Jeryimáya 28
28
Jeryimáya ne Mkpábé mú odabángê Hanánya
1[Ké dyije ándyi dyibónge,] ké nkéré mú kii/rí aje anyii ne etukáku etánge nyí Otu Zedekyâ o/ryí butu ḿbú Júda, Hanánya mú wǎn-Ázu, mú o/mû mkpábé, mú o/fím oshê mú Gyíbwon, o/raa ne me ké kafâ-kiǐtí-kyise-kyifen-Osówo echi, ké bushú ḿbú banchi kyifen-Osówo ne kángkáng banet o/fu, 2Osówo Óburúkpâbí mú Ézerel o/sét o/fu, me nn/koo busa ḿbú Otu mú Bábyílon. 3Ké aje něen afee, me n/chi n-kúng kángkáng byěm-kiǐtí-kyise-kyifen-Osówo echi ḿbyí Otu Nébúkanéza o/wuri o-jâ ne mbyí Bábyílon m-bwa ne mbyí esim ké kyikit ńkyín. 4N/chi m-bwa to esim ne Otu Jehóyákin cibicibi ne kángkáng banet ḿbé Júda ḿbé ba/mû ba/kám kámbé ba-jâ ne mbé wǎ básóng ké Bábyílon. Ké nǎ, me n/chi n-koo busa ḿbú otu mú Bábyílon. Me Óburúkpâbí nké n/raa.
5Ne me n-raa kâng ne Hanánya ké bushú ḿbú banchi kyifen ne kángkáng banet ḿbé ba/mû ba/bwom ké kafâ-kiǐtí-kyise-kyifen-Osówo echi n/fu, 6kyi/bát kyikyú éné. Kyi/bát Óburúkpâbí ochi éné. Kyi/bát Óburúkpâbí ochi byiraa ḿbyí wo aa/raa něen byi-kyú ntûntû, o-bwa esim ne kángkáng byěm ḿbyí byi/mû ké kiǐtí-kyise emen, ne kángkáng banet ḿbé ba/kám kámbé ba-dim ne mbé wǎ básóng. 7Nké kántîk, jwo kyiraa ńkyín ńkyí me mu n-sét ng ǒ, ńkyí kángkáng banet to mbe ba-jwo ng. 8Bamkpábé ḿbé badasét byiraa-Osówo ḿbé ba/byí kpáá ne me ne wo byi-bâ, kyi-fím ké nkéré mú kpákpá ba/sét kyi-kim ne byití ne esong ne byirwóm ḿbyí byi/chi byi-nwa eshê chwóó ne biǐtí-batu to chwóó. 9Nké mkpábé mú odasét kyi-kim ne bunyîn-dyityém ba-nyît ng ǎ wǎ mkpábé mú Óburúkpâbí o/twóm ǎ ké ntûntû, â byěm ḿbyí o/sét byi/chi wǎ eringe nyí o/sét.
10Ne Hanánya kâng o-pii mě kyifóngé ńkyí m/mû n/fé, o-sé kánkyí rugirugi, 11ne o-raa ké bushú ḿbú kángkáng banet o/fu, Óburúkpâbí o/fu, něen nké nyǐ o/chi o-bên byifóngé ḿbyí Otu Nébúkanéza oo/fé kángkáng eshê ké kyitông wǎ básóng, ne o/chi o-chi kánkyí ké chwǒm wǎ aje afee. Ne me kâng n-dim.
12Ké nkéré mú kii/rí ací ńdyí Hanánya o/sé kyifóngé ńkyí ejí, Óburúkpâbí o/raa ne me o/fu, 13ca a-da-sét Hanánya a/fu, Óburúkpâbí o/raa o/fu, wo aa/sé kyifóngé ńkyí n/chi ké kyichí, nké [me] n/chi n-chi ńkyí kiǐrékiire n-cít dyikíp. 14Ké nǎ, Osówo Óburúkpâbí mú Ézerel mú o/rêe o-shwôm oo/raa o/fu, me nn/yip byifóngé ḿbyí biǐré biire n-fé eshê ńnyín ké byitông n/fu, ekyú básóng ḿbé Otu Nébúkanéza mú Bábyílon, ne mbé ba/chi ba-kyú bǎmgbán emen, ké nǎ, me nn/kye ǎ cibicibi ne enyam nyí ké dyikán. 15Ne me n-sét Hanánya n/fu, fwôo atông a-jwo, ǎ Hanánya. Óburúkpâbí o*da ǒ etwóm* ne aa/chi banet ḿbén ba-fé dyityém ké kyisédéng. 16Ké bubwô ámbu, Óburúkpâbí o/fu, nyǐ o/chi o-man ne wo ké ejíí. Wo a/chi a-kpú ké ochíchí-dyije ńdyín, ké nǎ, wo a/sét banet ḿbén a/fu, babwom bunwa ne Óburúkpâbí.
17Ké etukáku káchâtkányi, ké dyije ándyi dyibónge, Hanánya o-kpú.
Currently Selected:
Jeryimáya 28: BKY
Highlight
Copy
Compare
Share
Want to have your highlights saved across all your devices? Sign up or sign in
Published by the Bible Society of Nigeria @ 1985
