Azáya 24
24
Óburúkpâbí o/chi o-kye Ejíí Busông
1Óburúkpâbí o/chi o-bên ejíí o-mîng kányí kafâ dyikáá. O/chi o-nyibi ejíí, o-pwó banet byiryibyiryi. 2Nang yeě nang yeě o/chi o-ri dyizong-busông ámbu bubónge, banchi kyifen-Osówo ne banet ḿbé kwán, básóng ne banchí ebe, banrê byěm ne banshee byěm, bampwoo banet akpuga ne bampwoo akpuga ne banet, banet-esang ne banet-byikpu. 3Ejíí e/chi e-bên kángkáng e-firi boǒcê boǒcê. Óburúkpâbí oo/raa, ne kyi/chi kyi-chi.
4Buce bu-kú bu-núng ng ké ejíí. Ejíí emúmú e/firi kyeekyee. Bubóng ne esí byi-kú byi-fwoo ng. 5Banet baa/bên ejíí ké byije ḿbyí Osówo ḿbyí mbe ba-bên n, ne ké ocím ebên mú nyǐ o/ryí o/fu, o/chi o-waa ne banyá. 6Ké bubwô ámbu, Osówo oo/shú ejíí. Banet ḿbé ejíí ba-kú ba-ri ng busông ké ńkyí mbé baa/chi. Ḿbé mbe bakpó mbe ba-sîi ng ba-câ. 7Byichí byi-kú byi-kpú u, ne bato ba-kú ba-kaa ng. Nang yeě mú o/mû ké bunyîn-dyityém o/firi kántîk ké bafip, 8ne ane nyí bunyîn-dyityém nyí ácîng ebe ne ekam ebe aa/man. 9Banet ba*fí to ba-jwáp ng bato* ba-kwán n ane ké bunyîn-dyityém*. Onet o*fí to o-jwo ng bunyîn-bato*. 10Ké oshê, kángkáng byěm byi/firi byiryibyiryi, ne banet ba-kú ba-fín n afyi ba-círing ng byiko. 11Banet ba-kú ba-wonge e ké byiká-oshê, ké nǎ, bato ba*fí to*. Baa*ri to bunyîn-dyityém ne banyá*. Baa/ró kámbú bu-dim ké esí. 12Oshê oo/shí, ne baa/sé afyi emen. 13Ńkyín nké kyi/chi kyi-chi ké kángkáng eshê, ké ejíí emúmú. Kyi/chi kyi-kyú wǎ nkéré mú byiryíng efuu byidaman, ké nkéré mú baa/bóng byirim-byichí ké kángkáng asín-byichí.
14Banet ḿbé ba/chi ba-kpen ba/chi ba-kwán ekwan ké bunyîn-dyityém. Banet ḿbé mbe ké kyicê ńkyí esû nyi e-ríbî ng ba/chi ba-sét eringe nyí Óburúkpâbí mu kiǐtí, 15ne ḿbé mbe ké kyicê ńkyí esû nyi e-byí i ba/chi ba-kpee ǎ. Banet ḿbé mbe ba-kyú u ké bakô-baya ḿbé baryên ba/chi ba-kpee Óburúkpâbí mú mu Osówo mú Ézerel. 16Be byi/bwom ké Ézerel byi-jwo ekwan-akpee nyí nyi e-fím m tíbítíbí, nyí mbe ba-kyâ Ézerel, oshê mú mu o-chi i kanong.
Nké ényángenyánge e*fí mě*. Me mu m-bên n n-câ. Bannîm banet mbe ba-câ kashú ne kaǎnínǐm ebe, ne byibî ebe mbyi byi-kán n ba-câ kashú. 17Nang yeě nang yeě ofwôo atông o-jwo mě. Bushî ne abíng ne boǒtám mbyi byi-bám m běn. 18Nang yeě mú o/kan o/fu, nyǐ o-fem m bushî o/chi o-róng ké dyibíng, ne nang yeě mú o/pyángê dyibíng, kaǎtám ka/chi ka-kám ǎ. Omu mú oryên o/chi o-na, ne byikû-byikwap ḿbyí ejíí byi/chi byi-náng. 19Ejíí e/chi e-nere ekyû e-járê. 20Ejíí e/chi e-kûcíng wǎ mbwôm bato, e-kûnáng wǎ kaampyep ńké afú nyí aryên nyi a-tugi ng kánké. Byibî ḿbyí ejíí bii/nye kányí byi-fé kyísí. E/chi e-róng, ee*bûu to ne banyá*.
21Nkéré mu o-bâ mú Óburúkpâbí o/chi o-kye byěm ḿbyí mbyi ne busa kyíbóng ne Batu ḿbé ké ejíí busông. 22Osówo o/chi o-wuri Batu o-zû kyikit kyibónge wǎ bamgbokobá ḿbé mbe ké dyibíng. O/chi o-fé kámbé ké kyibám-mgbokobá tete nkéré mú o/chi o-kye kámbé busông o-fyi. 23Otukáku o/chi o-bírî kyifip, ne óbyísû oo*ba/chi o-chîsan*. Ké nǎ, Óburúkpâbí mú o/rêe o-shwôm o/chi o-kyú Otu. Nyǐ o/chi o-kyú Otu ké Jerúsélem, ké kaku ńké Záyon, ne banet-ashí ba/chi ba-ri busan emen ḿbú ragerage.
Currently Selected:
Azáya 24: BKY
Highlight
Copy
Compare
Share
Want to have your highlights saved across all your devices? Sign up or sign in
Published by the Bible Society of Nigeria @ 1985
