Galíshan 2
2
Pôl ne Banet-Kyitwóm-Jisos ḿbé áku
1Ké nkéré mú aje aa/shwôm diǐkpú ne anyii, m/bwa esim Jerúsélem ne Bánábas. M/kpî to Tátus n-dim ne nyǐ. 2Me n/ce, ké nǎ, Osówo o/sét mě o/fu, me nca. Ké ncibi mú n/kyú ké kadip ne banet-ashí-ékwâbashi nyí Karâs, me n/sét kámbé kyikû-kyitwóm ńkyí Bǎmpém ḿbé Banong ḿbé me mu n-sét ng banet ḿbé ba*fí banet-Jûs*. Me m/mû n*fí n-ryuu ng n/fu, bǎmkpóngé ejí ḿbé nn/chi ké nkéré mú o/shwôm ké esim ne ḿbé kántîk bawaa kyísí dyikáá*. 3Tátus mú byimu byi-cen n burwám, nang ké o/fím Girîs, ba*da ǎ etírîng ba/fu, ocên* 4nang ké banet bakíri ḿbé ba/nîm banet ba/fu, mbé ba-chi i barî-banet eten ḿbé ba/bángê ké Karâs, ne ba-nung ké burwám eten, ba/mû mbe ba-ryuu ng ba/fu, mbé ba-cên n ǎ*. Banet ḿbén ba/jii ba-nung ké burwám eten wǎ banet-boǒfêp-esí, ba/fu, mbé banyît kyi-kim ne eringe nyí be byimu byi-kyú u ké byiko eten, ké ocibi eten ne Jisos Karâs. Mbé ba/mû mbe ba-ryuu ng ba/fu, mbé ba-chi i bě byi-firi básóng. 5Be byi*da/bángê ne mbé nang ké kaǎnyín-nkéré* ké nǎ, byimu byi-ryuu ng byi/fu, byi-tî ng ntûntû mú Bǎmpém ḿbé Banong o-waa kerededet byi-kye běn.
6Nké banet ḿbé ba/bwom wǎ banet-ashí-ékwâbashi nyí Karâs ba*da mě esét chwǒm nang kyibónge ńkyí kyifyîfî*. Me mu n-sét ng ńkyín, ké nǎ, me n*fí n-kérê ng kyi-kim ne dyizong-banet ńdyí mbé ba/mû*. Osówo o*fí o-tún n onet ké kiintaa-enyam-byiko ńkyí kyíjí*. 7Nké mbé ba/bwa ba-ri ba/fu, Osówo oo/kye mě bǎmkpóngé ḿbé o/fu, me nsét banet ḿbé ba*fí banet-Jûs* Bǎmpém ḿbé Banong, wǎ eringe nyí o/mû o/kye Pyíta bǎmkpóngé ḿbé o/fu, osét banet-Jûs Bǎmpém ḿbé Banong. 8Ké ebóng, Osówo nké o/chi mě n-firi onet-kyitwóm-Jisos mú ndasét banet ḿbé ba*fí banet-Jûs* kyitwóm emen wǎ eringe o/chi Pyíta onet-kyitwóm-Jisos mú odasét banet-Jûs kyitwóm emen. 9Jêmsyi ne Pyíta ne Jǒn ḿbé ba/bwom wǎ banet-ashí-ékwâbashi nyí Karâs ké nkéré ba/nyît ba/fu, Osówo oo/kye mě kiǐtí-bǎmkpóngé ḿbén, ba/fé bě akwâ ne Bánábas wǎ banet ḿbé byimu byi-chi i bǎmkpóngé babónge. Be ashí amúmú byi-bángê byi/fu, be byichi bǎmkpóngé ké burwám-banet ḿbé ba*fí banet-Jûs* mbé ba-chi ké burwám-banet-Jûs. 10Kángkáng ńkyí mbé ba/mû ba-ryuu ng kyi/mû ńkyí ba/fu, be byikûzîim banet-byikpu ḿbé mbe ké burwám ebe, ochíchí-chwǒm ámu mú me nn/chi bǎmkpóngé kanong kanong n/fu, n-chwáp ng.
Pôl o/bîn Pyíta ké Ántyok
11Ké nkéré mú Pyíta o/bê ké Ántyok, me m/bwom ké burwám-banet chwóó m-bírî ǎ esim ké byiraa ḿbyí o/mû o-sét ng, ké ebóng, nyǐ o/mû o*fí o-câ ké bukwóp ḿbú dángdáng*. 12Ne kyicê-banet ḿbé Jêmsyi o/twóm kámbé ba-ribi ké Ántyok, Pyíta o/mû mu o-ryí i byiryíng kyikit kyibónge ne barî-banet eten ḿbé ba/bángê ké Karâs, ḿbé ba*fí banet-Jûs*. Nké ké nkéré banet ḿbén ba/ribi, Pyíta o/mîng, o/fu, nyǐ oo*ryí to byiryíng ne mbé* ké ebóng, o/mû mu o-shî ng banet ḿbé ba/bángê ba/fu, bacên banet ḿbé ba*fí banet-Jûs*. 13Barî-banet eten ḿbé banet-Jûs ḿbé áku ba-kpet echi byěm wǎ banet-bushî ne Pyíta ké kyikû. Nang Bánábas to o/nung kámbé ké burwám ḿbú édúú nyí bushî. 14Ké nkéré mú me n/ri n/fu, mbé ba*fí ba-cen n ké kiǐfáng ńkyí dángdáng* ńkyí kyi/bwom ké ntûntû mú Bǎmpém ḿbé Banong* me n/raa ne Pyíta ké bushú ḿbú banet kángkáng n/fu, wo a-chi i onet-Jûs, nké wo amu a-kyú u wǎ onet mú o*fí onet-Jûs* *chí wǎ onet-Jûs*. Wo a-cen n nǎ kâng ne a-tírîng onet mú o*fí onet-Jûs* o-kûkyú wǎ onet-Jûs.
Osówo mu o-nyii ng Banet-Jûs ne ḿbé ba*fí Banet-Jûs*
15Ké ntûntû, be ba/fwon bě wǎ banet-Jûs, *chí wǎ banet ḿbé ba*fí banet-Jûs* ḿbé mbe banchi byibî*. 16Nké be byimu byi-nyît ng byi/fu, Osówo mu o-két ng mpan o-nwa onet ké bubwô-dyityém efé ne Jisos Karâs nké nke, *chí ké bubwô ḿbú Byije-Músis etî*. Be to bii/fé dyityém ne Jisos Karâs, eringe nyí Osówo odakét mpan o-nwa bě ké bubwô-dyityém eten efé ne Karâs, *chí ké bubwô ḿbú Byije-Músis etî*. Ké ebóng, onet o*fí mú Osówo odakét mpan o-nwa ǎ ké bubwô ḿbú Byije-Músis etî*. 17Â wǎ eringe nyí be byimu byi-kan n kâng byi/fu, Osówo okét mpan o-nwa bě ké ocibi eten ne Karâs, kyi/bwa kyi-tông kyi/fu, be byi-chi i banchi byibî wǎ eringe nyí banet ḿbé ba*fí banet-Jûs* mbe, ńkyín kyi/byí kyi/fu, Karâs o/kpú o/fu, byibî byica kashú? Kyi*fí éné*. 18Â me n/chîkpet ebi ńkyí me m/mû mm/bú m-pwó kyísí, ńkyí nkyí kyi-tông ng kyi/fu, me mu m-bên n Byije-Músis. 19Ké nǎ, me ké bukwóp ḿbú byije etî, me mm/kpú, byije ámbyi byiyén nké byi/ju mě, eringe nyí ndakyú dyikpen ńdyí dyidanyîn Osówo. Me baa/ju mě ne Karâs ké kyikwap ńkyí badashwân onet, 20ne ké bubwô ámbu, *chí me nké n/tôong m-kpen n* nké Karâs nké mu o-kpen n ké dyityém ejí. Dyikpen ńdyí me mu m-kpen n něen kántîk, me mu m-kpen n ké bubwô ḿbú dyityém efé ne Wǎn-Osówo mú me n/jê ǎ ne o-kye kyitông emen ké dyishí ejí. 21Me n*fí n-né ng kanong ńké Osówo* ké ebóng, â Osówo mu o-két ng mpan o-nwa onet ké bubwô ḿbú Byije-Músis etî, ányi kyi/byí, Karâs o/kpú dyikáá.
Currently Selected:
Galíshan 2: BKY
Highlight
Copy
Compare
Share
Want to have your highlights saved across all your devices? Sign up or sign in
Published by the Bible Society of Nigeria @ 1985
