Nómba 17
17
Ochí mú Éron
1Óburúkpâbí o/raa ne Músis o/fu, 2sét banet-Ézerel ba-kye ǒ echí diǐkpú ne efee, obónge ké dyishí-onet-dyishí-kyikû-banet nang orá. Sáng dyizîn ńdyí onet-dyishí-kyikû-banet nang orá ké ochí mú emen, 3a-sáng kâng dyizîn ńdyí Éron ké ochí mú o/bwom ké dyishí ńdyí banet-Lyíva. Ochí o/chi o-kyú obónge ké dyizîn ńdyí onet-dyishí-kyikû-banet nang orá. 4Kúng echí ányi a-ca ne nyǐ ké mpyep mú me ndakyú, a-tî kányí ké bushú-mkpukpu-byěm ejí, kyikit ńkyí me mu n-kâm m ǒ. 5Ochí mú onet kâng mú me nn/cá ǎ, o/chi o-tím byicat. Ké bukwóp ḿbún, me n/chi n-chi bushwôn ḿbú banet-Ézerel ḿbén mbe ba-shwôn n ne me bu-man.
6Músis kâng o-sét banet-Ézerel, ne onet-dyishí-kyikû-banet-Ézerel nang orá o/kye ǎ ochí. Echí kángkáng e/byí diǐkpú ne efee, ne ba/fé ochí mú Éron ké burwám-echí ányi. 7Músis kâng o-fé echí ányi kángkáng ké mpyep mú Óburúkpâbí odakyú, ké bushú-mkpukpu-byěm-Óburúkpâbí.
8Ké orî-dyicí, ké nkéré mú Músis o/danung ké kafâ-mpyep ámu, nyǐ o/ri o/fu, ochí mú Éron mú o/bwom ké dyishí ńdyí banet-Lyíva oo/tím byicat, o-chi eshǎan ne ekong o-zím byirim ḿbyí badakó ámon. 9Músis o-kúng echí ányi kángkáng o-tông banet-Ézerel. Mbé ba/ri ńkyí kii/chi, ne onet-dyishí nang orá o/kúng ochí mú emen. 10Óburúkpâbí o-raa ne Músis o/fu, bwa esim ne ochí mú Éron a-tî ké bushú-mkpukpu-byěm ejí. Mǔ o/chi o-kuri banet-Ézerel ekó ḿbé mbe ba-bírî ng bunwa ne me o/fu, mbé ba/chi ba-kpú â ba*da/mîng eshwôn ne me*. 11Músis o-chi wǎ eringe nyí Óburúkpâbí o/kye busa.
12Banet-Ézerel ba-raa ne Músis ba/fu, ányi kâng kyi/byí, be kángkáng bii/kpú. 13Nang yeě mú o/fárâng ne mpyep mú Óburúkpâbí o-man o-kpú. Be kángkáng byikpú dí.
Currently Selected:
Nómba 17: BKY
Highlight
Copy
Compare
Share
Want to have your highlights saved across all your devices? Sign up or sign in
Published by the Bible Society of Nigeria @ 1985
