Ézódos 19
19
Banet ḿbé Ézerel ké Kaku ńké Sána
1-2Banet ḿbé Ézerel ba/dim ké Refyídim ké mbwôp kashú-dyicí, ké etukáku echât, nkéré mú ba/mîng Éjip, ba-ba-ribi ké kyikim-dyikán ńkyí Sána. Ányi nké ba/bi oshê ebe ké kyikû-kaku ńké Sána, 3ne Músis o-dim kyíbóng-kaku o/fu, nyǐ o-da ng ekâm Osówo.
Óburúkpâbí o-bwom ké kaku o-kó ǎ, o-sét ǎ o/fu, osét banet ḿbé Ézerel, ḿbé bwǎn-Jekôp o/fu, 4ben ba/ri ńkyí me Óburúkpâbí n/chi banet ḿbé Éjip ne eringe nyí n/kúng běn wǎ eringe nyí kiinkwa kyidakúng bwǎn emen ké abyibabang emen, m-bâ ne ben nyín ba-kâm mě. 5Kántîk, â ben ba/chi ba-chi ńkyí me nda běn esét, ba-tî ocím ejí mú n/chi n-ryí ne ben n-sem byiko ejí, ben ba/chi ba-kyú banet ḿbé ejí me oyén. Ejíí emúmú e/já mě, nké ben ba/chi ba-kyú banet ḿbé ejí, ḿbé n/cá kámbé, 6banet ḿbé ba/já mě kǎnchí, ne ben ba/chi ba-kyú banchi kyifen ejí. 7Ne Músis o-dim kâng o-da-kó banet-ashí-Ézerel o-tî kyikit kyibónge, o-sét kámbé kángkáng byiraa ḿbyí Óburúkpâbí o/sét ǎ. 8Ne kángkáng banet ḿbé Ézerel ba-bángê ashí amúmú ba/fu, be byi-chi i kángkáng byěm ḿbyí Óburúkpâbí oo/sét, ne Músis o-kúng kánkyí o-sét Óburúkpâbí.
9Óburúkpâbí o-sét Músis o/fu, me n/chi m-bâ n-kâm ǒ ké kiǐkpîn-ófíbí, eringe nyí banet ḿbé Ézerel badajwo nkéré ndapem ne wo, ne ba/chi ba-kûbángê ńkyí adasét kámbé, kyi-fím kántîk kyi-ca kashú.
Músis o-sét Óburúkpâbí eringe nyí banet ḿbé Ézerel ba/faa ejá, 10ne Óburúkpâbí o-sét ǎ o/fu, ca a-kâm banet ḿbé Ézerel, a-sét kámbé a/fu, bakúng kurún ne nencí ba-soo byiko ebe ḿbyí bada mě ekye ofê. Ba-man ba-soo byídí ebe 11ba-kpá byiko â ací a/shwôm afee. Ké dyicí ándyi, me n/chi n-shû m-ba-bwom ké kaku ńké Sána, ké kyikit ńkyí kángkáng banet bada mě eri. 12Tut busáng a-wáp kaku a-fé ké kafâ, ḿbú banet baa*ba/chi ba-nyáng kámbú*. A-sét kámbé a/fu, onet o*dachi o-yú kaku ánke* o-fárâng nang kánké*. Nang yeě nké o/ta kyiká ké nké, baju ǎ. 13Â ba*da ǎ etím aká* baché ǎ abán, onet o*dachi o-ta ǎ*. Kyije ńkyín kyi/ta banet ne byitú. Ba-man ba-ju banet ámbe ne byitú ámbyi. Nké ké nkéré mú baa/jwá ntán, banet ba-man n eyú kâng kyíbóng-kaku.
14Ne Músis o-shû kâng kyíbóng-kaku o-ba-sét banet ḿbé Ézerel o/fu, bakpá byiko ḿbyí badafé Óburúkpâbí. Ba-soo kâng byídí ebe, 15ne Músis o-sét kámbé o/fu, ací afee kpá n̂g byiko, *da n̂g echi ba-ryí kabîbî*.
16Ké dyicófóróng ńdyí ací achât, kasabang ka/kédê, etare e-sá, kiǐkpîn-ófíbí kyi-byí ké kaku, ne ba-jwo ntán mú o/jwá kakânkakân. Kángkáng banet ḿbé ba/mû ké kyikit ánkyi ba/tím banê ké bushî. 17Músis o-kpî kámbé ké oshê ba-dim ba-da-kâm Osówo, ba-da-bwom ké kyikû-kaku. 18Arúkwâ a/cít kángkáng kaku ńké Sána, ké nǎ, Óburúkpâbí o/shû o-bâ ké nké, ké okwâ. Arúkwâ a/byí ké nké wǎ arúkwâ nyí adabyí ké kiǐkâp-okwâ, ne bushî bu-róng kángkáng banet kanong kanong. 19Ntán o-jwá ng o-bâ kakânkakân. Músis o-raa, Osówo o-faa ǎ ké etare. 20Óburúkpâbí o/shû o-bâ kyíbóng-kaku ńké Sána, o-kó Músis o/fu, oyú kyíbóng-kaku. Músis o-yú, 21ne Óburúkpâbí o-sét ǎ o/fu, shû kyísí a-da-kuri kángkáng banet ekó a/fu, ba*dachi ba-nyáng busáng* ba-yú kyíbóng ba-ba-ri mě*. Â ba/ri mě, bujê-banet ebe chwóó ba/chi ba-kpú. 22Nang banchi kyifen ejí ḿbé mbe ba-bâ ba-fárâng ng mě, ba-man ba-soo byiko ebe. Â ba*da/chi éné* n-kyâ kámbé busông.
23Músis o-sét Óburúkpâbí o/fu, baa*man ba-yú kyíbóng* ké nǎ, wo a/sét bě a/fu, byikúng kaku ńkén wǎ kaku-ociring, byi-tut busáng bu-wáp kánké bu-fé ké otyém.
24Óburúkpâbí o-faa o/fu, shû kyísí a-da-kpî Éron a-bâ ne nyǐ. Nké banchi kyifen ejí ne banet ḿbé áku baa*man ba-nyáng busáng* ba-bâ ba-kâm mě*. Â ba/nyáng, n-kyâ kámbé busông. 25Músis o-shû kâng o-kâm banet ḿbé Ézerel o-da-sét kámbé ńkyí Óburúkpâbí o/sét.
Currently Selected:
Ézódos 19: BKY
Highlight
Copy
Compare
Share
Want to have your highlights saved across all your devices? Sign up or sign in
Published by the Bible Society of Nigeria @ 1985
