LUKAS 1

Luk Pun-Pun

1Kuan kinanakku Téopilus:

Mula' lemulun pangeh nenutun ngayud bala ratnan luk pangeh mangun arang kai. 2Ideh nengayud kuan kai ratnan luk bila lemulun luk nekali' kekamen ineh rat pun-pun idi luk nemada' bala ineh. 3Idi ui ini luk pangeh nengelio do'-do' amung bala ini rat pun-punneh, sikal ngayud kuanmu bala luk petulu, O Téopilus luk buren, 4pad iko miak kali' luk matu ratnan amung-amung bala luk bida' kuanmu.

Melaikat Mada' Ratnan Yahya Luk Ngerereb Kareb Nateh Ieh Tinganak

5 # 1 In 24.10 Kareb Raca' Herodés ngimet bawang Israil, idi inan aceh imam, ngadanneh Sekaria, luk ratnan babpat Abia. Idi ngadan awanneh ineh Elisabet. Idi ieh pana' inul imam. 6Idi didueh ineh lemulun luk matu pa kiung Allah, idi maya' amung-amung bala idi ukum Tuhan dengan na sala'. 7Iamo' didueh na anak, ngaceku Elisabet ineh aceh decur luk na anak, idi didueh pana' pangeh mengered.

8Kareb Sekaria uned ngakem bang kekamen imam pa kiung Allah maya' luk inanneh pekalai, 9idi ieh nekaneh udi, maya' adat imam, pad ieh semuet bang Ruma' Allah ngeseb umau luk do' buen ineh. 10Idi lun mula' sembayang déi' liang kareb ngeseb umau luk do' buen ineh. 11Idi seburur melaikat Tuhan nesilagan kuan Sekaria; ieh tuped pa tinueh su luk inan bubpun luk inan ngeseb umau luk do' buen ineh. 12Idi Sekaria pana' negagap nenier neneh, idi ieh pelaba tot. 13Iamo' kebala melaikat neneh, “Aleg matot, O Sekaria, Allah pangeh neninger putuhmu, idi awanmu Elisabet ineh miak nenganak aceh anak deléi kuanmu. Idi do' iko nganau' ngadanneh Yahya. 14Idi miak mangun kuanmu awang niat idi geriguen teh. Idi mula' lemulun miak mawang niat ngaceku ratnan acingneh, 15#Iap 6.3 ngaceku ieh miak mangun rayeh pa kiung Tuhan. Idi na ieh miak ngirup abpa' anggur idi luk rupen luk dat, idi ieh miak mepanu' ku Roh Meligan rat bang batek tinanneh. 16Idi ieh miak nguli' mula' lun pupu Israil amé' inan Allah Tuhandeh ineh. 17#Mal 4.5–6 Ieh miak nalan pa kiung Tuhan dengan roh idi lalud Elia. Ieh miak nguit taman-taman idi anak-anakdeh pedo', idi lun luk ngelaba bala uenneh ngelubed kuan terawé lemulun luk matu, pad ieh nganau' temina' aceh pupu kuan Tuhan.”

18Idi keburi' Sekaria kuan melaikat ineh, “Kudeng apehké ui miak kali' kudeng ini matu? Ngaceku ui mengered, idi awanku pana' pelaba ngered teh.”

19 # Dan 8.16; 9.21 Idi kebala melaikat neneh, “Ui ini Gabriel luk tuped pa kiung Allah. Ui pangeh icuk pebala namu idi ngacing bala luk do' ini. 20Iamo' iko na manu ku balaku luk miak uen ngacing bang kareb luk petulu. Ngaceku iko na manu, iko mebegkeh idi na miak peburi' pad macing aco jani'ku mangun.”

21Idi lun mula' ineh nganét-nganét ni Sekaria. Ideh pelaba awa ngaceku ieh mio bang Ruma' Allah. 22Kareb ieh neremuat, idi na ieh miak pebala kuan lemulun ineh. Idi ideh nekali' Sekaria ineh pangeh nenier aceh luk sinierneh bang Ruma' Allah. Idi ieh nemada' nedeh dengan ticu'neh ngaceku ieh mebegkeh peh.

23Kareb aco kekamenneh bang Ruma' Allah petap, idi ieh nuli'. 24Muci ratnan ineh idi awanneh Elisabet mali' idi ieh na mepai limeh bulan kinioneh, kebalaneh, 25“Nekini Tuhan pangeh nengedengan negku kudeng ini. Ieh pangeh nenala' igu'ku pa kiung lemulun.”

Melaikat Mada' Ratnan Tuhan Yésus Kareb Nateh Ieh Tinganak

26Kareb Elisabet mali' pangeh anem bulan, melaikat Gabriel ineh icuk Allah amé' inan aceh bawang déi' Galilia luk titen Nasarét. 27#Mat 1.18 Ieh nenguit bala kuan seburur anak decur luk pun mebaruh, luk petuduk dengan seburur deléi ngadanneh Yusup, ratnan inul Daud. Idi ngadan decur ineh Mariam. 28Melaikat ineh iné' neneh, kebalaneh, “Awang kuanmu! Tuhan idi denganmu, idi pangeh nengeperuan namu.”

29Mariam negagap ku bala ineh; idi ieh nengerawé ratnan ilungneh. 30Idi kebala melaikat neneh, “O Mariam, aleg matot! Iko pangeh nengalap katu ratnan Allah. 31#Mat 1.21 Iko miak mali', idi nenganak aceh anak deléi, idi do' iko nganau' ngadanNeh Yésus. 32#2 Sem 7.12, 13, 16; Yes 9.7 Ieh miak mangun rayeh, idi Ieh miak belén Anak Allah luk Meluun Dita'. Idi Allah Tuhan tau miak maré kuanNeh imet tepunNeh Daud, 33Ieh miak mangun ku raca' kuan inul Yakub macing ruked-ruked; idi ImetNeh ineh na miak mabud!”

34Idi kebala Mariam nan melaikat ineh, “Kudeng apehké amung ini miak mangun, ngaceku ui nateh nekali' deléi'?”

35Idi kebala melaikat ineh, “Roh Meligan miak temurun luunmu, idi lalud Allah miak nucung namu. Ngaceku ineh anak luk meligan ineh miak tetanen Anak Allah. 36Ngerawé pupumu Elisabet ineh. Kebaladeh, ieh na miak inan anak; iamo' ieh mali' pangeh anem bulan, sagan tu pana' ieh mengered. 37#Pud 18.14 Ngaceku na luk idi anun-anun luk na miak ruen Allah.”

38Idi kebala Mariam neneh, “Ui ini demulun Tuhan; do' nganau' kuanku maya' kudeng luk bilamu.” Idi melaikat ineh neburo rat iringneh.

Mariam Ngikak Elisabet

39Muci ratnan ineh Mariam netemina'. Idi ieh iné' inan pegkung, ieh ineh aceh bawang déi' tana' Yudia. 40Ieh numak ruma' Sekaria, idi nemaré tabi' ni Elisabet. 41Kareb Elisabet neninger tabi' Mariam ineh, idi anak luk bang nakanneh ineh pana' nesigio, idi Elisabet pana' nepanu' ku Roh Meligan. 42Idi ieh nengitang kebalaneh, “Iko luk inan samal rat arang amung-amung decur, idi samal kuan anak luk uenmu nenganak ineh. 43Kudeng apehké peruan ini mangun kuanku, pad tinan Tuhanku iné' ngikak negku? 44Ngaceku kareb ui neninger tabi'mu ineh anak luk bang nakanku pana' nesigio ngaceku awang niatneh. 45Samal kuanmu luk pangeh nemanu ineh, ngaceku anun-anun luk bila namu ratnan Tuhan miak mangun peh.”

Mariam Menani Ngubur Tuhan

46 # 1 Sem 2.1–10 Idi kebala Mariam,

“Niatku ngerayeh Tuhan,

47idi rohku do' ria inan Allah Lun Nengulun negku,

48ngaceku Ieh pangeh nekali' ratnan beneh demulunNeh!

Idi rat pad kareb ini amung inul miak mala ui luk inan samal,

49ngaceku Luk Meluun Lalud pangeh nenganau' aceh kekamen luk rayeh kuanku.

NgadanNeh ineh meligan,

50idi éi'Neh lutep kuan anid-anid inul luk matot Neneh.

51Ieh nenatang ticu'Neh luk melalud

idi nengatad lemulun luk medita' niat dengan amung terawédeh.

52Ieh nengebeneh raca'-raca' ratnan kerusi imetdeh,

idi nengedita' lemulun luk mebeneh.

53Lemulun luk melau binorNeh ku luk do',

idi lemulun luk lun do' icukNeh buro dengan na uang.

54Ieh nengedengan pupu Israil, demulunNeh,

ngaceku Ieh ngerawé éi'Neh,

55 # Pud 17.7 maya' kudeng luk bilaNeh kuan Ibrahim

idi kuan inulneh macing ruked-ruked peh.”

56Idi Mariam netudo dengan Elisabet lélé teluh bulan kinioneh, idi ieh nuli'.

Yahya Luk Ngerereb Tinganak

57Idi mabud bulan Elisabet miak nenganak, idi ieh nenganak aceh anak deléi. 58Idi lun bang bawangneh idi pupuneh neninger idi Tuhan pelaba éi' neneh; idi ideh pana' mawang niat denganneh.

59 # Uk 12.3 Idi aco luk kewaluh idi selemulun nacing nunat anak ineh, idi sikal nganau' ngadanneh Sekaria maya' ngadan tamanneh. 60Iamo' kebala tinanneh, “Na! Ngadanneh Yahya.”

61Iamo' keburi'deh neneh, “Na luk idi seburur pana' rat arang pupumu luk kudeng ini ngadan!” 62Idi ideh nengitun tamanneh dengan makai ticu', idé ngadanneh luk pianneh ku ngadan anak ineh.

63Sekaria nemutuh aceh bangar luk inan ngayud, idi ieh nengayud kudeng ini, “Ngadanneh Yahya.” Idi amungdeh ineh pana' mawa. 64Idi petacu Sekaria miak peburi', idi ieh nengimun ngubur Allah. 65Idi lun bang bawang ineh pelaba tot. Idi bala ratnan ineh nepiar aput pegkung tana' Yudia. 66Idi amung lemulun luk neninger ineh nengerawé idi nengitun, kebaladeh, “Anunké miak mangun kuan anak ini?” Ngaceku lalud Tuhan idi neneh.

Bada' Luk Biré Kuan Sekaria

67Idi Sekaria taman Yahya nepanu' ku Roh Meligan idi ieh nemada' bala luk biré Allah, kebalaneh,

68“Do' tau ngubur Tuhan Allah lun Israil!

Ieh iné' ngedengan pupuNeh,

pad Ieh nemuit nedeh.

69Ieh nemaré aceh Lun Nengulun luk melalud kuan tau,

ieh ineh inul demulunNeh Daud.

70Mon Ieh nepebala dengan tang nabi-nabiNeh luk meligan:

71Ieh nepejani' muit netau ratnan bunu' tau,

idi ratnan lalud lemulun luk megateh netau.

72Ieh nepejani' ngegala' éi'Neh kuan tepun tau,

idi ngerawé pejani'Neh luk meligan.

73-74Ieh nepejani' kuan tepun tau Ibrahim

idi nepebulung pad muit netau ratnan bunu' tau

pelé tau sembayang Neneh dengan na matot:

75pad tau meligan idi matu pa kiungNeh

ruked-ruked ulun tau.

76 # Mal 3.1 “Iko ini, O anakku miak tetanen seburur nabi Allah luk Meluun Dita'.

Iko miak nalan pa atun Allah

pad nganau' temina' dalanNeh,

77pelé mada' pupuNeh ratnan ideh miak uen ngulun

pad ideh ngalap do' ratnan sala'deh.

78Allah tau mawa idi méi'.

Ieh ngacing rasat ulun kuan tau,

79 # Yes 9.2 rat surga Ieh ngacang lemulun luk tudo bang lungung até luk medacem,

idi nguyut netau amé' inan dalan awang.”

80Idi anak ineh pana' netemubu' idi iuk-iuk amé' rayeh rohneh. Idi ieh netudo déi' su luk ali-ali pad macing kareb ieh nengegala' bururneh kuan lun Israil.

Currently Selected:

LUKAS 1: BLD

Highlight

Copy

Compare