1 Koríntyan 2
2
Bǎmpém ḿbé ba/kim ne Karâs mú o/kpú ké Kyikwap ńkyí badashwân Onet
1Ké nkéré mú me m/bê n-kâm běn, ǎ bwǎn-bané ejí, n/fu, m-bâ ng běn ntûntû mú mu Osówo ké dyityém ebasét, me n*da/wuri chwóó* ne n*da běn etángê to ké bukwóp ḿbú byinyídíng ḿbyí onet mú oo/kwâa nwet chwóó*. 2Ké ebóng, me n/kabe ké dyityém ejí n/fu, n-ráp ng kángkáng byěm ké nkéré me m/mû ne ben, kyi*da/shwôm Jisos Karâs nké nke nké n*da ǎ eráp* aciringaciring bukyû emen ḿbú o/kpú ké kyikwap ńkyí badashwân onet. 3Nkyí nké ké nkéré mú m/bê kyikit enen, me m/mû kyeekyee, ne m/mû n-só ng to banê ne bushî ké byiko. 4Ne ńkyí n/tángê běn ne ńkyí n/sét běn, n*da běn esét kámbyí ké bukwóp ḿbú byinyídíng ḿbyí onet mú oo/kwâa nwet chwóó* nké kyi/mû kyi/tông wááng kyi/fu, kyi/mû ké busa ḿbú Busun-Osówo. 5Dyityém enen ńdyí ba/fé ne Karâs kâng dyi*fí dyi-jêem m esim ké byinyídíng ḿbyí onet* nké ndyi dyi-jêem m ké busa ḿbú Osówo.
Byinyídíng ḿbyí Osówo
6Nang ké nkyi éné, me mu n-raa ng byiraa-byinyídíng ne banet ḿbé atyém ebe aa/kán. Nké *chí ne byinyídíng ḿbyí ké ejíí ńnyín* nang ḿbyí batu ḿbé mbe ba-tún n ejíí ńnyín* batu ḿbé busa ebe mbu bu-man n bu-câ. 7Byinyídíng ḿbyí me mu n-kúng ng ne n-raa ng, ányi byinyídíng ḿbyí Osówo, ḿbyí mbyi ǎ ké dyityém, ḿbyí banet ba*fí ba-ri ng* ḿbyí Osówo oo/cá kámbyí, ne nyǐ o-kûchi ejíí, eringe nyí be byidakoo akpee. 8Otu mú ké ejíí ńnyín o*fí nang obónge mú mu o-nyît ng byinyídíng ḿbyín*. Â mbé ba/mû ba/nyît kámbyí, mbé ba/mû baa*ba/chi ba-mán Otu mú mu ne kiǐtí-busa ké kyikwap ńkyí badashwân onet*. 9Nké wǎ eringe nyí ejá-Osówo nyí ba/sáng kyísí e/sét e/fu, ńkyí onet nang obónge o*da/ri* o-jwo nang ké atông* ńkyí onet o/mû o/kabe o/fu, kii*ba/chi kyi-chi* nkyí nké nkyi ochíchí-chwǒm ánkyi, ńkyí Osówo o/nap kánkyí o-tî banet ḿbé nyǐ mu o-jê ng kámbé.
10Nké be nké Osówo o/sét bě ńkyí nkyi ǎ ké dyityém, ké bubwô ḿbú Busun emen. Busun-Osówo bu-kyé ng kyikû ńkyí kángkáng byěm, nang okabe mú Osówo, mú Osówo o/rôo tíbítíbí. 11Wǎ eringe nyí nkyi ne onet, dyityém emen ńdyí ndyi ǎ ké kakim nké ndyi dyi-nyît ng kyi-kim ne byiko emen. Ké bukwóp ámbu bubónge, Busun-Osówo kǎnchí nké mbu bu-nyît ng kyi-kim ne Osówo. 12Be byi*da/koo busun ḿbú bu/fím ké ejíí ńnyín*. Be bii/koo Busun-Osówo ḿbú Osówo o/twóm, eringe nyí be byidanyît kángkáng byěm ḿbyí Osówo oo/kye bě.
13Ké bubwô ámbu kâng, be byi*fí byi-raa ng ké ejá nyí byinyídíng ḿbyí banet ba/tángê bě* nké byimu byi-raa ng ké ejá nyí Busun-Osówo bu/tángê bě, ké nkéré byimu byi-sét ng banet ḿbé mbe ne Busun-Osówo ké dyityém ntûntû mú Osówo. 14Nké onet mú o*fí ne Busun-Osówo ké dyityém* oo*man ekoo eyáré nyí nyi e-fím m ne Busun-Osówo*. Nyǐ ké ntûntû oo*nyît kyikû kyi-kim ne eyáré ányi*. Ee*byí ǎ wǎ chwǒm*. Ké ebóng, busun nké budakúng ne bu-nyît kanong ńké eyáré ányi edakye. 15Onet mú mu ne Busun-Osówo ké dyityém o-man n enyît kyi-kim ne kanong ńké kángkáng byěm, nké onet o*fí mu odaman enyît ńkyí nkyi onet ámu ké kafâ*. 16Wǎ eringe nyí ejá-Osówo nyí ba/sáng kyísí e/sét e/fu, yeě mu o-nyît ng dyityém ńdyí Otu Kyítá. Yeě oda ǎ eman ekye bacê.
Be kâng byimu ne dyityém ńdyí Karâs.
Currently Selected:
1 Koríntyan 2: BKY
Highlight
Copy
Compare
Share
Want to have your highlights saved across all your devices? Sign up or sign in
Published by the Bible Society of Nigeria @ 1985
