɔdwɔ̄bi̍ yī nū ɔpɔ̄ɔpɛ̄ bū la lɛlā nīi o̍ yɛ ē po̍ ma̍. Lɛlā ɔla̍ā wa̍a̍ nīi o̍ yɛ ē po̍ ma̍ ge̍ē hɛ̍ ɔ̄ lɛpɔ̄. 25Ɛri̍ya̍ yī lɛlā yī nū nīi trɛ̍ba ma̍ ge̍ē wu̍ lipu̍ ē ti̍yɛchɛ. O̍ ge̍ē pu̍ kpɛ̍ɛ̍ ē ya̍ otūlichō de Ɔwɔ. O̍ ge̍ē de ē ka gbra ɔpɔ̄ɔpɛ̄ ka Ɔwɔ ɔ̍lɔ hɔ̄ amu ba̍la ala̍ lēchi̍ lēchi̍.
Lɛlā ɔya̍ tri̍di̍di̍ la Ogrēeyī yī āchɛ yī Ɔwɔ
26Aɛ̍nɛ̍ yī u, oji̍ - ɔchlɛhu̍ yī lɛlā nūma̍ nīi n yɛ ē ka ma̍? Ala̍ ge̍ē grēeyī i̍ngɔ̍ɔ ē ya̍ otūlichō yī Ɔwɔ ma̍, ɔnyɔnyɛ ge̍ chɛ̄rī bī u̍ku̍rɔ̍ ɔha̍ bāa ejē ogwo̍ kā Ɔwɔ ɔkɔ̄kā ma̍, ba̍la lɛlā ongū āchɛ ongōngū, ba̍la lɛlā nīi Ɔwɔ de hi̍yɛchɛ de ɔ̄chɛ ɔha̍ ma̍, ba̍la ɛrɔ̄ yī Ɔwɔ ɔka la oko̍o yī ɔcha ɔlɛbɛ̍bi̍ ɛha̍, ba̍la ɔka ochi̍chi̍ yī lɛlā yī ɔcha ɔlɛbɛ̍bi̍ ɔ̍lɔma̍. Ɔjāmɔjā nīi ɔnyɔnyɛ ge̍ē ya̍ ma̍ ge̍ re̍ka ɔjā nīi ge̍ē tū ogrēeyī yī āchɛ yī Ɔwɔ wa̍a̍ wɔbɔ̄ ma̍. 27Āchɛ ge̍ yɛ ge̍ē ka ɔcha ɔlɛbɛ̍bi̍ ɔla̍ā la ogrēeyī yī ala̍, āchɛ ɛpa kɛ̄ɛ āchɛ ɛta̍ ka̍ta̍ ge̍ē ka a̍nɛ. E̍ ge̍ chī ka hī oko̍o de ɔ̍nyīnū. Ɔ̄chɛ ɔka ochi̍chi̍ yī lɛlā nīi e̍ ge̍ē ka ma̍ ge̍ hɔ̄ abɔ̍ɔ de ka de āchɛ. 28Ɔ̄chɔ̄chɛ i̍ ge̍ chī hɔ̄ abɔ̍ɔ ge̍ē ka ochi̍chi̍ yī lɛlā nīi e̍ ka ma̍ ē mɛ ni̍, ɔ̍lɔma̍ āchɛ ɔka ɔcha ɔlɛbɛ̍bi̍ i̍ngɔ̍ɔ ɛla̍ā ge̍ hɔ̄ cho̍cho̍ abɔ̍ɔ la ogrēeyī yī āchɛ yī Ɔwɔ. O̍ ge̍ ka de iyī anu̍ ɔlɔjā ke̍e̍ ba̍la Ɔwɔ. 29Āchɛ ɛpa kɛ̄ɛ ɛta̍ nīi ge̍ bī ɛrɔ̄ yī Ɔwɔ abɔ̍ɔ ma̍ ge̍ ka, hɛ̄ɛbɛ nīi āchɛ ehēhī ge̍ gblāa abɔ̍ɔ ē jiya lɛlā yī wā ɔla̍ā ma̍. 30Ɔwɔ ge̍ chī tɛ̄rɔ̄ ɔha̍ hu ɔ̄chɛ ɔha̍ abɔ̍ɔ lipu̍ yī ogrēeyī ɔla̍ā, ɔ̄chɛ nīi bī oko̍o yɛ ē kɛlā ma̍ ge̍ hɛ̍gbɛ̄ɛ̄ o̍bū. 31Ala̍ wa̍a̍, ɔnyɔnyɛ ge̍ ka ɛrɔ̄ yī Ɔwɔ lūkpō lūkpō, hɛ̄ɛbɛ nīi ɔ̄chɛmɔ̄chɛ ge̍ ngū lɛlā de mlɔtū brii. 32Ɔ̄chɛ nīi yɛ ē ka ɛrɔ̄ yī Ɔwɔ ma̍ ge̍ jɔ̍ɔkɔ ku̍ ɛrɔ̄ nīi o̍ ē ka ma̍ bī. 33Ɔwɔ i̍ hī alɔ ɛra̍ wu̍chē yī lɛlā ɔti̍yatū ni̍; ogbodɔ̍dɔ̍ nīi o̍ hī alɔ ɛra̍ yī nū a̍nɛ.
Lɔkɔ nīi o̍ ge̍ē lɛ la ogrēeyī yī āchɛ yī Ɔwɔ wa̍a̍ ma̍, 34anyā wa̍a̍ ge̍ hɔ̄ cho̍cho̍ la ogrēeyī yī ala̍ āchɛ yī Ɔwɔ; e̍ ge̍ e̍e kɛlɛ̄lā ni̍. I̍ngɔ̍ɔ nīi Lihɔ yī Iju̍u ka a̍nɛ. E̍ ge̍ē wɛ alɛhu̍ yī lɛlɛ̄lā ni̍. 35E̍ ge̍ chikpo̍ ge̍ē je̍ ochi̍chi̍ yī lɛlā ɔha̍, e̍ ge̍ ga wɔlɛ̍ ge̍ che ɔbu̍wā ikpo̍. O̍ liwēyī iwēyī nīi ɔnyā ge̍ē nīichō kɛlā la ogrēeyī yī āchɛ yī Ɔwɔ.
36A gbɛri̍ya̍ ka ɛrɔ̄ yī Ɔwɔ ɔ̍lɔ bū la abɔ̄ yī aɔ̍lɔ ɔlɔjā? Kɛ̄ɛ awɔ lōru̍wɔ ē nāa ɛrɔ̄ yī Ɔwɔ a̍nɛ? 37Ɔ̄chɛ nīi ge̍ ka anɔ̍lɔ - ɔlɛrɔ̄ yī Ɔwɔ, kɛ̄ɛ anɔ̍lɔ nāa wɔhu̍ yī ɔjā nīi Uhu Ɔnɛ̄ɛhɛhi yī Ɔwɔ ɔ̍lɔ de ma̍, ɔ̍lɔma̍ ɔlɔjā ge̍ jo̍ōkū gɛ hīka, ɔjā nīi n yɛ ma̍ ē ta̍ ē tɛ̄rɔ̄ hu ala̍ ma̍, Ādā ɔlɔjā ka amɔ̍lɔ ge̍ ya̍ i̍ngɔ̍ɔ a̍nɛ. 38Ɔ̄chɛ nīi i̍ ge̍ pīyeyī ma̍ lɛlā nūma̍ ni̍, ala̍ e̍e pīyeyī ma̍ ɔlɔjā ni̍.
39O̍ lɛ i̍ngɔ̍ɔ ma̍, aɛ̍nɛ̍ yī u, ala̍ ā de ūkpɔ̄tū rɛ la ɛrɔ̄ yī Ɔwɔ ɔkɔ̄ka gɛ. Ala̍ e̍e howu̍ yī ɔcha ɔlɛbɛ̍bi̍ ɛha̍ la ɔkɔ̄ka ni̍. 40Lɛlāha̍ ɛlāha̍ wa̍a̍, ala̍ ā ya̍ ɔ̄ ga la ɔpɔ̄pū nīi - ɔlamu ɔlamu gba̍a lɛ tri̍di̍di̍ ma̍.
Currently Selected:
:
Highlight
Share
Copy
Want to have your highlights saved across all your devices? Sign up or sign in
© 2020 Bible Society of Nigeria (second edition)