Azáya 2
2
Bunyîn-Dyityém ḿbú ne Banyá
(Máka 4:1-3)
1Nyín kyitwóm ńkyí Osówo o/kye Azáya mú wǎn-Émoz kyi-kim ne Júda ne Jerúsélem.
2Osówo o/fu, ké ací nyí nyi a-bâ,
kaku ńké kiǐtí-kyise-kyifen emen echi kyi/bwom ké nké ka/chi ka-nyâam ka-shwôm eku kángkáng.
Kángkáng eshê e/chi e-kûbê ké nké,
3ne banet ebe ba/chi ba-raa ba/fu,
bâ n̂g byi-yú kaku ńké Óburúkpâbí
byi-wâa ké kiǐtí-kyise-kyifen echi ńkyí Osówo mú Ézerel.
Nyǐ o/chi o-tángê bě ńkyí mu o-ryuu ng o/fu, byichi.
Byi/chi byi-cen ké kiǐfáng ńkyí nyǐ oo/cá,
ké nǎ, ńkyí Óburúkpâbí mu o-tángê e nkyi kyi-fím m ké Jerúsélem.
Mu o-bwom m ké Záyon o-pem m ne banet emen.
4O/chi o-tóbê byiraa ḿbyí mbyi byi-róng ng ejíí emúmú.
Ba/chi ba-pín bushwám ebe ne byíbye
ḿbyí mbe ba-nwa ng byití
byi-firi byěm-bǎmkpóngé-kyifát.
Eshê ee*ba/chi e-chînwa byití ne barî*
e-kpá nang byiko ké byití*.
5Kántîk kâng, ǎ bwǎn-Jekôp, bâ n̂g byi-cen ké kiinwángé ńkyí Óburúkpâbí mu o-kyâ bě.
Óburúkpâbí o/chi o-fîm Byiko etông
6Ô Osówo, wo aa/né banet eyên ḿbé kyikû-banet ńkyí Jekôp. [Esí ebe ee/sú ne bansô epé ḿbé ba/fím ké kyicê ńkyí esû nyi e-byí i ne banet ḿbé ba/fím Fyilíta.] Banet ba-kú ba-chi i édúú nyí bacinbánet. 7Esí ebe ee/sú ne akpuga, ne aa/jê a-shwôm. Esí ebe ee/sú ne bubyî-orá, ne bamútu ebe ḿbé bubyî-orá budatut baa/jê to ba-shwôm. 8Esí ebe ee/sú ne erím-bakye, ne mbe ba-kyâ byěm ḿbyí mbé ba/chi ké abwô ebe ofê.
9Óburúkpâbí o/chi o-bwa ne nang yeě nang yeě kyísí ba-fé ǎ éshwân. Óburúkpâbí, *dachi a-pwoo kámbé*.
10Â ba*da/rem ké bacim* ké eku nyí aká áka* ba/chi ba-sím bǎmbwó ké ecing ba-rem eringe nyí badafem ké busa-dyityém ḿbú Óburúkpâbí, ba-kan ba/fu, mbé ba-chêe ng busa emen ne busan emen ḿbú ragerage. 11Dyicí ndyi dyi-bâ ńdyí byiko etông ḿbyí banet byi/chi byi-man, ba-ju kámbyí. Ké nkéré ámu, Óburúkpâbí kǎnchí nké ba/chi ba-kye ǎ ofê. 12Ké dyicí ándyi, Óburúkpâbí mú o/rêe o-shwôm o/chi o-bwa ne nang yeě mú mu ne busa kyísí, ne nang yeě to mú mu o-tông ng byiko. 13O/chi o-ju byichí ḿbyí byi/jang ekwóp ké Lebánon ne ḿbyí byi/jang erêe ké esí nyí Báshan. 14O/chi o-tare eku nyí nyáám ne nyí kyísí kyísí. 15O/chi o-tare to kiǐnyáám-kyise-mbâm nang kyirá ne ekpe nang erá nyí e/nyâam, nyí ba/bi ba-wáp oshê. 16Nang bǎnsukyíkang ḿbé ba/jang erêe ba-jang enwa, o/chi o-chi kámbé ba-sémê. 17-18O/chi o-man ne byiko etông ḿbyí banet, o-ju kámbyí. Erím-bakye e/chi e-rím debédebé, ne Óburúkpâbí kǎnchí nké ba/chi ba-kye ǎ ofê ké dyicí ándyi.
19Â banet ba*da/rem ké bacim* ké eku nyí aká áka* ba/chi ba-sím bǎmbwó ké ecing ba-rem eringe nyí badafem ké busa-dyityém ḿbú Óburúkpâbí, ba-rem busa emen ne busan emen ḿbú ragerage, ké nkéré mú oo/bê ejíí ebaninge. 20Ké nkéré mú dyicí ándyi dii/fyi, ba/chi ba-pwó erím-bakye nyí mbé ba/chi ké gûl ne syílyíba, ba-mîng kányí ne enyam nyí edakyú ké bacim ne ké biǐbwô-byise. 21Ké nkéré Óburúkpâbí o/chi o-bâ ejíí ebaninge, banet ba/chi ba-rem ké bacim ne ké bǎmbwó ké eku nyí aká áka, ba-kan ba/fu, mbé ba-fem m busa-dyityém ḿbú Óburúkpâbí, ba-rem busa emen ne busan emen ḿbú ragerage.
22*Da n̂g echîfé dyityém ne banet ḿbé badakpú* mbé ba/byí ebóng.
Currently Selected:
Azáya 2: BKY
Highlight
Copy
Compare
Share
Want to have your highlights saved across all your devices? Sign up or sign in
Published by the Bible Society of Nigeria @ 1985
