BALA LUK LINIO 8

Etu Luk Ketudu'

1Kareb Anak Dumba nengukab etu luk ketudu' ineh, idi bang surga ali-ali lélé setangal jam kinioneh. 2Idi ui nenier tudu' melaikat luk tuped pa kiung Allah ineh, idi pangeh biré kuandeh tudu' serupit.

3 # Am 9.1; Pur 30.1, 3 Idi seburur melaikat luk baken nacing idi netuped iring bubpun ineh. Ieh nengimet bigan amas luk inan luk sabpen luk do' buen, idi pangeh biré kuanneh tuda'-tuda' luk do' buen, pad ieh miak ngeseb ineh pad-pad dengan sembayang lun manu luun bubpun luk ratnan amas luk pa atun kerusi raca' ineh. 4Idi rabpun luk do' buen ineh pad-pad dengan sembayang lun manu ineh numak iné' pa kiung Allah rat bang palad melaikat ineh. 5#Uk 16.12; Yeh 10.2; Pur 19.16; Lin 11.19; 16.18 Idi melaikat ineh nengalap bigan ineh idi nenganau' apui luk ratnan bubpun ineh bang idi, idi ieh nenala' ineh luun tana'. Idi nangun tuda'-tuda' uni lalam, arod, kilep, idi ruyuh tana'.

Serupit-Serupit

6Idi tudu' melaikat ngimet tudu' serupit ineh netemina' sikal ngiup ineh.

7 # Pur 9.23–25; Yeh 38.22 Idi melaikat luk pun-pun ineh nengiup serupitneh. Idi udan batu idi apui netemurun puar-puar dengan dara', idi amung-amung ineh inutang kuan tana'. Idi sebuleng ratnan teluh babpat tana' neseb, idi sebabpat ratnan teluh babpat lawa kayuh neseb, idi amung-amung uduh ineh neseb teh.

8Idi melaikat luk kedueh ineh nengiup serupitneh, idi nangun aceh luk ayu-ayu mepad kudeng pegkung luk rayeh luk mebudung ku apui pangeh tila' bang abpa' rayeh. Idi sebabpat ratnan teluh babpat abpa' rayeh ineh mangun ku dara', 9idi sebabpat ratnan teluh babpat amung-amung pudut luk bang abpa' luk inan niat pangeh naté, idi sebabpat ratnan teluh babpat amung-amung kapal nusag.

10 # Yes 14.12 Idi melaikat luk keteluh ineh nengiup serupitneh. Aceh gituen luk rayeh nerurug rat bang langit, luk mebudung mepad kudeng budung sesakan, idi gituen ineh nengeritep sebabpat ratnan teluh babpat amung-amung abpa' idi amung-amung bued abpa' pana'. 11#Yer 9.15 (Idi ngadan gituen, ieh ineh Luk Mepét.) Idi sebabpat ratnan teluh babpat abpa' ineh mangun mepét, idi mula' lemulun naté ku abpa' ineh ngaceku ieh pangeh mangun mepét.

12 # Yes 13.10; Yeh 32.7; Yo 2.10, 31; 3.15 Idi melaikat luk keapat ineh nengiup serupitneh, idi sebabpat ratnan teluh babpat mateh aco bibpet, idi sebabpat ratnan teluh babpat bulan, idi sebabpat ratnan teluh babpat gituen-gituen, pad sebabpat ratnan teluh babpat ineh medacem peh, pad sebabpat ratnan teluh babpat acang aco ineh na luk idi acang, idi dacem pana' kudeng ineh teh.

13Idi ui nenier idi neninger aceh kanui netemulud déi' arang gawa' luk nengitang, “Mesusa', mesusa', mesusa' kuan amung lemulun luk tudo bang tana' ini, ngaceku ratnan uni serupit luk uen teluh melaikat luk baken ineh ngiup.”

Currently Selected:

BALA LUK LINIO 8: BLD

Highlight

Copy

Compare