Sâm 132
132
Byikpee n̂g Kiǐtí-Kyise-Kyifen-Osówo echi
1Óburúkpâbí, *daráp Otu Dívit*
ne kángkáng afaníkong emen nyí nyǐ o/ri*.
2Óburúkpâbí, zîim ńkyí Otu Dívit o/ryí ocím.
Ocím mú nyǐ o/sem ǒ wo,
Osówo mú Jekôp, mú a/rêe a-shwôm, o/fu,
3me mm*ba/chi n-dim dyijê* n-rí nang sáre*.
4Me mm*ba/chi n-jáng* n-rê nang burê*
5tete n-chi kyikit n-tî Óburúkpâbí,
kyise ńkyí Osówo mú Jekôp mú o/rêe o-shwôm.
6Be byi/jwo ké Bételehêm kyi-kim ne mkpukpu-byěm-Osówo,
ne be byi/ri kámú ké byifát ḿbyí Jeryím.
7Byi/raa byi/fu, bâ n̂g byi-dim byi-wâa ké kyise-Óburúkpâbí.
Bâ n̂g byi-kye ǎ ofê ké kakyúng-butu emen.
8Óburúkpâbí, bâ ne mkpukpu-byěm eyên
mú mu o-tông ng busa eyên
ké kiǐtí-kyise-kyifen eyên echi
a-kûkyú nyín ne banyá.
9Kyi/bát banchi kyifen eyên bakûchi ńkyí nkyi kanong kángkáng nkéré.
Kyi/bát banet eyên bajêe ne ejá kyíbóng kyíbóng.
10Wo a/ryí Otu Dívit mú ḿgbán eyên ocím.
Óburúkpâbí, *dané otu eyên mú wo a/cá*.
11Wo a/ryí Otu Dívit ocím mú ntûntû,
ocím mú wo aa*ba/chi a-bírî kámú esim*.
Wo a/raa a/fu, me n/chi n-chi wǎn-onyinchéng eyên obónge otu,
ne nyǐ o/chi o-kúng kakyúng-butu eyên.
12Bwǎn emen to ba/chi ba-kúng kyikit eyên kángkáng nkéré wǎ batu,
â ba/chi ba-tî ocím mú ba/ryí ba-sem mě,
ne byije ejí ḿbyí n/kye kámbé.
13Óburúkpâbí oo/cá Záyon.
Nyǐ mu o-ryuu ng o/fu,
nyǐ o-chi i Záyon oshê emen.
Nyǐ o/fu,
14nyín něen kyikit ńkyí me n/chi n-kyú ne banyá.
Nyín něen nké me n/fu,
n-kyú u otu.
15Me n/chi n-kye Záyon kángkáng byěm ḿbyí nyǐ mu o-ryuu ng.
Me n/chi n-kye banet emen ḿbé mbe kyikpu byiryíng ba-ryí ba-zût.
16Me n/chi n-jware banchi kyifen-Osówo emen
ké kángkáng byěm ḿbyí mbé mbe ba-chi i,
ne banet emen ba/chi ba-kwán ekwan ba-jêe ne ejá kyíbóng kyíbóng.
17Nyín něen nké me n/chi n-chi wǎn-Otu Dívit obónge otu mú kiǐtí.
Nyín něen nké me n/chi n-tî butu ḿbú otu ejí mú n/cá.
18Me n/chi n-fé banet-bushwôn emen éshwân ké byiko,
ne butu ḿbú emen bu/chi bu-já byěm chwóó.
Currently Selected:
Sâm 132: BKY
Highlight
Copy
Compare
Share
Want to have your highlights saved across all your devices? Sign up or sign in
Published by the Bible Society of Nigeria @ 1985
