2 Tesalónyan 2
2
Mbên Dyityém
1Kyi-kim ne obê mú Jisos Karâs, Otu Kyítá eten ne ocibi mú be byi/chi byi-cibi kyikit kyibónge byi-kyú ne nyǐ, me mu n-tîm m běn arông, ǎ bwǎn-bané ejí, n/fu, 2okabe enen o*dachi o-yángê* o-firi běn byiryibyiryi* ké osêt mú mbe ba-sét ng ba/fu, Dyicí ńdyí Otu Kyítá dii/fyi*. Katô onet obónge mú mu o-sét ng byiraa-Osówo wǎ mkpábé nké o/sét, katô onet mú mu o-sét ng banet Bǎmpém ḿbé Banong, katô banet mbe ba-sét ng ba/fu, be byi/sáng kánkyí ké léta. 3*Da n̂g echi ba-mîng onet nang obónge o-nîm běn ké bukwóp nang bubónge*. Ké ebóng, Dyicí ándyi dii*ba/chi dyi-bâ* tete nkuli kyikû-bunwa ḿbú banet ḿbé ba/né Osówo efé bu-fyi, ne Mbên Dyityém o-byí mú Osówo o/tî ǎ o/fu, ojâ ké kyikit-busông eri. 4Nyǐ o/chi o-né kángkáng byěm ḿbyí banet mbe ba-kyâ kámbyí ofê ne kángkáng byěm ḿbyí banet ba/fu, byi/já Osówo. Nyǐ o/chi o-bwom wǎ nyǐ o/shwôm kángkáng byěm ḿbyín, ne o-man to edim o-da-kyú me ké kafâ-kiǐtí-kyise-kyifen-Osówo echi o-sét o/fu, nyǐ o-chi i Osówo.
5Ben ba*fí to ba-zîim m dí*. Me n/sét běn kángkáng byěm ḿbyín ké nkéré mú me m/mû ne ben. 6Nké chwǒm nkyi kô ńkyí nkyi kyi-ku ng kyi/fu, chwǒm ńkyín kyi*dachi kyi-chi kántîk* ne ben bamu ba-nyît ng kánkyí. Ké ochíchí-nkéré kâng, Mbên Dyityém ámu o/chi o-bâ. 7Dyityém ebên ńdyí dyi/shwôm busa dii/kpet bǎmkpóngé echi, nké ńkyí kyi/chi kyi-chi kii*ba/chi kyi-chi* tete onet mú mu o-ku ng kánkyí o-dim. 8Nkéré ámu kâng nké Mbên Dyityém ámu o/chi o-bâ, ne Jisos, Otu Kyítá o/chi o-ju ǎ ne bufú ḿbú mbu bu-fím m ǎ ké ocím, o-bên ǎ kángkáng ne obê emen mú mu ne busa ké nkéré mú nyǐ o/chi o-bâ. 9Mbên Dyityém ámu o/chi o-bâ ne busa ḿbú Sátan, o-chi kángkáng azong-biǐtí-akat, o-tông ekap ne byěm ḿbyí byidakaa banet byiko, ḿbyí byi*fí ké kafâ*. 10O-kúng kángkáng byibî-akwóp o-nîm banet ḿbé badaman ba-tánê. Banet ámbe ba/chi ba-tánê, ké ebóng, mbé ba*da/koo* ba-kyú ne kyijé ne ńkyí nkyi ntûntû* eringe nyí Osówo odanyii kámbé*. 11Ké bubwô ḿbún, Osówo mu o-twóm m busa ḿbú budachi ńkyí kyi*fí ntûntû* o/fu, buchi kámbé bǎmkpóngé ké byiko, eringe nyí badabángê ńkyí kyi*fí ké kafâ*. 12Ńkyí kyi/chi kyi-chi nkyi něen, kyi/fu, kángkáng banet ḿbé ba*da/bángê ké ńkyí nkyi ntûntû* nké baa/kúng kyijé ké byibî echi, Osówo o/chi o-két mpan o-bên kámbé.
Osówo o/cá Běn o/fu, Nyǐ o-nyii ng Běn
13Be byi-man byi-kó Osówo asǎma kángkáng nkéré ké bubwô enen, ǎ bwǎn-bané eten. Ben mú bamu ba-jê ng Otu Kyítá. Ké ebóng, Osówo o/cá běn wǎ bambwôp kashú-banet ḿbé nyǐ o/chi o-nyii ké busa ḿbú Busun emen, o/fu, nyǐ o-chi i běn ba-firi banet ḿbé banong ḿbé Osówo, ne ké bubwô-dyityém enen ńdyí ba/fé ké ńkyí nkyi ntûntû. 14Osówo o/kó běn ké ńkyín, ké bubwô-Bǎmpém ḿbé Banong ḿbé be byi/sét běn. Nyǐ o/kó běn o/fu, ben bakoo kyicê-busan ḿbú ragerage ḿbú Jisos Karâs, Otu Kyítá eten ńkyí kyi/já běn. 15Ké bubwô ámbu kâng, ǎ bwǎn-bané eten, bwom m̂ kíngkíng, ba-níbî byěm ḿbyí ntûntû ámbyi, ḿbyí be byi/tángê běn ké bǎmpém eten ne ké baléta eten ḿbé byi/sáng běn.
16Kyi/bát Jisos Karâs, Otu Kyítá eten nyǐ oyén ne Osówo mú Bonchí eten mú byimu byi-jê ng ǎ, ne mú ké kanong emen o/kye bě dyityém ecíp ńdyí ne banyá ne achi etî nyí anong, 17bachi atyém eten a-sú ne dyityém ecíp, ba-chi běn to ba-kyú shwaneshwane eringe nyí badachi, ba-sét to kángkáng byěm ḿbyí mbyi kanong.
Currently Selected:
2 Tesalónyan 2: BKY
Highlight
Copy
Compare
Share
Want to have your highlights saved across all your devices? Sign up or sign in
Published by the Bible Society of Nigeria @ 1985
