Póróvep 13
13
1Wǎn mú mu ne bubong o-jwo ng dyishí ńdyí bonchí mu o-tángê e ǎ, nké onet-byiko etông oo*bángê o/fu, nyǐ o*da/man echi*.
2Banet ḿbé mbe kanong ba/chi ba-já eyáré ké ńkyí mbé mbe ba-sét ng, nké okabe mú bannîm banet mu ké anwa enwa.
3Onet mú mu o-níbî ng byibî-ocím emen mu o-ku ng dyikpen emen. Onet mú mu o-raa ng byiraa ocím fúú mu o-ju ng dyikpen emen.
4Onet-dyidare nang o-ryuu chwǒm nǎ! oo*já kánkyí*. Nchi bǎmkpóngé o-fé busa o-já ng nang ebóng ńkyí mu o-ryuu ng.
5Byisédéng byi-sa ng banet ḿbé mbe ba-sét ng ntûntû kafâ, nké byiraa ḿbyí bambên atyém byi-chi i éshwân ne mbyi ne edángé.
6Kanong echi ka-ku ng onet mú o*da/chi chwǒm*. Dyityém ebên nké ndyi dyi-ju ng banchi byibî.
7Banet bakíri ba-lángê e ba/fu, mbé mbe ne esang, tongfwán, chwǒm kyi*fí kámbé*. Bakíri ba-lángê e ba/fu, mbé mbe kyikpu, tongfwán, mbe ne esang.
8Onet-esang o-kúng ng akpuga emen o-nyángê dyikpen emen, nké onet o*fí mú odafé onet-kyikpu bushî*.
9Banet ḿbé mbe ba-chi i kanong mbe wǎ kiinwángé ńkyí nkyi kyi-san n. Bambên atyém mbe wǎ otyuryíkáng mú o-kú o-ríbî ng.
10Byiko etông byi-cen n ne afaníkong, kyi/nwa kyi-shwôm ńkyí adabí bacê.
11Esang ejá babap e-rím m babap, nké onet mú mu o-já ng kányí ké onyin ké onyin o/chi o-já e-jê.
12Okabe ebên o-kyâ orwôm ké dyityém, nké â kyi/chi eringe a/kabe, dyityém dyi-nyîn n ǒ.
13Â amu a-né ng bacê ḿbé banong, wo amu a-kyé ng afaníkong. Jwo bacê eringe nyí chwǒm kii*ta ǒ*.
14Dyikpen ndyi dyi-fím m ké byěm ḿbyí banet-bubong mbe ba-tángê e. Mbyí byi-chwáp ng ǒ a-fem ké nkéré dyikpen eyên dyi/firi ké bukwóp-bukyû.
15Bubong bu-kyâ ofê, nké bannîm banet mbe ké [bukwóp-bukyû.]
16Banet ḿbé mbe ne byinyídíng ba-kabe ng kángkáng nkéré ne ba-chi chwǒm, nké enyam-banet e-tông ng enyam ebe nyí ba/róng.
17Byibî-banet-kyitwóm ba-cen n ne afaníkong, nké ḿbé badachi ńkyí ba/sét kámbé ba-bâ ne bunyîn-dyityém.
18Onet mú oo*kwâa chwǒm* o-waa ng kyikpu ne éshwân. Nang yeě nké mu o-bángê e ba-tángê ǎ dyishí ba-kyâ ǎ ofê.
19Kyi-nyîn n dyityém â a/já ńkyí amu a-ryuu ng. Kii*nyîn enyam-banet byibî emîng*.
20Onet mú mu o-cen n ne banet ḿbé mbe ne bubong o-firi ng ne bubong. Kyi/chi kyi-bên ne wo â amu a-cen n ne enyam-banet.
21Afaníkong a-cen n ne banchi byibî nang nyá, nké ba/chi ba-yárê banet ḿbé mbe ba-chi i kanong byěm ḿbyí byinong.
22Onet mú mu o-chi i kanong o-já ng esang nyí bwǎn ḿbé bwǎn emen badaryí bukyû, nké esang nyí banet-byibî e-jâ e-kâm banet ḿbé mbe ba-chi i kanong.
[ 23Esí nyí banet-kyikpu nyí ba*da/kwón chwǒm* e-fâ byiryíng chwóó, nké banryî acît ké byěm baa*bángê banet ba-kpang byiryíng ké nyǐ*.]
24Â wo a*fí a-kyâ wǎn eyên busông* ányi o*fí o-jê ng ǒ*. Â mu o-jê ng ǒ, a-tángê e ǎ dyishí.
25Banet ḿbé mbe ba-chi i kanong ba-já ng ńkyí badaryí, nké kángkáng nkéré esong e-nwa ng bambên atyém.
Currently Selected:
Póróvep 13: BKY
Highlight
Copy
Compare
Share
Want to have your highlights saved across all your devices? Sign up or sign in
Published by the Bible Society of Nigeria @ 1985
