Ézódos 12
12
Dyijî-Kyifen ńkyí Shwôm
1Óburúkpâbí o/raa ne Músis ne Éron ké Éjip o/fu, 2otukáku mún nké o/chi o-kyú běn mbwôp kashú-otukáku mú dyije. 3Sét n̂g kángkáng banet ḿbé Ézerel byěm ḿbyín ḿbyí badachi. Ké ací diǐkpú, ké otukáku mún, onyinchéng nang orá ocá wǎn-etám-ebû nang mú ebúbǔu o-tî kyikû-banet emen. 4Â onet mu ne kyikû-banet ńkyí ba*da/jê* onet ámu o-man n ecibi ne orî-onet emen mú mu ǎ fáráng ba-kyii ebû ebónge nyí e/chi e-kwárê ocím-banet ebe nang yeě nang yeě o-ryí e-kwárê ǎ. 5Ba-man n ecá ebúbǔu nang etám-ebû, nké ebû ányi e-man e-kyú nyí ee/rí dyije dyibónge, ne ee*man e-kyú ne kyinêm ké byiko*. 6Ké dyikurúku ńdyí ací diǐkpú ne anyii, ké otukáku mún, kángkáng banet ḿbé Ézerel ba/chi ba-ju ebû ányi. 7Bakúng kyicê-baróng-ebû ányi ba-sabe ké ekíkírí-afyi ebe nyí byise ḿbyí ba/chi ba-kyú ba-ryí ebû ányi. 8Ké buchú ámbu, bafwá enyam-ebû ányi efwǎng, ba-ryí kányí ne eshǎan-byichí nyí edaruu ne berêt mú ba*da/fé bukye ḿbú budachi kámú o-mut*. 9Ba*dachi ba-rám kányí* ba-ryí nang kányí ekpó* nké bafwá kányí kángkáng ba-ryí cibicibi ne dyishí ne byiká ne kángkáng byidóng emen. 10Ba*dachi ba-tî onyin nang obónge tata dyicófóróng dyi-cé*. Â ba/ryí e-waa, bayip kányí ba-fé ké okwâ e-shí. 11Baryí kányí ochéé óchee, ká nǎ, ba-man ba-kpá byiko ḿbyí badadim bucen ne abe ké byiká ne ochí ké bubwô. Kyi/chi kyi-kyú dyijî-kyifen ńkyí ozîim mú ba/firi ké byiko ebe, ńkyí ba/chi ba-kûtî ké ofê ejí, me Óburúkpâbí.
12Ké buchú ámbu, me n/chi n-cen ké esí nyí Éjip n-ju mbwôp kashú-wǎn-onyinchéng nang orá mú banet ne byitú, n-kye to kángkáng erím-bakye nyí Éjip busông. Me n-chi i Óburúkpâbí. 13Baróng ḿbé ba/chi ba-sabe ké ekíkírí-afyi ba/chi ba-kyú ekap nyí e/chi e-tông byise ḿbyí bamu ba-kyú u. Â n/ri baróng ámbe, n/chi n-shwôm běn ne mm*ba/chi n-chi běn chwǒm* ké nkéré n-kú n-kyâ banet ḿbé Éjip busông*. 14Ba-man ba-tî dyicí ńdyín wǎ dyicí ńdyí bada mě ekye ofê, ńdyí dyi/chi dyi-kû běn ezîim ńkyí me Óburúkpâbí nn/chi. Kú n̂g echi dyijî ándyi ké kángkáng aje nyí nyi a-bâ.
Dyijî-Kyifen ńkyí Berêt
15Óburúkpâbí o/raa o/fu, ké ací káchâtkányi, onet o*dachi o-ryí berêt mú ba/fé bukye ḿbú odamut*. Ké mbwôp kashú-dyicí, ba-man ba-kúng bukye ḿbú budachi berêt o-mut kángkáng ké byise enen ba-pwó. Onet mú o/chi o-ryí berêt mú ba/fé bukye o-mut ké ací ányi oo*ba/chi o-chîkyú onet ejí*. 16Ké mbwôp kashú-dyicí ne ké ací káchâtkányi, ba-man ba-cibi kyikit kyibónge ba-fé mě. Baa*man ba-chi bǎmkpóngé nang babónge* ké ací ányi* nké ba-man n erám byiryíng. 17Kû n̂g mě ekye ofê ké ací ńnyín, ké nǎ, ké dyicí ńdyín nké n/fîm byikû-banet enen byi-byí ké Éjip. Ké kángkáng aje nyí nyi a-bâ, ba-man ba-tî dyicí ńdyín wǎ dyicí ńdyí bada mě ekye ofê. 18Kyi-fím ké dyikurúku ńdyí ací diǐkpú ne anyii nyí mbwôp kashú-otukáku tete kyi-ribi ké dyikurúku ńdyí ací bujam ne din, baa*man ba-ryí berêt mú ba/fé bukye o-mut*. 19-20Ké ací káchâtkányi, bukye ḿbú badafé ké berêt o-mut boo*man bu-kyú ké byise enen*. Nang yeě mú o/ryí berêt mú ba/fé bukye o-mut, nang oyén-oshê, nang ocinónet, onet ámu oo*kyú to onet ejí*.
Mbwôp Kashú-Dyijî-Kyifen ńkyí Shwôm
21Músis o/twóm ba-kó kángkáng banet-ashí-Ézerel ba-bâ, o-sét kámbé o/fu, nang yeě nang yeě ocá wǎn-etám-ebû nang mú ebúbǔu o-ju kámú, eringe nyí byikû-banet enen badachi dyijî-kyifen ńkyí Shwôm. 22Jâa n̂g kyire-kajang [ba-lip ké dyicáng ńdyí ba/chi ba-fé] baróng-ebû, ba-sabe ké byichí-afyi enen. Nang onet obónge o*dachi o-byí kyíjí* tata dyicófóróng dyi-cé. 23Ké nkéré Óburúkpâbí o-kú o-cen n ké Éjip o-ju ng banet ḿbé Éjip, o/chi o-ri baróng ámbe ké byichí-afyi ne oo*ba/chi o-bángê orím-bukyû o-nung ké byise enen o-ju běn*. 24Ben ne bwǎn enen ba-man ba-tî byije ḿbyín byi-waa ne banyá. 25Ké nkéré mú baa/ribi ké esí nyí Óburúkpâbí o/ryí ocím o/fu, nyǐ o-kyâ běn, ba-man ba-chi kyifen ńkyín. 26Â bwǎn enen ba/bí běn ba/fu, kyifen ńkyín kyi/byí nǎ, 27ben ba/chi ba-faa ba/fu, kyifen ńkyí byi/firi ké byiko eten, ńkyí byimu byi-chi i ké ofê mú Óburúkpâbí, ké nǎ, nyǐ o/shwôm byise ḿbyí banet ḿbé Ézerel ké Éjip. O/ju banet Éjip o-mîng bě be.
Banet ḿbé Ézerel ba-tím arông kyísí ba-kye Óburúkpâbí ofê. 28Ne ba-dim kâng ba-da-chi ńkyí Óburúkpâbí o/sét Músis ne Éron.
Bukyû ḿbú Bákpá-Bwǎn-Banyinchéng
29Ké otyém ne otyém-buchú, Óburúkpâbí o/ju kángkáng bákpá-bwǎn-banyinchéng ḿbé ké Éjip, kyi-fím ké wǎn-otu mú o/mû o/chi o-ryí butu ké kyikit ńkyí bonchí tete kyi-ribi ké ókpá mú onyinchéng mú mu ké mgbokobá. O-ju to kángkáng bambwôp kashú-bwǎn ḿbé kángkáng byitú ḿbyí mbyi ké Éjip. 30Ké buchú ámbu, otu ne banet-ashí-oshê emen ne kángkáng banet-Éjip ḿbé áku ba/jwóbê. Banet ba/mû ba-tii ng bukyû ḿbú buryên ké Éjip emúmú, ké nǎ, kyise nang kyibónge kyi/mû kyi*fí* ńkyí wǎn-onyinchéng o*da/kpú*. 31Ké buchú ámbu bubónge, otu mú Éjip o/twóm ba-kó Músis ne Éron o-sét kámbé o/fu, ben banet ḿbé Ézerel, dim m̂. Dim m̂ ké oshê ejí. Ca n̂g ba-da-fé Óburúkpâbí wǎ eringe nyí ben ba/bí ba/fu, me mmîng běn ba-ca. 32Kúng n̂g byitú enen kángkáng ba-dim. Fé n̂g to nshwam ba-kye Óburúkpâbí ba/fu, ojware mě.
33Banet ḿbé Éjip ba-tírîng banet ḿbé Ézerel ba/fu, badim babap ba-mîng oshê ebe. Ba-raa ba/fu be ashí kángkáng byi-kpú u â ba*da/dim*. 34Ne banet ḿbé Ézerel kâng ba-yip butí ebe ḿbú badaká berêt, ba-wuri filáwa mú badachi berêt ba-fé ké mbú pwat, ba-bwá kámbú ké byídí ba-tû. 35Banet ḿbé Ézerel ba/mû baa/chi wǎ eringe nyí Músis o/mû o/sét, ne ba/mû baa/bí banet ḿbé Éjip ba-kye kámbé byídí ne byibwáng ḿbyí ba/chi ké gûl ne syílyíba. 36Óburúkpâbí o/chi banet ḿbé Éjip ba-kye ḿbé Ézerel ofê, ba-kye kámbé byěm ḿbyí ba/bí kámbé. Ké bukwóp ámbu kâng, banet-Ézerel ba/yip esang nyí ké Éjip ba-dim ne nyǐ.
Banet ḿbé Ézerel ba/dim ké Éjip
37Banet ḿbé Ézerel ba-dim ké Rámesis ké byiká ba-waa Súkot. Bajam-égot-banyinchéng nké nke ba/mû bujam esim diǐkpú, banyinyi ne bwǎn ba*da/pan kámbé*. 38Bujê-banet bakíri chwóó ba/dim to ne mbé ké kyikû, cibicibi ne bampong ne ebû chwóó. 39Ba/chi berêt mú baa*fé bukye o-mut* ké filáwa mú badachi berêt, mú mbé ba/mû ba/kúng ké Éjip, ké nǎ, ba/ró kámbé ké Éjip ochéé óchee, mú ba*da/já nkéré mú badarám byiryíng* ba-chi nang berêt mú badafé bukye o-mut*.
40Banet ḿbé Ézerel ba/mû baa/kyú ké Éjip ké égot-aje efee ne aje bujam esim diǐkpú. 41Ké dyicí ńdyí égot-aje ányi a/kwárê, kángkáng byikû-banet ḿbyí banet ḿbé Óburúkpâbí ba/dim ké Éjip. 42Buchú ámbu nké Óburúkpâbí o/bám kámbé, o-fîm kámbé ba-byí ké Éjip. Buchú ámbu bubónge nké ba/kúng kámbú ba-kye Óburúkpâbí, ké kángkáng aje nyí nyi a-bâ ké kashú, wǎ buchú ḿbú banet ḿbé Ézerel badaman ba-kyú ba-bám mbâm.
Byije byi-kim ne Dyijî-Kyifen ńkyí Shwôm
43Óburúkpâbí o/sét Músis ne Éron o/fu, nyín byije ḿbyí dyijî-kyifen ńkyí Shwôm. Ocinónet oo*man o-ryí byiryíng ḿbyí dyijî-kyifen ńkyí Shwôm* 44nké ósóng nang orá mú ben ba/ré o-man n eryí kámbyí â ba/bwóp kpá kashú ba-cên ǎ. 45Onet mú mu o-kyú u ne ben ké kaǎnyín-nkéré nang onet mú ba/yámê ǎ ba/fu, ochi běn bǎmkpóngé oo*ryí kámbyí*. 46Byiryíng ámbyi kángkáng ba-man ba-ryí kámbyí ké kyise ńkyí ba/rám kámbyí. Baa*man ba-kúng kámbyí ba-byí ne mbyí kyíjí*. *Da n̂g echi ba-sé kyikúú-enyam ányi nang kyibónge*. 47Kángkáng banet-Ézerel ba-man ba-ryí kámbyí, 48nké onyinchéng mú ba*da ǎ ecên ne* oo*man o-ryí kámbyí*. Â ocinónet mú oo/bajé oshê enen mu o-ryuu ng o/fu, nyǐ o-ryí i kámbyí eringe nyí odafé Óburúkpâbí, ba-man ba-bwóp kpá kashú ba-cên kángkáng banyinchéng ḿbé mbe ké kyikû emen. Â ba/chi éné, onyinchéng ámu o-firi ng wǎ onet-Ézerel, ne o-man n eryí byiryíng ámbyi. 49Kyije ńkyín kyi/ta to banet-Ézerel bayén ne bacinbánet ḿbé baa/bajé ba-kâm běn. 50Kángkáng banet ḿbé Ézerel ba/jwo, ba-chi ńkyí Óburúkpâbí o/sét Músis ne Éron. 51Ké dyicí ándyi, Óburúkpâbí o/fîm byikû-banet ḿbyí Ézerel ba-byí ké Éjip.
Currently Selected:
Ézódos 12: BKY
Highlight
Copy
Compare
Share
Want to have your highlights saved across all your devices? Sign up or sign in
Published by the Bible Society of Nigeria @ 1985
