2 Koríntyan 8
8
Eyáré ekye wǎ Banet ḿbé ba/bángê ké Karâs
1Be byimu byi-ryuu ng byi/fu, ben banyît, ǎ bwǎn-bané, ńkyí ochwâp mú Osówo oo/chi ké byise-ékwâbashi nyí Karâs ḿbyí mbyi ké Masedónya. 2Baa/kan banet-ékwâbashi ányi kanong kanong ké afaníkong nyí ba/ri. Nké bunyîn-dyityém ḿbú ba/mû ne mbú bu/jê kanong kanong, ḿbú bu/chi kámbé ba-yárê banet byěm ḿbyí bii*nwa eri* nang ké mbé ba/mû bachíchí-banet-byikpu. 3Me mu n-sét ng běn ké ntûntû n/fu, ba/kye eringe nyí badaman ekye, kyi-bwa kyi-jê kyi-shwôm eringe nyí ba/mû ba/chi ba-kye. Ké okabe mú ebe mbé bayén, 4mbé ba/tîm bě arông ba-tú dyishí ba/fu, byikoo kyicê-byěm ebe byi-chwáp banet-Osówo ḿbé mbe ké Judyâ. 5Kyi/jê kyi-shwôm eringe nyí be byi/mû byi/chi byi-tî achi. Ké mbwôp kashú, ba/kúng byiko ebe ba-kye Otu Kyítá. Ne ké okabe mú Osówo kâng, ba-kúng byiko ebe ba-kye bě to. 6Ne byi-tírîng kâng Tátus mú o/kpet ne bǎmkpóngé ḿbén byi/fu, oca ne mbé kashú, o-chwáp běn ba-man bǎmkpóngé ḿbén ḿbé kyijé etông. 7Ben baa/fang kanong kanong ké kángkáng byěm ḿbyí bamu ne mbyí, ké dyityém efé, ké byiraa esét, ké byinyídíng, ké oryuu mú bamu ba-ryuu ng ba/fu, ba-chwáp ng banet, ne ké kyijé enen ne be. Ne ké bubwô ḿbún kâng, be byimu byi-ryuu ng byi/fu, ben bachi kyi-jê kyi-shwôm éné ké bǎmkpóngé ḿbén ḿbé kyijé.
8Me n*fí n-fâ kyije nang kyibónge*. Nké ké otông mú mu n-tông ng eringe nyí banet bakíri mbe ba-ryuu ng ba/fu, mbé ba-chwáp ng, me mu n-kan n n/fu, n-nyît ng ntûntû mú mu ké kyijé enen. 9Ké ebóng, ben bamu ba-nyît ng kanong ńké Jisos Karâs, Otu Kyítá eten. Nang ké o/mû ne esang, nyǐ o/bírî o-firi onet-kyikpu nyǐ oyén ké dyishí enen, eringe nyí oda běn echi ba-firi banet-esang ké bubwô-kyikpu ńkyí emen.
10Nyín okabe mú ejí kyi-kim ne kyiraa ánkyi. Kyi-nwa ng ne ben ńkyí badaman kántîk ńkyí ben ba/kpet ké dyije ńdyí dyi/shwôm ké esim. Ben ba/mû bambwôp kashú, *chí nang ké okpet echi* nké ké onyîn to mú kyi/nyîn běn ba/fu, ba-kpet ng echi. 11Ca n̂g kashú kâng ne nkyí, ba-man bǎmkpóngé ámbe. Kû n̂g ekabe ne busa ba/fu, ba-man n wǎ eringe nyí ba/mû ba/kabe ne busa ba/fu, ba-chi i kánkyí. Yip n̂g ńkyí bamu ne nkyí ba-chi kánkyí. 12Ké ebóng, â nkyi kyi-nyîn n běn ba/fu, ba-kyâ, Osówo o-koo ng eyáré enen ké bukwóp ḿbú bamu ne ńkyí badakye. *Chí ké bukwóp ḿbú ba*fí ne ńkyí badakye*.
13,14Me n*fí n-ryuu ng n/fu, n-shû ng dyitû ńdyí banet ḿbé áku n-tû běn ben*. Nké ké bubwô ḿbú ben bamu ne byěm chwóó ké nkéré mún, kyi-nwa ng ńkyí badachwáp banet ḿbé chwǒm kyi*fí kámbé*. Kyi-fím ányi kâng, â ké nkéré mú ben ba*fí ne chwǒm* ne mbé mbe ne mbyí chwóó, ba/chi ba-chwáp běn. Ké bukwóp ḿbún kâng, ben ashí amúmú ba-chwáp ng barî jangjang. 15Wǎ eringe nyí ejá-Osówo nyí ba/sáng kyísí e/sét e/fu, onet mú o/kpaa o-zû chwóó o*fí ne ńkyí kyi/jang ejê kyi-shwôm*. Ne onet mú o/kpaa kaǎnyín o*fí ne ńkyí kyi/jang esîi kyi-shwôm*.
Tátus ne Banet ḿbé mbe ké Burwám ne Nyǐ
16Be byimu byi-kó ng Osówo asǎma kanong kanong ké ochi mú o/chi Tátus o-kyú ne kyijé wǎ be, ńkyí oda běn echwáp. 17*Chí nang ńkyí byimu byi-sét ng ǎ nké nke nké nkyi kyi-nyîn n ǎ echi*. O/mû mu o-jang ng eryuu o/fu, nyǐ o-chwáp ng, ne o-kabe ké dyityém ńdyí emen nyǐ oyén o/fu, nyǐ o-bâ o-kâm běn. 18Be byimu byi-twóm m Tátus ne orî-onet eten mú o/bángê ké Karâs, mú mbe ba-kyâ ǎ kiǐtí-ofê ké ékwâbashi emúmú nyí Karâs ké bǎmkpóngé emen ḿbé mu o-sét ng banet Bǎmpém ḿbé Banong. 19Nang o/mû o*fí dyizong-onet ándyi* banet-ékwâbashi nyí Karâs baa/fîm ǎ ba/fu, ocen ne be ké bǎmkpóngé eten ḿbén ḿbé kyijé, ḿbé byimu byi-chi i ké akpee nyí Otu Kyítá, ne eringe nyí kyidatông to kyi/fu, be byimu byi-ryuu ng byi/fu, byi-chwáp ng.
20Be byimu byi-kám m byiko eten, eringe nyí baa*ba/chi ba-bîn bě kyi-kim ne eringe nyí byimu byi-níbî ng eyáré ńnyín. 21Okabe eten mu mú byidachi ńkyí nkyi ké bukwóp ḿbú bunong, *chí ké bushú ḿbú banet nké nke* nké ké bushú ḿbú Otu Kyítá to.
22Ké bubwô ḿbún, be byimu byi-twóm m wǎn-boné eten ne mbé. Be bii/kan ǎ kampén chwóó, ne bii/ri ne kyijé ńkyí mu o-ryuu ng o/fu, nyǐ o-chwáp ng běn kángkáng nkéré. Ne kántîk mú nyǐ oo/fé dyityém kanong kanong ne ben, nyǐ mu o-ryuu ng kanong kanong o/fu, nyǐ o-chwáp ng. 23Kyi-kim kâng ne Tátus, nyǐ mu onet-ochwâp ejí mú mu o-chi i bǎmkpóngé ne me ké ochwâp mú mu n-chwáp ng běn. Kyi-kim ne barî-banet ḿbé áku, ḿbé mbe ba-bâ ne nyǐ, mbé ba/bwom ké ashí-byise-ékwâbashi nyí Karâs, ne mbe ba-chi i banet ba-kyâ Karâs akpee. 24Tông n̂g kámbé kyijé enen, eringe nyí kángkáng ékwâbashi nyí Karâs e/chi e-nyît kánkyí ne ba-nyît ba/fu, kyi/kwárê ńkyí be byimu byi-tông ng byiko kyi-kim ne ben.
Currently Selected:
2 Koríntyan 8: BKY
Highlight
Copy
Compare
Share
Want to have your highlights saved across all your devices? Sign up or sign in
Published by the Bible Society of Nigeria @ 1985
