MATIUS 9

Yésus Ngedo' Seburur Lemulun Luk Mét Naté Urat

(Mrk 2.1–12; Luk 5.17–26)

1Yésus netemaleb bang aceh alud, idi neguta macing déi' dipar, idi Ieh nacing inan bawangNeh sebuleng. 2Idi ideh nenguit seburur lemulun luk mét naté urat amé' Neneh, luk telubid luun birirneh. Idi Yésus nekali' rayeh anudeh ineh, idi Ieh nepebala inan lemulun luk mét naté urat ineh, “O anakKu, do' iko lutep niat; iko lun mesala', iamo' Ui maré do' namu.”

3Idi sebuang rat arang guru-guru Ukum ineh nengerawé bang niatdeh, “Lemulun ini nguyo Allah.”

4Yésus nekali' terawédeh, idi kebalaNeh, “Ngudehké muyuh ngerawé luk dat bang niat muyuh? 5Sapehké luk meluun malé, mala, ‘Iko lun mesala', iamo' Ui maré do' namu,’ kian pebala, ‘Tumui idi nalan'? 6Iamo' nekini muyuh miak kali' Anak-Lemulun ngimet lalud maré do' ratnan sala' bang tana'.” Idi kebalaNeh kuan lemulun luk mét naté urat, “Tumui iko idi ngiding luk inanmu rudap, idi muli' amé' ruma'mu.”

7Idi lun mét ineh netumui, idi iné' ruma'neh. 8Kareb lun mula' nekali' ratnan luk kudeng ineh, idi ideh matot idi nengerayeh Allah luk nemaré lalud luk kudeng ineh kuan lemulun.

Tuhan Yésus Mili' Matius

(Mrk 2.13–17; Luk 5.27–32)

9Yésus nenecan bawang ineh, idi kareb Ieh nenalan, Ieh nenier selemulun, ngadanneh Matius, luk tudo bang ruma' luk inan ngamung usin pupuk. Idi kebala Yésus neneh, “Do' maya' Negku.”

Idi Matius netuped idi nemaya' Yésus.

10Idi kareb Yésus nekuman bang ruma' Matius, idi mula' lemulun luk ngamung usin pupuk idi lun mesala' pana' iné' idi netudo dengan Yésus idi anak-anak sekola'Neh teh. 11#Luk 15.1–2 Idi kareb lun Parisi nenier ineh, idi kebaladeh kuan anak-anak sekola'Neh, “Ngudehké Guru muyuh kuman dengan lun luk ngamung usin pupuk, idi lun mesala' teh?”

12Idi Yésus neninger bala ineh, idi kebalaNeh, “Lemulun luk do' burur na ulek kuan lun ngubat, iamo' lemulun luk mét mo'. 13#Mat 12.7; Hos 6.6 Iamo' do' muyuh amé' ngelio ilung bala ini, ‘Idi luk pianKu ineh éi', baken pung luk kereten.’ Ngaceku baken Ui macing nawar lemulun luk matu, iamo' lemulun luk mesala'.”

Itun Ratnan Mawa'

(Mrk 2.18–22; Luk 5.33–39)

14Idi anak-anak sekola' Yahya iné matun Yésus, keburi'deh, “Ngudehké kai idi lun Parisi pana' megéi' mawa', iamo' anak-anak sekola'Mu na mawa'?”

15Idi kebala Yésus, “Miakké lun rurum deléi luk sikal ngaweh ineh mesusa' niat kareb ieh idi dengandeh? Na tu! Iamo' aconeh miak macing kareb deléi luk sikal ngaweh ineh miak lapen rat arangdeh, kareb ineh ideh mawa'.

16“Na luk idi seburur lemulun luk mubpul aceh kuyu' luk mon ku kibung luk mebaruh, ngaceku kali' rungen bubpul ineh medarak, ieh ineh kibung luk mebaruh ngedarak luk mon ineh, pad darakneh meluun rayeh peh. 17Idi na lemulun ngutang abpa' anggur luk mebaruh bang seréi' kubil luk mon, ngaceku seréi kubil ineh mebila', idi abpa' anggur ineh mutat, idi seréi' ineh pana' mepau teh. Iamo' abpa' anggur luk mebaruh ruen lemulun bang seréi' kubil luk mebaruh, pad dueh-dueh ineh do'.”

Anak Yairus Luk Decur Idi Seburur

Decur Luk Ngakem Kuyu' Yésus

(Mrk 5.21–43; Luk 8.40–56)

18Kareb Yésus pebala kudeng ini kuandeh, idi inan seburur lun rayeh lun Yahudi nacing idi netekeradung sembayang Neneh, keburi'neh, “Anakku luk decur pangeh naté; do' Iko amé' ngerareng ticu'Mu luun bururneh, pad ieh mulun.”

19Idi Yésus nudur idi nemaya' neneh, idi anak-anak sekola'Neh nemaya' puetNeh.

20Idi inan seburur decur luk mét mirat dara' pangeh pulu' dueh lak kinioneh inéh rat pa ketedNeh idi nengakem iring kuyu'Neh. 21Ieh nengerawé bang niatneh, “Kudeng ui ngakem kuyu'Neh mo, ui miak do' peh.”

22Yésus nelumi idi nenier neneh, kebalaNeh, “O anakKu, do' iko lutep niat, anumu pangeh nengedo' namu.” Idi petacu decur ineh do' peh.

23Idi kareb Yésus nacing bang ruma' lun rayeh ineh, idi nenier lemulun luk ngiup suling idi lemulun luk mula' ria', 24idi kebalaNeh, “Buro muyuh, anak ini na naté, ieh rudap mo'.”

Idi ideh meriruh idi nesitunga Neneh. 25Iamo' kareb pangeh lun mula' ineh icukNeh buro, Yésus nesemuet idi nengimet ticu'neh; idi anak decur ineh netumui. 26Idi bala ratnan luk kudeng ineh nepiar macing libut-libut bawang ineh.

Yésus Ngedo' Dueh Burur Lun Mebuser

27Yésus nenecan bawang ineh, idi kareb Ieh nenalan, inan dueh lun mebuser nemaya' Neneh, idi nengitang, kebala didueh, “O Anak Daud, mé' nekai!”

28Idi kareb Ieh pangeh nesemuet bang ruma', lemulun luk mebuser ineh iné' matun Neneh. Idi kebala Yésus nedidueh, “Manuké medueh Ui melalud nganau' kekamen ini?”

Idi kebala didueh, “Manu, Tuhan.”

29Idi Ieh nengakem mateh didueh, kebalaNeh, “Do' mangun kuan medueh mepad kudeng luk medueh pangeh manu.” 30Idi mateh didueh nekulat, idi Yésus neperiteteng tu-tu nedidueh, kebalaNeh, “Ngerawé do'-do', aleg mada' seburur lemulun pana' ratnan ini.”

31Iamo' didueh neremuat, idi nemada' bala ratnan Yésus aput bawang ineh.

Yésus Ngedo' Lun Luk Mebegkeh

32Idi kareb ideh nalan, idi ideh nenguit seburur lun mebegkeh luk sinuet ada' iné' matun Yésus. 33Idi kareb ada' ineh tila' rat neneh, idi lun mebegkeh ineh nepebala; idi lun mula' ineh pana' mawa, keburi'deh, “Rat mon nateh kekamen luk kudeng ini sinier arang lun pupu Israil.”

34 # Mat 10.25; 12.24; Mrk 3.22; Luk 11.15 Iamo' kebala lun Parisi, “Ieh nala' ada' dengan lalud lun rayeh ada'.”

Yésus Méi' Nelun Mula'

35 # Mat 4.23; Mrk 1.39; Luk 4.44 Idi Yésus nenalan libut-libut amung-amung bawang idi ruma'. Idi Ieh nemada' bang amung-amung ruma' sembayangdeh, idi nemada' Bala luk Do' ratnan Imet ineh, idi nengedo' amung-amung lu mét, idi amung-amung laya' burur lemulun. 36#Iap 27.17; 1 Rac 22.17; 2 In 18.16; Yeh 34.5; Sek 10.2; Mrk 6.34 Iamo' kareb Ieh nenier nelun mula', Ieh méi' nedeh, ngaceku ideh mesusa' idi urap-urap kudeng dumba-dumba luk na lun matar. 37#Luk 10.2 Idi kebala Yésus nan anak-anak sekola'Neh, “Matu, mula' luk perinien, iamo' pawa' lun luk ngeranih. 38Do' mutuh ratnan Tuhan luk kuan perinien ineh, pelé Ieh ngecuk lemulun ngeranih lati'Neh ineh.”

Currently Selected:

MATIUS 9: BLD

Highlight

Copy