MARKUS 8
8
Yésus Maré Akan Kuan Apat Ngeribu Lemulun
(Mat 15.32–39)
1Kareb ineh teh lun mula' nepamung idi na luk idi anun-anun pana' luk miak kenendeh. Idi Yésus nenawar anak-anak sekola'Neh amé' Neneh, kebalaNeh, 2“Ui mé' nelun mula' ini, ngaceku pangeh teluh aco ideh tudo denganKu, idi na luk kenendeh. 3Kudeng Ui ngecuk lun mula' ini muli' dengan melau, kali' rungen ideh melepu arang dalan, ngaceku inan luk nacing rat mado.”
4Idi kebala anak-anak sekola'Neh Neneh, “Rat iapehké tau miak ngalap petap ruti tungé su luk ali-ali kuan lemulun luk kinula' ini?”
5Idi Yésus nengitun nedeh, “Tuda' ruti luk inan nemuyuh?” Idi keburi'deh, “Tudu' balad mo'.”
6Idi Ieh nengecuk lun mula' ineh tudo luun tana', idi Ieh nengalap ruti luk tudu' balad ineh, idi Ieh nemaré ubur kuan Allah, idi nemuri'-muri' ruti ineh idi nemaré kuan anak-anak sekola'Neh. Idi ideh nenganid kuan lun mula'. 7Idi inan teh déi' sesuut lawid luk dari-dari. Kareb Ieh pangeh nesembayang ratnan lawid ineh, idi Ieh nengecuk anak-anak sekola'Neh nganid kuan amung-amung lemulun ineh. 8Idi ideh nekuman pad macing mebor; idi ideh nengamung teceh luk neketecan, panu' tudu' ngebuan. 9Idi kinula'deh lélé apat ngeribu, idi Yésus nengecuk nedeh muli'. 10Kareb ineh teh Ieh netemaleb bang alud dengan anak-anak sekola'Neh, idi ideh nacing déi' babpat bawang Dalmanuta.
Lun Parisi Mutuh Tanu'
(Mat 16.1–4)
11 #
Mat 12.38; Luk 11.16 Lun Parisi nacing inan Yésus idi nepesaad Neneh, idi nemutuh rat Neneh aceh tanu' rat surga, ngaceku ideh sikal nutun Neneh. 12#Mat 12.39; Luk 11.29 Idi Yésus negarod kebalaNeh, “Ngudehké inul ini nakap tanu'? Ui pebala nemuyuh, sebuleng tanu' pana' na miak barén kuan inul ini.” 13Idi Ieh nenecan nedeh idi netemaleb bang alud teh, idi neguta takung ineh.
Lamud Lun Parisi Idi Herodés
(Mat 16.5–12)
14Idi anak-anak sekola' Yésus nekelupan nguit ruti; idi bang alud ineh inan sebalad ruti mo'. 15#Luk 12.1 Idi Yésus nemada' nedeh, keburi'Neh, “Ngerawé do'-do', idi matar burur muyuh ratnan lamud lun Parisi idi ratnan lamud Herodés.
16Idi ideh nepegayam arangdeh sebuleng, keburi'deh, “Ieh mala kudeng ineh ngaceku na luk idi ruti inuit tau.”
17Iamo' Yésus nekali' terawédeh idi Ieh nengitun nedeh, “Ngudehké muyuh pegayam arang muyuh sebuleng ngaceku na luk idi ruti nemuyuh? Naké muyuh kali' idi naké muyuh ngerawé ilungneh? Natehké terawé muyuh mukab? 18#Yer 5.21; Yeh 12.2; Mrk 4.12 Muyuh inan mateh, naké muyuh nier? Muyuh inan lalid, naké muyuh ninger, idi naké muyuh ngerawé? 19Kareb Ui nemuri' ruti luk limeh balad arang lemulun luk limeh ngeribu ineh, tuda' ngebuanké teceh ruti ineh luk imung muyuh?”
Idi keburi'deh Neneh, “Pulu' dueh ngebuan.”
20“Idi teh kareb luk tudu' balad ineh pinuri' arang lun apat ngeribu, idi tuda' ngebuan teceh ruti luk imung muyuh?”
Idi keburi'deh, “Tudu' ngebuan.”
21Idi kebala Yésus nedeh, “Naké muyuh kali' ilungneh?”
Yésus Ngedo' Seburur Lun Mebuser Déi' Baitsaida
22Idi ideh nacing déi' bawang Baitsaida. Idi ideh nenguit seburur lemulun luk mebuser, idi nemutuh Neneh ngakem lemulun ineh. 23Yésus nengimet ticu' lemulun luk mebuser ineh idi nenguyut neneh remuat rat bang bawang ineh. Pangeh Ieh nengelica' matehneh, idi Ieh nengerareng ticu'Neh luunneh, kebalaNeh, “Miakké iko nier anun-anun?”
24Idi lemulun ineh netukag idi nepebala, “Ui nier lemulun, iamo' ayudeh mepad kudeng lawa kayuh luk nalan.”
25Muci teh Ieh nengerareng ticu'Neh luun matehneh, idi ieh nenier do'-do' pad ieh nedo' peh, idi miak nier amung-amung dengan melagan. 26Yésus nengecuk neneh muli', keburi'Neh, “Aleg iko lemubed amé' bang bawang.”
Amo Pétrus Ratnan Yésus
(Mat 16.13–20; Luk 9.18–21)
27Idi Yésus neremuat dengan anak-anak sekola'Neh iné' bawang-bawang Kaisaria Pilipi. Kareb uned Ieh nalan, idi kebalaNeh inan anak-anak sekola'Neh, “Maya' buri'dulun, idéké Ui ini?”
28 #
Mrk 6.14–15; Luk 9.7–8 Idi keburi' anak-anak sekola'Neh, “Inan luk nemala Yahya luk Ngerereb, inan luk nemala Elia, idi inan teh luk nemala seburur lemulun rat arang nabi.”
29 #
Yah 6.68–69
Idi Yésus nengitun nedeh, “Kudeng buri' muyuh ini, idéké Ui ini?”
Idi kebala Pétrus, “Iko Keristus.”
30Idi Yésus nemebpeng nedeh na mada' nelun baken ratnan Ieh.
Yésus Mada' Ratnan Dereh Idi AtéNeh
(Mat 16.21–28; Luk 9.22–27)
31Idi Yésus nengimun mada' anak-anak sekola'Neh: “Na miak na Anak-Lemulun mabeh mula' dereh, pad Ieh talan lun rayeh-rayeh, imam-imam rayeh, idi guru-guru Ukum teh. Ieh miak pitayendeh, idi pangeh teluh aco, Ieh miak tumui teh.” 32Idi Ieh nemala bala ineh dengan megala'. Idi Pétrus nenguit Yésus iné setau' idi nemebpeng Neneh. 33Iamo' Yésus nelumi idi nenier anak-anak sekola'Neh, idi nemebpeng ni Pétrus, keburi'Neh, “Amé pa ketedKu, O Sétan! Ngaceku iko baken ngerawé luk ratnan Allah, iamo' luk ratnan lemulun mo'.”
34 #
Mat 10.38; Luk 14.27 Idi Yésus nenawar nelun mula' ineh dengan anak-anak sekola'Neh, idi kebalaNeh, “Idé-idé luk sikal maya' Negku, do' ieh na ngerawé bururneh sebuleng iamo' maan salibneh idi maya' Negku. 35#Mat 10.39; Luk 17.33; Yah 12.25 Ngaceku idé-idé luk ngerawé ulunneh, na miak ngalap ulun luk matu; idi lemulun luk na ngerawé ulunneh sebuleng ngaceku Ui idi ngaceku Bala luk Do' ineh, ieh miak ngalap ulun luk matu. 36Ngaceku anunké ulekneh kudeng selemulun ngalap amung-amung tana' ini, iamo' na ieh ngalap ulun luk meruked? 37Idi anunké miak barén lemulun ku libal ulunneh? 38Ngaceku ineh idé-idé luk migu' ngamo Negku idi balaKu teh arang pupu luk pasét idi mesala' ini, idi Anak-Lemulun ine pana' migu' ngamo neneh kareb Ieh macing dengan rayeh TamanNeh dengan melaikat-melaikatNeh luk meligan.”
Currently Selected:
MARKUS 8: BLD
Highlight
Copy
Compare
Share
Want to have your highlights saved across all your devices? Sign up or sign in
BALA LUK DO' Lun Bawang Bible © The Bible Society of Malaysia 1982, Second Edition 1998.
