Âak 24
24
Banet-Jûs ba/sét ké Bushú ḿbú Félik ba/fu, Pôl o/chi Kyibî
1Ké nkéré mú ací aa/shwôm atánge, otu-nchi kyifen-Osówo mú odabángê Ananyâs o/dim o-ca Sizaryâ ne kyicê-bakínkán-banet-Jûs ne onet obónge mú o/kwâa byije, mú odabángê Tétúlus. Mbé ba/bwom ké bushú ḿbú onet-dyishí mú odabángê Félik ké nkéré mu o-pan n Pôl mpan, ba-sét byibî-byěm ḿbyí ba/fu, Pôl o/chi. 2Ba-kó Tétúlus ba/fu, oraa, ne o-kpet epan mpan o-bât ng Pôl o/fu,
Otu-dyishí mú o/kwárê mú bada ǎ ekye ofê, ké ebóng, wo amu onet-dyishí mú mu ne bubong, ne bii/kyú ké bunyîn-dyityém ké kyikim-nkéré ńkyí kii/shwôm ké esim chwóó. Ne aa/chi biǐtí-byěm chwóó ḿbyí byidachi oshê eten o-firi kanong. 3Be kángkáng byimu byi-kó ng ǒ asǎma kángkáng nkéré kanong kanong ké byěm ḿbyín. 4Me n*fí n-ryuu ng n/fu, m-bên n ǒ nkéré chwóó*. Ké bubwô ámbu kâng, me mu n-tîm m ǒ arông n/fu, fwôo atông a-jwo ńkyí me n/chi n-raa kaǎkím ké bubwô-banet eten ḿbé mbe nyín. 5Onyinchéng mún o-chi i byiraa, ne mu kyibî-onet ké oshê eten omúmú. Nyǐ nké mu o-chi i banet-Jûs ba-kpet ng ne bunwa ḿbú mbu bu-koo ng oshê omúmú ké eshê ńnyín kángkáng. Nyǐ nké mu onet-dyishí-ncibi mú badakó Nazaryîn. 6Nyǐ o/kan to o/fu, nyǐ o-fîm m ociring mú mu ké kafâ-kiǐtí-kyise-kyifen-Osówo echi, ne be byi-kám ǎ. [Be byi/mû byi/cibi byi/fu, byi-pan n ǎ mpan ké bukwóp ḿbú byije ḿbyí eten, 7nké otu-dyishí-basúja mú odabángê Lyisáyas o/kúng busa o-bâ o-ba-koo ǎ ké abwô eten. 8Ne Lyisáyas o-kye kâng busa o/fu, banet ḿbé ba/fu, mú mǔ o/chi kyibî, babâ ba-ba-sét ké bushú eyên.] Â a/bí onyinchéng mún bǎmbím, wo oyén a/chi a-man enyît ké ocím mú emen nyǐ oyén kyi-kim ne byibî-byěm ḿbyí byi/fu, o/chi. 9Ḿbé banet-Jûs ba/sét to azong-byiraa ányi abónge ba-bât Pôl.
Mpan mú Pôl o/pan ké Bushú ḿbú Félik
10Félik mú onet-dyishí ámu o-sét kâng Pôl o/fu, ofaa ojá. Ne Pôl o-raa o/fu,
Me mu n-nyît ng n/fu, wo aa/pan banet ḿbé oshê mún bampan ké bujê-aje chwóó, ne ké bubwô ámbu, nkyi kyi-nyîn n mě ńkyí ndabwom ké bushú eyên m-pan mpan, 11eringe nyí wo adaman ekyé kyikû a-nyît wo oyén. Ací a*da/shwôm ne diǐkpú ne afee* nyí me n/dim n-wâa Jerúsélem* n/fu, n-da ng efé Osówo* ké kiǐtí-kyise-kyifen-Osówo echi*. 12Banet-Jûs ba*da mě eri ké mu n-kán n ké dyishí ne onet nang obónge* ké kafâ-kiǐtí-kyise-kyifen-Osówo echi* m-bwa n-chi dyizu-banet nang dyirá n/fu, bakpet ne bunwa* nang ké byise-ékwâbashi ebe* nang ké kyikim-oshê kyimúmú*. 13Mbé ba*fí ne chwǒm ńkyí badasét ba-tông wááng ba/fu, kyibî ńkyí mbé ba/fu, me n/chi nkyi ntûntû*. 14Me mu m-bángê e ké ńkyí me mu m-bâ ebasét něen n/fu, me mu n-fâ Osówo mú banchí eten ḿbé kpákpá ké Bukwóp-Dyikpen ḿbú Otu Kyítá, ḿbú mbé ba/fu, bu*fí ké kafâ*. Nké me to mu m-bángê e ké kángkáng byěm ḿbyí ba/sáng ké Nwet-Byije-Músis ne ké banwet ḿbé bamkpábé ḿbé badasét byiraa-Osówo. 15Me mu ne dyizong-obánge dyibónge ké ńkyí Osówo o/sét, wǎ eringe banet ḿbén bayén mbe ne mǔ ké ńkyí o/sét o/fu, kángkáng banet, nang ḿbé mbe ba-chi i kanong nang ḿbé mbe ba-chi i kyibî ba/chi ba-jwóbê ké bukyû. 16Ne ké bubwô ámbu kâng, me mu n-yip ng kángkáng busa ejí n/fu, n-kyú u ne dyityém wááng ké bushú ḿbú Osówo ne ḿbú banet.
17Ké nkéré mú me m/mîng oshê mú Jerúsélem ké bujê-aje chwóó, me n/chîbwa esim ké mǔ n/fu, n-da ng ekye banet ejí enyin-eyáré nyí akpuga, n-chi to byifen n-kye Osówo. 18Kyi/mû ké nkéré mú mu n-chi i byifen ḿbyín nké mbé ba/ri mě ké kafâ-kiǐtí-kyise-kyifen-Osówo echi, ké nkéré mú mm/man byěm echi ḿbyí byiko esoo. Banet chwóó ba/mû ba*fí ne me ké kyikû* nang kyicoge to kyi/mû kyi*fí*. 19Nké kyicê-banet-Jûs ḿbé ba/fím Ésha ba/mû ányi. Mbé bayén nké ba/mû ba/chi ba-ba-bwom ké bushú eyên ba-sét ńkyí ba/fu, me n/chi, â mbe ne kyibî-chwǒm nang kyibónge kyi-kim ne me. 20Â baa*chi éné* mîng banet ḿbé mbe nyín ba-sét kyibî-chwǒm ńkyí mbé ba/nyît ba/fu, me n/chi ké nkéré me m/bwom ké bushú-esuk nyí eryên nyí banet-Jûs. 21Kyi*da/shwôm chwǒm kyibónge ńkyí me n/raa* ké nkéré m/bwom ké bushú ebe n/fu, ben bamu ba-pan n mě mpan kurún* ké ebóng, me m/bángê n/fu, banet ḿbé baa/kpú ba/chi ba-chîjwóbê ba-bwa ké dyikpen*.
22Félik mú mu o-nyît ng kâng kanong kanong kyi-kim ne Bukwóp-Dyikpen ḿbú Otu Kyítá o-cít mpan ámu, o-sét kámbé o/fu, me n/chi n-két mpan enen ké nkéré onet-dyishí-basúja mú kánkán mú odabángê Lyisáyas oo/bê. 23O-kye onet-dyishí-basúja mú mu o-bám m Pôl busa o/fu, otî banet ba-kû ǎ ebám. Nké okû ǎ ekye onyin-mpât mú odabyí kyíjí, o-mîng bacín emen ba-kû ǎ ekye nang ebóng ochwâp mú mbe ba-ryuu ng ba/fu, mbé ba-kyâ ǎ.
Pôl o/bwom ké Bushú ḿbú Félik ne Durusyíla
24Ké nkéré ací a/chîshwôm, Félik o/bê ne onyi emen mú odabángê Durusyíla, mú o/mû onet-Jûs. Félik o-twóm o/fu, babâ ne Pôl, ne ba/fwôo atông ba-jwo ǎ ké nkéré o/raa kyi-kim ne dyityém efé ké Jisos Karâs. 25Nké ké nkéré Pôl mu o-pem m o-câ kashú kyi-kim ne kanong echi ne byiko ekám ne Dyicí ńdyí Osówo o/chi o-pan nang yeě nang yeě mpan, Félik o/kpet eshî, ne o-raa ne Pôl o/fu, ca kpá a-dim. N/chi n-chi ǒ ekó ké nkéré nn/já nkéré. 26Félik o/mû mu o-tî ng achi o/fu, Pôl o/chi o-kye ǎ ngu, ne ké bubwô ḿbún, o/mû mu o-kó ng Pôl o-bâ ké bushú emen kángkáng nkéré, o-pem m ne nyǐ.
27Ké nkéré mú kyiraa ńkyín kii/rí aje afee, Póshus-Fésetus o/bakúng kyikit-kakyúng ńkyí Félik wǎ onet-dyishí. Félik o/mû mu o-ryuu ng o/fu, banet-Jûs bakû ǎ ekpee, ké bubwô ámbu, o-mîng Pôl o-waa ké mgbokobá.
Currently Selected:
Âak 24: BKY
Highlight
Copy
Compare
Share
Want to have your highlights saved across all your devices? Sign up or sign in
Published by the Bible Society of Nigeria @ 1985
