LUKAS 11
11
Bada' Yésus Ratnan Sembayang
(Mat 6.9–13; 7.7–11)
1Idi bang seaco Yésus nesembayang su luk inanNeh sembayang. Kareb Ieh nugka', idi seburur anak sekola'Neh nepebala Neneh, “O Tuhan, mada' nekai ratnan sembayang, mepad kudeng Yahya nemada' anak sekola'neh.”
2Idi kebala Yésus nedeh, “Kareb muyuh sembayang, do' muyuh mala,
‘O Ama' luk bang surga:
Do' ngadanMu uen ngerayeh;
idi ImetMu uen ngacing bang tana'.
3Maré nekai akan luk petap anid-anid aco.
4Maré do' ratnan amung-amung sala'kai,
ngaceku kai pana' maré do' kuan anid-anid burur luk mesala' pa kiung kai.
Idi aleg nguit nekai amé' bang luk nutun.’ ”
5Idi kebala Yésus nan anak-anak sekola'Neh, “Idéké rat arang muyuh luk inan aceh lun rurum, idi amé' neneh kareb tangal dacem idi pebala neneh, ‘O lun rurum, maré teluh balad ruti kebitenku; 6seburur lun rurumku luk nalan pangeh numak ruma'ku, idi na luk idi anun-anun luk miak barénku kenenneh'? 7Idi lun rurumneh ineh pana' miak ngor balaneh rat bang takep, ‘Aleg ngesusa' negku, tanga'ku pangeh initek, idi anak-anakku idi denganku luun bitaranku. Ui na miak tumui maré luk kuanmu.’ 8Ui pebala nemuyuh, sagan pana' na ieh tumui maré luk kuanneh ngaceku ieh lun rurumneh, iamo' ngaceku ieh metueh mutuh, idi ieh miak tumui, idi maré kuanneh anun-anun luk pianneh. 9Idi Ui pebala nemuyuh teh: Do' mutuh, idi miak barén nemuyuh; do' nakap, idi muyuh miak ngalap; nateg tanga', idi tanga' miak kabin kuan muyuh. 10Ngaceku anid-anid lemulun luk mutuh miak ngalap; idi lemulun luk nakap miak kali', idi kuan lemulun luk nateg, tanga' ineh miak kabin. 11Taman sapehké rat arang muyuh, kudeng anakneh mutuh ruti, ieh maré batu kuanneh? Idi kudeng ieh mutuh lawid, ieh maré menipeh? 12Idi kudeng ieh mutuh terur, ieh maré menipal kara'? 13Kudeng muyuh luk dat kali' teh maré luk do' kuan anak-anak muyuh, meluun teh Taman muyuh luk bang surga sikal maré Roh Meligan kuan lemulun luk mutuh rat Neneh!”
Yésus Idi Balsebul
(Mat 12.22–30; Mrk 3.20–27)
14Idi bang seaco Yésus uned nala' aceh ada' luk mebegkeh. Kareb ada' ineh pangeh neremuat, idi lun mebegkeh ineh pana' nepebala-pebala, idi lun mula' ineh pana' mawa. 15 Iamo' inan tuda'-tuda' lemulun rat arangdeh nepebala, “Lemulun ini nala' ada' dengan lalud Balsebul, lun rayeh ada'.”
16 Idi teh inan lun baken nenutun Neneh idi nemutuh Neneh maré aceh tanu' rat surga. 17Iamo' Yésus nekali' terawédeh, idi kebalaNeh nedeh, “Anid-anid bawang luk sikal metueh sebuleng ratnan sebuleng na miak lutep; idi anid-anid tetek ruma' luk sikal metueh sebuleng ratnan sebuleng miak musag peh. 18Kudeng imet Sétan inan kedaluh arangdeh sebuleng, kudeng apehké imetneh miak tuped? Kebala muyuh, Ui nala' ada dengan lalud Balsebul. 19Iamo' kudeng Ui ini nala' ada' dengan lalud Balsebul ineh, dengan lalud idéké anak-anak muyuh nala' nedeh? Lun luk maya' nemuyuh pana' ngegala' ratnan terawé muyuh sala'! 20Na! Dengan lalud Allah Ui nala' ada dengan ticu' Allah. Ieh ineh luk ngegala' ratnan Imet Allah pangeh nacing nemuyuh.
21“Kareb lemulun luk metueh pangeh netemina' ku ayung pebunu' matar ruma'neh sebuleng, idi amung-amung binawehneh miak uen ngasa'. 22Iamo' kareb seburur luk meluun tueh macing neneh idi ngelaya' neneh, kali' rungen ieh ngalap amung-amung ayung pebunu' ineh luk inanneh merapet, idi ieh mabpat amung luk pinoneh ineh.
23 “Lemulun luk na perurum Negku, ieh ineh sikal metueh rat Negku; idi lemulun luk na ngedengan Negku ngamung, ieh ineh luk ngatad.”
Ada' Lemubed
(Mat 12.43–45)
24“Kareb ada' remuat ratnan lemulun, ieh nalan lemaba su luk na abpa', idi nakap su luk inanneh ucu'. Iamo' na luk kali'neh, idi keburi'neh, ‘Ui sikal muli' amé' ruma'ku, ieh ineh su luk pangeh ticanku atun.’ 25Idi kareb ieh macing, ieh kali' ruma' ineh pangeh inapuh idi inau' temina'. 26Muci ieh amé' idi ngalap tudu' ada' luk baken teh denganneh, ieh ineh luk meluun dat rat neneh, idi ideh semuet tudo déi'. Idi kekiped lemulun ineh meluun dat ratnan luk pun-pun.”
Awang Luk Matu
27Pangeh Yésus nepebala kudeng ineh, idi seburur decur luk arang lun mula' nengitang, keburi'neh Neneh, “Samal kuan batek luk nemali' Namu, idi iti' luk neniti' Namu!”
28Iamo' kebala Yésus, “Meluun teh, samal kuan lemulun luk ninger bala Allah idi ngimet neneh.”
Lun Mula' Mutuh Tanu'
(Mat 12.38–42)
29 Kareb lun mula' nepamung Neneh, idi Yésus nepebala kudeng ini, “Inul ini pelaba dat. Ideh nakap aceh tanu', iamo' na miak barén kuandeh tanu' luk baken, iamo' tanu' Nabi Yunus mo'. 30 Mepad kudeng Yunus mangun ku aceh tanu' kuan lun Ninewé, kudeng ineh teh Anak-lemulun mangun ku tanu' kuan inul ini. 31 Kareb Aco Ngukum raca' decur luk rat tana' pa kabing busat aco miak tumui pad-pad dengan inul ini idi ngesala' nedeh; ngaceku ieh ineh nacing rat iring tana', sikal ninger ileh Selimun; idi inan tungé seburur lemulun luk meluun rayeh ratnan Selimun. 32 Kareb Aco Ngukum lun Ninewé miak tumui pad-pad dengan inul ini idi ngesala' neneh; ngaceku ideh nuren ku bada' Yunus, idi inan tungé' seburur lemulun luk meluun rayeh ratnan Yunus.
Acang Burur
(Mat 5.15; 6.22–23)
33 “Na luk idi seburur pana' luk nutud ilu', idi ngapung ineh, idi ngakeb neneh ku gatang, iamo' ieh nganau' neneh luun dawan, pad lemulun luk semuet miak nier acang ineh. 34Idi acang bururmu, ieh ineh matehmu. Kudeng matehmu do', kali' rungen amung bururmu pana' macang. Iamo' kudeng matehmu ineh dat, kali' rungen bururmu pana' medacem peh. 35Ngaceku ineh matar do'-do' pad acang luk bang bururmu ini na medacem. 36Kudeng amung bururmu ineh macang, pad na luk idi medacem, kali' rungen amung-amungneh ineh macang, mepad kudeng ilu' ngacang namu dengan acangneh.”
Yésus Ngadu' Lun Parisi Idi Guru-Guru Ukum
(Mat 23.1–36; Mrk 12.38–40)
37Uned Yésus pebala kudeng ineh, idi seburur lun Parisi nacing nawar Neneh kuman denganneh; idi Ieh nesemuet bang ruma'neh, idi tudo kuman. 38Lun Parisi ineh mawa kareb ieh nenier Yésus na maru' ticu'Neh kareb nateh Ieh nekuman. 39Idi kebala Tuhan neneh, “O muyuh lun Parisi, luk maru' luun sangkir idi bigan, iamo' niat muyuh mepanu' ku pano' idi luk dat. 40O muyuh lun mebacé! Bakenké Allah luk nenganau' pa luun, idi lubangneh? 41Iamo' maré kuan lun masi' anun-anun luk bang sangkir idi bigan muyuh, idi luk amung-amung miak meligan kuan muyuh.
42 “Mesusa' kuan muyuh, O lun Parisi! Muyuh maré babpat pulu' ratnan bawing idi karid pét, idi amung-amung irin pana', iamo' muyuh pangeh nengelaba ukum idi awa Allah. Petulu muyuh nganau' amung ineh, iamo' aleg necan luk baken.
43“Mesusa' kuan muyuh, O lun Parisi! Muyuh sikal tudo luun kerusi luk inan ubur bang ruma' sembayang, idi muyuh sikal buren lemulun déi' kadai. 44Mesusa' kuan muyuh! Muyuh mepad kudeng tanem luk na melagan, idi lemulun luk nalan pa luunneh na kali' neneh.”
45Idi kebala seburur guru Ukum Neneh, “O Guru, dengan bala luk kudeng ineh Iko ngedat nekai teh.”
46Idi kebala Yésus, “Mesusa' kuan muyuh teh, O guru-guru Ukum! Muyuh ngerareng pa luun lemulun babeh luk meberat idi luk mikat baben, iamo' muyuh sebuleng dengan sebuleng bua' ticu' muyuh pana' na sikal ngakem babeh ineh. 47Mesusa' kuan muyuh ngaceku muyuh nganau' tanem nabi-nabi, iamo' tepun muyuh nengaté nedeh. 48Muyuh sebuleng ngamo ratnan muyuh na dat niat ku kekamen tepun muyuh ineh, ngaceku ideh luk ngaté nabi-nabi, idi muyuh luk nganau' tanemdeh. 49Ngaceku ineh teh Ileh Allah nepebala, ‘Ui ngecuk nabi-nabi idi lun duken kuandeh, idi sebuangdeh miak pitayen, idi sebuangdeh miak uendeh ngedereh.’ 50Idi inul luk bang kareb ini miak kumin ngaceku até amung nabi luk pinaté rat pun tana' ini pinudut, 51ieh ineh ngimun ratnan até Abil macing inan até' Sekaria luk pangeh pinaté arang bubpun idi Su luk Meligan. Meluun teh, Ui pebala nemuyuh, idi inul bang kareb ini miak kumin ngaceku amung atédeh ineh.
52“Mesusa' kuan muyuh, O guru-guru Ukum! Taka luk ku ngukab ruma' ileh dinug muyuh. Muyuh sebuleng na semuet, idi muyuh mebpeng lemulun luk sikal semuet.”
53Kareb Yésus neremuat rat déi', idi guru-guru Ukum idi lun Parisi ineh pana', nengimun ngedat Neneh, idi nengitun Neneh ratnan tuda'-tuda' itun, 54idi nganét Neneh, sikal nganau' abpung kuanNeh, pad ideh miak ngesala' balaNeh.
Currently Selected:
LUKAS 11: BLD
Highlight
Share
Copy
Want to have your highlights saved across all your devices? Sign up or sign in
BALA LUK DO' Lun Bawang Bible © The Bible Society of Malaysia 1982, Second Edition 1998.