YEREMIA 50
50
Tabpa Babil
1 #
Yes 13.1—14.23; 47.1–15 Kebala Tuhan ni Nabi Yeremia ratnan Babil idi pupuneh.
2“Mada' bala ini kuan amung pupu!
Nateg tawak, idi maré kali'!
Aleg ngalum ineh!
Babil pangeh netabpa!
Akangneh Marduk pangeh nebila'!
Idi amung akang Babil pangeh inigu'.
Amung akang luk inan megani' pangeh inusag!
3“Aceh pupu rat pa tinueh busat aco pangeh iné' munu' Babil, pad ieh mangun ku su luk ali-ali. Lemulun idi pung pana' miak buro, pad seburur pana' nateh luk mulun su ineh.”
Israil Muli'
4Kebala Tuhan, “Kareb ineh lun Israil idi lun Yahuda miak amé' nakap Negku luk Allahdeh dengan nangi'. 5Ideh miak ngitun dalan amé' Sion idi maya' dalan ineh. Ideh miak nganau' aceh pejani' luk meruked dengan Tuhan luk na miak labéndeh.
6“PupuKu mepad kudeng dumba luk neraruh, luk rinaruh lun luk matar nedeh luun pegkung. Ideh pangeh nenalan mepad kudeng dumba, rat aceh pegkung amé' luun pegkung baken. Idi ideh pangeh nekelupan libungdeh. 7Amung lemulun luk kali' nedeh ngaté nedeh. Idi kebala bunu'deh, ‘Ideh pangeh nenganau' sala' pa kiung Tuhan. Ngaceku ineh na kai mesala'. Tepundeh pangeh merapet inan Tuhan, idi petulu ideh lutep maya' Neneh.’
8 #
Lin 18.4
“O Lun Israil, buro rat Babil! Necan bawang ineh! Do' muyuh buro atun! 9Ui miak ngegio tuda'-tuda' pupu rat pa tinueh busat aco, pad ideh amé' munu' Babil. Ideh miak ngerieng bawang ineh idi ngalap neneh. Ideh miak mayung ku busudeh mepad kudeng lun nganup luk mileh mayung. 10Babil miak uen ngaro. Idi lemulun luk ngaro neneh miak ngalap anun-anun luk piandeh. Ui ini Tuhan pangeh nepebala.
Bawang Babil Metabpa
11“O Lun Babil, muyuh nengaro bawang pupuKu. Sagan tu pana' iko mawang niat idi do' ria', idi nalan mepad kudeng sapi' luk rumik padé, idi kudeng kuda luk muni, 12bawangmu ineh miak uen ngigu' idi uen ngebeneh. Babil miak mangun ku bawang luk isuut tu-tu, ieh ineh su luk ali-ali luk na abpa'. 13Ngaceku usehKu, seburur pana' nateh luk tudo déi' Babil. Ieh miak uen ngusag. Amung lemulun luk lemaba miak megagap idi mawa ku luk pangeh nangun kuanneh.
14“O muyuh lun luk mileh mayung ku busu, do' muyuh temina' ngerieng bawang Babil idi ngelibut neneh. Mayung busu muyuh nelun Babil, ngaceku ieh pangeh nenganau' sala' pa kiungKu luk Tuhan 15Ngitang-ngitang libut-libut bawang ineh! Nekini Babil pangeh melaya'. Libung batuneh pangeh nekusag. Ui ini Tuhan ngua' nelun Babil. Do' muyuh pana' ngua' nedeh, idi nganau' kuandeh mepad kudeng luk pangeh inau'deh kuan lun baken. 16Aleg nima' padé uen nibu déi' Babil, idi aleg nima' lemulun ngeranih su ineh. Amung lun sakai luk tudo déi' miak matot baweh luk ngerieng nedeh ineh, pad ideh muli'.”
Israil Muli'
17Kebala Tuhan, “Lun Israil mepad kudeng dumba luk uen balang ngerada' idi ngatad. Pun-pun ideh binunu' raca' Asur, idi pangeh ineh Nebukadnesar raca' Babil ngim tulangdeh. 18Ngaceku ineh Ui ini, Tuhan luk Melalud, Allah lun Israil, miak ngukum Nebukadnesar idi bawangneh, mepad kudeng Ui nengukum raca' Asur. 19Ui miak nguit nelun Israil muli' amé' bawangdeh. Ideh miak kuman nuba' luun Pegkung Karmel idi bang babpat Basan. Idi ideh miak kuman amung luk piandeh déi' Epraim idi Giliad. 20Kareb ineh, na miak kali' sala' arang lun Israil, idi na luk dat arang lun Yahuda pana', ngaceku Ui miak maré do' kuan lemulun luk siménKu mulun. Ui ini Tuhan pangeh nepebala.”
Ukum Allah Kuan Babil
21Kebala Tuhan, “Do' munu' lemulun déi' Merataim idi Pekod. Do' ngaté nedeh. Do' nganau' amung luk dukenKu nemuyuh. Ui ini Tuhan pangeh nepebala. 22Uni lun pebunu' pedingeren bang bawang ngaceku inan usag luk rayeh. 23Babil pangeh nenecat amung tana' ini, idi nekini tuno ineh pangeh neputul. Amung-amung pupu megagap nier luk pangeh nangun kuan Babil. 24O Babil, iko pangeh nekaneh abpung luk inau'Ku kuanmu, sagan tu pana' iko na kali'. Iko pangeh kikemdeh, ngaceku iko sikal metueh rat Negku. 25Ui pangeh nengukab su luk inanKu nganug busuKu, idi dengan usehKu Ui pangeh nengalap busu ineh ngaceku Ui ini, Tuhan luk Melalud, inan luk ruenKu déi' Babil. 26Do' munu' Babil rat selipa idi rat pa selipa, idi ngaro lepo padédeh. Ngamung amung binaweh luk ruen muyuh ngaro mepad kudeng aceh bubpun padé. Do' ngusag bawang ineh idi aleg necan anun-anun pana'. 27Ngaté amung lundeh luk pebunu'! Ngaté nedeh, idi aleg méi' nelun Babil! Tarekneh pangeh macing kareb ideh miak kumin!”
28(Lun luk neburo rat Babil iné' Sion, idi nemada' ratnan kudeng apeh Tuhan Allah tau nengua' luk inau' lun Babil kuan Ruma'Neh.)
29 #
Lin 18.6
“Do' ngecuk nelun luk mileh mayung ku busu amé' munu' Babil. Idi teh ngecuk amung-amung lemulun luk mileh mayung ku busu amé' ngelibut bawang ineh, idi aleg nima' seburur pana' buro. Do' ngua' amung-amung luk pangeh inau'neh. Idi nganau' kuanneh, mepad kudeng luk inau'neh kuan lun baken. Ngaceku dengan medita' niat ieh sikal metueh rat Negku, ieh ineh Tuhan lun Israil luk Meligan. 30Idi amung anak adi' deléi miak pitayen luun dalan bawang ineh, idi amung bawehneh miak uen ngaté bang aco sineh. Ui ini Tuhan pangeh nepebala.
31“O Babil, iko pelaba dita' niat. Ngaceku ineh, Ui ini, Tuhan luk Melalud, sikal metueh rat namu. Tarekneh pangeh nacing kareb iko miak kumin. 32Pupumu luk medita' niat miak metebaceng idi meluka', idi seburur pana' nateh luk miak ngiding namu. Ui miak ngeseb amung bawangmu, idi teh amung luk libut-libutmu miak uen ngusag.”
33Kebala Tuhan luk Melalud, “Amung lun Israil idi lun Yahuda pangeh pidereh. Amung-amung lun luk nenaban nedeh matar nedeh do'-do' idi na sikal muit nedeh. 34Iamo' Lun luk pian muit nedeh ineh metueh — idi ngadanNeh, ieh ineh Tuhan luk Melalud. Ieh luk miak ngedengan nedeh idi nguit tana' ini pedo', iamo' Ieh miak ngacing susa' kuan lun Babil.”
35Kebala Tuhan,
“Até kuan Babil!
Até kuan pupuneh,
idi kuan lun rayeh idi lun mileh pana'.
36Até kuan nabi-nabineh luk mebalih —
ideh pelaba bacé.
Até kuan bawehneh —
ideh pelaba tot.
37Ngaté kudaneh idi ngusag kerétaneh!
Ngaté nelun pebunu' luk ngalap tabpar pana' —
ideh pelaba laya'!
Ngusag amung binawehneh;
idi ngaro neneh.
38Ngacing rikan kuan bawangneh,
pad abpa'neh mekeket.
Babil ineh aceh bawang luk mepanu' ku akang luk dat
luk naluk nelun Babil.
39 #
Lin 18.2
“Ngaceku ineh, Babil mangun ku su luk mula' ada' idi suit luk melutak. Idi muci na lemulun miak mulun ieneh, macing ruked-ruked. 40#Pud 19.24–25 Mepad kudeng luk inau'Ku kuan Sodom, Gemora, idi bawang luk muneng ku bawang ineh, kareb Ui nengusag nedeh, kudeng ineh teh luk miak ruenKu kuan Babil. Seburur pana' nateh luk miak mulun su ineh, segageh pana' nateh. Ui ini Tuhan pangeh nepebala.
41“Aceh pupu macing rat bawang luk pa tinueh busat aco,
ieh ineh aceh bawang luk melalud rat mado luk temina' pebunu'.
42Ideh pangeh nengalap busu idi pelapetdeh.
Ideh mesangit idi na mileh méi'.
Uni bawehdeh mepad kudeng beri abpa' rayeh
kareb ideh nalan maya' kudadeh.
Ideh temina' munu' nelun Babil.”
43Kareb raca' Babil neninger bala ineh,
idi ticu'neh melaya'.
Idi ieh pelaba susa'
mepad kudeng seburur decur luk mét nenganak.
44“Ui ini Tuhan miak remuat rat bang pulung tangeb Abpa' Yarden idi nalan luun laman. Idi Ui miak nganau' nelun Babil denak-denak buro rat bang bawangdeh. Idi lun luk pilinKu miak ngimet bawang ineh. Idéké luk mepad Negku? Idéké luk sikal metueh rat Negku? Iapehké lun rayeh luk metueh rat Negku? 45Do' ninger balaKu ratnan bawang Babil, idi luk ruenKu kuan pupuneh. Anak-anakdeh pana' miak tebanen, pad amung lemulun miak megagap. 46Kareb Babil metabpa, unineh miak nganau' tana' meruyuh, idi arod lemulun miak pedingeren amung pupu baken.”
Currently Selected:
YEREMIA 50: BLD
Highlight
Copy
Compare
Share
Want to have your highlights saved across all your devices? Sign up or sign in
BALA LUK DO' Lun Bawang Bible © The Bible Society of Malaysia 1982, Second Edition 1998.
