Sâm 135
135
Okwan-Akpee
1Kye n̂g Óburúkpâbí akpee.
Kye n̂g dyizîn emen akpee,
ben bǎmgbán-Óburúkpâbí.
2Ben mú bamu ba-bwom m ké kyise ńkyí Óburúkpâbí
ké kiǐtí-kyise-kyifen echi ńkyí Osówo eten.
3Kye n̂g Óburúkpâbí akpee,
ké nǎ, nyǐ mu kanong.
Kwán n̂ ekwan-akpee ba-kye dyizîn emen,
ké nǎ, [nyǐ o/cángê dyityém.]
4Nyǐ o/cá Jekôp o-tî byiko emen,
o-cá banet-Ézerel ba-kyú ḿbé emen.
5Me mu n-nyît ng n/fu,
Óburúkpâbí mú eten o/rêe.
O/rêe o-shwôm kángkáng esówo.
6Nyǐ mu o-chi i ńkyí mu o-ryuu ng ké bubóng ne esí
ne ké biǐríbíríbí-baya ḿbé baryên.
7Nyǐ nké mu o-chi i bubóng bumúmú bu-jîi.
Nyǐ nké mu o-chi i kasabang ńké omu odana,
ne mu o-fîm m bufú ké kyise emen o-bâ ne mbú.
8Ké Éjip, nyǐ o/ju bambwôp kashú-bwǎn
ḿbé banet ne ḿbé enyam.
9Nyǐ o/chi biǐtí-akat eringe odakye otu
ne kángkáng banet-bǎmkpóngé-otu busông.
10Nyǐ o/bên eshê chwóó,
ne o/ju batu ḿbé ba/mû ne busa.
11Batu wǎ Otu Síhon mú otu mú Ámon,
ne Otu Ôok mú otu mú Báshan,
ne kángkáng batu ḿbé Kínan.
12Nyǐ o/kúng esí ebe o-kye banet emen.
O/kye banet-Ézerel kányí.
13Óburúkpâbí, ba/chi ba-kûsét kángkáng nkéré ba/fu,
wo a-chi i Osówo.
Kángkáng byitông-banet byi/chi byi-kû ǒ ezîim.
14Óburúkpâbí o/chi o-bám banet emen.
Nyǐ o/chi o-ri bǎmgbán emen bafip.
15Eshê nyí ee*nyît Óburúkpâbí* e-chi i erím-bakye nyí ebe ké syílyíba ne gûl.
Banet nké ba/kúng abwô ne ba-chi kányí.
16Nyi ne ecím, nké ee*man eraa*.
Nyi ne achi, nké ee*man eri*.
17Nyi ne atông, nké ee*man ejwo*.
Nang kiǐnjáng ee*man eshû*.
[ 18Kyi/bát kángkáng banet ḿbé ba/chi kányí
ne ḿbé ba/tî dyityém ké nyǐ bafiri] wǎ erím-bakye ebe.
19Banet-Ézerel, kye n̂g Óburúkpâbí akpee.
Ben banchi kyifen ḿbé Osówo,
kye n̂g ǎ akpee.
20Kyikû-banet ńkyí Lyíva,
kye n̂g Óburúkpâbí akpee.
Kángkáng banet ḿbé mbe ba-fâ ǎ,
kye n̂g ǎ akpee.
21Kye n̂g Óburúkpâbí akpee ké Záyon
ne ké Jerúsélem mú mu oshê emen.
Kye n̂g Óburúkpâbí akpee.
Currently Selected:
Sâm 135: BKY
Highlight
Copy
Compare
Share
Want to have your highlights saved across all your devices? Sign up or sign in
Published by the Bible Society of Nigeria @ 1985
