Jóna 4
4
Busa-Dyityém ḿbú Jóna ne Bafip ḿbé Osówo o/ri Banet ḿbé Nyínyíve
1Kyi*da/nyîn Jóna nang kaǎnyín kyi-kim ne ńkyín* ne kafâ ka-kpet ǎ esa. 2Ne o-fé nshwam o/fu, Óburúkpâbí, me m/mû n*da/sét ne n-dim ké byise n/fu, ńkyín nké wo a/chi a-chi*? Nkyí nké kyi/chi ne n-kan n/fu, n-chêe ng n-jâ Syipîn. Me mu n-nyît ng n/fu, wo a-chi i Osówo mú banet bada ǒ ejê, o-ri ng kámbé bafip. Wo kángkáng nkéré amu ne dyityém ńdyí degere, kángkáng nkéré a-cángê e dyityém, ne kángkáng nkéré a-yángê e dyityém eyên aa*kye to banet busông*. 3Kántîk, ǎ Óburúkpâbí, mîng mě m-kpú. Ńkyí ndakpú kyi-nwa ng kyi-shwôm ńkyí ndawaa okpó.
4Óburúkpâbí o-faa o/fu, ebóng bukwóp ḿbú wo amu ne mbú, ḿbú wo adasa kafâ.
5Jóna o-dim o-wâa ké kyicê-oshê ńkyí esû nyi e-byí i o-da-kyú me. O-chi kyikit ńkyí odarem esû, o-kyú me ké busi emen, mu o-bám m o/fu, nyǐ o-ri ng ńkyí kyi/chi kyi-chi Nyínyíve. 6Ne Osówo Óburúkpâbí kâng o-chi kyichí kyi-byí, kyi-paam byire, kyi-ku Jóna esû eringe nyí odakyú ké bunyîn-dyityém. Kyi/nyîn Jóna kanong kanong ne kyichí ánkyi. 7Nké ńdyí dyicí dyi/cé ké orî-dyicí, Osówo o/kye busa kiǐnyâa kyi-ryí kyichí ánkyi kyi-kpú. 8Ké nkéré mú esû e/byí, Osówo o/twóm kiinsóngé-bufú, ne Jóna o/mû o/nángê o-jwâa ké busông-esû nyí nyi e-sóng ng ǎ ké dyishí. Ne [o-kpet eryuu kâng o/fu, kyi/bát nyǐ okpú.] O-raa o/fu, ńkyí ndakpú kyi-nwa ng kyi-shwôm ńkyí ndawaa okpó.
9Nké Osówo o/raa ne nyǐ o/fu, ebóng bukwóp ḿbú wo amu ne mbú, ḿbú wo adasa kafâ kyi-kim ne kyichí ánkyi. Jóna o-faa o/fu, me mu ne bukwóp ḿbú ndasa kafâ, m-man n esa kafâ ńké ndakpú.
10Óburúkpâbí o-raa ne nyǐ o/fu, kyichí ńkyín kyi/byí ké buchú bubónge, kyi-kpú ké orî-dyicí. Wo a*da/kye kánkyí chwǒm* ne *chí wo nké a/chi kánkyí ne kyi-kán* nké byiko mbyi byi-kpú u ǒ ne nkyí. 11Kyi-cen n nǎ kâng ne me nn*ri kiǐtí-oshê wǎ Nyínyíve bafip*. Â a/tún a-ri, égot-boǒbwásíng ḿbú mbu ké oshê ámu bu-shwôm m égot echât, ne byitú to chwóó ḿbyí mbyi ké mǔ.
Currently Selected:
Jóna 4: BKY
Highlight
Copy
Compare
Share
Want to have your highlights saved across all your devices? Sign up or sign in
Published by the Bible Society of Nigeria @ 1985
