SEKARIA 1
1
Tuhan Nawar Pupu Neh Iumi Neneh
1 #
Esr 4.24—5.1; 6.14 Tuhan nemaré bala ini kuan Nabi Sekaria luk anak Berekia Ido bang bulan ualuh, lak luk kedueh kareb imet Darius raca' Parsi. 2Tuhan luk Melalud nengecuk ni Sekaria pebala kuan pupuneh, “Ui ini Tuhan pelaba useh inan tepun muyuh. 3Iamo' nekini UI pebala nemuyuh, ‘Do' lumi Negku, idi Ui miak lumi nemuyuh. 4Aleg muyuh mepad kudeng tepun muyuh. Nabi-nabi luk mulun bang kareb luk mon nemaré balaKu nedeh, idi nemebpeng nedeh na nganau' luk dat. Iamo' na ideh pian ninger balaKu. 5Iapehké tepun muyuh nekini? Mulun teh ideh luk nabi ineh? 6Iamo' bada' idi ukum luk biréKu dengan tang demulunKu lun nabi pangeh nangun kuan tepun muyuh. Mio-mio ideh nuren idi nengamo Negku, Tuhan luk Melalud, pangeh nengukum nedeh maya' kekamendeh, maya' kudeng luk pangeh tirawéKu.’ ”
Luk Sinier Nabi Ratnan Kuda-Kuda
7Bang lak luk kedueh kareb imet Darius, ieh ineh dueh ngepulu' apat aco bulan pulu' aceh (luk titen bulan Sibat), Tuhan nemaré aceh bala bang luk sinierku kareb medacem. 8#Lin 6.4; Lin 6.2 Ui nenier aceh melaikat Tuhan luk maya' kuda luk mesia'. Ieh pangeh nucu' liang kayuh hadas#1.8Hadas, ieh ineh aceh kayuh luk miak lapen angat ruen ku apo. luun raked, idi pa puetneh inan kuda baken—mesia', mebuda' idi meburit. 9Idi ui nengitun neneh, kebalaku, “Anunké ilung kuda ini?”
Idi kebalaneh, “Ui miak mada' ilungneh namu. 10Tuhan luk nengecuk nelun luk maya' kuda ini amé' nier bang tana' ini.”
11Idi kebala lun luk maya' kuda ineh kuan melaikat, “Kai pangeh nenalan aput-aput tana' ini, idi lun luk bang tana' ini melaya' idi na pebunu'.”
12Idi kebala melaikat ineh, “O Tuhan luk Melalud, Iko museh inan Yerusalim idi bawang-bawang Yahuda kinio tudu' ngepulu' lak. Tuda' ioké idi Iko mada' éi'Mu nedeh?”
13Idi Tuhan nengor bala melaikat ineh dengan bala luk do', 14idi melaikat ineh nengecuk negku mada' luk bila Tuhan luk Melalud ineh, kebalaNeh, “Ui mawa tu-tu idi méi' kuan Yerusalim, bawangKu luk meligan ineh. Idi Ui museh inan pupu baken luk mulun dengan na susa'. 15Kareb Ui nengimet usehKu inan pupuKu, pupu baken ineh luk nengacing susa' luk meluun rayeh kuan pupuKu. 16Idi nekini Ui amé' Yerusalim, pad Ui mada' éi'Ku kuan bawang ineh Ruma'Ku miak piduten baruh, idi bawang ineh pana'.”
17Idi melaikat ineh nengecuk negku mada', kebalaneh, “Tuhan luk Melalud nepejani' idi bawang-bawangNeh ini miak uen ngeperuan, idi Ieh miak ngubuk Yerusalim sekua' teh, pad ieh mangun ku bawangNeh luk pinili'.”
Luk Sinier Ratnan Unga
18Bang aceh luk sinier, idi ui nekali' apat unga pung. 19Idi ui nemutuh melaikat ineh mada' ilungneh.
Idi kebalaneh, “Ieh ineh apat imet bang tana' ini luk pangeh nematad nelun Yahuda, lun Israil, idi lun Yerusalim.”
20Idi Tuhan nemada' apat burur lemulun luk ngimet tuno sirenku. 21Idi ui nengitun, “Anunké luk ruen lemulun ini?”
Kebalaneh, “Ideh amé' ngatot idi ngusag imet luk pangeh nengebeneh tana' Yahuda idi luk pangeh nematad pupu ini.”
Currently Selected:
SEKARIA 1: BLD
Highlight
Copy
Compare
Share
Want to have your highlights saved across all your devices? Sign up or sign in
BALA LUK DO' Lun Bawang Bible © The Bible Society of Malaysia 1982, Second Edition 1998.
