MIKA 2
2
Kekiped Lemulun Luk Ngedereh Nelun Masi'
1Pelaba susa' kuan lemulun luk telubid luun bitaran idi ngerawé-ngerawé ratnan luk dat! Idi kareb macang aco, idi ideh inan aceh kareb, petacu ideh nganau' luk tirawédeh. 2Kareb ideh pian ku tana', ideh ngalap mo'. Kudeng ideh pian ku ruma', ideh ngalap mo'. Ideh mano ruma' idi tana' lun baken.
3Ngaceku ineh kebala Tuhan, “Ui ngacing susa' nemuyuh, pad muyuh na miak mepuit, pelé muyuh na mulun dengan medita' niat, ngaceku muyuh pelaba susa' kareb ineh. 4Aco sineh, amung lemulun miak mada' bala ratnan susa' muyuh, pad ideh nganau' aceh nani luk mepad kudeng tido:
Kai pangeh inusag!
Tuhan pangeh nengalap tana' kai,
idi ineh biré kuan lemulun luk nenaban nekai.”
5Ngaceku ineh, seburur pana' rat arang muyuh nateh luk miak ngalap tana' kareb aco tana' uen mabpat teh arang pupu Tuhan.
6Idi kebala lun Israil negku, “Aleg mada' nekai. Aleg mada' ratnan amung ineh. Allah na pian ngigu' nekai. 7Inanké lun Israil kidiman Tuhan? Inanké Tuhan mawer niat? Miakké Tuhan nganau' luk kudeng ineh? Naké Ieh pebala luk do' kuan lemulun luk nganau' luk matu?”
8Idi kebala Tuhan, “Iamo' muyuh nganau' burur muyuh mangun ku bunu' pupuKu. Muyuh mano kuyu' rat nelun luk do' niat, luk muli' rat bang bunu' idi luk ngerawé na inan susa' peh. 9Muyuh ngecuk decur pupuKu buro rat bang ruma' luk inandeh do' udeng, idi muyuh pangeh nengaro peruan luk biréKu inan anakdeh. 10Do' muyuh buro; na su ini luk inan muyuh ucu'. Ngaceku muyuh nganau' sala', muyuh miak ngalap aceh ukum luk pelaba berat.
11“Pupu ini pian ku nabi luk mepanu' ku balih idi saluk, luk lawé-lawé mada', kebaladeh, ‘Mula' abpa' anggur idi arak miak barén nemuyuh.’
12“Iamo' Ui miak ngamung amung muyuh lun Israil luk ketecan. Ui miak ngamung nemuyuh mepad kudeng dumba bang libung, idi teh mepad kudeng sengeriudan dumba luk bang laman. Bawang muyuh miak mepanu' ku ria' mula' lemulun.”
13Allah miak ngukab dalan kuandeh, idi nguyut nedeh. Ideh miak urap maya' tanga' bawang, pad ideh mepuit. Raca'deh, ieh ineh Tuhan sebuleng miak nguyut nedeh.
Currently Selected:
MIKA 2: BLD
Highlight
Copy
Compare
Share
Want to have your highlights saved across all your devices? Sign up or sign in
BALA LUK DO' Lun Bawang Bible © The Bible Society of Malaysia 1982, Second Edition 1998.
