BALA LUK LINIO 2

Surat Kuan Sidang Déi' Epesus

1“Kuan melaikat sidang luk déi' Epesus do' ngayud kudeng ini: “Idi ini bala rat Neneh luk ngimet tudu' gituen bang ticu'Neh luk pa tinueh, luk nala-nalan arang tudu' kukud dawan luk ratnan amas ineh. 2Ui kali' kekamenmu, erur, idi ulai niatmu. Ui kali' namu na perurum dengan amung-amung lemulun luk dat, iamo' iko pangeh nenutun amung-amung lemulun luk mala nedeh rasul, iamo' baken, idi pangeh iko nekali' nedeh mebalih. 3Iko mulai niat idi pangeh nemabeh dereh ngaceku ngadanKu dengan na musam. 4Iamo' ini adu'Ku namu: iko pangeh nenecan awamu luk pun-pun ineh. 5Do' ngerawé rat iapeh iko nebpeh! Do' uren ratnan sala'mu, idi nganau' kekamen luk inau'mu pun-pun ineh; kudeng iko na uren, Ui sikal macing namu idi mubuh kukud dawanmu ineh rat su luk inanneh. 6Iamo' iko miak buren ngaceku iko megateh niat ku kekamen lun Nikolai, luk inanKu megateh teh.

7 # Pud 2.9; Lin 22.2; Yeh 28.13; 31.8 “Idé luk inan lalid, do' ieh ninger bala Roh luk kuan amung-amung sidang!

“Kuan lemulun luk ngalap tueh, Ui miak maré akan luk ratnan bua' lawa ulun luk bang Kabun Allah.

Surat Kuan Sidang Déi' Smirna

8 # Yes 44.6; 48.12; Lin 1.17; 22.13 “Kuan melaikat sidang luk déi' Smirna do' ngayud kudeng ini:

“Ini bala rat Neneh luk Pun-pun idi luk Kekiped, luk pangeh naté, idi muli' mulun teh. 9Ui pangeh kali' susa'mu idi asi'mu—iamo' setuneh iko mula binaweh. Ui kali' kuyo ratnan lemulun luk mala nedeh lun Yahudi, iamo' baken, iamo' ideh aceh ruma' sembayang Sétan. 10Aleg iko matot ku susa' luk macing namu teh. Siruh, Iblis sikal nuet sebuang muyuh bang tutup, pad muyuh tetunin; idi muyuh miak ngalap dereh teh bang pulu' aco kinioneh. Do' iko lutep pad macing maté, idi Ui miak maré kuanmu pata ulun ineh.

11 # Lin 20.14; 21.8 “Idé luk inan lalid, do' ieh ninger bala Roh luk kuan amung-amung sidang.

“Idi lemulun luk metueh, na tu-tu ieh miak ngalap dereh até luk kedueh ineh.

Surat Kuan Sidang Déi' Pergamum

12“Kuan melaikat sidang Pergamum, do' ngayud kudeng ini:

“Ini bala rat Neneh luk inan pelapet metadem idi tadem pekop ineh. 13Ui kali' su inanmu tudo', ieh ineh su inan kerusi Sétan. Iko ngimet ngadanKu idi na necan anumu Negku, sagan pana' bang kareb Antipas, lun nekali' Negku luk lutep ineh, luk pangeh pinaté pa kiung muyuh, su luk inan Sétan tudo. 14#Iap 22.5, 7; 31.16; Bad 23.4; Iap 25.1–3 Iamo' ini sesuut adu'ku namu, inan teh denganmu lemulun luk ngimet bada' Bilam, luk nemada' ni Balak pad ngeraruh nelun pupu Israil, pad ideh kuman luk pangeh biré kuan akang, idi pasét teh. 15Kudeng ineh teh inan denganmu lemulun luk ngimet bada' lun Nikolai luk mepad kudeng ineh teh. 16Ngaceku ineh do' uren. Kudeng na, Ui macing namu dengan mesaget, idi munu' lemulun ineh ku pelapet luk remuat rat bang tangKu.

17 # Pur 16.14–15; 16.33–34; Yah 6.48–50; Yes 62.2; 65.15 “Idé luk inan lalid, do' ieh ninger bala Roh luk kuan amung-amung sidang!

“Kuan lemulun luk metueh Ui maré manna luk inapung ineh, idi Ui maré kuanneh aceh batu luk mebuda', idi luun batu ineh inayud aceh ngadan luk mebaruh luk na miak kali' seburur lemulun pana', iamo' lemulun luk ngalap ineh mo' luk kali'.

Surat Kuan Sidang Déi' Tiatira

18“Kuan melaikat sidang déi' Tiatira do' ngayud kudeng ini:

“ini bala Anak Allah, luk matehNeh mepad kudeng budung apui, idi kukudNeh mepad kudeng tekaling luk mesilo. 19Ui kali' kekamenmu. Ui kali' awa, anu, asa', idi ulai niatmu. Ui kali' kekamenmu nekini meluun do' ratnan luk atun. 20#1 Rac 16.31; 2 Rac 9.22, 30 Iamo' ini adu'Ku namu: iko nima' decur luk ngadan Isabel luk mala neneh nabi decur. Ieh mada' idi ngeraruh demulun-demulunKu pad ideh pasét idi kuman luk biré kuan akang. 21Ui nemaré kuanneh aceh kareb pad ieh miak uren, iamo' na ieh sikal uren ratnan pasét ineh. 22Ngaceku ineh Ui ngacing ét kuanneh luun luk inanneh rudap, idi ideh luk pasét denganneh miak semuet denganneh bang dereh luk rayeh, kudeng ideh na uren ratnan maya' kekamen decur ineh. 23#Nani 7.9; Yer 17.10; Nani 62.12 Idi Ui miak ngaté anak itinneh ku luk kadan, pad amung-amung sidang kali' ratnan Ui ini kali' terawé idi lili lemulun, idi Ui miak ngua' kuan muyuh maya' kekamen muyuh.

24“Iamo' muyuh lun baken luk déi' Tiatira na nemaya' bada' luk dat ineh. Muyuh na nesibada' luk titen lun baken ‘Kekamen Sétan luk medalem.’ Ui pebala nemuyuh, na Ui ngerareng babeh luk baken luun muyuh. 25Iamo' amung-amung luk inan bang palad muyuh do' ngimet meraben pad Ui macing. 26-28#Nani 2.8–9 Kuan lemulun luk metueh idi luk lutep nganau' luk pianKu macing kekipedneh, Ui miak maré lalud, mepad kudeng luk ilapKu ratnan TamanKu: Ui miak maré kuandeh lalud pa luun amung-amung pupu, pad ideh ngimet nedeh dengan rukud belawan, idi mila' nedeh mepad kudeng kuden. Idi teh Ui maré kuandeh gituen pekak.

29“Idé luk inan lalid, do' ieh ninger bala Roh luk kuan amung-amung sidang.

Currently Selected:

BALA LUK LINIO 2: BLD

Highlight

Copy

Compare