Jeryimáya 20
20
Jeryimáya o/shwôn ne Nchi Kyifen-Osówo mú odabángê Páshu
1Ké nkéré nchi kyifen-Osówo mú odabángê Páshu, mú wǎn-Éma, mú o/mû onet-dyishí-bǎmkpóngé ké kiǐtí-kyise-kyifen-Osówo echi o/jwo nkéré mú me n/sét byiraa ḿbyín, 2o/kye busa o/fu, bamín mě, ba-fé mě bamgbokobá fáráng ne dyifyi dyibónge ńdyí ndyi ké kiǐtí-kyise-kyifen-Osówo echi, ńdyí badakó dyifyi ńdyí Běnjámin. 3Ké orî-dyicófóróng, ké nkéré Páshu o/zú mě abwô ké bamgbokobá ḿbé ba/fé mě, me n-sét ǎ n/fu, Óburúkpâbí o*da ǒ efé dyizîn ńdyí mbe ba-kó ng ǒ Páshu*. Dyizîn ńdyí nyǐ oo/fé ǒ dyi-bángê e Bushî ké Kángkáng Byikit. 4Óburúkpâbí oyén oo/sét o/fu, me n/chi n-chi ǒ a-firi onet mú o/chi o-chi bushî ne byiko emen, o-chi bushî ne bacín emen, ne wo a/chi a-ri ké banet-bushwôn ebe ba/chi ba-yip bushwám ba-ju kámbé. N/chi n-chi kángkáng banet ḿbé Júda ba-firi ké abwô nyí otu mú Bábyílon. Otu ámu o/chi o-kúng kyicê-banet o-dim ne mbé wǎ básóng, o-ju bakíri. 5Me n/chi m-mîng to banet-bushwôn ebe ba-bên kángkáng esang nyí nyi ké oshê mún, ba-koo kángkáng byěm ḿbyí mbyi ké mǔ, cibicibi ne esang nyí batu ḿbé Júda, ba-tû kángkáng byěm ba-jâ ne mbyí Bábyílon. 6Kyi-kim ne wo, ǎ Páshu, ba/chi ba-kám ǒ ne kángkáng kyikû-banet eyên ba-jâ ne ben Bábyílon. Áku nké a/chi a-kpú ba-ryii ǒ, cibicibi ne kángkáng bacín eyên ḿbé a/sét kámbé byisédéng chwóó.
Jeryimáya o/tii o-kó Óburúkpâbí
7Óburúkpâbí, wo aa/nîm mě
ne aa/chi ba-nîm mě.
Wo a-shwane e a-shwôm mě
ne aa/kpógê mě.
Nang yeě nang yeě o-kú o-jwó ng mě.
Banet ba-kú ba-fát ng mě kiikuku kángkáng dyicí.
8Nang nkéré orá nké n/raa, n-tii ng,
n-wonge e n/fu, bunwa ne busông.
Óburúkpâbí, banet mbe ba-fát ng mě kiikuku,
ba-shú u mě kángkáng nkéré,
ké nǎ, me mu n-sét ng kyitwóm eyên.
9Nké â n/fu, n/chi n-ráp Óburúkpâbí,
nn*raa to ké dyizîn emen*
kyitwóm eyên kâng kyi-firi wǎ okwâ nké mu o-mang ng mě ké kafâ.
N/kan n/fu, n-níbî ng kánkyí ké kafâ ejí,
nké mm*man echîníbî kánkyí*.
10Me mu n-jwo ng ké nang yeě nang yeě mu o-raa ng ké booju o/fu,
bushî bu/firi ké kángkáng byikit.
Bâ n̂g byi-da-sét banet-ashí kyi-kim ne nyǐ.
Nang bacín-dyityém ejí mbe ba-bám m ba/fu, me nróng.
Mbe ba-raa ng ba/fu,
katô byi-man n ǎ enîm,
byi-kám ǎ, byi-só ǎ ewa.
11Nké wo, ǎ Óburúkpâbí,
mú a/rêe ne amu ne busa,
amu ké kyicê ńkyí ejí,
ne banet ḿbé mbe ba-kyâ mě busông baa*ba/chi ba-ri bukwóp*.
Ba/chi ba-wuri kámbé éshwân nyí ee*man*
ké nǎ, kii*ba/chi kyi-byí kámbé dyishí*.
Banet baa*tigi ba-ráp éshwân ebe*.
12Nké wo, ǎ Óburúkpâbí mú a/rêe a-shwôm,
amu a-fwôo ng banet ké bukwóp ḿbú bunong.
Wo amu a-nyît ng ńkyí nkyi ké atyém ebe.
Ké bubwô ḿbún, chi mě n-só banet-bushwôn ejí ewa,
ké nǎ, me nn/kúng mpan ejí n-fé ǒ ké abwô.
13Kwán n̂ ekwan ba-kye Óburúkpâbí.
Kye n̂g Óburúkpâbí akpee.
Nyǐ mu o-nyii ng banet ḿbé mbe ba-cít ng kámbé
ké abwô nyí busa ḿbú byibî-banet.
14Shú dyicí ńdyí ba/fwon mě.
Ráp dyicí ńdyí boné ejí o/fwon mě.
15Shú onet mú o/chi bonchí ejí o-firi ké bunyîn-dyityém,
mú o/ba ǎ esét o/fu,
baa/fwon ǒ wǎn-onyinchéng,
wo a/firi ne wǎn-onyinchéng.
16Kyi/bát onyinchéng ámu ofiri wǎ eshê ányi nyí Óburúkpâbí o/bên,
bafip ba*da ǎ echi*.
Kyi/bát ojwo ejá-bukyû-busông ké dyicófóróng,
o-jwo dyiwonge ńdyí byití ne esû,
17ké nǎ, nyǐ o*da mě eju ne ba-kû mě efwon*.
Dyifít ńdyí boné ejí kâng dyi/mû dyi/chi dyi-kyú dyikun ejí.
18Ebóng ba/fwon mě.
Ba/fwon mě ba/fu,
me nri afaníkong ne bafip
m-man dyikpen ejí ké éshwân?
Currently Selected:
Jeryimáya 20: BKY
Highlight
Copy
Compare
Share
Want to have your highlights saved across all your devices? Sign up or sign in
Published by the Bible Society of Nigeria @ 1985
