Nómba 21
21
Ba/kpógê Banet ḿbé Kínan
1Ké nkéré otu mú Árat, mú banet ḿbé Kínan, ké kyicê-Kínan ńkyí busyísen o/jwo ba/fu, banet-Ézerel mbe ba-bâ ké bukwóp ḿbú oshê mú Átarim, nyǐ o/kye kámbé bunwa o-kám kyicê-banet-Ézerel. 2Banet-Ézerel ba-ryí Óburúkpâbí ocím kâng ba/fu, â a/mîng bě byi-kpógê banet ḿbén, be byi-ju ng kámbé kángkáng byi-bên eshê ebe emúmú byi-kye ǒ wǎ kiǐtí-eyáré. 3Óburúkpâbí o/jwo ńkyí ba/bí, ne o/chwáp kámbé ba-kpógê banet-Kínan. Banet-Ézerel kâng ba/ju kámbé kángkáng ba-bên to eshê ebe emúmú, ba-fé kyikit ánkyi dyizîn ńdyí badakó Hóma.
Efyi nyí ba/chi ké Borôn
4Banet-Ézerel ba/dim ba-mîng kaku ńké Hôo, ba-cen ké kiǐfáng ńkyí nkyi kyi-jâ dyiga ńdyí Ákwaba eringe nyí mbé badacen kerékeré ba-shwôm esí nyí Édom. Nké banet-Ézerel ba*da/chîman ecíp dyityém ké bukwóp* 5ne mbé ba-kûshwôn ne Óburúkpâbí ne Músis. Mbé ba/raa ba/fu, ebóng ńkyí a/fîm bě ké Éjip a/fu, byiba-kpú ké kyikim-dyikán ńkyín, ńkyí byiryíng nang omu byi*fí*. Be bii*man to eryí byibî-byiryíng ḿbyín*. 6Óburúkpâbí o-twóm kâng efyi e-kâm banet-Ézerel, e-jwóm banet-Ézerel chwóó ba-kpú. 7Banet-Ézerel ba-bâ ba-kâm Músis ba-raa ba/fu, be byi/chi kyibî ké nkéré byi/shwôn ne Óburúkpâbí ne wo. Kántîk, fé nshwam a-kye Óburúkpâbí o-kúng efyi ńnyín e-dim. Músis o-fé kâng nshwam ké bubwô-banet-Ézerel. 8Óburúkpâbí kâng o-sét Músis o/fu, ochi efyi ké kiǐré o-kpong kányí ké kyikwap, eringe nyí nang yeě mú efyi e/jwóm ǎ odatún kányí o-nyange. 9Músis kâng o-chi efyi ké borôn o-kpong kányí ké kyikwap. Nang yeě mú efyi e/jwóm ǎ, o-man n etún achi ké nyǐ o-nyange.
Banet-Ézerel ba/fím ké Kaku ńké Hôo ba-ribi ké Owo mú Banet-Mówep
10Banet-Ézerel ba-cen ba-ca kashú ba-da-bi oshê ké Óbit. 11Ké nkéré mbé ba/dim ké Óbit, mbé ba/dabi oshê ké biǐbwô-oshê ḿbyí Ábarim, ké kyikim-dyikán, ké kyicê-kyikim-esí-Mówep ńkyí esû edabyí. 12Ne ba-dim kâng ba-da-bi oshê ké owo mú Zéret. 13Ba-chîdim ányi ba-da-bi oshê ké kyicê-kace ńké Ánon ńkyí bushûyû, ké kyikim-dyikán ńkyí kyi/nere tete kyi-byí ké kyikim-esí ńkyí Ámórit. Kace ńké Ánon ka/mû buti ḿbú banet-Mówep ne ḿbé Ámórit. 14Nkyí nké kyi/chi ne ba-sáng ké Nwet-Byití ḿbyí Óburúkpâbí kyi-kim ne oshê mú Báhep, ké kyikim-esí ńkyí Súfa ne ewo ányi ne kace ńké Ánon 15ne ewo nyí e/byí ké oshê mú Âa, e/byí to ké buti ḿbú banet-Mówep.
16Ba-dim ké kyikit ánkyi ba-jâ ké kyikit ńkyí badakó Dyibíng-Omu, ké kyikit ńkyí Óburúkpâbí o/raa ne Músis o/fu, kó banet-Ézerel ba-bâ kyikit kyibónge, ne me n/chi n-kye kámbé omu. 17Ké nkéré ámu, banet-Ézerel ba/kwán okwan mún ba/fu,
dyibíng-omu, omu eyên obyí,
ne be byi/chi byi-ta ǒ kyiraa ké okwan.
18Dyibíng-omu ńdyí batu eten ne bwǎn ebe ba/sím,
ńdyí ba/sím ké bushwám ne echí ebe.
Banet-Ézerel ba/dim kâng ba-mîng kyikim-dyikán ánkyi ba-dim ḿbú Mátana, 19ne ba-fím ányi ba-dim ḿbú Nahalyêl, ne ba-fím ké Nahalyêl ba-dim ḿbú Bámot. 20Ba-fím ké Bámot ba-dim ḿbú owo mú mu ké kyikim-esí ńkyí banet-Mówep, fáráng ne kyíbóng-kaku ńké Pyísaga, mú o/bírî kashú-kyicê ńkyí kyikim-dyikán.
Banet-Ézerel ba/kpógê Otu Síhon ne Otu Ôok
(Dyitorónómyi 2:26-37; ne ké3:1-11)
21Banet-Ézerel kâng ba-twóm banet-kyitwóm ba-kâm Otu Síhon mú banet-Ámórit ba/fu, basét ǎ ba/fu, 22mîng bě byi-shwôm ké esí eyên. Be ne byitú eten bii*mîng ndûm* byi-ján ké kafâ-byifát enen* ne bii*jwáp omu ké ajwáng enen*. Be byi/chi byi-cen ké [ndûm mú bancen busî badacen ké mǔ] tete byi-shwôm kyikim-esí eyên. 23Nké Otu Síhon o*da/bángê banet-Ézerel ba-cen ba-shwôm ké kyikim-esí emen*. O-kó bannwa byití emen o-dim ḿbú Jáhaz, ké kyikim-dyikán, banet-Ézerel bunwa edakye. 24Nké banet-Ézerel ba/ju banet-bushwôn ebe chwóó ké byití ámbyi, ba-koo kámbé esí kyi-fím ké kace ńké Ánon kyi-jâ ké kyicê ńkyí bushûyû, kyi-ribi ké kace ńké Jábok. Ányi kyi/byí, kyi/ribi ké esí nyí banet-Ámon, ké nǎ, banet-Ámon ba/mû ba-bám m buti ebe kanong kanong. 25Banet-Ézerel kâng ba/koo kángkáng eshê nyí banet-Ámórit, cibicibi ne Héshibon ne kángkáng boǒshê ḿbú bu/mû bu/wáp kámú bu-fé ké kafâ, ba-kûkyú ké nyǐ. 26Héshibon o/mû dyityém-oshê mú Otu Síhon, mú banet-Ámórit, mú o/mû o/nwa byití ne otu mú kpákpá mú banet-Mówep, ne o/mû oo/koo esí emen kángkáng tete o-byí ké kace ńké Ánon. 27Nkyí nké kyi/chi ne bankwân ekwan mbe ba-kwán n ba/fu,
bâ n̂g ké Héshibon mú mu oshê mú Otu Síhon.
Be byimu byi-ryuu ng byi/fu,
byiri kámú ké baa/bwât kámú ba-bi o-firi eringe nyí o/mû.
28Nkéré obónge, ké oshê mún mú Héshibon,
bannwa byití ḿbé Otu Síhon ba/byí wǎ okwâ.
Ba/bên oshê mú Âa ké Mówep,
ne [ba/sé] eku nyí bushûyû ḿbú kace ńké Ánon.
29Kyi/bên ne ben banet-Mówep kanong kanong.
Baa/ju běn mú bukye ḿbú badakó Kémoshi mbu bu-nyîn n běn.
Osówo enen o/mîng banyinchéng enen ba-firi banet ḿbé ba*fí ne oshê*
ne banyinyi enen ba-firi básóng ḿbé otu mú Ámórit.
[30Nké kántîk, baa/ju bwǎn ebe, kyi-fím ké Héshibon kyi-byí ké Dyíbon,
ne kyi-fím ké Náshim kyi-byí ké Nófa, fáráng ne Médéba.]
31Ké bubwô ámbu kâng, banet-Ézerel ba/kyú ké esí nyí banet-Ámórit, 32ne Músis o/twóm banet o/fu, bada-kyé kyikû kyi-kim ne oshê mú Jáze. Banet-Ézerel ba/koo kámú ne boǒshê ḿbú bu/wâng kámú, ba-ró banet-Ámórit ḿbé ba/mû ba-kyú u ányi.
33Banet-Ézerel ba-pín kâng ba-bírî ké bukwóp ḿbú mbu bu-jâ Báshan, ne Otu Ôok mú Báshan o-byí ne bannwa byití emen o/fu, nyǐ o-da ng ekye kámbé bunwa ké Édara. 34Óburúkpâbí o-raa ne Músis o/fu, *dachi a-shî ǎ*. Me n/chi n-chi ǒ a-kpógê ǎ ne banet emen kángkáng ne esí emen. Chi ǎ ńkyí a/chi Otu Síhon mú banet-Ámórit, mú o/mû ké Héshibon. 35Banet-Ézerel kâng ba-ju Otu Ôok ne bwǎn emen ḿbé banyinchéng ne kángkáng banet emen, onet nang obónge o*da/fem* ne mbé kâng ba-koo esí emen.
Currently Selected:
Nómba 21: BKY
Highlight
Copy
Compare
Share
Want to have your highlights saved across all your devices? Sign up or sign in
Published by the Bible Society of Nigeria @ 1985
