Jeryimáya 12
12
Jeryimáya o/bí Óburúkpâbí Bǎmbím
1Jeryimáya o/fu,
Óburúkpâbí, â n/fu,
n-kán n ké dyishí ne wo,
a-kpógê ng mě.
Nké m-man m-bí ǒ bǎmbím kyi-kim ne acît eryí.
Ebóng ńkyí byibî-banet mbyi byi-já ng byěm.
Ebóng ńkyí bannîm banet nang ba-chi ebóng kyi-nwa ng kyi-kye kámbé.
2Wo nké a/kwón kámbé, ba-chi eriri, ba-kán, ba-zím byirim.
Mbé kángkáng nkéré ba-raa ng kanong kyi-kim ne wo,
nké ké ntûntû, ba*fí ba-kérê ng kyi-kim ne wo*.
3Nké Óburúkpâbí, wo amu a-nyît ng mě.
Wo amu a-ri ng ńkyí mu n-chi i,
ne eringe nyí wo amu a-jê ng mě.
Tut byibî-banet ḿbyín a-dim ne mbé
wǎ ebû nyí ba-kú ba-bâ eju kányí.
Bám kámbé tete kyi-ribi nkéré mú ba/chi ba-ju kámbé.
4Ka-rí i nǎ ne esí eten e-mîng ewaa jwómjwóm
ne biǐbyâa byi-mîng ekpú.
Enyam nyi e-kpú u ké bubwô ḿbú byibî ḿbyí banet eten,
banet ḿbé mbe ba-raa ng ba/fu,
Osówo o*fí o-ri ng [ńkyí byimu byi-chi i*.]
5Óburúkpâbí o/raa o/fu, Jeryimáya,
â wo aa/kyee ké ochéé ekan ne banet,
wo a-cen n nǎ ne a-kan ochéé ne bubyî-orá.
 wo aa*man ebwom nang cip ké kyikit ńkyí nkyi wááng*
wo a-cen n nǎ ne a-nung ké kyizinge
ńkyí nkyi ké bukô-kace ńké badakó Jódan.
6Nang bwǎn-bané eyên ḿbé mbe kyikû-banet eyên ba-kú ba-chi i ǒ byěm-kaǎnínǐm.
Baa/cibi ne barî ba-bwom bunwa ne wo.
*Dachi a-fé dyityém ne mbé*
nang ké mbe ne bunyîn-ejá*.
Bafip ḿbé ba/chi Óburúkpâbí ké Bubwô-Banet Emen
7Óburúkpâbí o/raa o/fu,
me nn/dim m-mîng banet ḿbé Ézerel.
Me nn/né oshê ejí mú n/cá kámú.
Nn/kúng banet ḿbé mbe ba-jê ng mě
n-kye banet-bushwôn ebe.
8Banet ejí ḿbé n/cá kámbé baa/bírî bunwa ne me.
Mbé baa/pám mě ba-fém
wǎ ekpang nyí nyi ké dyikán,
ne ké bubwô ámbu, ba-kú ba-sa ng mě kafâ.
9Banet ejí ḿbé n/cá kámbé mbe wǎ kanurung
ńké bukô mbu bu-kan n kánké ekám byicê byimúmú.
Kó enyam-dyikán e-bâ e-ba-nung ké dyijî.
10Batu chwóó ḿbé eshê ekíri baa/bên kyifát ejí.
Mbé baa/bên byiryíng ejí.
Baa/chi esí ejí nyí enong enong e-bírî kyikim-dyikán.
11Baa/chi kányí e-bírî kyikim-dyikán,
e-waa kafâ dyikáá ké bushú ejí.
Esí emúmú e/firi kyikim-dyikán,
ne nang onet obónge o*fí o-kérê ng*.
12Banet baa/fím ké kángkáng eku nyí ké kyikim-dyikán ba-ba-bên byikit.
Me nn/twóm byití n/fu,
byiba-bên kángkáng esí ejí
ne onet o*fí mú o/chi o-man ekyú ké bunyîn-dyityém*.
13Banet ejí ba/kwón esang-byichí, ba-fuu byiwong.
Mbé baa/chi bǎmkpóngé ba-fé busa,
nké ba*da/já nang chwǒm ké mbé*.
Ké bubwô ḿbú kyibî-busa-dyityém ejí,
byíkwôn ebe byi*da/zím*.
Ocím mú Óburúkpâbí o/ryí Banet ḿbé ba/kim ne Banet ḿbé Ézerel
14Óburúkpâbí o/raa o/fu, me mu ne chwǒm ńkyí ndasét kyi-kim ne banet ḿbé mbe ba-kyú u ba-kim m banet ḿbé Ézerel, ḿbé ba/bên esí nyí n/kye banet ejí ḿbé Ézerel. N/chi n-kúng byibî-banet ámbyi ké eshê ebe n-dim ne mbé wǎ kyichí ńkyí ndazú kánkyí ne eriri, ne n/chi n-nyii banet ḿbé Júda ké abwô ebe n-koo. 15Nké ké nkéré mú nn/kúng kámbé ké eshê ebe ányi n-dim ne mbé, n/chi n-ri kámbé bafip. N/chi m-bwa ne oshê nang orá ké esí ebe ne ké kyikit ńkyí ba/mû. 16Â mbé ba/chi ba-koo Osówo mú banet ejí mbe ba-fâ ne kángkáng atyém ebe, ba-ryí ocím ba/fu, ké dyizîn ńdyí Óburúkpâbí mú mu okpó, wǎ eringe nyí mbé ba/mû ba/tángê banet ejí ba-ryí ocím ké dyizîn ńdyí Bâl, mbé kâng ba/chi ba-kyú ké burwám-banet ejí, ne ba/chi ba-já ńkyí mbe ba-ryuu ng. 17Nké â oshê nang orá o/fu, mǔ oo*chi ńkyí n/sét* n-zú ng kámú kángkáng ne eriri, n-ju kámú. Me Óburúkpâbí nké n/raa.
Currently Selected:
Jeryimáya 12: BKY
Highlight
Copy
Compare
Share
Want to have your highlights saved across all your devices? Sign up or sign in
Published by the Bible Society of Nigeria @ 1985
