YEREMIA 39
39
Tabpa Yerusalim
1Bang bulan pulu', lak luk keiwa' kareb Raca' Sedekia ngimet Yahuda, idi Nebukadnesar, raca' Babil nacing dengan amung bawehneh idi nengerieng Yerusalim. 2Idi iwa' aco bulan apat bang lak luk kepulu' aceh, kareb Raca' Sedekia ngimet, idi amung libung bawang netabpa.
3(Kareb Yerusalim pangeh linaya', idi amung lun rayeh raca' Babil iné' tuped munung Tanga' luk Uned, ieh ineh Neregal Sareser, Samgar Nebo, Sarsekim, idi teh Neregal Sareser luk baken teh.)
4Kareb Sedekia, raca' Yahuda idi amung bunu'neh nekali' luk pangeh nangun, idi ideh nenutun buro rat bang bawang Yerusalim kareb medacem. Ideh nenalan rat kabun raca' maya' tanga' luk titen Arang Dueh Alad. Idi ideh neburo amé' matun Raked Yarden. 5Iamo' baweh lun Babil nengerada' nedeh, idi nengakem ni Sedekia luun raked luk muneng ku Yeriko. Idi ideh nenaban neneh idi nemaré neneh bang palad Raca' Nebukadnesar luk déi' Ribla luk bang bawang Hamat, idi Nebukadnesar nengukum neneh déi'. 6Déi' Ribla raca' Babil nengecuk nelun ngaté anak-anak Sedekia su siren Sedekia. Idi teh ideh nengecuk nelun ngaté amung lun rayeh Yahuda. 7Idi ieh nengecuk nelun nakul mateh Sedekia, idi ngaling neneh pad ieh iten amé' Babil. 8Idi teh lun Babil nengeseb ruma' raca' idi ruma'-ruma' lun mula'. Idi ideh nengusag amung libung batu Yerusalim. 9Kekipedneh, Nebusaradan, lun rayeh baweh nenaban lemulun luk neketecan bang bawang ineh amé' Babil, dengan lemulun luk pangeh neperurum neneh. 10Ieh nenecan bang bawang Yahuda tuda'-tuda' burur lun masi' luk na tana'. Idi ieh nemaré kabun anggur idi lati' kuandeh.
Yeremia Pinuit
11Iamo' Nebukadnesar, raca' Babil nengecuk Nebusaradan, lun rayeh baweh maré kali' ratnan Yeremia kudeng ini: 12“Amé' ngalap ni Yeremia idi ngasa' neneh. Aleg ngedereh neneh, iamo' nganau' anun-anun luk pianneh.” 13Idi Nebusaradan dengan Pengulu Nebusasban idi Pengulu Neregal Sareser idi amung lun rayeh raca' Babil luk baken, 14nenawar ni Yeremia idi nengecuk nelun nguit neneh ratnan natad ineh. Idi ideh nengecuk Gedalia anak Ahikam Sapan matar neneh, pad ieh muli' dengan do'. Idi Yeremia neketecan dei' arang pupuneh sebuleng.
Rapet Kuan Ebed Melek
15Tuhan nepebala ni Yeremia kareb ieh tinutup luun natad ineh. KebalaNeh, 16“Do' amé' mada' ni Ebed Melek lun Sudan ineh luk bila Tuhan luk Melalud, Allah lun Israil, kebalaNeh, ‘Ui ngacing susa' kuan bawang ini idi baken peruan, maya' kudeng luk bilaKu. Idi kareb amung ini mangun, iko idi su ineh pad iko nier ineh. 17Iamo' Ui ini Tuhan miak matar namu, pad iko na barén bang palad lemulun luk inanmu matot. 18Ui miak matar namu pad iko na pitayen. Iko miak mulun, ngaceku iko merapet Negku. Ui ini Tuhan pangeh nepebala.’ ”
Currently Selected:
YEREMIA 39: BLD
Highlight
Copy
Compare
Share
Want to have your highlights saved across all your devices? Sign up or sign in
BALA LUK DO' Lun Bawang Bible © The Bible Society of Malaysia 1982, Second Edition 1998.
