Rúman 16
16
Pôl o/ta Kyicê-Banet ḿbé ba/bángê ké Karâs, ḿbé mbe ké Rûm Kyiraa
1Me mu n-ryuu ng n/fu, n-sét ng běn n/fu, orî-onet eten mú onyinyi, mú o/bángê ké Karâs, mú odabángê Fyíbyi, mú mu o-chwáp ng banet-ékwâbashi nyí Karâs ḿbé ké Senchíryâ, o-chi i onet mú onong. 2Koo n̂g ǎ ké bubwô ḿbú Otu Kyítá wǎ eringe nyí banet-Osówo badachi. Ba-kye ǎ nang ebóng ochwâp mú mu o-ryuu ng ké abwô enen. Ké ebóng, Fyíbyi oyén o-chi i onet-ochwâp mú onong mú banet chwóó, ne o-chi i onet-ochwâp ejí to.
3Me n/ta Peresyíla ne Akwéla ḿbé byi/mû byi-chi i bǎmkpóngé ḿbé Jisos Karâs ne mbé kyiraa. 4Ḿbé dyikpen ebe dyi/mû ké afaníkong ké dyishí ejí. Me n/kó kámbé asǎma kanong kanong. *Chí me nké nke* nké kángkáng byise-ékwâbashi nyí Karâs ḿbyí banet ḿbé ba*fí banet-Jûs* ba/kó to kámbé asǎma. 5N/ta to banet-ékwâbashi nyí Karâs ḿbé mbe ba-cibi ng ké kyise ebe kyiraa.
N/ta to ocín ejí mú dyityém mú odabángê Epyinétus kyiraa, mú o/mû mbwôp kashú-onet ké esí nyí Ésha mú o/bángê ké Karâs. 6N/ta Méryi kyiraa mú oo/chi bǎmkpóngé kanong kanong o-kye běn. 7N/ta Andorónyíkus ne Junyâs kyiraa ḿbé mbe báten-banet-Jûs, ḿbé ba/mû ké mgbokobá ne me. Banet-kyitwóm-Jisos ba-nyît ng kámbé kanong kanong, ne mbé ba/bwóp kashú ba-bángê ké Karâs ba-sí mě.
8Me n/ta Ampyilyǎtus kyiraa mú mu ocín-dyityém ejí ké ncibi ne Otu Kyítá. 9N/ta Obánus kyiraa mú mu óten-onet-bǎmkpóngé ḿbé Karâs. N-ta to Sátakus mú ocín-dyityém ejí. 10N/ta Apéles kyiraa mú oo/tông wááng o/fu, nyǐ mu o-fâ Karâs. N/ta banet ḿbé mbe ké kyikû-banet ńkyí Aryisatábulus kyiraa. 11N/ta óten-onet-Jûs mú odabángê Heródyon kyiraa, ne báten-banet ḿbé ba/bángê ké Karâs, ḿbé mbe ké kyikû-banet ńkyí Nasyísus.
12N/ta Tyiraféna ne Tyirafósa kyiraa ḿbé mbe ba-chi i bǎmkpóngé ḿbé Otu Kyítá. N-ta to ocín-dyityém ejí mú odabángê Pésis, mú oo/chi bǎmkpóngé kanong kanong o-kye Otu Kyítá. 13N/ta Rúfos kyiraa, onyinchéng ámu mú mu kiǐtí-onet-bǎmkpóngé mú Otu Kyítá. N-ta to boné emen mú oda mě etún kángkáng nkéré wǎ wǎn emen. 14N/ta Asinkyíryítus ne Felégon ne Hémyis ne Patóróbas ne Hémas ne kángkáng báten-banet ḿbé ba/bángê ké Karâs, ḿbé mbe ne mbé kyiraa. 15N/ta Fyilólógus ne Julyâ kyiraa, ne Nérus ne wǎn-boné emen mú onyinyi, ne Olyímpas, ne kángkáng banet-Osówo ḿbé mbe kyikit kyibónge ne mbé.
16Ta n̂g barî kyiraa ne dyirwâm ńdyí kyijé. Kángkáng byise-ékwâbashi nyí Karâs byi/ta běn kyiraa.
Pôl o/sét Banet ḿbé ba/bángê ké Karâs ńkyí badaman ba-chi
17Me mu n-tîm m běn arông, ǎ bwǎn-bané ejí, n/fu, bám m̂ byiko enen kyi-kim ne banet ḿbé mbe ba-chi i banet ba-kyii ne barî, ba-bên n dyityém ńdyí banet ba/fé ne Jisos, ḿbé ba*fí ba-chi i wǎ eringe nyí ba/tángê běn ba/fu, bachi*. *Da n̂g ece kámbé ké byiko*. 18Ké ebóng, banet ḿbé mbe ba-chi i azong-byěm ányi ba*fí ba-fâ Karâs, Otu Kyítá eten* nké mbe ba-kabe ng kyi-kim ne ńkyí mbé badaryí ne ńkyí baa*ryí*. Ké bunyîn-ejá ebe ne ké bǎmpém ebe ḿbé badabyiryi banet mbé mbe ba-nîm m banet ḿbé ba*fí ba-nyît ng kyi-kim ne byibî ḿbyín*. 19Nang yeě nang yeě oo/jwo kyi-kim ne ofê enen mú bamu ba-fâ Bǎmpém ḿbé Banong, ne ké bubwô ḿbún, nkyi kyi-nyîn n mě! ne ben. Me mu n-ryuu ng n/fu, ben bakyú ne byinyídíng kyi-kim ne ńkyí nkyi kanong. Ba*dachi ba-nyît kyi-kim ne kyibî*. 20Ne Osówo mú mu o-kyâ běn bunyîn-dyityém oo*ba/chi o-chîbwon ne o-kpógê Sátan* o-twóp ǎ kyísí ba-cím ǎ byiká*.
Ochwâp mú Jisos, Otu Kyítá eten okyú ne ben.
21Tyímótyi mú byimu byi-chi i bǎmkpóngé ne nyǐ burwám o/fu, me nta běn kyiraa. Lúsus ne Jésin ne Sosipáta ḿbé báten-banet-Jûs ba/ta běn to kyiraa.
22Me Tétyos mú o/sáng ńkyí Pôl o/sét ké léta mún n/ta běn banet ḿbé ba/bángê ké Karâs kyiraa.
23Onet mú me Pôl n/nung ǎ ocinónet, mú odabángê Gáyus, mú banet-ékwâbashi nyí Karâs mbe ba-cibi ng ké kyise emen o/ta běn to kyiraa. Erásátus mú mu o-tî ng akpuga-oshê ne wǎn-boné eten mú odabángê Kótus ba/ta běn to kyiraa.
[ 24Ochwâp mú Jisos Karâs, Otu Kyítá eten okyú ne ben ashí amúmú. Kyi/bát kyikyú éné.]
Ké Nkuli Kyikû, Pôl o/fé Nshwam o-kye Osówo
25Mîng n̂g byi-kye Osówo akpee. Nyǐ o-man n běn echi ba-bwom kíngkíng ké dyityém enen ńdyí ba/fé ne Karâs wǎ eringe nyí me nn/sét ké nkéré mu n-sét ng banet Bǎmpém ḿbé Banong ḿbé ba/kim ne Jisos Karâs. Nkyi to wǎ eringe nyí ntûntû mú o/mû Osówo ké dyityém, mú banet ba/mû ba*da/nyît ne* ké bujê-aje nyí aa/shwôm ké esim chwóó, oo/chi kyi-byí kyíjí wááng. 26Kántîk kâng, ké bubwô-byěm ḿbyí bamkpábé ḿbé badasét byiraa-Osówo ba/sáng, ntûntû ámu o/firi kyíjí wááng. Ne ké busa ḿbú Osówo mú oo*kpú ne banyá* ejíí emúmú ee/nyît ntûntû ámu, eringe nyí kángkáng banet ba/chi ba-bángê ké Osówo, ba-chi ńkyí o/sét.
27Kyi/bát byikye Osówo mú mu Osówo kǎnchí, mú mu o-nyît ng kángkáng byěm akpee ne banyá ne banyá ké bubwô ḿbú Jisos Karâs. Kyi/bát kyikyú éné.
Currently Selected:
Rúman 16: BKY
Highlight
Copy
Compare
Share
Want to have your highlights saved across all your devices? Sign up or sign in
Published by the Bible Society of Nigeria @ 1985
