MARKUS 1

Bada' Yahya Luk Ngerereb

(Mat 3.1–12; Luk 3.1–18; Yah 1.19–28)

1Ini pun-pun Bala luk Do' ratnan Yésus Keristus Anak Allah. 2#Mal 3.1 Mepad kudeng luk inayud bang surat Nabi Yesaya, kebalaneh;

“Matu, Ui ngecuk lun dukenKu amé' pa atunMu,

pad nganau' temina' dalanMu.

3 # Yes 40.3 Idi seburur lemulun ngitang déi' su luk ali-ali:

‘Nganau' temina' dalan Tuhan,

idi ngesiri lisangen-lisangenNeh!’ ”

4Idi Yahya nacing ngerereb lemulun déi' su luk ali-ali, idi nemada' ratnan rereb uren, ieh ineh dalan ngalap do' ratnan sala'. 5Kareb ineh amung uang tana' Yudia neremuat dengan amung lun Yerusalim iné' matun Yahya. Ideh nengamo sala'deh, idi Yahya nengerereb nedeh bang Abpa' Yarden.

6 # 2 Rac 1.8 Yahya ineh nengayung ku buluh pung unta, idi inan abet awa'neh ratnan kubil pung, idi luk kenenneh, ieh ineh kato idi duru' tebikan. 7Kebalaneh nelun mula', “Muci rat negku ini miak macing Seburur Lemulun teh luk meluun lalud rat negku. Neka abet kasutNeh pana' ui na mayu. 8Ui ngerereb nemuyuh bang abpa'; iamo' Ieh miak ngerereb nemuyuh ku Roh Meligan.”

Rereb Idi Tutun Yésus

(Mat 3.13—14.11; Luk 3.21–22; 4.1–13)

9Na mio teh idi Yésus nacing rat Nasarét déi' tana' Galilia idi Yahya nengerereb Neneh bang Abpa' Yarden. 10Kareb Yésus numak rat bang abpa' ineh, Ieh nenier langit mukab idi Roh Allah temurun luunNeh mepad kudeng aceh suit sukur. 11#Pud 22.2; Nani 2.7; Yes 42.1; Mat 3.17; 12.18; Mrk 9.7; Luk 3.22 Idi inan aceh tang rat bang langit, “Iko ini AnakKu luk inanKu mawa, idi Ui mawang niat Namu!”

12Petacu teh Roh nenguit Neneh amé' su luk ali-ali. 13Idi Ieh netudo déi' su luk ali-ali apat ngepulu' aco kinioneh, tinutun Sétan. Idi Ieh tudo arang pung-pung luk meliput, iamo' melaikat-melaikat pana' nacing ngasa' Neneh.

Yésus Nawar Apat Burur Lun Ngerabat

(Mat 4.12–22; Luk 4.14–15; 5.1–11)

14Kareb Yahya ineh pangeh kikem, idi Yésus nacing déi' Galilia mada' Bala luk Do' ratnan Allah. 15#Mat 3.2 KebalaNeh, “Karebneh pangeh macing, idi Imet Allah pangeh muneng. Do' muyuh uren idi manu ku Bala luk Do' ini.”

16Kareb Yésus nenalan déi' tangeb Takung Galilia, idi Ieh nenier dueh burur lun ngerabat, ieh ineh Simun dengan kinanakneh Andrias, uned ngerabat déi' bang takung ineh. 17Idi keburi' Yésus nedidueh, “Amé' medueh maya' Negku, idi Ui nganau' nemedueh mangun ku lun ngerabat lemulun.” 18Petacu didueh nenecan rabat ineh, idi nemaya' Yésus.

19Kareb Yésus nenalan rat déi' nateh mado tu, idi Ieh nenier Yakub Sabdi, dengan kinanakneh Yahya, idi didueh tudo bang alud ngii' rabat. 20Idi Ieh petacu nenawar nedidueh, idi didueh nenecan Sabdi taman didueh bang alud dengan lun tebarinneh, idi nemaya' Yésus.

Seburur Lemulun Luk Sinuet Ada'

(Luk 4.31–37)

21Ideh iné' déi' Kapernaum, idi kareb Aco luk inan Mudeng, Yésus nesemuet bang ruma' sembayang idi nemada' nedeh. 22#Mat 7.28–29 Idi lemulun ineh mawa ku bada'Neh ineh. Ieh baken ratnan guru-guru Ukum, ngaceku Ieh nemada' nedeh dengan lalud.

23Idi kareb ineh seburur lemulun luk sinuet ada' nesemuet bang ruma' sembayang, idi nengitang, 24keburi'neh, “O Yésus lun Nasarét, anunké luk pianMu nekai? Iko macing sikal ngaté nekaiké? Ui kali' Namu ini, ieh ineh Lemulun luk Meligan luk nacing ratnan Allah.”

25Idi Yésus nemebpeng neneh, keburi'Neh, “Pirud! Remuat iko ratnan lemulun ini!”

26Idi ada' ineh ucet ngagau lemulun ineh, idi nengitang, idi ieh neremuat rat neneh. 27Idi lun mula' ineh mawa pad ideh nengitun seburur dengan seburur, keburi'deh, “Anunké ini? Bada' luk mebaruhké? Ngaceku amung-amung ada' pana' icukNeh dengan lalud, pad ideh maya' balaNeh.”

28Idi dengan mesaget amung-amung bala ratnan Yésus ini nepiar bang libut-libut bawang Galilia.

Yésus Ngedo' Mula' Lun Mét

(Mat 8.14–17; Luk 4.38–41)

29Ideh neremuat rat bang ruma' sembayang idi iné' ruma' Simun idi Andrias pad-pad dengan Yakub idi Yahya. 30Idi iban Simun, telubid ngaceku medadem, idi petacu ideh nemaré kali' kuan Yésus ratnan ineh. 31Idi Yésus nacing idi nengimet ticu'neh, idi nenui neneh, pad dademneh ineh pana' nedo' peh, idi decur ineh nengasa' nedeh.

32Kareb aco pangeh macep, idi ideh nenguit amé' matun Yésus amung-amung lemulun luk mét idi lemulun luk sinuet ada' pana'. 33Idi amung lun bang bawang ineh pana' nepamung munung tanga' ruma' ineh. 34Idi Yésus nengedo' mula' lemulun luk inan puar-puar luk mét, idi mula' ada' pana' tila'Neh. Iamo' Ieh na maré ada' ineh pebala-pebala, ngaceku ada' ineh miti Neneh.

Yésus Mada' Déi' Tana' Galilia

(Luk 4.42–44)

35Pekak uka-uka, kareb nateh aco masat, idi Yésus netumui, idi Ieh neremuat iné' su luk ali-ali, idi Ieh nesembayang déi'. 36Iamo' Simun dengan amung lun rurumneh ineh nesemunu' Neneh. 37Kareb ideh nepapu' Neneh, idi ideh nepebala Neneh, “Amung-amung lemulun nakap Namu!”

38Iamo' Yésus nepebala nedeh, “Do' tau amé' bang bawang luk bake luk muneng rat ieni, pad Ui mada' déi' teh, ngaceku ini punneh Ui nacing.”

39 # Mat 4.23; 9.35 Idi Ieh iné' mada' bang amung ruma' sembayangdeh ineh déi' aput tana' Galilia, idi Ieh nenala' ada' teh.

Yésus Ngedo' Seburur Lun Luk Mét Susud

(Mat 8.1–4; Luk 5.12–16)

40Inan aceh lemulun luk mét susud iné' matun Yésus, idi netekeradung pa kiungNeh mutuh pedengan, keburi'neh, “Kudeng Iko pian, Iko miak ngedo' negku.”

41Idi Yésus pelaba éi' neneh, idi Ieh nenatang ticu'Neh idi nengakem neneh, kebalaNeh, “Ui pian ngedo' namu, do' iko meligan peh!” 42Idi petacu susudneh ineh nedo', idi ieh malét. 43Idi Yésus metueh mada' neneh, idi nengecuk neneh nalan dengan mesaget, 44#Uk 14.1–32 kebalaNeh, “Ngerawé do'-do', aleg iko mala anun-anun kuan seburur lemulun pana'. Iamo' do' iko petacu amé' mada' bururmu siren lun imam, idi maré baré maya' kudeng luk icuk Musa, pad ngegala' liganmu kuan amung-amung lemulun.”

45Iamo' lemulun ineh nenalan idi nengimun mada' bala ineh aput-aput bawang. Ieh nemada' ratnan amung ineh pad Yésus na miak semuet bang bawang ineh dengan megala'. Iamo' Ieh tudo déi' su luk ali-ali' idi mula' lemulun nacing Neneh ratnan anid-anid bawang.

Currently Selected:

MARKUS 1: BLD

Highlight

Copy

Compare