Mâk 8
8
Jisos o/nen Égot-Banet Bujam
(Mátyuu 15:32-39)
1Kyi*da/chîrí* bujê-banet bakíri chwóó ba-chîbazû kyikit kyibónge. Ké nkéré banet ámbe ba*fí to ne chwǒm ńkyí badachîryí* Jisos o-kó bǎmgbán emen ba-kâm ǎ. Ne o-raa ne mbé o/fu, 2byiko mbyi byi-kpú u mě ne banet ḿbén, ké ebóng, mbé baa/kyú ne me ké ací jangjang achât. Nké kántîk, ba*fí to ne chwǒm ńkyí badachîryí*. 3Â me n/sét kámbé n/fu, bajâ byise ebe esong ésong, mbé ba/chi ba-jwâa ké bukwóp, ké ebóng, banet bakíri ba/fím tíbítíbí.
4Bǎmgbán emen ba-bí ǎ ba/fu, onet o-ri ng byiryíng nyá ké kyikim-dyikán ńkyín ḿbyí byi/chi byi-kwárê o-nen kángkáng banet ḿbén.
5Jisos o-bí kámbé o/fu, berêt mú o/waa o/jê nǎ.
Mbé ba-faa ǎ ba/fu, mu byirim káchâtkányi.
6Jisos o-kye kâng busa o/fu, bujê-banet ámbe bakyú me kyísí. Ne Jisos o-yip byirim-berêt ámbyi káchâtkányi o-kó Osówo asǎma. Ne o-ját kámbyí o-kye bǎmgbán emen o/fu, bakyii bujê-banet ámbu. Ne bǎmgbán emen ba-chi éné. 7Bǎmgbán emen ba/mû to ne boǒnyín-boǒkworê. Jisos o-kó to Osówo asǎma ké boǒkworê ámbu, ne o-sét bǎmgbán emen o/fu, bakyii to kámbú. 8Nang yeě nang yeě o/ryí o-zût eringe nyí mu o-ryuu ng. Banet ámbe ba/mû égot nang bujam. 9Ne bǎmgbán emen ba-bwóp ekén-byiryíng nyí e/waa kyísí e-sú bookye káchâtkányi. Jisos o-twóm kâng banet ámbe dyijê. 10Ne nyǐ o-shwôm o-da-nung ké ókpǐ ne bǎmgbán emen ba-dim Damanúta.
Banet-Ncibi mú badakó Fárasyî ba/bí Jisos ba/fu, otông Kámbé Kiǐtí-Akat
(Mátyuu 16:1-4)
11Kyicê-banet-ncibi mú badakó Fárasyî ba/bê ba-kâm Jisos, ne ba-kpet ekán ké dyishí ne nyǐ. Mbé ba/mû ba-ryuu ng ba/fu, mbé ba-kan n ǎ. Ne mbé ba-bí ǎ kâng ba/fu, otông kámbé ekap nyí edatông e/fu, busa emen bu/fím ne Osówo. 12Jisos o-shwám ne o-raa o/fu, ebóng ńkyí bwǎn-bafî mbe ba-ryuu ng ekap. Aa*wááng*. Me mu n-sét ng běn n/fu, ben bwǎn-bafî baa*ba/chi ba-ri dyizong-ekap ándyi nang dyibónge*.
13O-dim o-mîng kámbé ányi, o-chîdanung ké ókpǐ, o-kpet enyáng o-ca esim-baya nyí áku.
Édúú nyí Banet-Fárasyî ne ḿbé Otu Hérot, nyí nyi wǎ Bukye ḿbú badafé ké Berêt ne o-mut
(Mátyuu 16:5-12)
14Bǎmgbán-Jisos ba/mû ba/ráp berêt okíri ekúng. Ba/mû ne kyirim-berêt kyibónge nké nke ké ókpǐ. 15Jisos o-kuri kámbé ekó o/fu, kû n̂g ebám byiko enen kyi-kim ne édúú nyí banet-Fárasyî ne ḿbé Otu Hérot, nyí nyi wǎ bukye ḿbú badafé ké berêt ne o-mut.
16Bǎmgbán emen ba-kpet epem ne barî ba/fu, mu o-raa ng ńkyín, ké ebóng, berêt o*fí bě to*.
17Jisos o/nyît ńkyí bǎmgbán emen mbe ba-raa ng, ne o-bí kámbé kâng o/fu, ebóng ńkyí ben bamu ba-pem m ba/fu, ben ba*fí ne berêt*. Nang kántîk, ben ba*da/nyît ne dí* aa kyi*da běn ewángê ne*. Ben ba*fí ne bubong*? 18Ben bamu ne achi, nké baa*man eri*? Bamu ne atông, nké baa*man ejwo*? Ben ba*fí to ba-zîim m 19nkéré mú me n/ját byirim-berêt byitánge n-kye égot-banet bujam ne etánge*? Bookye bu/sú bufěng ḿbú ben ba/wuri ekén-berêt nyí e/waa kyísí.
Ba-faa ba/fu, diǐkpú ne bufee.
20O-chîbí kámbé o/fu, bookye bu/sú bufěng to ḿbú ben ba/wuri ekén-berêt nyí e/waa kyísí ké nkéré mú me n/ját byirim-berêt káchâtkányi n-kye égot-banet bujam.
Ba-faa ba/fu, káchâtkányi.
21Ne o-bí kámbé o/fu, nké kyi*da běn ewángê ne nang kántîk*?
Jisos o/chi Onyinchéng Obónge ké Bét-Sáda mú o/mû o/sêe Achi o-kpet erángê
22Ba-ba-ribi ké oshê mú badakó Bét-Sáda. Banet ba-bâ ányi ne onyinchéng obónge mú o/sêe achi ba-kâm Jisos. Ne ba-tîm Jisos arông ba/fu, ota ǎ abwô ké byiko. 23Jisos o-níbî onyinchéng ámu ké bubwô, o-dim ne nyǐ ba-shwôm oshê. Ńdyí Jisos oo/shú mú onyinchéng ámu akorong ké achi, o-nye ǎ abwô ké nyǐ, ne o-bí ǎ o/fu, amu a-ri ng nang chwǒm?
24Onyinchéng ámu o-bêem achi kyíbóng, ne o-faa Jisos o/fu, âa, mu n-ri ng banet, nké mbe mě éné wǎ byichí nké mbyi byi-cen n.
25Jisos o-chî ǎ enye abwô ké achi. Mpéne mún onyinchéng ámu o-tún kanong kanong, achi emen a-chîbâa o-kpet eri kángkáng byěm kanong kanong. 26Jisos o-sét kâng onyinchéng ámu o/fu, oca o-jâ. O-sét ǎ o/fu, *dachi a-chîbwa esim ké kafâ-oshê mún*.
Pyíta o/sét Wááng kyi-kim ne Jisos
(Mátyuu 16:13-20; Lûk 9:18-21)
27Jisos ne bǎmgbán emen ba/dim kâng ba/fu, mbé ba-câ ké eshê nyí nyi ké Sizaryâ Fyilyípa. Ké nkéré mú mbé mbe ba-cen n ba-câ ké bukwóp, Jisos o-bí kámbé o/fu, sét n̂g mě, banet mbe ba-fu ng me mu ebóng dyizong-onet.
28Bǎmgbán emen ba-faa ba/fu, banet mbe ba-fu ng wo a-chi i Jǒn mú o/mû o-kyâ banet osoo mú Osówo. Banet bakíri mbe ba-fu ng wo a-chi i Elája. Bakíri mbe ba-fu ng wo a-chi i mkpábé mú odasét byiraa-Osówo.
29Ne Jisos o-bí bǎmgbán emen o/fu, aa ben kâng. Ebóng dyizong-onet ńdyí ben ba/fu, me mu.
Pyíta o-faa o/fu, wo a-chi i onet mú Osówo o/kúng ǎ butu.
30Ne Jisos o-nyibi kámbé atông o/fu, *da n̂g echi ba-sét onet nang obónge kyi-kim ne dyizong-onet ńdyí me mu*.
Jisos o/raa kyi-kim ne Busông Emen ne Bukyû Emen
(Mátyuu 16:21-28; Lûk 9:22-27)
31Ne Jisos o-kpet bǎmgbán emen etángê o/fu, Wǎn mú Onet o-man o-ri busông chwóó, ne bakínkán-banet-Jûs ne batu-banchi kyifen-Osówo ne bantánge Byije-Músis ba/chi ba-né ǎ. Ba/chi ba-ju ǎ, ne ké ací achât, nyǐ o/chi o-jwóbê ké bukyû. 32Jisos o/sét kámbé ńkyín wááng. Pyíta kâng o-kpî ǎ o-da-bwom ne nyǐ ké bukô, o-kpet eraa ne Jisos o/fu, Jisos o*dachîraa dyizong-kyiraa ándyi*. 33Nké Jisos o/pín achi o-tún bǎmgbán emen ḿbé áku, ne kyi-sa ǎ ne Pyíta, o-raa ne nyǐ o/fu, dim mě me nyín ké bushú, ǎ Sátan. Wo, okabe eyên mu mú banet, *chí mú Osówo*.
34Ne Jisos o-kó bujê-banet ne bǎmgbán emen ba-bâ ba-kâm ǎ. Ne o-sét kámbé o/fu, nang yeě nké o/fu, nyǐ o-bâ ne me, onet ámu o-man n o-ráp kyi-kim ne enyam-byiko emen, o-yip kyikwap emen ńkyí bada ǎ eshwân o-dim ne me ké kyikû. 35Ké ebóng, nang yeě nké mu o-jang ng eryú kyi-kim ne dyikpen emen, dyikpen emen dyi/chi dyi-tánê ǎ. Nké nang yeě nké dyikpen emen dyi/tánê ǎ ké dyishí ejí ne ké dyishí-Bǎmpém ḿbé Banong esét, nyǐ o/chi o-kpen. 36Onet o-man n eryí mpún? â o/já kángkáng byěm ḿbyí mbyi ké ejíí ńnyín? o-rím dyikpen emen dí. Mpún o*fí*. 37Chwǒm kyi*fí* ńkyí onet odaman ekye* eringe nyí odachîkoo dyikpen emen*. 38Nké â éshwân nyi e-chi i onet kyi-kim ne me ne byěm ḿbyí me mu n-tángê e ké ejíí ńnyín nyí bwǎn-bafî ḿbé mbe ba-né ng Osówo, ba-chi i byibî, éné éshwân e/chi e-chi Wǎn-Onet to kyi-kim ne onet ámu ké nkéré oo/fím áku kyíbóng ké busan ḿbú Bonchí emen ḿbú ragerage o-bâ ne barím ḿbé banong.
Currently Selected:
Mâk 8: BKY
Highlight
Copy
Compare
Share
Want to have your highlights saved across all your devices? Sign up or sign in
Published by the Bible Society of Nigeria @ 1985
