1 Tesalónyan 3
3
1Ké nkuli kyikû, be byi*da/chîman ecíp dyityém*. Ne byi-kabe kâng byi/fu, byi-kyú u kǎnchí ké Áten, 2byi-twóm Tyímótyi mú wǎn-boné eten, mú mu o-chi i bǎmkpóngé ne be o-kyâ Osówo ké Bǎmpém ḿbé Banong ḿbé mu o-pem m banet kyi-kim ne Karâs. Be byi/twóm ǎ byi/fu, oba-fé běn busa, o-chwáp běn ké dyityém enen ńdyí ba/fé ne Karâs, 3eringe nyí onet nang obónge ké burwám enen oo*ba/chi o-mîng dyityém emen efé ne Karâs* ké bubwô-busông ḿbún* ḿbú byimu byi-ri ng*. Ben bayén bamu ba-nyît ng ba/fu, dyizong-busông ámbu mbu ké burwám-byěm ḿbyí Osówo o/kabe o-tî bě. 4Ké ebóng, ké nkéré mú be byi/mû byi/tôong ne ben, be byi/sét běn kyikû ké esim byi/fu, banet ba/chi ba-kye bě busông, ne eringe nyí ben bamu ba-nyît ng, ńkyí be byi/sét běn nké kyi/chi kerededet. 5Nkyí nké kyi/chi ne n-twóm Tyímótyi. Me n*da/chîman ecíp dyityém*. Ké bubwô ámbu kâng, n-twóm ǎ n/fu, oba-kyé kyikû kyi-kim ne dyityém enen ńdyí ba/fé ne Karâs. Me n*da/kabe n/fu, Otu-Byibî-Barím oo/kan běn ba-róng* kángkáng bǎmkpóngé eten ba-tánê*.
6Kántîk, Tyímótyi oo/fím kyikit enen o-kâm bě. Ne oo/ba bě esét bǎmpém ḿbé ba/nyîn bě kyi-kim ne obánge enen ne kyijé enen. Nyǐ oo/sét bě o/fu, ben kángkáng nkéré bamu ba-kabe ng kanong kyi-kim ne be, ne bamu ba-ryuu ng ba/fu, ba-ri ng bě wǎ eringe nyí be to byimu byi-ryuu ng byi/fu, byi-ri ng běn. 7Ké bubwô ámbu kâng, ǎ bwǎn-bané, baa/fé bě busa kyi-kim ne ben ké kángkáng afaníkong ne busông eten. Dyityém enen ńdyí ba/fé ne Karâs nké dyi/fé bě busa, 8ké ebóng, kántîk nké byi-kú byi-kpen n, â ben ba/waa shwaneshwane ké dyikpen enen, ké bukwóp ḿbú Otu Kyítá. 9Ké ebóng, kántîk, byi-man n ekó Osówo asǎma ké bubwô enen. Byi-kó ng ǎ asǎma ké bubwô ḿbú bunyîn-dyityém ḿbú be byimu ne mbú ké bushú ḿbú Osówo, ké bubwô enen. 10Be byimu byi-bí ng ǎ buchú ne esû ne atyém eten kángkáng byi/fu, omîng bě byi-ri barî ké achi, byi-kye běn ńkyí kyi/chi kyi-kwárê ne dyityém enen ńdyí ba/fé ne Karâs.
11Kyi/bát Osówo mú mu Bonchí eten oyén ne Jisos, Otu Kyítá eten batông bě bukwóp ḿbú be byi/chi byi-bâ byi-ba-ri běn. 12Kyi/bát Otu Kyítá ochi kyijé enen ne barî ne kángkáng banet kyi-kán n kyi-câ kashú, kyi-firi kiǐtí wǎ eringe nyí ńkyí eten nkyi ne ben. 13Ké bukwóp ḿbún, Otu Kyítá o/chi o-chi atyém enen a-shwane, ne ben ba/chi ba-kwárê kerededet ne kanong ké bushú ḿbú Osówo mú mu Bonchí eten ké nkéré mú Jisos, Otu Kyítá eten o/chi o-bâ ne kángkáng banet ḿbé mbe ḿbé emen.
Currently Selected:
1 Tesalónyan 3: BKY
Highlight
Copy
Compare
Share
Want to have your highlights saved across all your devices? Sign up or sign in
Published by the Bible Society of Nigeria @ 1985
