LUKAS 4

Yésus Tinutun

(Mat 4.1–11; Mrk 1.12–13)

1Idi Yésus pana' nepanu' ku Roh Meligan, kareb Ieh nelemubed rat Yarden. Idi Roh ineh nenguyut Neneh iné' su luk ali-ali. 2Idi déi' Ieh tinutun Iblis apat ngepulu' aco kinioneh. Ruked ineh sebuleng anun-anun pana' nateh kinanNeh. Kareb pangeh mabud aco ineh Ieh melau peh.

3Idi Iblis nepebala Neneh, “Kudeng matu Iko Anak Allah, do' Iko ngisu' batu ini mangun ku ruti kenenMu.”

4 # Bad 8.3 Idi Yésus nengor balaneh, “Pangeh inayud bang Surat Allah, ‘Baken ratnan ruti mo' lemulun miak mulun.’ ”

5Idi Iblis nenguit Neneh amé' inan aceh pegkung, idi ieh nemada' amung imet libut-libut tana' ineh sirenNeh segageh mo' kinioneh. 6Idi Iblis nepebala Neneh, “Ui sikal maré amung lalud ini idi rayehdeh kuanMu; ngaceku amung-amung ini pangeh biré negku, idi ui miak maré ineh kuan idé-idé lun pianku. 7Ngaceku ineh kudeng Iko sembayang negku idi amung-amung ineh mangun ku binawehMu.”

8 # Bad 6.13 Idi Yésus nengor balaneh, “Pangeh inayud bang Surat Allah, ‘Do' iko sembayang inan Allah Tuhanmu, idi maya' Neneh mo'.’ ”

9Idi Iblis nenguit Neneh iné' Yerusalim, idi ieh nenganau' Neneh luun buduk Ruma' Allah idi nepebala Neneh, “Kudeng matu Iko Anak Allah, do' Iko ubpa rat ieni amé' déi' liang; 10#Nani 91.11 ngaceku pangeh inayud, ‘Idi Ieh miak pebala kuan amung-amung melaikatNeh ratnan Iko, pad ideh matar Namu,’ 11#Nani 91.12 idi ‘Ideh miak ngimet Namu bang ticu'deh, pad kukudMu na miak matuk ku batu.’ ”

12 # Bad 6.16 Idi kebala Yésus neneh, “Pangeh inayud bang Surat Allah, ‘Aleg iko nutun Allah Tuhanmu.’ ”

13Pangeh Iblis ineh nengabud tutunneh nan Yésus, idi ieh neburo rat Neneh segageh mo' kinioneh.

Yésus Ngimun Ngakem Déi' Galilia

(Mat 4.12–17; Mrk 1.14–15)

14Pangeh ineh Yésus nelemubed iné' Galilia dengan lalud Roh; idi balaNeh nepiar aput bawang ineh. 15Idi Ieh nemada' bang amung ruma' sembayangdeh, idi amung lemulun pana' nengerayeh Neneh.

Yésus Tila' Rat Nasarét

(Mat 13.53–58; Mrk 6.1–6)

16Idi Yésus iné' Nasarét, su luk inanNeh tudo kareb Ieh anak. Idi kareb Aco luk inan Mudeng Ieh nesemuet bang ruma' sembayang maya' kudeng luk pekalai. Idi Ieh netuped sikal maca' Surat Allah. 17Idi ideh nemaré kuanNeh surat Nabi Yesaya. Pangeh Ieh nengelesad ineh, idi Ieh nepapu' aceh bala luk pangeh inayud,

18 # Yes 61.1–2 “Roh Tuhan idi pa luunKu,

ngaceku Ieh pangeh nengumau Negku,

pad Ui mada' Bala luk Do' kuan lun masi'.

Ieh nengecuk Negku mada' puit kuan lun luk tiban,

idi ngedo' mateh lun luk nebuser,

idi muit lemulun luk neritep,

19idi mada' lak luk inan Tuhan ngulun pupuNeh.”

20Idi Ieh nengelulun surat ineh, idi nemaré ineh kuan lun luk ngasa' ruma' sembayang, idi Ieh netudo. Idi lemulun bang ruma' sembayang ineh nenutong Neneh. 21Idi Ieh nengimun pebala nedeh, “Bang aco sini ayat bang Surat Allah luk muyuh neninger pangeh icing.”

22Niat amungdeh ineh nesigio ku bada'Neh, idi ideh mawa ku balaNeh luk pelaba do', keburi'deh, “Bakenké Ieh ini anak Yusup?”

23Idi kebala Yésus nedeh, “Kali' rungen muyuh mada' luk pinginud ini kuanKu, ‘O Lun Ngubat, ngedo' bururMu sebuleng,” idi teh, ‘Do' Iko nganau' tungé' bang bawangMu sebuleng, mepad kudeng luk biladeh nekai ratnan luk inau'Mu déi' Kapernaum.’ 24#Yah 4.44 Matu, Ui pebala nemuyuh, na luk idi seburur nabi pana' ruen ngedita' bang bawangneh sebuleng.

25 # 1 Rac 17.1 “Ninger do'-do', bang kareb Elia, inan mula' decur tinula' arang lun Israil, kareb na udan teluh lak anem bulan kinioneh pad macing iru' luk rayeh aput tana' ineh. 26#1 Rac 17.8–16 Iamo' Elia ineh na icuk kuan seburur lun baken, iamo' kuan seburur decur tinula' déi' Sarepat déi' tana' Sidon. 27#2 Rac 5.1–14 Idi kareb Nabi Elisa ineh, inan mula' lemulun luk mét susud arang lun Israil, idi na luk idi seburur pana' luk dino' iamo' Naaman, seburur lun Siria ineh mo'.”

28Amung lemulun bang ruma' sembayang ineh pana' pelaba useh kareb ideh neninger bala ineh. 29Ideh nudur nala' Yésus rat bang bawang ineh idi nenguit Neneh amé' inan aceh buduk pegkung su luk inan bawangdeh pinudut, sikal nala' Neneh déi' beneh. 30Iamo' Yésus nelemaba arangdeh idi nenalan.

Lun Luk Sinuet Ada'

(Mrk 1.21–28)

31Idi Yésus iné' Kapernaum bang babpat Galilia. Idi Ieh nemada' lemulun kareb Aco luk inan Mudeng. 32Ideh mawa ku bada'Neh, ngaceku balaNeh inan lalud. 33Idi bang ruma' sembayang ineh inan seburur lemulun luk sinuet ada', idi ieh nengitang, keburi'neh, 34“Anunké luk pianMu nekai, O Yésus lun Nasarét? Iko macing sikal ngaté nekaiké? Ui kali' Namu ini, Iko ineh Lun Duken Allah luk Meligan.”

35Idi Yésus nemebpeng neneh, kebalaNeh, “Pirud! Remuat iko ratnan lemulun ini!” Idi ada' ineh pana' nengeluka' neneh arang lemulun luk mula' ineh, idi ada' ineh neremuat rat bang bururneh dengan na nenganau' luk métneh.

36Idi amungdeh ineh mawa idi nepebala seburur dengan seburur, keburi'deh, “Bala anunké ini? Ngaceku dengan lalud idi tueh Ieh ngecuk amung ada' buro idi ideh remuat.” 37Idi bala ratnan Yésus nepiar kuan amung babpat libut-libut bawang ineh.

Yésus Ngedo' Mula' Lemulun

(Mat 8.14–17; Mrk 1.29–34)

38Yésus neremuat rat bang ruma' sembayang ineh idi iné' ruma' Simun. Idi iban Simun medadem, idi ideh nemutuh Yésus ngedengan neneh. 39Idi Ieh netuped iringneh idi nemebpeng dadem ineh. Idi dadem ineh pana' nedo', idi petacu ieh netumui idi nengasa' nedeh.

40Kareb aco macep, idi amung lemulun luk inan puar-puar luk mét, nenguit lemulun luk mét ine amé' matun Yésus. Idi Ieh nengerareng ticu'Neh luun anid-anid lemulun ineh idi nengedo' nedeh. 41Idi ada'-ada' pana' neremuat ratnan lemulun luk mula' ineh idi nengitang, keburi'deh, “Iko ini Anak Allah.”

Idi Yésus nemebpeng nedeh na pebala-pebala, ngaceku ada' ineh nekali' idi Ieh ineh Keristus.

Yésus Mada' Bang Ruma' Sembayang

(Mrk 1.35–39)

42Kareb aco macang Yésus neremuat iné' su luk ali-ali; idi lun mula' nenakap Neneh. Kareb ideh nekali' Neneh, idi ideh sikal ngimet Neneh pad Ieh na necan nedeh. 43Iamo' kebala Yésus nedeh, “Ui na miak na mada' Bala luk Do' ratnan Imet Allah kuan bawang luk baken pana', ngaceku ini punneh Ui pangeh icuk Allah.” 44Idi Ieh nemada' bang ruma'-ruma' sembayang aput bawang ineh.

Currently Selected:

LUKAS 4: BLD

Highlight

Copy

Compare