BALA LUK LINIO 19

1Muci ratnan ineh ui neninger teh uni mepad kudeng arod lun mula' luk ngitang déi' surga, kebaladeh, “Ngubur Allah! Ulun luk meruked, rayeh idi lalud idi bang palad Allah! 2Amung-amung ukumNeh ineh matu idi mesiri! Ieh pangeh nengukum decur luk pelaba sawa' ineh, luk nengeraruh tana' ini ku sawa'neh ineh. Allah pangeh nengukum neneh ngaceku ieh nengaté demulun-demulunNeh kusawa' ineh.” 3#Yes 34.10 Idi kebaladeh luk kedueh kua'neh, “Ngubur Allah! Rabpun ratnan bawang luk meseb ineh umak macing ruked-ruked!” 4Idi dueh ngepulu' apat lun rayeh ineh idi apat pudut luk mulun ineh teh netekeradung sembayang inan Allah luk tudo luun kerusi, idi nepebala, “Amin! Ngubur Allah!”

Irau Paweh Anak Dumba

5 # Nani 115.13 Idi aceh arod luk rayeh neremuat ratnan kerusi ineh kebalaneh, “Do' ngubur Allah tau, O amung-amung muyuh luk demulunNeh, idi luk matot Neneh, do' luk isuut idi luk rayeh pana'!” 6#Yeh 1.24; Nani 93.1; 97.1; 99.1 pangeh ineh ui neninger aceh arod luk mepad kudeng arod lun luk mula', idi mepad kudeng beri rueb luk medita', idi mepad kudeng uni lalam kebaladeh, “Ngubur Allah! Ngaceku Tuhan tau, Allah luk Melalud, Ieh ineh Raca'! 7Do' tau mawang niat idi do' ria', idi do' tau ngubur rayehNeh! Ngaceku kareb irau paweh Anak Dumba pangeh nacing, idi awanNeh pana' pangeh temina'. 8Idi pangeh biré kuanneh kibung pu luk malét idi merasat, pad ieh miak ngayung ku ineh.” (Kibung pu ineh pinginud kekamen-kekamen luk matu luk inau' lun manu.)

9 # Mat 22.2–3 Idi kebala melaikat negku, “Do' ngayud kudeng ini: Samal kuan lemulun luk tinawar amé' ku irau paweh Anak Dumba ineh.” Idi teh kebala melaikat ineh, “Ini bala Allah luk matu.”

10Ui netekeradung sembayang neneh, iamo' kebalaneh negku, “Aleg nganau' kudeng ineh! Ui pana' demulun teh mepad kudeng iko, idi mepad kudeng amung-amung kinanakmu luk ngimet luk nekali' Yésus. Do' sembayang inan Allah.”

Ngaceku bada' luk matu luk ginala' Yésus, ieh ineh luk ngegio niat nabi-nabi.

Lun Luk Tudo Luun Kuda Luk Mebuda'

11 # Yeh 1.1; Nani 96.13; Yes 11.4 Pangeh ineh ui nenier langit mukab idi inan aceh kuda luk mebuda'. Ngadan lemulun luk tudo luunneh ineh, Lutep Maya' Jani' idi Matu, idi dengan siriNeh Ieh mutut ukum idi pebunu' pana'. 12#Dan 10.6 MatehNeh ineh mepad kudeng budung apui, idi Ieh nengayung ku mula' pata; idi inan aceh ngadan luk inayud luunNeh luk na miak miti seburur lemulun pana', iamo' Ieh sebuleng. 13Idi Ieh inan kuyuh' luk pangeh rireb bang dara'. Idi Ieh tetanen “Bala Allah.” 14Idi baweh-baweh surga nemaya' puetNeh luun kuda luk mebuda'. Ideh nengayung ku kibung pu luk malét idi mebuda'. 15#Nani 2.9; Yes 63.3; Yo 3.13; Lin 14.20 Idi rat bang tangNeh neremuat aceh pelapet luk metadem, dengan ineh Ieh miak ngelaya' amung-amung pupu. Ieh miak ngimet nedeh ku rukud belawan. Idi Ieh luk rumik-rumik bua' anggur, ieh ineh lau' useh Allah luk Melalud. 16Idi luun kuyuh'Neh idi tipanNeh pangeh inayud aceh ngadan, ieh ineh, “Raca' pa luun amung-amung raca' idi Tuhan pa luun amung-amung tuan.”

17 # Yeh 39.17–20 Idi ui nenier teh aceh melaikat luk tuped nan mateh aco. Ieh nengarod kuan amung-amung suit luk temulud déi' arang gawa', kebalaneh, “Amé' tungé' idi pamung bang irau Allah luk rayeh. 18Amé' kuman uang raca'-raca', lun rayeh baweh, idi lun pebunu', idi uang kuda-kuda, uang lemulun luk tudo luun keteddeh idi uang amung-amung lemulun, do' lun do' idi demulun, do' luk isuut idi luk rayeh pana'.”

19Idi ui nenier pung ineh idi raca'-raca' bang tana' ini dengan bawehdeh, nepamung sikal pebunu' Neneh luk maya' kuda ineh, idi bawehNeh pana'. 20#Lin 13.1–18 Idi pung ineh pana' kikem pad-pad dengan nabi luk mebalih luk pangeh nenganau' tuda'-tuda' tanu' luk nan mawa pa kiungneh. (Idi dengan tanu'-tanu' ineh ieh nengeraruh lemulun luk inan etu pung ineh, idi luk pangeh sembayang inan akangneh.) Didueh ineh tila' dengan mulun bang takung apui luk mebudung ku batu apui. 21Idi baweh-bawehdeh pinaté ku pelapetNeh luk tudo luun keted kuda ineh, ieh ineh pelapet luk remuat rat bang tangNeh. Idi suit-suit pana' mebor ku uang lemulun ineh.

Currently Selected:

BALA LUK LINIO 19: BLD

Highlight

Copy

Compare