MARKUS 6

Yésus Tila' Rat Nasarét

(Mat 13.53–58; Luk 4.16–30)

1Idi Yésus nenecan bawang ineh, idi nuli' iné' bawangNeh sebuleng dengan anak-anak sekola'Neh. 2Kareb Aco luk inan Mudeng, Yésus nengimun mada' bang ruma' sembayang. Idi mula' lemulun mawa kareb ideh neninger bada'Neh, kebaladeh, “Rat iapehké lemulun ini nengalap luk kudeng ini? Kudeng apehké ileh luk biré Neneh ineh, idi kekamen luk melalud luk inau'Neh? 3Bakenké Ieh ini lun ngakem kayuh, anak Mariam, idi kinanak Yakub, usup, Yudas idi Simun? Idi bakenké kinanak-kinanakNeh luk decur pana' idi dengan tau tungé'?” Idi ideh nesabeng ku Ieh.

4 # Yah 4.44 Kebala Yésus nedeh, “Seburur nabi kali' rungen ruen ngedita', iamo' bang bawangneh sebuleng idi tetek ruma'neh sebuleng na lun ngedita' neneh.”

5Idi su ineh na Ieh miak nganau' sebuleng kekamen luk melalud pana', iamo' inan tuda'-tuda' lemulun luk mét mo' luk dino'Neh dengan nengerareng ticu'Neh luundeh. 6Idi Yésus mawa, ngaceku ideh na manu.

Yésus Ngecuk Pulu' Dueh Anak Sekola'Neh Nalan

(Mat 10.5–15; Luk 9.1–6)

Yésus nenalan bang bawang luk libut-libut Nasarét ineh idi Ieh nemada' nelun mula'. 7Yésus nenawar pulu' dueh anak sekola'Neh idi nengecuk nedeh tedueh-tedueh. Idi Ieh nemaré lalud kuandeh pa luun amung-amung ada'. 8Idi Ieh nemebpeng nedeh na nguit anun-anun kareb ideh nalan, iamo' sebuleng rukud mo', ruti pana' na, luk inan balu' pana' na, idi usin bang takubdeh pana' na; 9miak teh makai kasut, iamo' aleg makai dueh buun kuyu'. 10Idi kebalaNeh nedeh, “Kareb muyuh darin umak, do' muyuh tudo su ineh, pad macing muyuh remuat rat bang bawang ineh. 11#Kek 13.51 #Luk 10.4–11 Kudeng muyuh macing bang aceh bawang luk na pian nganak nemuyuh idi luk na sikal ninger bala muyuh, do' muyuh necan bawang idi ngegkar abuh luk liang depar muyuh mangun ku aceh bada' kuandeh.” 12Idi ideh nenalan idi nemada' ratnan lemulun na miak na uren. 13#Yak 5.14 Ideh nenala' mula' ada' idi nengumau mula' lemulun luk mét, idi nengedo' nedeh.

Até Yahya Luk Ngerereb

(Mat 14.1–12; Luk 9.7–9)

14Raca' Herodés neninger bala ineh, ngaceku ngadan Yésus pangeh nepiar. Idi inan lun pebala, “Yahya luk Ngerereb pangeh netumui rat arang lun naté. Ini punneh inan lalud luk kudeng ini ngakem bang bururneh.”

15 # Mat 16.14; Mrk 8.28; Luk 9.19 Idi inan teh lun pebala, “Ini Elia.”

Idi inan teh lun baken luk pebala, “Ieh seburur nabi, mepad kudeng nabi luk mon.”

16Kareb Herodés neninger bala ineh, idi kebalaneh, “Yahya ini luk pangeh kilebku pangeh tumui teh!” 17Herodés sebuleng pangeh nengecuk lemulun ngakem Yahya, idi ideh nengaling neneh idi nenipa neneh bang tutup, ngaceku ratnan Herodia, awan Pilipus luk kinanakneh, ngaceku Herodés panegh nengaweh neneh. 18#Luk 3.19–20 Yahya luk Ngerereb megéi' mada' ni Herodés, “Bibpeng kuanmu na miak ngalap awan kinanakmu.”

19Idi Herodia mét niat ni Yahya sikal ngaté neneh, iamo' na miak ngaceku Herodés. 20Herodés matot ni Yahya, ngaceku ieh kali' ieh seburur lemulun luk matu idi meligan, idi ieh megéi' nginita neneh. Ieh pian ninger bala Yahya, sagan tu pana' ieh megagau ku balaneh.

21Mio-mio inan aceh kareb luk biré kuan Herodia, ieh ineh kareb aco luk inan Herodés tinganak. Idi ieh nengana' aceh irau kuan amung-amung lun rayeh bang imetneh, lun rayeh bawehneh, idi lun rayeh bang bawang Galilia pana'. 22Kareb ineh anak decur Herodia nesemuet idi nengalai. Idi ieh nengawang niat Herodés dengan lun luk tinawarneh. Idi kebala raca' kuan anak decur ineh, “Do' iko mutuh anun-anun luk pianmu, pad ui miak maré ineh kuanmu.” 23Idi Herodés nepebulung neneh, keburi'neh, “Anun-anun pana' luk pituenmu rat negku, ui miak maré kuanmu, macing sebuang imetku pana'.”

24Idi anak decur ini iné' ngitun tinanneh, “Anunké luk pituenku?”

Idi keburi' tinanneh, “Do' mutuh uluh Yahya luk Ngerereb.”

25Idi dengan mesaget anak decur ineh iné' matun raca', keburi'neh, “Ui mutuh namu maré uluh Yahya luk Ngerereb bang aceh bigan.”

26Idi raca' pelaba susa' niat; iamo' ngaceku bulungneh, idi teh ngaceku amung lemulun luk tinawarneh ineh, na ieh miak ngelaba luk pinutuhneh. 27Idi raca' ineh nengecuk seburur lun matar amé' ngalap uluh Yahya. Idi lemulun ineh iné' ngaleb uluh Yahya déi' bang tutup. 28Idi ieh nenguit uluhneh ineh bang bigan, idi ieh nemaré neneh kuan anak decur ineh; ini anak decur ineh pana' nemaré neneh kuan tinanneh. 29Kareb bala ineh nekali' anak-anak sekola' Yahya, idi ideh iné' ngalap butungneh, idi ideh nenanem neneh.

Tuhan Yésus Maré Akan Kuan Limeh Ngeribu Lemulun

(Mat 14.13–21; Luk 9.10–17; Yah 6.1–14)

30Lun rasul pana' nelemubed iné' matun Yésus. Idi ideh nemada' Neneh ratnan amung-amung luk inau'deh idi luk bida'deh pana'. 31Idi kebala Yésus nedeh, “Do' tau sebuleng amé' su luk ali-ali, pad muyuh miak ngato erur muyuh.” Ngaceku mula' lemulun luk macing idi nalan teh, pad ideh na miak kuman pana'. 32Idi ideh nemaya' alud iné' su luk ali-ali.

33Iamo' mula' lemulun nekali' nedeh nalan idi mula' teh lemulun luk miti nedeh; idi ideh neremuat rat bang bawangdeh, idi nupun pa atun maya' tana'. Idi ideh nacing atun ratnan lemulun luk maya' alud ineh. 34#Iap 27.17; 1 Rac 22.17; 2 In 18.16; Yeh 34.5; Sek 10.2; Mat 9.36 Kareb Yésus numak rat bang alud, idi Ieh nenier mula' lemulun, idi Ieh méi' nedeh, ngaceku ideh mepad kudeng dumba luk na lun matar. Idi Ieh nengimun maré mula' bada' kuandeh. 35Idi kareb lélé macep aco, idi anak-anak sekola'Neh iné' Neneh, kebaladeh, “Su ini mali tu, idi lélé macep aco. 36Do' ngecuk lun mula' ini amé' déi' lati' idi ruma' pana' luk muneng, pad melih akan kuandeh sebuleng.”

37Iamo' kebala Yésus, “Do' muyuh maré nedeh kuman.”

Idi kebaladeh, “Pianmu kai amé' melih ruti luk raga dueh ngeratu rigit kenen lun mula' iniké?”

38Idi kebala Yésus nedeh, “Tuda' balad ruti muyuh? Do' amé' nier.”

Kareb ideh nekali', idi kebaladeh Neneh, “Inan ruti limeh balad, idi dueh lawid mo'.”

39Idi Yésus nengecuk anak-anak sekola'Neh nganau' nedeh tudo setau'-setau' luun uduh ineh. 40Idi ideh netudo setau'-setau', inan luk meratu, idi inan luk limeh ngepulu' kinula'deh. 41Yésus nengalap ruti luk limeh balad idi dueh lawid ineh, idi Ieh netengook déi' langit idi nesembayang. Ieh nemuri'-muri' ruti ineh, idi nemaré kuan anak-anak sekola'Neh. Idi ideh nengerareng ineh pa kiung lun mula'. Kudeng ineh teh dueh lawid ineh bibpat kuan lun mula'. 42Idi amung-amungdeh nekuman pad macing mebor. 43Pangeh ineh idi ideh nengamung amung-amung tecehneh, panu' pulu' dueh ngebuan, idi teh ela lawid ineh. 44Idi ula' lemulun luk nekuman ruti ineh, ieh ineh limeh ngeribu burur amung-amung deléi mo'.

Yésus Nalan Luun Abpa'

(Mat 14.22–33; Yah 6.15–21)

45Idi petacu Yésus nengecuk anak-anak sekola'Neh temaleb bang alud sikal guta amé' par déi' bawang Baitsaida, kareb Ieh ngecuk lun mula' ineh muli.’ 46Pangeh Ieh nemutuh do' nedeh, idi Ieh iné' luun pegkung sikal sembayang. 47Kareb malem aco, idi alud ineh pana' nacing luun uned takung ineh, kareb Yésus sebuleng déi' tana' luun. 48Idi Ieh nenier nedeh pelaba erur peribue' ngaceku bui pelaba tueh, idi kareb malé macang, idi Ieh iné' nedeh idi nalan luun abpa' ineh sikal lemaba nedeh. 49Iamo' ideh nenier Neneh nalan luun abpa' ineh, idi ideh nengerawé Neneh ada', idi ideh nengitang. 50Kareb amungdeh nenier Yésus idi ideh megagap.

Iamo' petacu Yésus nepebala nedeh, “Aleg muyuh merapang, Ui ini, aleg matot!” 51Idi Ieh numak bang alud ineh dengandeh, idi bui ineh pana' nugka', pad amungdeh pelaba awa; 52ngaceku ideh nateh nekali' idi nateh nengerawé ratnan ilung ruti luk biréNeh ineh, ngaceku nateh terawédeh mukab.

Yésus Ngedo' Nelun Mét Déi' Genésaret

(Mat 14.34–36)

53Ideh neguta takung, idi nacing déi' tana' Genésaret idi ideh nengabet aluddeh déi' tangeb. 54Kareb ideh numak rat bang alud, petacu amung-amung lemulun miti Yésus. 55Idi ideh nalan libut-libut bawang ineh idi nenguit amung-amung lun luk mét luun birirdeh iné' su luk inandeh nekali' Yésus. 56Idi su apeh pana' ulek Yésus, do' déi' ruma', déi' bawang rayeh, idi déi' lati' pana', lun mula' nenguit amung-amung lun luk mét, idi nengerareng nedeh luun natad su luk inan masui irin, idi nemutuh Neneh nima' nedeh ngakem iring kuyu'Neh mo'. Idi idé'idé luk nengakem kuyu'Neh ineh petacu do'.

Currently Selected:

MARKUS 6: BLD

Highlight

Copy

Compare