MIKA 6
6
Adu' Tuhan Nelun Israil
1Do' ninger adu' Tuhan pa kiung lun Israil. O Tuhan, miket mada' adu'Mu. Pegkung mangun ku lun luk nekali'. Nima' amung surud ninger luk belénMu.
2O pegkung, muyuh luk alen tana' ini luk na sigio, do' ninger adu' Tuhan! Tuhan pian mada' adu'Neh pa kiung lun Israil, idi pian nguit nedeh besara'.
3Kebala Tuhan, “O pupuKu, anunké luk inau'Ku nemuyuh? Kudeng apehké Ui mangun ku babeh kuan muyuh? Do' muyuh mada' Negku. 4#Pur 12.50–51; Pur 4.10–16; Pur 15.20 Ui nenguit nemuyuh remuat rat bawang Masir. Idi teh Ui nemuit nemuyuh ratnan taban. Idi Ui nengecuk ni Musa, Arun, idi Miriam mangun ku lun nguyut nemuyuh. 5#Iap 22.2—24.25; Yus 3.1—4.19 O pupuKu, do' ngerawé ratnan luk tirawé Balak, raca' Moab ratnan muyuh, idi kudeng apeh Bilam Bior nengor balaneh. Do' ngerawé ratnan amung-amung luk nangun kareb maya' dalan rat Sitim amé' Gilgal, pelé muyuh kali' luk inau'Ku pad ngulun nemuyuh.”
Luk Duken Tuhan Inan Lemulun
6Anunké luk itenku kuan Tuhan, Allah surga, kareb ui amé' sembayang Neneh? Petuluké ui nguit anak sapi' luk meluun do' mangun ku baré luk sabpen kuanNeh? 7Mawangké niat Tuhan kudeng ui nguit ribu-ribu dumba, idi pulu' ribu arur luk mepanu' ku umau saitun? Miakké ui maré Neneh anakku luk atun ku ngua' sala'ku? 8O lun muyuh, Tuhan pangeh nemada' nemuyuh ratnan luk do'. Kudeng ini luk dukenNeh nemuyuh: nganau' luk mesiri, idi do' lutep bang awa. Maya' Allah muyuh dengan mebeneh niat.
9Mileh lemulun luk matot inan Tuhan. Tuhan ngitang-ngitang bang bawang rayeh, “O muyuh luk bang bawang rayeh ini, do' muyuh ninger. 10Bang ruma' lun luk dat inan binaweh luk ilap dengan pino. Luk ku nimangdeh na matu, idi Ui megateh ku ineh. 11Miakké Ui maré do' nelun luk sala' timang? 12Lun do' bang bawang rayeh muyok nelun masi'. Idi amung lun luk bang bawang ineh mebalih mo'. 13Idi nekini Ui ngimun ngedereh idi ngukum nemuyuh, ngaceku sala' muyuh. 14Muyuh miak kuman, iamo' na muyuh mebor, idi melau kidi-kidi. Idi luk nugen muyuh pana' na do'. Anun-anun luk pangeh dinug muyuh miak uenKu ngusag bang bunu'. 15Muyuh miak nibu, iamo' na muyuh ngeranih. Muyuh miak ngeradu' bua' saitun muyuh, iamo' na muyuh makai umauneh. Muyuh miak nganau' abpa' anggur, iamo' na muyuh ngirup idi. 16#1 Rac 16.23–28; 1 Rac 16.29–34; 21.25–26 Muyuh pangeh nemaya' Kekamen Raca' Omri luk dat, idi kekamen anakneh Raca' Akab. Macing nekini muyuh nemaya' terawé didueh, pad Ui pian ngusag nemuyuh, pelé amung pupu muyuh uen ngedat. Amung-amung lemulun iapeh-iapeh pana' miak ngedat nemuyuh.”
Currently Selected:
MIKA 6: BLD
Highlight
Copy
Compare
Share
Want to have your highlights saved across all your devices? Sign up or sign in
BALA LUK DO' Lun Bawang Bible © The Bible Society of Malaysia 1982, Second Edition 1998.
