TITUS 1
1
1Rat ni Paulus, demulun Allah idi rasul Yésus Keristus. Ui pangeh pinili' Allah, idi icuk ngepicet anu pupu Allah luk pinili' idi nguyut nedeh macing inan luk matu, maya' kudeng luk bida' ratnan baya' tau, 2luk tipin luun rapet tau ku ulun luk meruked, luk pangeh pijani' Allah luk na miak mebalih, atun ratnan amung-amung kareb luk meruked. 3Idi balaNeh ineh pangeh ginala' bang kareb luk petulu, bang bada' luk pangeh biré kuanku, maya' kudeng ukum Lun Nengulun netau, ieh ineh Allah.
4 #
2 Kor 8.23; Gal 2.3; 2 Tim 4.10 Kuan Titus, luk mangun ku anakku matu-matu dengan sebuleng anu.
Do' katu idi awang ratnan Allah, ieh ineh Taman, idi ratnan Keristus Yésus Lun Nengulun netau temurun kuanmu.
Kekamen Titus Déi' Kriti
5Ui nenecan namu déi' Kriti, pad iko miak mangeh amung-amung luk nateh inau', idi pad iko miak mili' lun rayeh-rayeh sidang bang anid-anid bawang, maya' kudeng luk pangeh icukku namu: 6Do' lun rayeh sidang ineh lemulun luk na mesala', idi luk inan sebuleng awan mo', idi anak-anakneh manu idi na inadu' ngaceku kekamen luk dat, idi na ngelaba ukum. 7Ngaceku lun rayeh sidang ineh ngasa' kekamen Allah idi na miak mesala'. Ieh na miak medita' niat, na malé museh, na mabuk, na pekedaluh, idi na melili ku binaweh bang tana' ini. 8Do' ieh ngasa' nelun sakai, idi mawa ku luk do'. Do' ieh mepiteb, mesiri, meligan, idi ngimet burur. 9#1 Tim 3.2–7 Do' ieh ngimet meraben bala luk matu maya' bada' Tuhan ineh, pad ieh miak nginul bada' luk matu, idi mada' lemulun luk sikal metueh.
10Ngaceku inan mula' lemulun luk na maya' bala, luk pebala mo'-mo', idi luk naluk, meluun teh lemulun luk ngimet ukum nunat. 11Tangdeh na miak na uen niep, ngaceku ideh ngagau amung uang tetek ruma' lemulun, idi mada' luk na petulu, pad ngalap binaweh mo'. 12Seburur nabi rat Kriti pangeh nepebala, “Lun Kriti megéi' mebalih. Ideh ineh pung luk dat, lemulun luk mekupé idi manga.” 13Luk bila nabi ineh matu. Ngaceku ineh, metueh mada' nedeh, pad anudeh meriput, 14pelé ideh na ngerawé bala lun Yahudi luk mo'-mo', idi ukum lemulun luk pangeh neteketed ratnan luk matu. 15Idi kuan lun luk meligan amung-amung meligan peh; iamo' kuan lemulun luk melutak idi luk na manu sebuleng pana' na meligan, ngaceku terawédeh idi teruayen niatdeh pana' melutak. 16Ideh ngamo bururdeh ngiti Allah, iamo' dengan kekamendeh ideh ngalum Neneh. Ideh luk inan lun baken megateh; ideh ngelaba bala idi na mayu nganau' kekamen luk do'.
Currently Selected:
TITUS 1: BLD
Highlight
Copy
Compare
Share
Want to have your highlights saved across all your devices? Sign up or sign in
BALA LUK DO' Lun Bawang Bible © The Bible Society of Malaysia 1982, Second Edition 1998.
