Nómba 23
23
1Bálim o-raa ne Otu Bálek o/fu, bi mě byikit-kyifen-Osówo echi káchâtkányi nyín, a-bâ mě to ne batyép-mpong káchâtkányi ne etyítǎm káchâtkányi.
2Otu Bálek o-chi eringe nyí ba/sét ǎ. Nyǐ ne Bálim ba-kúng otyép-mpong obónge obónge ne otyítǎm obónge obónge ba-chi byifen ké byikit-kyifen-Osówo echi byimúmú. 3Bálim kâng o-raa ne Otu Bálek o/fu, bwom nyín ké bukô-byifen ḿbyí a/chi, me n-ca n-da-ri â Óburúkpâbí o/chi o-bâ o-kâm mě, nang oo*bê o*. Me n/chi n-sét ǒ nang ebóng chwǒm ńkyí nyǐ oda mě esét. Bálim kâng o-dim kǎnchí ḿbú kyíbóng-kaku, 4ne Osówo o/byí o-kâm ǎ. Bálim o-raa ne Osówo o/fu, me mm/bi byikit-kyifen echi eyên ámbyi káchâtkányi, ne nn/ju mpong ne ebû ké mbyí byimúmú n-chi byifen.
5Óburúkpâbí o-sét Bálim ńkyí o/chi o-sét, ne o-twóm ǎ o-bwa esim o-kâm Otu Bálek ne kyitwóm. 6Bálim kâng o-bwa esim o-ri ké Otu Bálek o/tôong cip ne kángkáng banet-ashí-Mówep ké bukô-byifen ḿbyí o/chi.
7Bálim o-sét kyitwóm ńkyín wǎ mkpábé mú odasét byiraa-Osówo o/fu,
Otu Bálek mú otu-Mówep oo/kúng mě ké [Syírya,]
ké eku nyí kyicê ńkyí óbyísû odabyí,
o-bâ ne me o/fu, bâ a-ba-raa ké bubwô ejí.
Fé kyibî-nshwam a-kye banet-Ézerel.
8Me n-cen n nǎ ne n-fé kyibî-nshwam n-kye chwǒm ńkyí Osówo o*da/shú*.
N-raa nang kyi-kim ne bukyû,
â Óburúkpâbí o*da/raa kyi-kim ne mbú*.
9Me mu m-bwom m ké aká nyí nyáám n-ri kámbé.
Me m-bwom m ké eku n-tún n kámbé.
Mbé ba-chi i oshê mú odakyú kǎnchí.
Mbé mbe ba-nyît ng ba/fu,
Osówo o/jware kámbé o-shwôm banet-bushûyû.
10Bwǎn ḿbé Ézerel ba/jê wǎ édúkǎndú.
Mbé baa*nwa epan*.
Mîng mě n-kúlî ací ejí wǎ onet mú Osówo.
Mîng mě m-kpú ké bunyîn-dyityém wǎ banet ḿbé mbe ba-chi i kanong.
11Otu Bálek kâng o-raa ne Bálim o/fu, wo aa/chi mě ebóng. Me n/kó ǒ a-bâ nyín n/fu, afé kyibî-nshwam a-kye banet-bushwôn ejí. Nké wo aa/bwa a-jware ojwáráng kámbé.
12Bálim o-faa o/fu, me m-man n esét ńkyí Óburúkpâbí o/sét mě o/fu, me nsét nké nke.
Nnyinyěng-Byiraa ḿbyí Bálim o/sét wǎ Mkpábé mú odasét Byiraa-Osówo
13Otu Bálek o-raa ne Bálim o/fu, bâ ne me byi-dim ké kyikit kyikíri ńkyí adabwom a-ri kyicê-banet-Ézerel kyikíri nké nke. Fé kyibî-nshwam nyín ké bubwô ejí a-kye kámbé. 14O-kúng Bálim ba-dim ḿbú kyifát ńkyí Zófim, kyíbóng-kaku ńké Pyísaga. Nyǐ o-bi to byikit-kyifen-Osówo echi káchâtkányi ányi o-ju otyép-mpong obónge obónge ne otyítǎm obónge obónge ké byikit ámbyi byimúmú.
15Bálim o-raa ne Otu Bálek o/fu, bwom nyín ké bukô-byifen ḿbyí a/chi, ne me n/chi n-kâm Osówo áku.
16Óburúkpâbí o-kâm Bálim o-sét ǎ ńkyí o/chi o-sét, ne o-twóm ǎ o-bwa esim o-kâm Otu Bálek, o/fu, osét ǎ kyitwóm ánkyi. 17Bálim o-bwa kâng esim o-da-ri Otu Bálek ké o/tôong ányi cip ne banet-ashí-Mówep ké bukô-byifen ḿbyí o/chi. Otu Bálek o-bí Bálim ńkyí Óburúkpâbí o/sét, 18ne Bálim o-faa o-sét kyitwóm ńkyí mkpábé mú odasét byiraa-Osówo, o/fu,
bâ, ǎ Otu Bálek mú wǎn-Zípo,
a-ba-jwo ńkyí me nda ǒ esét.
19Osówo o*fí wǎ banet* ḿbé badasét byisédéng*.
Nyǐ o*fí wǎ onet* mú odayángê dyityém emen*.
Nang ebóng ńkyí nyǐ o/ryí ocím, mu o-chi i kánkyí.
Ńkyí nyǐ odaraa kyi-chi i éné.
20Baa/sét mě ba/fu, me njware banet,
ne â Osówo o/kye ojware,
me mm*man to ekoo ojware ámu o-bwa esim ne mǔ*.
21Me nn/ri n/fu, dyikpen ńdyí Ézerel ńdyí ndyi dyi-bâ dii*ba/chi dyi-bâ kámbé ne busông* nang afaníkong*.
Osówo Óburúkpâbí ebe mu ne mbé.
Mbé mbe ba-sét ng ba/fu, nyǐ o-chi i Otu ebe.
22Osówo oo/fîm kámbé ba-byí ké Éjip.
Nyǐ mu o-nwa ng o-kyâ kámbé wǎ kyibî-enyam.
[23Kiǐré-bukye kyi*fí* nang bucí bu*fí*
ḿbyí ba-nwa ne oshê mú Ézerel*.]
Kántîk, banet ba/chi ba-raa kyi-kim ne Ézerel ba/fu,
ri n̂g ńkyí Osówo oo/chi kámbé.
24Oshê mú Ézerel mu wǎ ekpang.
Nyǐ ee*jang* tete e-ju e-ryí,
tete e-jwáp baróng ḿbé enyam nyí nyǐ ee/ju.
25Otu Bálek o-raa ne Bálim o/fu, wo aa/né kyibî-nshwam efé a-kye banet-Ézerel, nké *dachi a-bwa to a-jware kámbé*.
26Bálim o-faa o/fu, me n*da ǒ esét n/fu, me n-chi i nang ebóng chwǒm ńkyí Óburúkpâbí o/sét mě*?
Byiraa ḿbyí Bálim o/sét ké Kampén Kachât wǎ Mkpábé mú odasét Byiraa-Osówo
27Otu Bálek o-raa o/fu, bâ ne me ké kyikû. Me n/chi n-kúng ǒ byi-dim kyikit kyikíri. Kakíri Osówo o/chi o-bángê ǒ a-fé kyibî-nshwam ányi ké bubwô ejí a-kye kámbé. 28Nyǐ kâng o-kúng Bálim ba-dim kyíbóng-kaku ńké Pôo, ńké ka/bírî kashú ké kyicê ńkyí kyikim-dyikán. 29Bálim o-sét ǎ o/fu, bi mě byikit-kyifen-Osówo echi káchâtkányi nyín, a-bâ mě to me batyép-mpong káchâtkányi ne etyítǎm káchâtkányi. 30Otu Bálek o/chi eringe nyí ba/sét ǎ, o-kúng otyép-mpong obónge obónge ne otyítǎm obónge obónge o-chi byifen ké byikit-kyifen-Osówo echi ámbyi byimúmú.
Currently Selected:
Nómba 23: BKY
Highlight
Copy
Compare
Share
Want to have your highlights saved across all your devices? Sign up or sign in
Published by the Bible Society of Nigeria @ 1985
