Máka 3
3
Máka o/raa ne Banet-Ashí ḿbé Ézerel
1Fwôo n̂g atông ba-jwo, ben banet-ashí ḿbé Ézerel. Ben ba/mû ba/chi ba-kûsét ntûntû kyi-kim ne byije ejí, 2nké ńkyí nkyi kanong kyi-sa ng běn kafâ, kyibî kyi-nyîn n běn. Ben bamu ba-pwát ng banet ejí ekwop bakpó, ba-shâng kámbé enyam ké byikúú. 3Bamu ba-ryí i banet ejí. Bamu ba-pwát ng kámbé enyam-byiko, ba-sé ng kámbé byikúú, ba-két ng kámbé boǒkím boǒkím wǎ enyam nyí badarám. 4Nkéré mu o-bâ mú ben ba/chi ba-tii ba-kó Óburúkpâbí, nké oo*ba/chi o-faa běn ojá*. Nyǐ oo*ba/chi o-jwo banshwam enen* ké nǎ, ben baa/chi kyibî.
5Bamkpábé ḿbé badasét byiraa-Osówo mbe ba-nîm m banet ejí ḿbé mbe ba-kyâ kámbé akpuga, ba/fu, ba/chi ba-kyú ké bunyîn-dyityém. Ba-sét ng ḿbé ba*fí ba-kyâ kámbé akpuga* ba/fu, ba/chi ba-nung ké byití. Óburúkpâbí mu o-sét ng azong-bamkpábé ámbe o/fu, 6bamkpábé ḿbé badasét byiraa ejí, ací enen a*fí to chwóó*. Busa enen bu*fí to*. Ké bubwô ḿbú bamu ba-nîm m banet ejí, ben baa*ba/chi ba-chîri chwǒm ńkyí ntûntû ńkyí badasét* ne baa*ba/chi ba-chîman esét chwǒm nang kyibónge ńkyí kyi/chi kyi-chi ké kashú*. 7Éshwân e/chi e-wuri bansô epé, ké nǎ, byěm ḿbyí ba/sét bii*ba/chi byi-chi*. Ba/chi ba-bwa ne mbé kyísí kyísí, ké nǎ, Osówo o*fí o-faa ng kámbé ojá*.
8Nké kyi-kim ne me, Óburúkpâbí mu o-fâ mě busa ḿbú Busun emen ké byiko o-kyâ mě bubong ḿbú ndanyît ntûntû ne busa ḿbú ndabwom n-sét banet ḿbé Ézerel eringe nyí byibî ebe mbyi. 9Fwôo n̂g atông ba-jwo mě, ben banet-ashí-Ézerel, ben mú ntûntû oda běn esa kafâ, ba-bírî ng kyinong kyi-firi kyibî. 10Ben bamu ba-bi ng Jerúsélem mú oshê mú Osówo ké kiimkpet kyikû-ekpe-kyise ńkyí banet eju ne acît eryí. 11Batu-oshê mbe ba-koo ng bangu ne ba-tún oshê. Banchi kyifen-Osówo mbe ba-tángê e banet Byije-Músis ba-koo ng akpuga. Bamkpábé ḿbé badasét byiraa-Osówo mbe ba-sét ng byiraa-Osówo ba-koo ng akpuga. Ne mbé ashí kángkáng mbe ba-sét ng ba/fu, Óburúkpâbí mu ne mbé. Mbe ba-raa ng ba/fu, busông boo*ba/chi bu-ta bě* ké nǎ, Óburúkpâbí mu ne be.
12Ké bubwô ámbu kâng, ké dyishí enen, ba/chi ba-kpang Jerúsélem wǎ kyifát, ba-bên kámú, ne kiǐtí-kyise-kyifen-Osówo echi kyi/chi kyi-bírî kyizinge.
Currently Selected:
Máka 3: BKY
Highlight
Copy
Compare
Share
Want to have your highlights saved across all your devices? Sign up or sign in
Published by the Bible Society of Nigeria @ 1985
