BALA LUK LINIO 11

Dueh Burur Lun Nekali'

1 # Yeh 40.3; Sek 2.1–2 Idi pangeh biré kuanku aceh bulu' luk mepad kudeng rukud ayunneh, idi keburi'neh, “Tumui iko, idi nari ruma' Allah idi bubpun, idi ngiap amung-amung lemulun luk sembayang bang ruma' Allah ineh. 2#Luk 21.24 Iamo' aleg nari natad luk bal alad Ruma' Allah ineh, aganeh, ngaceku pangeh biré kuan lun pupu baken, idi bawang luk meligan ineh miak riduenneh apat ngepulu' dueh bulan kinioneh. 3Idi Ui miak maré dueh lun nekali' Negku mada' pad macing 1,260 aco kinioneh, idi didueh miak ngayung ku kibung guni.”

4 # Sek 4.3, 11–14 Dueh lun nekali' ineh mepad kudeng dueh lawa saitun idi dueh kukud dawan luk tuped pa kiung Tuhan luk kuan tana' ini. 5Idi kudeng idé lemulun sikal ngesusa' nedidueh, apui miak remuat rat bang tang didueh idi ngaté amung-amung bunu' didueh; idi kudeng idé lemulun sikal ngesusa' nedidueh, idi na miak na ieh maté ratnan luk kudeng ineh. 6#1 Rac 17.1; Pur 7.17–19; 1 Sem 4.8 Didueh inan lalud ngitek langit pad na mudan laba' didueh mada', idi didueh inan lalud pa luun bued abpa' pad miak ngisu' ineh mangun ku dara', idi didueh miak ngelaya' tana' ku amung-amung ét, tuda'-tuda' kua' maya' pian didueh.

7 # Dan 7.7; Lin 13.5–7; 17.8; Dan 7.21 Kareb didueh pangeh nengeriput luk nekali' didueh, idi pung luk meliput luk remuat rat bang lubang luk na miak teriin kidalemneh ineh sikal munu' nedidueh. Ieh miak ngelaya' nedidueh, idi ngaté nedidueh. 8#Yes 1.9–10 Idi butung didueh miak telubid nan dalan bawang luk rayeh, luk dengan pinginud titen Sodom idi Masir, su luk inan Tuhan didueh sinalib ineh. 9Lemulun rat arang amung-amung inul, babpat, buri', idi pupu pana' miak nier butung didueh teluh aco setangal kinioneh. Idi na ideh sikal nanem butung didueh. 10Idi lemulun bang tana' ini mawang niat ngaceku até didueh idi do' ria'. Ideh maré baré seburur kuan seburur, ngaceku dueh lun nabi ineh pangeh nengedereh lemulun luk tudo bang tana' ini. 11#Yeh 37.10 Pangeh teluh aco setangal ineh idi niat ulun ratnan Allah nesemuet bang nedidueh, idi didueh netumui idi netuped; idi tot luk rayeh nacing kuan amung-amung lemulun luk nenier nedidueh ineh. 12#2 Rac 2.11 Idi dueh nabi ineh neninger aceh tang luk rayeh rat bang langit luk nepebala nedidueh, “Umak amé' tungé'!” Idi didueh numak iné' déi'' langit maya' bang laput. Idi amung-amung bunu'deh pana' nenier nedidueh. 13#Lin 6.12; 16.18 Kareb ineh teh mangun ruyuh tana' luk rayeh, pad sebabpat ratnan pulu' babpat bawang ineh netabpa, idi 7,000 lemulun naté bang ruyuh tana' ineh, idi luk ketecan ineh matot idi nengerayeh Allah luk déi' surga.

14Idi susa' luk kedueh ineh pangeh nepelaba! Siruh, susa' luk keteluh ineh macing dengan mesaget!

Serupit Luk Ketudu'

15 # Pur 15.18; Dan 2.44; 7.14, 27 Idi melaikat luk ketudu' ineh nengiup serupitneh, idi inan tuda'-tuda' arod déi' surga luk pebala, “Imet tana' ini mangun ku Imet Tuhan tau, idi Imet KeristusNeh, idi Ieh miak ngimet macing ruked-ruked peh.” 16Idi dueh ngepulu' apat lun rayeh luk tudo luun kerusideh luk pa kiung Allah ineh munel sembayang inan Allah, 17idi nepebala,

“Kai ngubur Namu, O Tuhan Allah luk Melalud,

Luk idi nekini idi Luk pangeh idi atun,

ngaceku Iko makai laludMu luk rayeh,

idi Iko pangeh ngimun ngimet!

18 # Nani 2.5; 110.5; Nani 115.13 Lun luk na manu megateh niat

ngaceku aco usehMu pangeh nacing,

idi lun maté miak kumin.

Ini karebneh inan maré tabpar kuan demulunMu, nabi-nabi,

idi amung pupuMu luk matot Namu,

do' luk isuut idi luk rayeh pana'.

Ini karebneh inan ngaté amung lemulun luk ngusag tana' ini.”

19 # Lin 8.5; 16.18; Lin 16.21 Ruma' Allah luk déi' surga pana' mukab, idi megala Pati' Pejani'neh ineh bang ruma' ineh. Idi mangun tuda'-tuda' kilep, arod, lalam, ruyuh tana', idi udan batu luk mula'.

Currently Selected:

BALA LUK LINIO 11: BLD

Highlight

Copy

Compare