Jeryimáya 36
36
Báruk o/kó Nwet ké Kafâ-Kiǐtí-Kyise-Kyifen-Osówo echi
1Ké nkéré Otu Jehóyákim mú wǎn-Otu Josáya o/ryí butu ké Júda o-rí aje anyii, Óburúkpâbí o/raa ne me o/fu, 2kúng nwet a-sáng kángkáng byěm ḿbyí me n/sét kyi-kim ne Ézerel ne Júda ne kángkáng eshê nyí ké ejíí. Sáng kángkáng byěm ḿbyí me nn/sét ǒ kyi-fím ké nkéré mú me m/bwóp kashú n-raa ne wo, ké nkéré Otu Josáya o/mû otu tete kyi-ribi kántîk. 3Katô â banet ḿbé Júda ba/jwo kyi-kim ne kángkáng busông ḿbú mu n-kabe ng n/fu, n-kyâ kámbé, ba/chi ba-mîng byibî-akwóp ebe. Â ba/chi éné kâng, n/chi m-pwoo kámbé ké atyém ebe ebên ne byibî ebe.
4Ne n-kó kâng Báruk mú wǎn-Neryâ ne n-sét ǎ kángkáng ńkyí Óburúkpâbí o/sét mě. Ne Báruk o-sáng kánkyí ké nwet. 5Ne n-sét kâng Báruk byiraa ḿbyín n/fu, ba*fí to ba-bángê e mě n-nung ké kafâ-kiǐtí-kyise-kyifen-Osówo echi*. 6Nké mu n-ryuu ng ǒ n/fu, ca ké kafâ â banet ba/chîce esong ecíp. Kó nwet mún eringe nyí ba/chi ba-jwo kángkáng byěm ḿbyí Óburúkpâbí o/sét mě ne me n-sét ǒ a-sáng kyísí. Bwom ké kyikit ńkyí nang yeě oda ǒ eman ejwo, cibicibi ne banet ḿbé Júda ḿbé baa/fím ké eshê ebe ba-bâ. 7Katô ba/chi ba-fé nshwam ba-kye Óburúkpâbí, ba-mîng byibî-akwóp ebe, ké nǎ, Óburúkpâbí oo/fé banet ḿbén bushî ne busa-dyityém emen ḿbú buryên. 8Ne Báruk kâng o-kó ejá nyí Óburúkpâbí ké kafâ-kiǐtí-kyise-kyifen-Osówo echi kerededet wǎ eringe nyí n/sét ǎ n/fu, okó.
9Ké nkéré mú kii/rí aje atánge ne etukáku kátángekányi nyí Otu Tehókim mu otu mú Júda, banet-Ézerel ba/cíp esong ba/fu, Osówo opwoo kámbé. Kángkáng banet ḿbé ba/mû ba-kyú u ké Jerúsélem ne ḿbé ba/fím ké eshê nyí Júda ba-bâ ké Jerúsélem ba/cíp esong ányi. 10Ké nkéré banet ámbe kángkáng kâng mbe ba-fwôo ng atông, Báruk o/kó nwet ámu kángkáng mú me n/sét ǎ. Nyǐ o/bwom ké nfût mú Gemaryâ mú wǎn-Sháfan, mú o/mû nsâng banwet, ké kafâ-kiǐtí-kyise-kyifen-Osówo echi ne o-kó kámú. Nfût emen ámu o/mû ké kyikim ńkyí kyíbóng, fáráng ne ocím-dyifyi mú dyifyi ńdyí badakó Dyifyîfî ńdyí kiǐtí-kyise-kyifen-Osówo echi.
Báruk o/kó Nwet ámu o-sét Banet-Ashí-Bǎmkpóngé
11Makáya mú wǎn-Gemaryâ, mú bonchí emen mú kánkán o/mû o-bángê e Sháfan, o/jwo ké nkéré Báruk o/kó ké nwet ńkyí Óburúkpâbí o/sét. 12Ne o-dim kâng o-ca ké kyibám-butu, ké nfût mú nsâng banwet ké kyikit ńkyí kángkáng banet-ashí-bǎmkpóngé ba/mû ké ncibi. Elyíshama mú nsâng banwet ne Dyiláya mú wǎn-Shemáya ne Enátan mú wǎn-Ákobo ne Gemaryâ mú wǎn-Sháfan ne Zedekyâ mú wǎn-Hanánya ne kángkáng banet-ashí-bǎmkpóngé ḿbé áku ba/mû ányi. 13Makáya o-sét kámbé kángkáng ńkyí nyǐ o/jwo Báruk o/kó o-sét banet. 14Banet-ashí-bǎmkpóngé ámbe kâng ba-twóm Jehúdyi mú wǎn-Netanyâ, mú banchí emen ḿbé bakínkán ba/mû Shelemyâ ne Kúshi, ba/fu, oda-sét Báruk o-bâ ne nwet ámu mú o/kó o-sét banet. Báruk o-bâ ne nwet ámu o-ba-kye kámbé. 15Ba-sét ǎ ba/fu, okyú me o-kó nwet ámu o-sét kámbé. Báruk o-kó kâng o-sét kámbé. 16Ké nkéré mú oo/kó o-sét kámbé, mbé ba-waa ocím ké dyishí fúú, ba-bírî ba-tún barî, ba-sét Báruk ba/fu, byi-man byi-da-sét otu kánkyí. 17Ne ba-bí Báruk kâng ba/fu, sét bě, wo a/cen nǎ ne a-sáng kángkáng ḿbyín. Jeryimáya nké o/sét ǒ o/fu, wo asáng?
18Báruk o-faa o/fu, Jeryimáya nké o/sét mě kángkáng byiraa ḿbyín ne n-kúng omu-nwet n-sáng kámbyí kángkáng ké nwet mún.
19Ne ba-sét Báruk ba/fu, wo ne Jeryimáya ba-man ba-chêe ba-da-rem. *Da n̂g echi ba-chi onet nang obónge o-nyît kyikit ńkyí ben badarem*.
Otu o/shí Nwet ámu
20Banet-ashí-bǎmkpóngé ámbe ba-yip nwet ámu ba-fé ké nfût mú Elyíshama mú nsâng banwet, ba-dim ba-wâa ké kyibám ńkyí otu ba-da-kúng kángkáng byiraa ámbyi ba-sét ǎ. 21Otu kâng o-twóm Jehúdyi o/fu, obâ ne nwet ámu. Jehúdyi o-da-kúng kámú ké nfût mú Elyíshama o-kó o-sét otu ne banet-ashí-bǎmkpóngé ḿbé ba/bwom ba-wáp otu ba-fé ké otyém. 22Kyi/mû ké nkéré mú dyibyi, ne otu o/mû o/kyú ké nfût emen mu o-jwaa ng okwâ. 23Ké nkéré Jehúdyi o-kó ng byikim byichât ne byinyii o-bâ, otu o-yip kaǎshwám o-két byikim ámbyi o-fé ké okwâ. O/chi éné o-ca kashú tete o-shí kyirim-nwet ánkyi kpók. 24Nké nang otu nang banet-ashí-bǎmkpóngé emen ḿbé ba/jwo kángkáng byiraa ḿbyín ba*da/shî* ba-tông nang ekap nyí byiko byi/kpú kámbé*. 25Nang ké Enátan ne Dyiláya ne Gemaryâ ba/tîm otu arông ba/fu, o*dachi o-shí nwet ámu* otu o*da/fwôo atông o-jwo kámbé*. 26Ne otu kâng o-kye wǎn emen mú odabángê Jerámyil cibicibi ne Seráya mú wǎn-Ázaryel ne Shelemyâ mú wǎn-Ábidil busa o/fu, bakám mě ne Báruk mú nsâng banwet ejí. Nké Óburúkpâbí o/mû oo/rôo bě.
Jeryimáya o/sáng Nwet Okíri
27Ké nkéré Otu Jehóyákim oo/shí nwet mú m/mû n/sét Báruk o-sáng, Óburúkpâbí o/sét mě 28o/fu, me nyip nwet okíri n-sáng kángkáng byěm ḿbyí byi/mû ké nwet mú kashú. 29Óburúkpâbí o/sét mě o/fu, me nsét otu ámu n/fu, wo aa/shí nwet ámu ne aa/bí Jeryimáya ńkyí kyi/chi ne n-sáng o/fu, otu mú Bábyílon o/chi o-bâ o-ba-bên esí ńnyín, o-ju banet ne enyam nyí nyi ké nyǐ. 30Kántîk kâng, me Óburúkpâbí mu n-sét ng ǒ wo Otu Jehóyákim n/fu, wǎn eyên o*fí nang obónge mú o/chi o-chîkyú otu ké kyikû-butu ńkyí Otu Dívit*. Ba/chi ba-yip kyikwóm-enyam-byiko eyên ba-twóp kyíjí ké kyikit ńkyí esû edasóng kánkyí ne esû, dyibyi dyi-nwa kánkyí ne buchú. 31Me n/chi n-kye ǒ wo ne kyikû-banet eyên ne banet-ashí-bǎmkpóngé eyên busông ké bubwô ḿbú byibî ḿbyí ben ashí amúmú bamu ba-chi i. Nang wo nang banet ḿbé Jerúsélem ne ḿbé Júda ba*da/fwôo atông ba-jwo ekó nyí n/kuri běn* ne ké bubwô ámbu, n/chi m-bâ ne kángkáng busông ḿbú m/mû n/fé běn bushî.
32Ne n-kúng kâng nwet okíri n-kye Báruk ne o-sáng kángkáng ńkyí n/sét ǎ. O/sáng kángkáng ńkyí kyi/mû ké nwet mú kashú ne byěm byikíri ḿbyí m/mû n/sét ǎ.
Currently Selected:
Jeryimáya 36: BKY
Highlight
Copy
Compare
Share
Want to have your highlights saved across all your devices? Sign up or sign in
Published by the Bible Society of Nigeria @ 1985
